1. ¿Mbaʼe mbaʼépa Jehová ohecha ipuévlore?

ÑANDEJÁRA JEHOVÁ ningo ‘ohayhu ipuévlope’ (2 Crón. 2:11). ¡Ajépa javyʼaite upévare! Jehová ohecha umi kualida porã jarekóva ha umi mbaʼe ikatúva jajapo, ha haʼe voi ñanemoag̃ui ijehe. Ñande jasegíramo ñandefiél chupe haʼe oĩta ñande ykére pára siémpre (Juan 6:44).

2. ¿Mbaʼérepa algúnope ijetuʼu oguerovia hag̃ua Jehová ohayhuha chupe?

² Ikatu oĩ opensáva: “Che ningo aikuaa Jehová ohayhuha ipuévlope, ¿péro mbaʼéicha ikatu aĩ segúro Jehová cherayhuha chéve?”. ¿Mbaʼérepa oĩ ermáno opensáva upéicha? Peteĩ ermána hérava Oksana * ohasa asyeterei vaʼekue imitãme ojejapo rupi hese heta mbaʼe vai. Haʼe omombeʼu: “Che avyʼaiterei vaʼekue ajevautisárõ guare ha añepyrũ che prekursorádo. Péro 15 áño haguépe añepyrũ chemanduʼapaite jey umi mbaʼe vaiete ahasa vaʼekuére chemitãme. Upévare apensa Jehová ndacheguerohoryveimaha ha namereseiha voi haʼe cherayhu”. Peteĩ prekursóra hérava Yua ohasa vaʼekue avei heta mbaʼe ijetuʼúva imitãme, haʼe heʼi: “Che ningo añemeʼẽ vaʼekue Jehovápe ambovyʼaségui chupe, péro aĩ vaʼekue segúra haʼe ndaikatumoʼãiha voínte cherayhu”.

3. ¿Mbaʼépa jahecháta ko artíkulope?

³ Katuete oiméne nde avei rehayhueterei Jehovápe, péro sapyʼánte reduda haʼe nderayhuha ndéve, oikoháicha koʼã mokõi ermánare. ¿Mbaʼérepa tekotevẽ reime segúro Jehová añetehápe ojepyʼapyha nderehe? ¿Ha mbaʼépa nepytyvõta repensa jave Jehová nanderayhuiha? Ko artíkulope oñembohovái koʼã porandu.

4. ¿Mbaʼérepa ipeligróso jadudáramo Jehová ñanderayhuha?

⁴ Ñande ñaĩramo segúro Jehová ñanderayhuha, jajaposéta opa ikatúva iservísiope, jahasáramo jepe umi mbaʼe ijetuʼúva ñande rekovépe. Péro jadudáramo Ñandejára ojepyʼapyha ñanderehe ‘ndajarekomoʼãi fuérsa’ (Prov. 24:10). Ñañedesanimáramo ha ñapensa Ñandejára nañanderayhuiha, ndaikatumoʼãi ñandepuʼaka Satanásre ñandeataka jave (Efes. 6:16).

5. ¿Mbaʼépa oiko umi opensávagui Ñandejára ndohayhuiha chupekuéra?

⁵ Oĩ umi ermáno ha ermána oñepyrũ vaʼekue opensa Jehová ndohayhúi ha ndojepyʼapyiha hesekuéra, upéicha rupi ou ijerovia kangy hikuái. Peteĩ ansiáno hérava James heʼi: “Che ambaʼapo Betélpe ha igustoiterei chéve aservi peteĩ kongregasión oĩvape ótro idiómape. Upéicharõ jepe, naiméi vaʼekue segúro Jehová ovyʼaha chereheve, ha oguerohoryha umi mbaʼe ajapóva. Ha peteĩ moméntope aju voi aduda ohendúne hag̃ua umi che ñemboʼe”. Eva oservíva avei Betélpe heʼi: “Che ahechakuaa ipeligrosoitereiha jadudáramo Jehová ñanderayhuha, pórke upéva oafekta opa mbaʼe jajapóva iservísiope. Upéi ndajajaposevéima mbaʼeve Ñandejárape g̃uarã, ha ndajavyʼavéima iservísiope”. Michael, peteĩ prekursór rregulár ha ansiáno heʼi: “Ndajagueroviáiramo Ñandejára ojepyʼapyha ñanderehe ñañemomombyrýta chugui”.

6. ¿Mbaʼépa jajapo vaʼerã ñañepyrũ jave ñapensa Ñandejára nañanderayhuiha?

⁶ Koʼã experiénsia ohechauka mbaʼeichaitépa ipeligróso ñande jeroviápe g̃uarã ñapensáramo Jehová nañanderayhuiha. ¿Péro mbaʼépa ikatu jajapo ñañepyrũ jave ñapensa upéicha? Pyaʼe porã jaipeʼaite vaʼerã upéva ñane akãgui, ha jajerure Jehovápe tomeʼẽ ñandéve ‘ipyʼaguapy oñangarekótava ñane korasõre ha umi mbaʼe ñapensávare’. Péicha ndajaikomoʼãvéima ñañekevranta umívare (Sal. 139:23; Filip. 4:6, 7). Ha ñanemanduʼa vaʼerã ndahaʼeiha ñande añónte la ñañeñandúva upéicha. Oĩ heta ermáno ha ermána ifiélva ombohováiva avei koʼã mbaʼe, ha Jehová siervokuéra yma guare jepe oñeñandu vaʼekue upéicha. Jahechamína mbaʼépa ikatu ñaaprende apóstol Pablo ehémplogui.

7. ¿Mbaʼe mbaʼe ijetuʼúvapa ombohovái vaʼekue Pablo?

⁷ ¿Ndépa sapyʼánte eñandu erekomaha hetaiterei rresponsavilida, ha ijetuʼuha ndéve ekumplipa hag̃ua umíva? Oiméramo upéicha,  rentende porãitereíta apóstol Páblope. Haʼe ningo ojepyʼapy vaʼekue ndahaʼéi peteĩ kongregasiónrente, síno “entéro umi kongregasiónre” (2 Cor. 11:23-28). ¿Ndépa nderasykatu hína ha upéicha rupi reñedesanima ha nderevyʼavéi jepi? Pablo ningo heta ohasa asy vaʼekue pórke oreko ‘peteĩ ñuatĩ oikutúva chupe hetépe’. Oime vaʼerãngo upéva peteĩ mbaʼasy rakaʼe, ha haʼe okuerase asy vaʼekue chugui (2 Cor. 12:7-10). ¿Ndépa sapyʼánte reñedesanima neimperfékto haguére? Páblore sapyʼánte oiko vaʼekue upéva. Haʼe heʼi vaʼekue voi ijehe: “¡Ivaietépa ko che situasión!”, pórke kontinuadoite oñehaʼã vaʼerã kuri ojapo hag̃ua iporãva (Rom. 7:21-24).

8. ¿Mbaʼépa oipytyvõ vaʼekue Páblope ogueropuʼaka hag̃ua iprovlemakuéra?

⁸ Pablo ombohováiramo jepe entéro koʼã mbaʼe ijetuʼuetéva, haʼe osegi vaʼekue oservi Jehovápe. ¿Mbaʼéicha rupípa haʼe imbarete vaʼekue ogueropuʼaka hag̃ua koʼã mbaʼe? Pablo oikuaa porãitereíramo jepe umi idefektokuéra, haʼe ojerovia vaʼekue ipyʼaite guive pe rreskátere. Haʼe oikuaa porã Jesús opromete hague: “Entéro umi ohechaukáva ojeroviaha [cherehe] ikatúta oikove pára siémpre” (Juan 3:16; Rom. 6:23). Jahechaháicha, Pablo ojerovia vaʼekue pe rreskátere. Haʼe oĩ vaʼekue segúro Jehová operdonasetereiha umi oñarrepentívape, ivaietereíramo jepe upe ojapo vaʼekue (Sal. 86:5).

9. ¿Mbaʼépa ñaaprende umi mbaʼe Pablo heʼi vaʼekuégui Gálatas 2:20-pe?

⁹ ¿Mbaʼépa oipytyvõ vaʼekue avei Páblope osegi hag̃ua oservi Jehovápe? Haʼe ojerovia vaʼekue Jehová ohayhuetereiha chupe, ha oĩ vaʼekue segúro upévagui pórke oikuaa Haʼe ombou hague Jesúspe omano hag̃ua hesehápe. Jahechamína mbaʼépa Pablo heʼi vaʼekue Ñandejára Raʼýre: “Haʼe ningo cherayhu ha omeʼẽ kuri hekove cherehehápe” (elee Gálatas 2:20). Pablo nopensái vaʼekue haʼe iñañaitereiha Ñandejára ndaikatúi hag̃uáicha ohayhu chupe. Haʼe ndeʼíri vaʼekue: “Chéngo antende mbaʼérepa Jehová ohayhu umi che ermanokuérape, péro aniche vaʼerã la chéve cherayhu”. Upéva rangue, haʼe omomanduʼa vaʼekue umi rrománope: “Cristo omano ñanderehehápe ñande pekadór aja gueteri” (Rom. 5:8). ¡Ndaipóri ningo mbaʼeve ojoko vaʼerã Ñandejárape ñanderayhu hag̃ua!

10. ¿Mbaʼépa ñaaprende Romanos 8:38, 39 heʼívagui?

¹⁰ (Elee Romanos 8:38, 39). Pablo ningo oikuaa vaʼekue mbaʼeichaite pevépa imbarete Ñandejára mborayhu. Haʼe heʼi vaʼekue mbaʼeve ndaikatumoʼãiha “ñandepeʼa Ñandejára mborayhúgui”. Pablo oikuaa vaʼekue Jehová ipasiensiaiterei hague umi israelítare, ha imanduʼa avei mbaʼéichapa haʼe oiporiahuvereko vaʼekue chupe. Upévare ikatu jaʼe Pablo heʼiséne hague: “Jehová ningo Itaʼýra jepe ombou vaʼekue omano  hag̃ua cherehehápe, ¿mbaʼéicha piko upéicharõ adudáta haʼe cherayhuha?” (Rom. 8:32).

11. Pablo ojapóramo jepe entéro umi mbaʼe vaiete oñemombeʼúva 1 Timoteo 1:12-15-pe, ¿mbaʼérepa haʼe oĩ vaʼekue segúro Ñandejára ohayhuha chupe?

¹¹ (Elee 1 Timoteo 1:12-15). Katueténgo oiméne Pablo oñeñandu vaietereíne rakaʼe imanduʼa jave umi mbaʼe vaiete ojapo vaʼekuére oiko mboyve chugui kristiáno. Haʼe heʼi voi ijehe haʼe hague “pe ipekádo vaive vaʼekue”. ¡Ha ndareíri heʼi vaʼekue upéva ijehe! Haʼe oikuaa mboyve la verda, osẽ vaʼekue peteĩ siudágui ha oho ótrope opersegi mbarete hag̃ua umi kristianokuérape. Hetápe oguerahaka kárselpe, ha oapoja voi ojejuka hag̃ua chupekuéra (Hech. 26:10, 11). Ñapensamína ko situasiónre: Ñamoĩ chupe Pablo oikuaaha peteĩ mitãrusu kristiánope, péro upéi oñentera ko mitãrusu opyta hague ityreʼỹ Pablo voi ojukauka haguére ituakuérape. ¿Mbaʼéichapa oñeñandúne rakaʼe haʼe? Pablo ningo ombyasyeterei umi mbaʼe ojapo vaʼekue, péro ndaikatuvéima orremedia umíva. Haʼe oĩ vaʼekue segúro Cristo omano hague hesehápe, ha upévare heʼi: “Ñandejára imbaʼeporãiterei rupi, koʼág̃a che peteĩ apóstol” (1 Cor. 15:3, 10). ¿Mbaʼépa ñaaprende chugui? Ñaĩ vaʼerãha segúro Cristo omano hague ñanderehehápe, ha upéicha rupi koʼág̃a ikatu jareko peteĩ amista iporãva Jehovándi (Hech. 3:19). Ikatu oime ñañeñandu vai hína japeka haguére oiko mboyve ñandehegui Testígo, térã upe rire. Péro ñanemanduʼa vaʼerã Ñandejárape g̃uarã la iñimportánteva hína umi mbaʼe jajapóva koʼág̃a ha amo gotyove, ha ndahaʼéi umi mbaʼe vai jajapo vaʼekue yma (Is. 1:18).

12. Oiméramo ñapensa ndajavaleiha mbaʼeverã térã nañamereseiha avave ñanderayhu, ¿mbaʼéichapa ikatu ñanepytyvõ pe heʼíva 1 Juan 3:19, 20?

¹² Sapyʼánte ñapensa jave Jesús omano hague oñeperdona hag̃ua ñande pekádo, ikatu hína jaʼe: “Che ningo namereséi ko rregálo porãite”. ¿Mbaʼérepa ikatu ñañeñandu upéicha? Pórke  ñane korasõ iñimperfékto, ha ikatu ñanembotavy ha ñanemopensa ndajavaleiha mbaʼeverã, térã nañamereseiha avave ñanderayhu (elee 1 Juan 3:19, 20). Ñañepyrũ jave ñapensa upéicha, ñanemanduʼa vaʼerã “Ñandejára tuichaveha ñane korasõgui”. Upévare tekotevẽ ñañekonvense ñandejupe voi Jehová ñanderayhuetereiha ha ñaneperdonaseha. Ha upearã pyʼỹinte jastudia vaʼerã Iñeʼẽ, ñañemboʼe meme chupe ha jahasa tiémpo ermanokuérandi. ¿Mbaʼérepa iñimportantete jajapo koʼã mbaʼe?

13. ¿Mbaʼéichapa ñanepytyvõ jastudiáramo Ñandejára Ñeʼẽ? (Ehecha avei pe rrekuádro “ ¿Mbaʼéichapa oipytyvõ chupekuéra Ñandejára Ñeʼẽ?”).

¹³ Jastudia Ñandejára Ñeʼẽ káda día. Upéva ñanepytyvõta jaikuaa porãve hag̃ua umi kualida porãite Jehová orekóva, ha jahechakuaáta mbaʼeichaite pevépa haʼe ñanderayhu. Jajepyʼamongetáramo káda día la Biblia heʼívare, ñapensa porãvéta, ha ikatúta “jakorrehi” umi mbaʼe vai ñapensáva ha ñañandúva (2 Tim. 3:16). Peteĩ ansiáno hérava Kevin oñehaʼãmbaite vaʼekue ani hag̃ua opensa ndovaleiha mbaʼeverã. Haʼe heʼi: “Pe Salmo 103 heʼíva chepytyvõ ahecha hag̃ua hendápe porã opa mbaʼe. Alee ha ajepyʼamongeta rire upépe heʼívare ahechakuaa mbaʼépa añetehápe Jehová opensa cherehe”. Eva, pe ermána ajeʼi ñañeʼẽ hague, heʼi: “Oñemohuʼã jave káda día, che añemotiémpo ajepyʼamongeta hag̃ua mbaʼéichapa Jehová ohecha opa mbaʼe. Upéva chembopyʼaguapy ha omombareteve che jerovia”.

14. ¿Mbaʼéichapa ñanepytyvõ ñañemboʼéramo?

¹⁴ Ñañemboʼe meme (1 Tes. 5:17). Jarekoséramo peteĩ amista ótra persónandi, ñañemongeta meme vaʼerã hendive ha ñamombeʼu chupe mbaʼéichapa ñañeñandu. Ha peichaite avei pe amista jarekóva Jehovándi. Ñañemboʼe jave, ha ñamombeʼu chupe umi mbaʼe ñapensáva, ñañandúva ha ñandepyʼapýva, jahechauka hína jajeroviaha hese ha jaikuaaha haʼe ñanderayhuha (Sal. 94:17-19; 1 Juan 5:14, 15). Yua, pe ermána ajeʼi ñañeʼẽ hague, heʼi: “Añemboʼe jave, ndahaʼéi amombeʼúnteva Jehovápe umi mbaʼe ajapo vaʼekue upe díape, síno aavri che korasõ Jehovápe, ha amombeʼupaite chupe umi mbaʼe apensáva ha añandúva. Upéicha rupi, mbeguekatúpe ahechakuaa Jehová ndahaʼeiha peteĩ patrón odirihíva peteĩ emprésa guasu, síno haʼeha peteĩ Túa ojepyʼapýva ipyʼaite guive ifamiliakuérare” (ehecha pe rrekuádro “ ¿Releémapa raʼe ko lívro?”).

15. ¿Mbaʼéichapa Jehová ohechauka ojepyʼapyha káda únore?

¹⁵ Jahasa tiémpo ñane ermanokuérandi. Haʼekuéra ningo peteĩ rregálo oúva Jehovágui (Sant. 1:17). Ñande Ru yvagapegua ohechauka ojepyʼapyha káda únore, omeʼẽvo ñandéve umi ermáno ha ermána haʼéva ñane família ñanderayhúva “tódo el tiémpo” (Prov. 17:17). Pe kárta oskrivi vaʼekuépe umi colosénsepe, Pablo  imanduʼa unos kuánto kristiáno oipytyvõ vaʼekuére chupe, ha heʼi voi hesekuéra: “Tuichaiterei chekonsola hikuái” (Col. 4:10, 11). Jesucristo jepe oikotevẽ vaʼekue iñamigokuérare ha omombaʼeterei haʼekuéra oipytyvõrõ guare chupe, tahaʼe umi ánhel térã umi yvypóra (Luc. 22:28, 43).

16. ¿Mbaʼéichapa umi ermanokuéra ñanepytyvõ ñañemoag̃uive hag̃ua Jehováre?

¹⁶ ¿Jaaprovecha porãpa hína pe rregálo Jehová omeʼẽ vaʼekue ñandéve? Ñamombeʼu jave ñane provlemakuéra, térã umi mbaʼe ñandepyʼapýva peteĩ ermáno ijerovia mbaretévape, upéva ndeʼiséi ñandejerovia kangyha. Añetehápe upéva ikatu hína ñandeprotehe. James, pe ermáno ajeʼi ñañeʼẽma hague, heʼi: “Umi che amigokuéra ijerovia mbaretéva heta vésema chepytyvõ apensa jave ndavaleiha mbaʼeverã, ha avave voi ndacherayhuiha. Umi che amígo ahayhuetéva ningo ipasiénsia cherehe, cherendu ha chemomanduʼa cherayhuha hikuái. Haʼekuéra ojapo jave upéva, añandu Jehová voi cherayhuha ha ojepyʼapyha cherehe”. ¡Ajépa iñimportantete jareko peteĩ amista imbaretéva ñane ermáno ha ermanakuérandi!

17, 18. ¿Mávapepa ñahendu vaʼerã, ha mbaʼérepa?

¹⁷ Satanás ningo oipota ñande ñañentrega ha ndajajapovéi iporãva. Haʼe oipota ñapensa Jehová nañanderayhuiha, ha nañamereseiha voi haʼe ñandesalva. Péro jahecháma haguéicha upéva ndahaʼeiete hína upéicha.

¹⁸ Jehová ningo nderayhueterei, nde ndevaliosoiterei chupe g̃uarã, ha upévare haʼe hakateʼỹ nderehe. Neñeʼẽrendúramo chupe ‘reikóta imborayhúpe’ pára siémpre, Jesús ojapo haguéicha (Juan 15:10). Upévare, aníkena epena Satanásre ha ani ehendu ne korasõme ogueroviakase jave ndéve Jehová nanderayhuiha. Upéva rangue ehendu Jehovápe, ohecháva pe iporãvéva jarekóva káda uno. Ha eimékena segúro ‘Jehová ohayhuha ipuévlope’, ha nde reime hína ijapytepekuéra.