1. a) ¿Mbaʼéichapa ostudia vaʼekue ermáno Russell ha iñirũnguéra? b) ¿Mbaʼérepa iporã vaʼekue ostudia hikuái upéicha?

OJAPÓMA 100 áño rasa ermáno Russell ha umi iñirũnguéra oñepyrũ hague oñembyaty ostudia hag̃ua oñondive Ñandejára Ñeʼẽ. Haʼekuéra ningo oikuaase vaʼekue mbaʼépa añetehápe la Biblia omboʼe Jehovágui, Jesucrístogui, mbaʼe situasiónpepa oĩ umi omano vaʼekue, ha pe rreskáte. Haʼekuéra ostudia lája isensíllo vaʼekue. Peteĩva ijapyteguikuéra ojapo peteĩ pregúnta, ha upéi oñondivepa ostudia kompletoite umi téxto oñeʼẽva upe témare. Ha oanalisapa rire hikuái, oskrivi umi mbaʼe oaprende vaʼekue. Jehová oipytyvõ rupi koʼã kuimbaʼépe, haʼekuéra ontende umi mbaʼe iñimportánteva omboʼéva la Biblia, ha umíva ñande koʼag̃aite peve ñamombaʼeterei.

2. ¿Mbaʼérepa sapyʼánte ñantende vai peteĩ profesía bíblica?

² Péro ontende rire umi mbaʼe isensíllova omboʼéva la Biblia, upe grúpo pyaʼe ohechakuaa ijetuʼuveha oñentende peteĩ profesía bíblica. ¿Mbaʼérepa upéva? Primero, pórke peteĩ profesía oñentende porãve jepi oñekumpli aja hína térã oñekumplipa riréma. Péro ndahaʼéi upévante. Ñantende porã hag̃ua peteĩ profesía, tekotevẽ ñaanalisa pe profesía kompletoite. Ñañekonsentráramo peteĩ párterente pe profesíare ha nañapenái umi ótra pártere, ikatu hína ñantende vai pe profesía. Ñaanalisa jeýramo, amalisia upéva oiko vaʼekue peteĩ profesía oĩvare lívro de Joélpe. Jahechami jeýna upe profesía ha jaikuaami mbaʼérepa tekotevẽ ñakambia ñane entendimiénto.

3, 4. ¿Mbaʼéichapa ñantende raʼe jaikóvo pe profesía oĩva Joel 2:7-9-pe?

³ (Elee Joel 2:7-9). Joel oprofetisa vaʼekue umi tuku ohundipaitetaha Israel yvy. Hãinguéra ojogua umi león rãime, ha  umi hañykã umi león rañykãme, ha hoʼupa otopáva haperãme (Joel 1:4, 6). Heta áñore ñande ñantende ko profesía oñeʼẽha Jehová puévlo osegívare opredika ha umi tukúicha ndaiporiha ojoko vaʼerã chupekuéra. Ñapensa vaʼekue ko tembiapo oafekta vaietereitaha pe ‘tetãme’ oñeñeʼẽha Joel 1:6-pe, ha ñaimoʼã vaʼekue upe ‘tetã’ haʼeha umi hénte oĩva umi líder rrelihióso poguýpe. *

⁴ Jaleéramo Joel 2:7-9 añoiténte, haʼetévaicha oĩ porãva ñantende lája upe profesía. Péro ñaanalisáramo pe profesía kompletoite, jahechakuaáta tekotevẽha ñakambia ñantende lája. Jahechamína koʼág̃a 4 rrasón mbaʼérepa jajapo vaʼerã upéva.

5, 6. a) ¿Mbaʼépa ikatu ñañeporandu ñaanalisa rire Joel 2:20? b) ¿Mbaʼépa ikatu ñañeporandu ñaanalisa rire Joel 2:25?

⁵ Primero, Jehová opromete vaʼekue Joel 2:20-pe oñeʼẽvo umi tuku rehe: “Amondóta mombyry pendehegui umi nortéño”, térã umi tuku. Oiméramo umi tuku orrepresenta testígo de Jehová opredika ha ojapóvape disípulo Jesús omanda haguéicha, ¿mbaʼérepa upéicharõ Jehová opromete omondotaha mombyry chupekuéra? (Ezeq. 33:7-9; Mat. 28:19, 20). Jehová ningo ni mbaʼevéicharõ nomondomoʼãi mombyry isiervokuéra ifiélvape, síno álgo térã álgien oñakontrariávape ipuévlore.

⁶ Segundo, ñaanalisami pe ojeskrivi vaʼekue Joel 2:25-pe. Upépe Jehová heʼi: “Amyengovia jeýta peẽme pene ñemitỹngue peperdepa vaʼekue umi áño oúrõ guare umi tuku. Umíva hoʼu vaʼekue umi tuku guasu, umi tuku raʼy, umi tuku okakuaapámava ha umi tuku karu. Upéva hína che ehérsito tuicháva amondo vaʼekue pene kóntrape”. Jahechakuaa Jehová oprometeha ‘omyengovia jeytaha’ térã opagataha pe perhuísio ojapo vaʼekue umi tuku. Oiméramo umi tuku orrepresenta Jehová puévlo opredikávape oikóvo, ¿mbaʼérepa upéicharõ ojeʼéta pe mensáhe ogueraháva hikuái oporoperhudikaha? Upe mensáhe ningo añetehápe ikatu hína oporosalva ha oipytyvõ umi iñañávape oñarrepenti hag̃ua (Ezeq. 33:8, 19). Ajépa upéva ou porãitereíta umi héntepe ha ndahaʼéi operhudikátava chupekuéra.

7. ¿Mbaʼéichapa pe palávra “upéi” oĩva Joel 2:28, 29-pe ñanepytyvõ ñantende hag̃ua pe profesía?

⁷ (Elee Joel 2:28, 29). Tercero, jahecha vaʼerã mbaʼe órdenpepa oiko umi mbaʼe oñemombeʼúva pe profesíape. Jehová heʼi voi: “Upéi ameʼẽta che espíritu”, térã ojapóta upéva umi tuku otermina rire pe traváho oñemeʼẽ vaʼekue chupekuéra. Oiméramo umi tuku orrepresenta umi opredikávape Ñandejára Rréino, ¿mbaʼére piko upéicharõ Jehová omeʼẽta chupekuéra ijespíritu otermina rire ae hikuái upe hembiapo? Añetehápe ningo haʼekuéra ndoguerekóirire Jehová espíritu sánto ipoderosoitéva, ndaikatumoʼãi kuri opredika hetaite áñore, oĩramo jepe umi oñemoĩva hesekuéra térã umi goviérno oproivíramo jepe chuguikuéra hembiapo.

8. ¿Mávapepa orrepresenta umi tuku oñeñeʼẽha Apocalipsis 9:1-11-pe? (Ehecha pe taʼanga oĩva ko rrevísta apére).

⁸ (Elee Apocalipsis 9:1-11). Jahechamína koʼág̃a pe cuarta rrasón. Anteve ñande jaʼe umi tuku oñeñeʼẽha Joélpe orrepresentaha ñane predikasión, pórke ko profesía joguaha oĩ lívro de Apocalípsispe. Upe profesía omombeʼu umi tuku rova ‘haʼeteha peteĩ persóna rova’ ha ‘iñakãre orekoha hikuái peteĩ mbaʼe  haʼetéva koróna de óro’ (Apoc. 9:7). Haʼekuéra ombosufri “umi persóna ndoguerekóivape Ñandejára séllo isyváre”, umíva hína Ñandejára enemigokuéra, ha umi tuku ombosufri chupekuéra 5 mésere, upéva hína pe tiémpo oikoveha jepi umi tuku (Apoc. 9:4, 5). Koʼã tuku añetehápe orrepresenta hína Jehová unhidokuérape. Haʼekuéra ningo pyʼaguasúpe oikuaauka mbaʼépa Ñandejára ojapóta ko múndo añáre, ha upe mensáhe ndogustaiete umi oapojávape ko múndo.

9. ¿Mbaʼépepa tuicha idiferénte umi tuku ohecha vaʼekue Joel ha umi ohecha vaʼekue Juan?

⁹ Jaʼekuaa pe profesía oĩva Apocalípsispe ha Joélpe ojojoguaha unas kuánta kósape. Péro tuicha idiferénte hína. Ñaanalisami: Joel profesíape umi tuku ohundipaite umi plantasión (Joel 1:4, 6, 7). Péro pe visión ohecha vaʼekuépe apóstol Juan, umi tukúpe ojeʼe ani hag̃ua operhudika pe kapiʼipe, ni umi ótra plánta (Apoc. 9:4). Umi tuku Joel ohecha vaʼekue ningo ou nórteguio ládo (Joel 2:20). Péro umi tuku ohecha vaʼekue Juan osẽ peteĩ yvykua pypukúgui (Apoc. 9:2, 3). Umi tuku Joel ohecha vaʼekuépe oñemondo mombyry. Apocalípsispe katu umi tukúpe noñemondói mombyry, síno Jehová opermiti chupekuéra otermina pe itraváho. La Bíbliape ningo ndajatopaiete heʼihápe Jehová ndoguerohoryiha koʼã tukúpe. (Ehecha pe rrekuádro “ Umi profesía oñeʼẽva umi tukúre: Ojojogua péro idiferénte”).

10. ¿Mbaʼérepa ikatu jaʼe umi tuku oñeñeʼẽha Joélpe ndahaʼeiha el mísmo umi tuku oñeñeʼẽha Apocalípsispe?

 ¹⁰ Koʼã diferénsia orekóva umi mokõi profesía ñanepytyvõ ñantende hag̃ua ndahaʼeiha peteĩcha. Upéva heʼise umi tuku oñeñeʼẽha Joélpe ndahaʼeiha el mísmo umi tuku oñeñeʼẽha lívro de Apocalípsispe. Sapyʼánte la Bíbliape ojepurúnte voi peteĩ mbaʼe oñerrepresenta hag̃ua diferénte kósa, ha orekóva diferénte signifikádo asegún mbaʼéichapa ojepuru. Por ehémplo, Apocalipsis 5:5-pe Jesúspe oñehenói “pe León Judá trivupegua”, péro 1 Pedro 5:8-pe pe Diablo rehe ojeʼe haʼeha “peteĩ león okororõva hína”. Koʼã 4 rrasón jahecha vaʼekue ha umi pregúnta ñaanalisáva, ohechauka ñandéve tekotevẽha ñakambia ñantende lája pe profesía de Joel. Jahechamína koʼág̃a upéva.

11. ¿Mbaʼéichapa Joel 1:6 ha 2:1, 8, 11 ñanepytyvõ jaikuaa hag̃ua mávapepa orrepresenta umi tuku?

¹¹ Ñaanalisáramo umi ótro versíkulo oĩva Joel profesíape, jahechakuaáta haʼe oprofetisa hague oĩtaha peteĩ ehérsito oporoatakáva (Joel 1:6; 2:1, 8, 11). Jehová heʼi kuri omondotaha ‘ijehérsito tuicháva’, térã umi soldádo babilóniope okastiga hag̃ua umi israelita naiñeʼẽrendúivape (Joel 2:25). Ko ehérsitope oñehenói “umi nortéño”, pórke umi babilonio oikéta Israélpe nórteguio ládo (Joel 2:20). Ko ehérsitope oñekompara hetaiterei tuku oñeorganisa porãvare. Joel heʼi voi hesekuéra: “Káda [soldádo] osegi hape. [...] Ojatropella hikuái umi siuda ha oike, ha odipara umi murálla ári. Ojupi hikuái umi ógare, ha mondaháicha oike umi ventánarupi” (Joel 2:8, 9). Eñeimahinamína upéva. Oparupiete oĩ umi soldadokuéra. Ndaipóri lugár oñekañy hag̃ua. ¡Ni peteĩva ndojesalvamoʼãi Babilonia ehérsitogui!

12. ¿Mbaʼéichapa oñekumpli Joel profesía oñeʼẽva umi tuku rehe?

¹² Umi babilonio, térã umi caldeo, tukúicha ojagarrapaite Jerusalén áño 607-pe a.C. La Biblia omombeʼu mbaʼépa ojapo vaʼekue umi caldeokuéra rréi. Heʼi voi hese: “Haʼe ojuka espádape umi mitãrusukuérape [...], ha nombyasýi ojuka hag̃ua umi mitãkuimbaʼe ni kuñataĩ, itujáva ni hasykatúvape. Ha Ñandejára omeʼẽmbaite chupe oĩmíva guive. Haʼe ohapy Ñandejára tee róga, oitypaite Jerusalén murálla, ohapy kompletoite umi tórre isegúro porãva ha ohundi entéro mbaʼe de valór” (2 Crón. 36:17, 19). Umi babilonio ojagarra ha ohundi rire pe siuda, umi hénte ohecháva Jerusalén heʼi: “Ko lugár ningo nandi vera, ndaipóri yvypóra ni animál, ha oñemeʼẽma umi caldéope” (Jer. 32:43).

13. ¿Mbaʼépa heʼise Jeremías 16:16, 18?

¹³ Oiméne 200 áñorupi Joel oprofetisa rire, Jehová ojevale Jeremías rehe oprofetisa hag̃ua hetave mbaʼe ko atáke oikótavare. Haʼe heʼi umi ojagarráva pe siuda oheka porãtaha ha ojagarrapaitetaha entéro umi israelita hembiapo vaívape. “Jehová heʼi: ‘Ahenoikáta ha ambyatýta heta peskadórpe, ha umíva pendejagarráta. Upe rire ahenoikáta ha ambyatýta heta ohóvape omariska, ha umíva penderekáta ha pendejagarráta umi montañaháre ha kompletoite umi lugár ijyvatehápe, ha avei umi ita guasu kuápe. [...] Akastiga raẽta chupekuéra entéro mbaʼe vai ojapo vaʼekuére ha ipekadokuérare’”. Umi israelita noñarrepentíriva ndaikatumoʼãi kuri okañy ni umi oséanope ni umi kaʼaguýre umi babilonio oúvagui (Jer. 16:16, 18).

14. ¿Arakaʼépa oñekumpli raʼe Joel 2:28, 29?

¹⁴ Joel ningo oreko avei notísia iporãva omombeʼúva: Pe yvy oprodusi porã jeýta (Joel 2:23-26). Upéva heʼise, tiémpo rire  umi hénte oikuaataha kuri hetaiterei mbaʼe Ñandejáragui. Jehová heʼi voi: “Ameʼẽta che espíritu entéro persónape, ha pende raʼy ha pende rajykuéra oprofetisáta, ha [...] ameʼẽta che espíritu che esklavokuéra ha che esklavakuérape jepe” (Joel 2:28, 29). Ñandejára ningo nomeʼẽi vaʼekue ijespíritu sánto umi israelítape ou jey riremínte Babilóniagui, síno upéva oiko hag̃ua ohasa 600 áñorupi, Pentekostés áño 33-pe. ¿Mbaʼérepa jaʼe upéva?

15. Heʼiháicha Hechos 2:16, 17-pe, ¿mbaʼéichapa apóstol Pedro okambiaʼimi Joel 2:28 heʼíva, ha mbaʼépa ohechauka upéva?

¹⁵ Ñandejára espíritu rupive, apóstol Pedro heʼi Joel 2:28, 29 oñekumpli hague oikórõ guare peteĩ mbaʼe ijojahaʼỹva upe Pentekostés díape. Upe pyharevépe, oiméne la 9 rupi Ñandejára omeʼẽ ijespíritu sánto, ha umi orresivi vaʼekue upe espíritu oñepyrũ oñeʼẽ diferénte idiómape, ha omombeʼu “umi mbaʼe ijojahaʼỹva Ñandejára ojapo vaʼekue” (Hech. 2:11). Apóstol Pedro imanduʼárõ guare Joel profesíare, espíritu sánto rupive haʼe okambiaʼimi kuri umi palávra oipuru vaʼekue ko proféta. ¿Rehechakuaápa nde mbaʼe mbaʼépa okambiaʼimi raʼe? (Elee Hechos 2:16, 17). Oñepyrũvo, heʼi rangue “upéi”, Pedro heʼi: “Umi ára pahápe”. Ko pártepe haʼe oñeʼẽ kuri umi judío ára paháre, pórke upe tiémpope Jerusalén ha itémplo oñehundi potaitéma kuri. Ha upe tiémpope Ñandejára omeʼẽta ijespíritu “entéro persónape”. Kóva ohechauka Joel profesía oñekumpli hag̃ua ohasa hague hetaiterei áño.

16. a) ¿Mbaʼéichapa Ñandejára espíritu sánto oipytyvõ ojepredika hag̃ua yma síglo primérope? b) ¿Mbaʼéichapa Ñandejára espíritu sánto ñanepytyvõ japredika hag̃ua ñane tiémpope?

¹⁶ Ñandejára omeʼẽ rire ijespíritu umi kristiánope yma síglo primérope, haʼekuéra oñepyrũ vaʼekue opredika hetaiterei hendápe ko yvy ape ári. Ha apóstol Pablo oskrivírõ guare ikárta  umi colosénsepe áño 61 rupi, haʼe ikatu vaʼekue heʼi umi notísia porã ojepredikáma hague “ko múndo tuichakuére” (Col. 1:23). Pablo heʼírõ guare upéicha oñeʼẽ umi lugár oĩvare ko múndope ha ikatu haguépe oviaha haʼe ha umi ótro ermáno. Péro Jehová ñanepytyvõ rupi ijespíritu sánto ipoderosoitéva rupive, ñane tiémpope japredikáma hetaitereive hendápe ha ñag̃uahẽma “umi lugár mombyryvehápe ko yvy ape ári” (Hech. 13:47; ehecha pe rrekuádro “ Ameʼẽta che espíritu”).

17. ¿Mbaʼéichapa koʼág̃a ñantende pe profesía de Joel oñeʼẽva umi tukúre?

¹⁷ ¿Mbaʼépa upéicharõ oñekambia raʼe? Koʼág̃a ñande ñantende porãvéma pe profesía oĩva Joel 2:7-9-pe. Jahechakuaa koʼã versíkulope noñeñeʼẽiha pe predikasión kyreʼỹme ojejapóvare, síno oñeʼẽha umi babilonio ehérsito ojagarra vaʼekuére Jerusalén áño 607-pe a.C.

18. ¿Mbaʼépa nokambiái Jehová puévlope?

¹⁸ Péro, ¿mbaʼépa nokambiái? Jehová puévlo osegi opredika opárupi umi notísia porã, ha oñehaʼã ojapo upéva opa hendáicha (Mat. 24:14). Umi goviérno oproivíramo jepe ñandehegui, ñande jasegíta japredika, ndaipóri ñandejoko vaʼerã. Ha koʼytevéntema ko tiémpope ñandepyʼaguasu japredika hag̃ua umi notísia porã oñeʼẽva Ñandejára Rréinore, pórke Jehová ñanevendesi hína. Ñande ningo umíldemente jahechakuaa ñadependeha Jehováre ñantende hag̃ua umi profesía oĩva la Bíbliape, pórke jajerovia haʼe itiempoitépe ‘ñandegia ha ñanepytyvõtaha ñantende porã hag̃ua la verda’ (Juan 16:13).