Ohasáma un tiémpo Jesús ojevautisa hague, ha hetaiterei persónama oikuaa chupe. Oĩma hetaiterei hudío ohecháva umi milágro haʼe ojapóva, ha opárupi oñemombeʼu hembiapokue. Upévare, Jerusalénpe oikórõ guare pe Enrramáda Guýpe Jeiko Arete, umi hénte ohekajoa chupe.

Umi hénte ojodiskutipa oñeʼẽ jave Jesúsre. Oĩ heʼíva: “Kuimbaʼe nevuénova ningo péva”. Ótro katu heʼi: “Nahanirietépa, pévango oiko ombotavy umi héntepe” (Juan 7:12). Péicha oñeñeʼẽ hese pe arete oñepyrũvo. Péro avave noñanimái heʼi ojeroviaha Jesús rehe, pórke ojekyhyje umi líder rrelihióso hudíogui.

Pe arete aja, ojehechásapyʼa Jesúspe pe témplope. Haʼe omboʼe umi héntepe ha haʼekuéra ijurujaipa oñatende hese. Jesús ningo ndohóiva umi eskuéla rrelihiósa hudíape, upévare umi hénte heʼijoa: “Chupéngo noñehekomboʼéi umi eskuélape, ¿mbaʼéicha piko upéicharõ oikuaa hetaite mbaʼe?” (Juan 7:15).

Jesús heʼi: “Che naporomboʼéi chejehegui reínte, amboʼe guei upe chembou vaʼekue heʼíva. Oĩramo ojaposéva hembipota, oikuaáta oúpa Ñandejáragui umi mbaʼe amboʼéva térãpa añeʼẽ chejehegui reínte” (Juan 7:16, 17). Umi mbaʼe Jesús omboʼéva nokontradesíri Ñandejára Léi heʼíva. Ha upéva ohechauka porã haʼe noñembotuichaseiha, síno oipota oñemombaʼeguasu Ñandejárape.

Jesús heʼi: “Moisés omeʼẽ vaʼekue peẽme pe Léi, ¿ajépa? Péro ni peteĩva peẽ ndapejapói pe Léi heʼíva. ¿Mbaʼére piko chejukase?”. Umi hénte apytépe oĩ heta oúva mombyrýgui pe areterã ha ndoikuaái oĩha ojukaséva Jesúspe. Haʼekuéra ni ndogueroviaséi oĩne hag̃ua ojukaséva peichagua mboʼehára ikatupyryetévape. Upévare oimoʼã hikuái Jesús oĩ vaiha iñakãgui. Haʼekuéra heʼi: “Ndéngo oiméne reñendemonia mbaʼe. ¿Máva piko ndejukase?” (Juan 7:19, 20).

Ojapo un áño imédio umi líder rrelihióso ojukase hague Jesúspe omonguera haguére peteĩ kuimbaʼépe peteĩ sábadope. Péro Jesús omopensa hag̃ua chupekuéra ha ohechauka hag̃ua vyroreiha la heʼíva hikuái, heʼi: “Peteĩ kuimbaʼépe oñesirkunsidáramo sabadokue oñekumpli hag̃ua Moisés Léi, ¿mbaʼére piko upéicharõ pendepochy vaipa amonguera haguére peteĩ kuimbaʼépe sábado? Anivéna pehusga pehechávarente, pehusga guei tekojojápe” (Juan 7:23, 24).

Umi hénte Jerusalengua oikuaáva la oikóva, heʼi: “¿Ndahaʼéi piko kóva pe kuimbaʼe ojehekáva ojejuka hag̃ua? Péina ápe oñeʼẽ hína opavave rovake ha avave ndeʼíri chupe mbaʼeve. ¿Noiméi piko ñande ruvichakuéra opensa kóva haʼeha pe Cristo mbaʼe?”. Upéicharõ jepe, umi hénte ndogueroviái Jesús haʼéne hag̃ua pe Cristo. ¿Mbaʼérepa? Haʼekuéra heʼi: “Ñandéngo jaikuaa moõguápa ko kuimbaʼe, pe Cristo ou vove katu avave ndoikuaamoʼãi moõguápa haʼe” (Juan 7:25-27).

Upéi Jesús osẽ heʼi: “Peẽ chekuaa, ha peikuaa moõguápa che. Chéngo ndajúi chejeheguínte, pe chembou vaʼekue katu añetehápe oikove, ha peẽ ndapeikuaái chupe. Che katu aikuaa chupe, aju voi hérape, ha Haʼe chembou” (Juan 7:28, 29). Ohendu rire upéva, oĩ ojagarraséva Jesúspe omoinge hag̃ua kárselpe térã ojuka hag̃ua chupe. Péro nosẽi chupekuéra la ijidéa, pórke ndahaʼéi gueteri pe tiémpo Jesús omano hag̃ua.

Upéicharamo jepe, oĩ heta ojeroviáva Jesús rehe. ¡Ha mbaʼéicha voi piko ndojejeroviamoʼãi hese ko Jesús ojapómava heta milágro! Por  ehémplo oguata y apére, okalma torménta vai, omongaru hetaiterei persónape oipurúvo mbovymi pan ha pira, omonguera hasývape, oguataʼỹvape, ohechaʼỹvape, ilépravape ha omanóva jepe omoingove jey. Upévare umi ojeroviáva Jesúsre heʼi: “Ou vove pe Cristo, haʼe ndojapomoʼãi hetave milágro ko kuimbaʼe ojapo vaʼekuégui, ¿ajépa?” (Juan 7:31).

Umi fariséo ohendu rire umi hénte heʼiha koʼã mbaʼe, haʼekuéra ha umi saserdóte prinsipál omondo unos kuánto soldádo ojagarra hag̃ua Jesúspe.