SANSÓN omano rire oĩvaʼekue Israélpe peteĩ hués ha proféta hérava Samuel. Umi Israelgua ojoguaseterei umi tetã ambueguápe ha upévare ojerure Samuélpe omoĩ hag̃ua chupekuéra peteĩ rréi. Jehová ipochy hesekuéra, upéicharamo jepe heʼi Samuélpe omoĩ hag̃ua Saúlpe rreirã. Ñepyrũrã ko kuimbaʼe oñemomirĩvaʼekue, upéi katu oñemombaʼeguasu ha ipahápe naiñeʼẽrenduvéi Ñandejárape. Upémarõ Jehová omboyke chupe ha heʼi Samuélpe oiporavo hag̃ua Davídpe hekoviarã. Péro haʼe ohaʼarõvaʼerã heta áño ojupi hag̃ua.

Peteĩ jey David oho iñermanokuéra rendápe Saúl ehérsitope. Og̃uahẽvo otopa umi soldádo oryrýi osusũ okyhyjégui. Mbaʼe piko oiko mbaʼe? Ou chupekuéra peteĩ soldádo Filisteaygua hérava Goliat ha ipukúva 3 métro rupi voi. Ko kuimbaʼe ndetuichapa jepéva oñemoĩ ollama Israel ehérsitope ha otaky Jehováre. David ipochyeterei ha imitãramo jepe oho oñorairõ hendive. Oraha peteĩ hónda ha una partída ita akytã, ha osẽ ohug̃uaitĩ pe arriéro kakuaaitépe. Goliat oñembohory hese, David katu heʼi chupe: ‘Chémante aganáta añorairõgui Jehová rérape’. Unavénte ojapi chupe ha Goliat oho yvýpe. Upépe David oipeʼa chugui ijespáda ha oñakãʼo. Umi soldádo Filisteaygua ohechávo upéva oñemondýi ha itarovávaicha odiparapa.

Saúl omombaʼeterei Davídpe ipyʼaguasu haguére ha upévare ogueraha chupe ijehérsitope. Péro upéi ohechávo mbaʼéichapa David ivale ou ndaijaʼevéi hese. Ha ani hag̃ua ojejuka David odipara ha okañy. Jepe heta áñore oiko kañyháme Saúl káusare haʼe akóinte omombaʼe chupe. Mbaʼéicha rupípa? Oikuaágui Jehová omoĩ hague Saúlpe ogoverna hag̃ua. Tiémpo rire Saúl omano ñorairõhápe ha David ojupi hendaguépe Jehová heʼi haguéicha.

David ningo omopuʼãsevaʼekue peteĩ témplo Jehovápe g̃uarã, péro haʼe heʼi chupe peteĩ ifamiliare ojapotaha upéva. Ha itaʼýra Salomón omopuʼã upe témplo. Upéi Jehová ojapo David ndive peteĩ kompromíso iporãitereíva. Heʼi chupe umi rréi ogovernátava Israélpe outaha iñemoñarégui ha peteĩva haʼetaha pe osalvátava yvyporakuérape oñepromete haguéicha Edénpe. Upéva haʼéta hína Jehová Rembiporavo térã Mesías ogovernátava opa ára g̃uarã.

David ovyʼaiterei upévare ha omeʼẽ heta óro, pláta ha materiál oñekotevẽva oñemopuʼã hag̃ua pe témplo. Avei ohai heta sálmo térã purahéi omombaʼeguasu hag̃ua Ñandejárape. Omano mboyvemi oguerohory Jehovápe ojevale haguére hese ha heʼi: ‘Ñandejára espíritu oñeʼẽ che rupive ha iñeʼẽ oĩ che jurúpe’ (2 Samuel 23:2).

(Oñeguenohẽ 1 Samuel, 2 Samuel; 1 Crónicas; Isaías 9:7; Mateo 21:9; Lucas 1:32; ha Juan 7:​42-gui.)