Jesús ojapóma heta mbaʼe porã Galiléape. Péro haʼe avei opensa ohóvo ótro lugárpe, upévare heʼi: “Aha vaʼerã ótro siudápe amombeʼu hag̃ua umi marandu porã oñeʼẽva Ñandejára Rréinore”. Jesús “oho opredika Judéape umi sinagogahárupi” (Lucas 4:43, 44). Upérõ primavérama ha hiʼag̃uimbaite peteĩ arete Jerusalénpe.

Jesús ningo ojapo heta mbaʼe iporãitereíva Galiléape, péro la Biblia nomombeʼuguasúi mbaʼe mbaʼépa ojapo vaʼekue Judéape. Amalisia upépe saʼi oĩ ohendúva chupe. Upéicharõ jepe, haʼe kyreʼỹme opredika ha ojapo heta mbaʼe porã ohohápente.

Upe riremínte Jesús oho Jerusalénpe, pe siuda iñimportantevéva oĩva Judéape. ¿Maʼerãpa oho upépe? Ofesteha hag̃ua pe Páskua áño 31-pegua. Jerusalénpe oĩ peteĩ piléta hérava Betzata, pe “ovechakuéra rokẽ ypýpe”. Upépe oho hetaiterei hasýva, isiégova ha oguataʼỹva. Haʼekuéra oimoʼã ikatutaha okuera oikéramo pe pilétape okuʼe jave pe y.

Koʼág̃a sábado hína ha Jesús oho pe piléta ypýpe. Upépe ohecha oĩha peteĩ karai hasýva ojapóma 38 áño. Jesús oporandu chupe: “¿Rekuerasépa?”. Pe kuimbaʼe heʼi: “Karai, ndarekói ningo avave chepytyvõmi vaʼerã aike hag̃ua pe y oñemonguʼe jave, ha che aha aja, ótro itenondéma cherehe” (Juan 5:6, 7).

Jesús osẽ heʼi peteĩ mbaʼe osorprendéva pe kuimbaʼépe ha entéro umi ohendúvape: “Epuʼã, ejagarra nde rupa ha tereho” (Juan 5:8). Upepete pe kuimbaʼe okuera, ojagarra hupa ha oguata.

Péro umi hudío ovyʼa rangue pe milágrore, osẽ heʼi pe kuimbaʼépe: “Koestedía ningo sábado, ha ndovaléi regueraha nde rupa”. Pe karai heʼi chupekuéra: “Pe kuimbaʼe chemonguera vaʼekue voi heʼi chéve: ‘Ejagarra nde rupa ha tereho’” (Juan 5:10, 11). Umi hudío ipochy oñemonguera haguére pe kuimbaʼépe peteĩ sábadope.

Upévare haʼekuéra oporandu pe karaípe: “¿Máva piko upe heʼi vaʼekue ndéve: ‘Ejagarra nde rupa ha tereho’?”. Upérõ guare oĩ kuri hetaiterei hénte upe lugárpe ha “Jesús ohóma upégui”. Upéicha rupi pe kuimbaʼe ndoikuaái mávapa la omonguera vaʼekue chupe (Juan 5:12, 13). Péro upe rire ojotopa Jesúsndi pe témplope, ha upépe oikuaáma mávapa pe omongueráva chupe.

Upéi, pe karai osẽ oho ha ojotopa umi ombaʼeporandu vaʼekuéndi chupe. Umi hudío oikuaa rire mávapa ojapo kuri upe milágro, oho Jesús rendápe. ¿Maʼerãpa oho hikuái? ¿Oikuaase piko mbaʼéichapa haʼe ojapo koʼãichagua milágro? Nahániri. Haʼekuéra okopi Jesúsre ojapo haguére pe milágro pe día sábadope. Ha ndahaʼéi voi upévante. Opersegi voi katu chupe hikuái.