María, Raúl, Arne, ha hetavépe g̃uarã, pe ñemboʼe haʼe peteĩ rregálo iporãitereíva. Haʼekuéra oñandu voi pe ñemboʼe rupive ikatuha oñeʼẽ Ñandejárandi, oagradese chupe, ha ojerure chupe ajúda. Haʼekuéra oguerovia ipyʼaite guive la Biblia heʼíva pe ñemboʼére Primera de Juan 5:14-pe: “Ha jajeroviakuaa ko mbaʼére: oimeraẽ mbaʼe jajeruréva Ñandejárape, oĩ porãramo hembipotándi, haʼe ñanerendúta”.

Oĩ avei heta persóna ndogueroviáiva umi mbaʼe la Biblia heʼíva pe ñemboʼére, por ehémplo Steve omombeʼu mbaʼépa opensa vaʼekue ymave pe ñemboʼére. Haʼe heʼi: “Arekórõ guare 17 áño mbohapy che amígo omano. Peteĩva omano ochokárõ guare hiʼáuto reheve, ha umi ótro mokõi katu ojahoga márpe”. ¿Mbaʼépa ojapo upémarõ Steve?  Haʼe heʼi: “Añemboʼe Ñandejárape aikuaa hag̃ua mbaʼérepa oiko umícha mbaʼe péro norrespondéi chéve, upévare apensa añemboʼepa reiha”. Heta avei oĩ heʼíva avave norrespondeiha chupekuéra iñemboʼe, upévare opensa ñañemboʼepa reiha.

Péro ndahaʼéi upévarente oĩ la opensáva natekotevẽiha ñañemboʼe. Oĩ avei heʼíva: “Ñandejára ningo oikuaa opa mbaʼe, oikuaa mbaʼépa ñaikotevẽ ha ñane provlemakuéra, upévare jaʼe reíta chupe pórke haʼe oikuaapáma voi”.

Oĩ avei opensáva Ñandejára nohenduseiha iñemboʼekuéra, ymave ojapo haguére peteĩ mbaʼe ivaíva, por ehémplo Jenny heʼi: “Che añandu ndavaleiha mbaʼeverã, péva la che provléma. Ajapóma heta mbaʼe ambyasyetereíva, upévare apensa voi che namereseiha Ñandejára ohendu che ñemboʼe”.

¿Ha mbaʼépa nde repensa pe ñemboʼére? Oiméramo nde repensa avei koʼã persónaicha térã reikuaase ótra kósa pe ñemboʼégui, ani ejepyʼapy, la Bíbliape katuete retopáta umi mbaʼe reikuaaséva. La Biblia ningo oñeʼẽ pe ñemboʼére * ha ikatu jajerovia umi mbaʼe heʼívare upépe. Ñandejára Ñeʼẽ rupive ikatúta oñerresponde ndéve koʼã pregúnta:

• ¿Añetehápepa Ñandejára ohendu ñane ñemboʼe?

• ¿Mbaʼérepa oĩ ñemboʼe Ñandejára norrespondéiva?

• ¿Mbaʼéichapa ñañemboʼe vaʼerã oñehendu hag̃ua ñane ñemboʼe?

• ¿Mbaʼéichapa pe ñemboʼe ikatu ñanepytyvõ?