1, 2. ¿Mbaʼérepa Jesús oĩ raʼe pe desiérto de Judéape áño 29-pe d.C., ha mbaʼépa oiko hese upépe? (Ehecha pe taʼanga oĩva iñepyrũme).

 PE ÁÑO 29-pe, oiméne opakuévo octubre térã oñepyrũmírente noviembre, Jesús oĩ hína kuri pe desiérto de Judéape, nórte gotyo pe Mar Muértogui. Ojevautisa ha oñeunhi rire Jesúspe, pe espíritu sánto odirihi chupe ko lugárpe. Kóva ningo peteĩ lugár isékova, itaty memete ha oĩ heta varránka guasu. Ko lugárpe Jesús oajuna, oñemboʼe ha ojepyʼamongeta trankílo porã 40 díare. Ikatu oime upérõ Jehová oñekomunika raʼe Itaʼýrandi ha oprepara chupe ombohovái hag̃ua umi mbaʼe oútava upe rire.

² Jesús ningo iñembyahyieterei, upéicha rupi ikangýma ohóvo, ha upe javete Satanás oñemboja hendápe. La oikóva upe rire omyesakã peteĩ mbaʼe iñimportantetereíva oafektáva entéro umi ohayhúvape pe adorasión verdadéra, umíva apytépe ndéve avei.

3, 4. a) ¿Mbaʼépa heʼi Satanás omoñepyrũvo umi mokõi tentasión? b) ¿Mbaʼépa oiméne Satanás oipota raʼe Jesús opensa? c) ¿Mbaʼéichapa Satanás oipuru avei koʼág̃arupi umichagua tentasión?

³ (Elee Mateo 4:1-7). Omoñepyrũvo umi mokõi tentasión, Satanás tova atãme heʼi Jesúspe: “Ndéramo añete Ñandejára raʼy”. ¿Oduda piko raʼe Satanás Jesús haʼeha Ñandejára Raʼy ajeve heʼi chupe upéicha? Nahániri. Upe ánhel opuʼã vaʼekue Ñandejárare oikuaa porã  vaʼekue Jesús haʼeha Ñandejára Raʼy ypykue (Col. 1:15). Avei Satanás oikuaa porã Ñandejára heʼi hague Jesús rehe ojevautisárõ guare: “Kóva hína che Raʼy ahayhuetéva ha aguerohorýva” (Mat. 3:17). Ikatu oime Satanás oipota Jesús ipyʼamokõi ha opensa: “¿Añetehápe piko che Túa oñangarekóne cherehe? ¿Ikatúne piko akonfia hese?”. Upévare pe primera tentasiónpe, heʼírõ guare chupe ojapo hag̃ua pan umi itágui, Satanás heʼise kuri chupe: “Nde ningo Ñandejára Raʼy, ¿mbaʼére piko upéicharõ nde Túa nanemongarúi ko desiérto perõme?”. Pe segunda tentasiónpe katu, heʼírõ guare chupe ojepoi hag̃ua pe témplo murálla árigui, Satanás haʼete oporandúva chupe: “Nde ningo Ñandejára Raʼy, ¿nde piko reime segúro nde Túa oñangarekotaha nderehe?”.

⁴ Ñane tiémpope Satanás oipuru avei umichagua tentasión (2 Cor. 2:11). Haʼe ningo opeska oikóvo umi oadorávare Ñandejárape, ikatu hag̃uáicha ág̃a ikangy ha oñedesanima vove oataka chupekuéra, ha pyʼỹinte ojapo upéva ñemihaitépe (2 Cor. 11:14). Satanás ñanembotavyse ha oipota ñapensa Jehová arakaʼeve nañanderayhumoʼãiha ni nañandeguerohorymoʼãiha. Haʼe oipota avei ñapensa ndaikatuiha jajerovia Jehováre, ha nokumplimoʼãiha umi mbaʼe opromete vaʼekue Iñeʼẽme. Péro haʼe iñañaitereígui péicha ijapu (Juan 8:44). ¿Mbaʼépa jajapo vaʼerã ani hag̃ua jaguerovia koʼã mbaʼe?

5. ¿Mbaʼéichapa Jesús ombohovái umi mokõi tentasión?

⁵ Ejepyʼamongetamína mbaʼéichapa Jesús ombohovái umi mokõi tentasión. Haʼe ningo ndodudái vaʼekue Itúa ohayhuha chupe, ha ojerovia vaʼekue hese ipyʼaite guive. Upévare nopensái 2 vése orrechasa hag̃ua Satanáspe ha ojevale Itúa heʼi vaʼekuére. Upearã Jesús oipuru umi párte oĩva Ñandejára Ñeʼẽme ha orekóva Jehová réra (Deut. 6:16; 8:3). Oipurúvo Ñandejára réra, Jesús ohechauka porã ojeroviaha Itúare, ha ndareíri ojapo upéva, pórke upe téra haʼe peteĩ garantía Jehová katuete okumplitaha entéro promésa ojapo vaʼekue. a

6, 7. ¿Mbaʼéichapa ikatu jagueropuʼaka Satanás ñandeataka vove ñemihaitépe?

⁶ Jaipurúramo Jehová Ñeʼẽ ha jajepyʼamongeta mbaʼépa heʼise Ñandejára réra, ñande avei ikatúta jagueropuʼaka Satanás ñandeataka vove ñemihaitépe. La Bíbliape jatopa umi téxto heʼíva Jehová ohayhuha entéro umi oadorávape chupe, koʼýte umi oñekevranta ha oñedeprimívape. Ñande jahechakuaa vove umíva oñeʼẽha avei ñanderehe, ñantendéta Satanás ijapuha heʼívo Jehová arakaʼeve nañanderayhumoʼãiha ni nañandeguerohorymoʼãiha (Sal. 34:18; 1 Ped. 5:8). Avei jarekóramo enkuénta Jehová siémpre ojapoha entéro mbaʼe ani hag̃ua omotĩ héra, ni mbaʼevéicharõ ndajadudamoʼãi Haʼe okumplitaha opa mbaʼe oprometéva ha omereseha jajerovia hese ñande pyʼaite guive (Prov. 3:5, 6).

⁷ ¿Péro mbaʼépa añetehápe Satanás la ohupytyséva? ¿Mbaʼépa la oipotáva jajapo? Upéva ojekuaa porã kuri Satanás omoĩrõ guare Jesús renondépe pe tercera tentasión.

8. ¿Mbaʼéichapa Satanás ohechauka porãma mbaʼépa la oipotáva pe tercera tentasiónpe?

⁸ (Elee Mateo 4:8-11). Ko tercera tentasiónpe Satanás noñomivéima mbaʼeve, síno ohechauka porã mbaʼépa añetehápe la oipotáva. Satanás ohechauka Jesúspe, ikatu oime peteĩ visión rupive, “umi goviérno oĩva ko múndope ha umi rrikésa orekóva”, péro ndohechaukái chupe umi mbaʼe vai orekóva koʼã goviérno. Upéi heʼi Jesúspe: “Koʼã mbaʼe ameʼẽmbaitéta ndéve reñesũramo che renondépe ha una ves jepe cheadora”. b ¡Adorasión hína la Satanás oipota vaʼekue! Haʼe oipota Jesús oheja Itúape ha orrekonose chupe idiósramo. Haʼe oofrese chupe peteĩ solusión haʼetévaicha isensíllova. Satanás ontendeka Jesúspe orekotaha kompletoite pe podér ha rrikésa orekóva umi nasión ha hiʼarive natekotevẽmoʼãi osufri mbaʼevete: Noñemoĩmoʼãi iñakãre koróna ojejapóva ñuatĩgui, ndoipoʼomoʼãi harreadórpe, ni ndojetorturamoʼãi yvyráre. Satanás añetehápe oofrese kuri chupe koʼã mbaʼe, upévare Jesús nonegái Satanás orekoha ipoguýpe umi goviérno oĩva ko múndope (Juan 12:31; 1 Juan 5:19). Katuete Satanás omeʼẽta kuri Jesúspe oimeraẽ mbaʼe anive hag̃ua oadora Itúape añoiténte.

9. a) ¿Mbaʼépa Satanás oipota ñandehegui? b) ¿Mbaʼéichapa oñehaʼã okonsegi upéva? c) ¿Mbaʼe mbaʼépa oike avei ñane adorasiónpe? (Ehecha pe rrekuádro “¿Mbaʼépa heʼise adorasión?”).

⁹ Ñane tiémpope, Satanás oipota avei jaadora chupe tahaʼe haʼeháicha. Haʼe ningo ko “múndo jára”, upévare pe adorasión fálsa oñemeʼẽva umi rrelihión oĩvape Babilonia Guasu poguýpe, añetehápe oñemeʼẽ  hína chupe (2 Cor. 4:4). Péro Satanás noñekontentái oreko haguére ipoguýpe millones oadoráva chupe, haʼe oipotaiterei umi oadoráva Jehovápe ojapo umi mbaʼe Ñandejára ndoguerohorýiva. Upearã Satanás oofrese ñandéve imúndope podér ha rrikésa, jaiko rangue peteĩ kristiánoicha ha ‘jahasa asy jajapo haguére iporãva’ (1 Ped. 3:14). Jahejáramo ipuʼaka ñanderehe koʼã tentasión ha ndajaadoravéi Jehovápe añoiténte, upéicharõ ñande jaikéma Satanás múndope, ha haʼetéta ñañesũva henondépe ha jaadora chupe, ha péicha oikóta chugui ñande dios. ¿Mbaʼéichapa ikatúta jagueropuʼaka ko tentasión?

10. ¿Mbaʼéichapa Jesús ombohovái pe tercera tentasión, ha mbaʼérepa ojapo upéicha?

¹⁰ Emañamína mbaʼéichapa Jesús ombohovái pe tercera tentasión. Haʼe ohechauka porã ni mbaʼevéicharõ ndohejamoʼãiha Jehovápe, ha upepete omosẽ Satanáspe heʼívo: “¡Tereho koʼágui Satanás!”. Ojapo haguéicha umi mokõi tentasiónpe, Jesús oipuru peteĩ párte oĩva Deuteronómiope orekóva Ñandejára réra. Haʼe heʼi: “Ñandejára Ñeʼẽme heʼi: ‘Ñandejára Jehovápe readora vaʼerã ha chupe añoite reservi vaʼerã’” (Mat. 4:10; Deut. 6:13). Péicha Jesús orrechasa upe ojeofrese vaʼekue chupe: Peteĩ puésto iñimportánteva pe múndope péro ndaipukumoʼãiva, ha peteĩ vída trankíla natekotevẽmoʼãihápe osufri. Jesús ohechauka vaʼekue Itúa añoite omereseha ojeadora, ha ‘una ves jepe oadoráramo’ Satanáspe, heʼiseha oñemoĩha ipoguýpe. Jesús orrechasa Satanáspe ha ndoipotái chupe idiosrã. Pe Diablo ohechakuaávo upéva, “oheja Jesúspe” (Mat. 4:11). c

11. ¿Mbaʼéichapa ikatu ñandepuʼaka Satanás rehe ha umi tentasión haʼe omoĩvare?

¹¹ Jesús ojapo haguéicha, ñande ikatu avei ñandepuʼaka Satanás rehe ha umi tentasión oĩvare imúndope, pórke jareko ñande favórpe peteĩ mbaʼe: Pe liverta jaiporavo hag̃ua, upéva hína peteĩ rregálo omeʼẽ vaʼekue ñandéve Jehová. Upévare avave, ni pe ánhel aña ipoderosoitéva, ndaikatúi ñandeovliga jaheja hag̃ua pe adorasión verdadéra. Ñande ‘ñañemoĩ mbaretéramo ikóntrape ha jajerovia mbarete’, haʼete hína jaʼéva: “¡Tereho koʼágui Satanás!” (1 Ped. 5:9). Nemanduʼákena Satanás osẽ hague oho Jesús orrechasa mbarete rire chupe. Ndareíri ningo la Biblia heʼi ñandéve: “Peñemoĩ mbaretékena pe Diáblore ha haʼe odiparáta pendehegui” (Sant. 4:7).

12. ¿Mbaʼéichapa Satanás ohechauka vaʼekue Edénpe haʼe raẽvete oñemoĩ hague pe adorasión oñemeʼẽvare Jehovápe?

¹² Pe última tentasión rupive, Satanás ohechauka vaʼekue haʼe raẽvete oñemoĩ hague pe adorasión oñemeʼẽvare Jehovápe. Heta áño upe mboyve, pe hardín de Edénpe Satanás ohechauka ndaijaʼeieteha pe adorasión verdadérare. Haʼe ombotavy Évape, ha Eva katu omboliga Adánpe omboyke hag̃ua Jehová omanda vaʼekue, péicha opyta hikuái Satanás poguýpe ha haʼe odomina chupekuéra (elee Génesis 3:1-5; 2 Cor. 11:3; Apoc. 12:9). Ikatu oime Adán ha Eva ndoikuaái mávapa upe ombotavy vaʼekue chupekuéra. Upéicharõ jepe, haʼekuéra oñepyrũ oadora Satanáspe ha oiko chugui idioskuéra. Avei omboligávo oñepuʼã hag̃ua Ñandejárare Edénpe,  Satanás odesafia pe derécho orekóva Jehová ogoverna hag̃ua, ha ndahaʼéi upévante, síno oataka pe adorasión verdadéra. ¿Mbaʼéichapa ojapo upéva?

13. ¿Mbaʼérepa oñeñeʼẽ jave mávapa oreko derécho ogoverna hag̃ua, ojehecha vaʼerã avei mávapepa ojeadora vaʼerã?

¹³ Oñeñeʼẽ jave mávapa oreko derécho ogoverna hag̃ua, ojehecha vaʼerã avei mávapepa ojeadora vaʼerã. Ñandejára ogovernáva opa mbaʼe, haʼe hína upe ‘ojapo vaʼekue entéro mbaʼe’, upévare haʼe añoite omerese ojeadora (Apoc. 4:11). Jehová ningo ojapo vaʼekue Adán ha Évape perfékto ha omoĩ chupekuéra pe hardín de Edénpe, upérõ haʼe oipota vaʼekue ko yvy saʼi saʼípe henyhẽ ohóvo yvypóra perféktogui. Koʼã yvypóra oadoráta kuri chupe ijeheguieténte ha ojaposégui voi upéva, péicha Jehová orresivíta pe adorasión ipotĩva, osẽva umi korasõ ipotĩvagui (Gén. 1:28). Satanás odesafia pe derécho orekóva Jehová ogoverna hag̃ua, pórke haʼe oipota ojeadora chupe ojeadora rangue Ñandejára Jehovápe añoiténte, upe ogovernáva opa mbaʼe (Sant. 1:14, 15).

14. ¿Ikatúpa jaʼe Satanás ohundi hague pe adorasión verdadéra? Emyesakã.

 ¹⁴ ¿Osẽ porãpa Satanás oatakávo pe adorasión verdadéra? Nahániri. Péro omomombyry Adán ha Évape Ñandejáragui. Upe guive Satanás oñemoĩ mbarete pe adorasión verdadérare, ha oñehaʼãmbaite omomombyry ikatumíva entérope Jehovágui. Por ehémplo, Jesús ou mboyve ko yvy ape ári Satanás kontinuadoite oataka vaʼekue umi oadorávape Ñandejárape. Ha umi kristiáno ypykue tiémpope katu omoñepyrũ peteĩ apostasía ivaietereíva, ha upéva káusare pe kongregasión kristiána ou oñemongyʼa ha haʼete voi ku opaitéva umi oadoráva Jehovápe haʼe oipotaháicha (Mat. 13:24-30, 36-43; Hech. 20:29, 30). Ha pe áño 100 rire, umi oadoráva Ñandejárape opyta prisionéroramo heta tiémpore Babilonia Guasu poguýpe, orrepresentáva entéro rrelihión fálsape. Péro Satanás ndaikatúi ohundi Ñandejára volunta, pórke Jehová oipota chupe añoiténte ojeadora. Ndaipóri avave ikatúva ojoko Ñandejárape okumpli hag̃ua haʼe oipotáva (Is. 46:10; 55:8-11). Haʼe ningo ni mbaʼevéicharõ nopermitimoʼãi oñemongyʼa héra. ¡Jehová siémpre okumpli ipropósito, núnka ndofallái!

15. a) ¿Mbaʼépa ojapo Jehová Edénpe umi opuʼã vaʼekuére hese? b) ¿Mbaʼépa ojapo ogarantisa hag̃ua oñekumplitaha katuete ivolunta?

¹⁵ Edénpe Jehová ensegída ojapo tekotevẽva guive ikatu hag̃uáicha ojekorrehi umi opuʼã vaʼekuépe hese, ha ogarantisa hag̃ua ivolunta oñekumplitaha katuete (elee Génesis 3:14-19). Adán ha Eva oĩ aja gueteri pe hardínpe, Jehová okondena umi mbohapy opuʼãvape hese. Ha haʼe ojapo upéva asegún máva raẽpa opeka vaʼekue: Oñepyrũ Satanásgui, upéi Eva ha ipahápe Adán. Okondenávo Satanáspe, upe rrevélde Adán ha Eva ndohechái vaʼekuépe, Jehová oprofetisa outaha peteĩ “familiare” ohundítava umi mbaʼe vai oikótava oñepuʼã rupi Ñandejárare. Upe “familiare” oñepromete vaʼekue iñimportantetereíta, pórke haʼe oipytyvõta ojeadora jey hag̃ua Jehovápe haʼe oipotaháicha.

16. Oñepuʼã rire hese Edénpe, ¿mbaʼe mbaʼépa ojapo Jehová oñekumpli hag̃ua ivolunta?

¹⁶ Oñepuʼã rire hese Edénpe, Jehová osegi ombaʼapo oñekumpli hag̃ua ivolunta. Haʼe ojapo tekotevẽva guive umi yvypóra imperfékto oadora hag̃ua chupe haʼe oipotaháicha, jahechataháicha pe ótro kapítulope (Heb. 11:4–12:1). Haʼe omeʼẽ avei ijespíritu sánto heta kuimbaʼe oskrivi vaʼekuépe la Biblia, umíva apytépe Isaías, Jeremías ha Ezequiel, ikatu hag̃uáicha oskrivi umi profesía iporãitéva heʼíva mbaʼéichapa ojeadora jeýta Jehovápe añoiténte. La Biblia oñeʼẽ upe téma iñimportantetévare heta hendápe. Entéro umi profesía oñekumplíta kuri pe “familiare” oñepromete vaʼekue rupive, ha Jesucristo haʼe hína pe párte prinsipál upe familiarégui (Gál. 3:16). Haʼe la odefende porãvéva pe adorasión verdadéra, ha upéva ojekuaa porã vaʼekue ombohovái lája pe tercera tentasión. Añetehápe, Jehová oiporavo voi Jesúspe okumpli hag̃ua umi profesía oñeʼẽva pe adorasión verdadérare (2 Cor. 1:20; Apoc. 19:10). Upéi Jesús oguenohẽta kuri Ñandejára puévlope pe  rrelihión fálsa poguýgui ha oadora jeýta hikuái Jehovápe añoiténte haʼe oipotaháicha.

17. ¿Mbaʼérepa iñimportanteterei ñandéve g̃uarã umi profesía heʼíva ojeadora jeytaha Jehovápe haʼe oipotaháicha?

¹⁷ Igustoiterei ha omombarete ñande jerovia jastudiáramo umi profesía oĩva la Bíbliape heʼíva mbaʼéichapa ojeadora jeýta Jehovápe haʼe oipotaháicha. Koʼã profesía ningo iñimportanteterei ñandéve g̃uarã, pórke jaipotaitereíma og̃uahẽ pe tiémpo enterove oĩva yvágape ha yvy ape ári oadora jeytaha oñondivepa Jehovápe añoite, upe ogovernáva opa mbaʼe. Umi profesía omeʼẽ avei ñandéve esperánsa, haʼégui peteĩ garantía oñekumplitaha umi ótra profesía oĩva la Bíbliape. Katuete ningo enterove jahechase mbaʼéichapa Jehová okumpli umi ipromésa, por ehémplo oñemoingove jey umi persóna jahayhúva, ojejapo ko yvýgui peteĩ paraíso ha ñaneresãi ha jaikove pára siémpre (Is. 33:24; 35:5, 6; Apoc. 20:12, 13; 21:3, 4).

18. ¿Mbaʼépa ñahesaʼỹijóta ko lívrope?

¹⁸ Ko lívrope ñahesaʼỹijóta umi profesía iporãitéva oĩva lívro de Ezequiélpe. Heta umi profesía omombeʼu mbaʼéichapa ojeadora jeýta Jehovápe añoiténte. Jahecháta avei mbaʼéichapa umi profesía oĩva lívro de Ezequiélpe oho avei umi ótra profesía oĩvare la Bíbliape, mbaʼéichapa oñekumplíta umíva Jesucristo rupive ha mbaʼérepa iñimportánte ñandéve g̃uarã (ehecha pe rrekuádro “Mbaʼe rehepa oñeñeʼẽ lívro de Ezequiélpe”).

19. ¿Mbaʼépa nde redesidi rejapotaha ha mbaʼérepa?

¹⁹ Pe desiérto de Judéape áño 29-pe, Satanás nokonsegíri la oipota vaʼekue: Omomombyry Jesúspe pe adorasión verdadéragui. ¿Ha mbaʼépa jajapóta ñande? Satanás koʼág̃a koʼýte ndoipotái jaadora Jehovápe haʼe oipotaháicha (Apoc. 12:12, 17). Hiʼãite ningo ko lívro ñanepytyvõ jajedesidi hag̃ua ñande pyʼaite guive ñañemoĩ Satanás rehe. Ha umi mbaʼe jaʼe ha jajapóvare tojekuaa porã ñande jaʼeha Jesús heʼi haguéicha: “Ñandejára Jehovápe readora vaʼerã”. Péicha ikatúta jahecha oñekumplívo Jehová volunta: Enterove oĩva yvágape ha yvy ape ári oñemoĩ peteĩ ñeʼẽme ha oadora jey Jehovápe haʼe omereseháicha, péicha haʼe orresivíta pe adorasión ipotĩva, osẽva umi korasõ ipotĩvagui.