1, 2. a) ¿Mbaʼépepa ojojogua ko múndo aña ha peteĩ kuimbaʼe oñekondenáva a muérte? (Ehecha pe taʼanga oĩva iñepyrũme). b) ¿Mbaʼéichapa oñeñandúta umi oĩva yvágape ha ko yvy ape ári oñehundi vove ko múndo aña?

EÑEIMAHINAMÍNA ko situasión: umi guárdia ogueraha pe kársel pasíllore peteĩ préso ipeligrósovape, ha osapukái ohóvo hikuái: “¡Koʼápe oho peteĩ omanóa!”. ¿Mbaʼérepa heʼi hikuái upéicha? Pe préso ningo haʼete hesãiva ha noĩriva omano hag̃uáicha peteĩ mbaʼasýgui. Upéicharõ, ¿mbaʼérepa umi guárdia heʼi hese omanoha? Pórke pe kuimbaʼépe oñekondena a muérte ha ojegueraháma hína ojejuka hag̃ua. Upévare haʼete omanómava * (elee pe nóta).

² Ko múndo aña jaikoha haʼete avei peteĩ oñekondenáva a muérte ha oĩmava ojejuka hag̃uáicha. La Biblia heʼi: “Ko múndo ha umi mbaʼe oipotáva, ohasa ohóvo” (1 Juan 2:17). Jehová odesidíma koʼẽrõite ohunditaha ko múndo aña, ha upévare ñaĩ segúro oikotaha upéva. Péro ko múndo ha pe kuimbaʼe oñekondenáva a muérte idiferénte peteĩ mbaʼépe. ¿Mbaʼérepa? Pórke ikatu oĩ oprotestáva openságui reiete oñekondena hague pe  kuimbaʼépe, ha ohaʼarõ oñekambia jey la ojedesidíma vaʼekue. Péro Jehová haʼe peteĩ Hués perfékto ndojavýiva arakaʼeve, upévare ko múndo ojehusgámante vaʼerã (Deut. 32:4). Ko huísio ojejapóta hiʼoraitépe. Oñehundi rire ko múndo aña, entéro umi oĩva yvágape ha ko yvy ape ári ndoprotestamoʼãi Jehová ohusgáta haguére ko múndo, pórke oikuaa haʼe ojapóva siémpre ihústo ha oĩ porãha. Añetehápe upe tiémpope jaikótama pyʼaguapýpe.

3. ¿Mbaʼépa umi 4 mbaʼe opátava ou vove Ñandejára Rréino?

³ ¿Mbaʼépa heʼise ko múndo ohasaha ohóvo? Heʼise koʼẽrõite opataha entéro umi mbaʼe vai oikóva koʼág̃arupi. Upéva haʼe peteĩ “marandu porã” ojehupytýtava Ñandejára Rréino rupive (Mat. 24:14). Ko artíkulope jahecháta 4 mbaʼe opátava og̃uahẽ vove Ñandejára Rréino: umi hénte aña, umi organisasión ikorrúptova, umi mbaʼe vai, ha jehasa asy. Upearã ñambohováita koʼã porandu: 1) ¿Mbaʼéichapa ñandeafekta koʼã mbaʼe? 2) ¿Mbaʼépa Jehová ojapóta oipeʼapa hag̃ua umíva? Ha, 3) ¿mbaʼe iporãvapa Ñandejára oguerúta umi mbaʼe vai rendaguépe?

4. ¿Mbaʼéichapa ñandeafekta umi hénte aña?

⁴ ¿Mbaʼéichapa ñandeafekta umi hénte aña? Apóstol Pablo heʼi vaʼekue: “Umi ára pahápe pe situasión ijetuʼúta ha hasýta jagueropuʼaka hag̃ua”. Upéi heʼi avei: “Umi kuimbaʼe aña ha hovamokõiva oho vai vaive vaʼerã” (2 Tim. 3:1-5, 13). ¿Mbaʼéichapa oñekumpli ko profesía? Ñande apytépe oĩ heta osufrímava oĩ rupi persóna ivioléntova, oporojukáva, oporomondáva térã omboykéva hapichápe. Koʼã hénte aña apytépe oĩ heta notĩriva voi hembiapo vai hag̃ua. Ótro katu oipytyvõse guaʼu umi héntepe, péro añetehápe ombotavy chupekuéra. Koʼã mbaʼe vai ndoikóiramo jepe ñanderehe, katuete ñandeafekta la ojapóva umi hénte aña. Heta vése oguapyeterei ñanderehe ñahendu jave ojetrata vaietereiha umi mitãme, umi ijedávape ha ambue persóna ndaikatúivape oñedefende. Umi ojapóva upéicha, haʼete voi umi animál térã demónio (Sant. 3:15). Péro tuicha ñanekonsola Ñandejára Ñeʼẽ omeʼẽ rupi ñandéve esperánsa.

5. a) ¿Maʼerãpa oñemeʼẽ gueteri tiémpo umi hénte añáme? b) ¿Mbaʼépa oikóta umi nokambiaséivagui?

⁵ ¿Mbaʼépa Jehová ojapóta? Koʼág̃a peve, Jehová omeʼẽ gueteri tiémpo umi hénte añáme okambia hag̃ua (Is. 55:7). Jehová heʼíramo jepe ohunditaha ko múndo aña, heta persóna ikatu gueteri ojesalva. Péro ou vove pe jehasa asy guasu, Jehová ohundíta umi nokambiaséivape ha oapojáva ko múndo (elee Salmo 37:10). Koʼág̃arupi oĩ heta oñomikuaáva hembiapo vai, upévare heta vése ndojekastigái chupekuéra (Job 21:7, 9). Péro la Biblia heʼi: “Ñandejára ohechapaite yvyporakuéra ojapóva, ha oikuaa mbaʼe tapépa káda uno osegi. Umi iñañáva ndaikatúi okañy mamove, ni umi lugár iñypytũháme ndaiporihápe ni peteĩ lus” (Job 34:21, 22, TNM). Upéva heʼise avave ndaikatuiha okañy Jehovágui. Haʼe ikatu ohecha opa mbaʼe ojapóva umi iñañáva. Armagedón ohasa rire, ñamañáta oĩ haguépe hikuái, ha ni hendague ndopytamoʼãi. Umi hénte aña oñehundíta pára siémpre (Sal. 37:12-15).

6. a) ¿Mávapa opytáta ko yvy ape ári oñehundi vove umi hénte añáme? b) ¿Mbaʼérepa upéva haʼe peteĩ notísia porã?

⁶ ¿Mávapa ojesalváta oñehundi vove umi iñañávape? Jehová opromete: “Umi  hénte ivuénova opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre”. Ótro sálmope heʼi: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Sal. 37:11, 29, TNM). ¿Mávapa umi “ivuénova”? Umíva hína umi persóna iñumíldeva, oaprendéva ohóvo Jehovágui ha iñeʼẽrendúva chupe. Ha, ¿mávapa umi hembiapo porãva? Koʼãva umi ojaposéva ipyʼaite guive opa mbaʼe Jehová heʼíva oĩ porãha. Pe múndo pyahúpe sólamente oĩta umi ivuénova ha hembiapo porãva, ha haʼekuéra ojapóta ko yvýgui peteĩ paraíso.

7. ¿Mbaʼéichapa ñandeafekta umi organisasión ikorrúptova?

⁷ ¿Mbaʼéichapa ñandeafekta umi organisasión ikorrúptova? Heta mbaʼe vai oikóva ko múndope, ndahaʼéi katuete umi persóna káusare síno umi organisasión káusare. Umi organisasión rrelihiósa ombotavy hetaiterei persónape. Por ehémplo, haʼekuéra omboʼe heta japu Ñandejáragui, heʼi ndaikatuiha jajerovia la Bíbliare, ha nomboʼéi mbaʼépa añetehápe oikóta ko yvýgui ha yvyporakuéragui. Umi goviérno ikorrúptova oapoja umi gérra ha omboliga umi héntepe ndaijaʼéi hag̃ua hapicháre ipire kolór térã ikostúmbre diferénte haguére. Avei haʼekuéra ombohasa asy umi imboriahúvape ha umi ndorekóivape odefende vaʼerã chupekuéra. Koʼãichagua goviérno ou irríko ha omanda guasu ofavorese rupi algúnope téra oasepta haguére sovórno. Heta emprésa oganasevégui pláta ou okontaminapa ñane planéta, ohundi pe naturalésa, ha ojaprovecha umi héntere ikatu hag̃uáicha irríko hikuái. Jahechaháicha, umi organisasión ikorrúptova káusare hetaiterei hénte osufri.

8. ¿Mbaʼépa heʼi la Biblia oikotaha umi organisasión haʼetévaicha la imbaretévagui?

⁸ ¿Mbaʼépa ojapóta Jehová? Pe jehasa asy guasu oñepyrũta umi organisasión polítika oataka vove umi organisasión rrelihiósa fálsape. La Biblia ombojoja koʼã organisasión rrelihiósape peteĩ kuña rekovaíre, hérava Babilonia Guasu (Apoc. 17:1, 2, 16; 18:1-4). Entéro umi rrelihión fálsa oñehundíta. Ha, ¿mbaʼépa oikóta umi ótra organisasión ikorrúptovagui? La Biblia ombojoja koʼãvape umi sérro ha íslare, pórke haʼetévaicha la oñemopyenda porãva ha imbaretéva (elee Apocalipsis 6:14). Heʼi avei tahaʼe haʼéva goviérno ha organisasión ndoapojáiva Ñandejára Rréino oñehunditaha. Upéva oikóta opa mboyvemi pe jehasa asy guasu (Jer. 25:31-33). Upe rire ndaiporimoʼãvéima ni peteĩ organisasión ikorrúptova.

9. ¿Mbaʼérepa ikatu ñaĩ segúro pe yvy pyahu oñeorganisa porãtaha?

⁹ ¿Mbaʼépa oñemoĩta koʼã organisasión ikorrúptova rekovia? ¿Oĩtapa algúna organisasión ko yvy ape ári Armagedón rire? La Biblia heʼi: “Ñande ñahaʼarõ hína yvága ha yvy ipyahúva, ha umívape akóinte oĩta tekojoja” (2 Ped. 3:13). Pe yvága tuja haʼe hína umi goviérno ikorrúptova, ha pe yvy tuja katu umi hénte aña oñemoĩva koʼã goviérno poguýpe. ¿Mbaʼépa oikóta oñehundi rire chupekuéra? Oñemoĩta “yvága ha yvy ipyahúva”. Pe yvága ipyahúva haʼe peteĩ goviérno pyahu omoakãtava Jesucristo ha umi 144.000. Pe yvy pyahu katu ojerreferi umi oikótavare Ñandejára Rréino poguýpe. Jehová ningo ndojapói mbaʼeve  sarambikuépe, upéicha avei Jesús ha Irréino ojapóta entéro mbaʼe hendápe porã (1 Cor. 14:33). Jahechaháicha, pe yvy pyahu oñeorganisa porãta. Upépe oĩta heta kuimbaʼe ipyʼaporãva oipytyvõtava ikatu hag̃uáicha opa mbaʼe osẽ porã (Sal. 45:16). Koʼã kuimbaʼe oñemoĩta Cristo ha umi 144.000 poguýpe. Javyʼaitereíta ningo entéro organisasión ikorrúptova oñehundi vove. Upérõ opytáta peteĩ organisasión añoite, oĩva peteĩ ñeʼẽme ha arakaʼeve ndojapomoʼãiva mbaʼeve ivaíva.

10. a) ¿Mbaʼe ivaívapa ojehechave nde reikohárupi? b) ¿Mbaʼéichapa koʼã mbaʼe ndeafekta ndéve ha ne famíliape?

¹⁰ ¿Mbaʼéichapa ñandeafekta umi mbaʼe vai? Ñande jaiko hína peteĩ múndo oĩháme hetaiterei hekovaíva, naiñonrrádoiva ha ivioléntova. Koʼã mbaʼe ningo ojechauka iporãramoguáicha umi vyʼarãme. Avei koʼãichagua entretenimiénto oñembohory Jehová heʼívare oĩ porãha (Is. 5:20). Tuakuéra oñehaʼãmbaite ani hag̃ua koʼãichagua vyʼarã oafekta chupekuéra ha ifamíliape. Jahechaháicha, jaiko aja ko múndo ndorrespetáivape Ñandejára heʼíva, entéro kristiáno jajapo vaʼerã ikatúva guive pono japyta vai Jehová renondépe.

11. ¿Mbaʼépa ñanemboʼe oiko vaʼekue Sodoma ha Gomórrare?

¹¹ ¿Mbaʼépa ojapóta Jehová oipeʼa hag̃ua entéro mbaʼe vai? Ñapensamína mbaʼépa haʼe ojapo vaʼekue oipeʼa hag̃ua umi mbaʼe vai ojejapóva Sodoma ha Gomórrape (elee 2 Pedro 2:6-8). Lot haʼe vaʼekue peteĩ kuimbaʼe ihústova, upévare haʼe ha ifamília osufrieterei umi hénte rembiapo vaikuére. Jehová ohundi koʼã siuda opa hag̃ua umi mbaʼe vai ojejapóva upérupi. Péicha haʼe “oheja peteĩ modélo ohechaukáva mbaʼépa oikóta umi hénte añáre”. Jehová oipeʼaite umi mbaʼe vai ojejapo vaʼekue yma, ha koʼẽrõite katuete ojapóta avei upéva ko múndo añáme.

12. ¿Mbaʼépa nde rejapose pe múndo pyahúpe?

¹² ¿Mbaʼépa oñemoĩta umi mbaʼe vai rekovia? Enteroite mbaʼe jajapótava pe paraísope ñanembovyʼáta. Ñañeimahinamína mbaʼeichaitépa ñandepyʼarorýta ñambaʼapo vove ikatu hag̃uáicha oiko ko yvýgui peteĩ lugár neporãva. Upépe javyʼáta pórke jajogapóta ha ñaipytyvõta ñane amígo ha ñane hentekuérape ojapo hag̃ua avei hogarã. Avei ñañeñandu porãitereíta jarresivi vove umi oñemoingove jeývape. Upépe jarekóta pe oportunida ñamboʼévo chupekuéra Jehová rape ha umi mbaʼe ojapo vaʼekue yvyporakuéra rehehápe (Is. 65:21, 22; Hech. 24:15). Añetehápe, ñambaʼapo meméta umi mbaʼe ñanembovyʼávape ha omombaʼeguasúva Jehovápe.

13. ¿Mbaʼépa oiko Satanás, Adán ha Eva opuʼã rupi Jehováre?

¹³ ¿Mbaʼéichapa ñandeafekta umi jehasa asy? Ko múndope jahecha opárupi hénte aña, organisasión ikorrúptova ha mbaʼe vai, upévare heta oĩ ohasa asýva. Entérope ñandeafekta oĩ rupi omboykéva hapichápe, imboriahúva, gérra, mbaʼasy ha ñemano. Koʼa mbaʼe oñepyrũ Satanás, Adán ha Eva opuʼã rupi Jehováre. Ha upévare entéro jahasa asy koʼag̃aite peve.

14. ¿Mbaʼépa Jehová ojapóta oipeʼa hag̃ua pe jehasa asy?

¹⁴ ¿Mbaʼépa Jehová ojapóta oipeʼa hag̃ua pe jehasa asy? Por ehémplo, haʼe opromete opatamaha umi gérra  (elee Salmo 46:8, 9). Ñandejára oipeʼáta opaichagua mbaʼasy (Is. 33:24). Avei ndaiporimoʼãvéima omanóva (Is. 25:8). Yvyporakuérape ndofaltamoʼãvéima mbaʼeve pórke ndaiporimoʼãi imboriahúva (Sal. 72:12-16). Añetehápe Jehová oipeʼáta opa mbaʼe ñanembohasa asýva. Avei Satanás ha idemoniokuéra oñehundíta, upévare ndaikatumoʼãvéima omomýi hikuái avavépe hembiapo vai hag̃ua (Efes. 2:2).

15. ¿Mbaʼe mbaʼépa opáta Armagedón rire?

¹⁵ Epensamíntena mbaʼeichaitépa javyʼáta jaiko vove peteĩ múndo ndaiporihápe gérra, mbaʼasy ni ñemano. Opáta umi árma ha umi monuménto ojejapóva ojegueromanduʼa hag̃ua umi oñorairõ vaʼekuépe gerrahápe. Avei nañaikotevẽmoʼãvéima ospitál, doktór, enferméra, mórge ni sementério. Ha opáta rupi umi hénte oporoperhudikáva, ndaiporivéitama polisía ni alárma de segurida, ha ikatu voi ndojepuruvéi hína umi kandádo ha serradúra. Añetehápe opáta entéro mbaʼe ñandereko asýva.

16, 17. a) Opa rire Armagedón, ¿mbaʼéichapa oñeñandúta umi ojesalváva? Emoĩ peteĩ ehémplo. b) ¿Mbaʼépa jajapo vaʼerã jajesalva hag̃ua ko múndo oñehundi vove?

¹⁶ ¿Mbaʼéichapa jaikóta opa vove umi jehasa asy? Sapyʼánte ijetuʼu ñañeimahina hag̃ua mbaʼéichapa jaikóta upérõ. Hetaiterei tiémporema ningo jahecha oikoha mbaʼe vai ko múndope, ha upévare sapyʼánte ndajahechakuaavéima ñandeafektaha umíva. Ñantende hag̃ua upéva, ikatu ñapensa umi persóna oikóvare rrúta kóstare. Haʼekuéra ningo ojepokuaáma ohendu umi rruído, upévare kon el tiémpo nomolestavéima chupekuéra. Ha umi oikóva peteĩ vasuréro ypýpe katu, tiémpo rire ndostorvavéima chupekuéra pe tyakuã vai. Péro pe rruído ha pe tyakuã vai opáramo, oñeñandu porãitereíta hikuái. Péicha avei, Jehová oipeʼapa vove umi mbaʼe vai, tuicha ñandepiroʼýta.

¹⁷ ¿Mbaʼéichapa ojeikóta opa vove opaichagua provléma? La Biblia heʼi umi oikótavare upe tiémpope: “Haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (Sal. 37:11, TNM). Ajépa ñanembopyʼaguapy jaikuaávo Jehová oipotaha jaiko upéicha. Upévare, koʼág̃ama voi jajapo vaʼerã opa ikatúva ñaime hag̃ua Jehová ha iñorganisasión ykére. Jasegíkena jajepyʼamongeta umi mbaʼe porã jahupytýtavare amo gotyove. Iporãta avei ñañeimahináma voi oikoha umi mbaʼe, ha ñamombeʼu ñande rapichakuérape ñane esperánsa porãite (1 Tim. 4:15, 16; 1 Ped. 3:15). Jajapóramo koʼã mbaʼe, jajesalváta oñehundi vove ko múndo aña ha javyʼaitereíta opa árare.