Jesús ojapo rire pe Sermón del Mónte, oho Capernáumpe. Upépe, unos kuánto hudío orekóva autorida oñemboja hendápe. Koʼã kuimbaʼépe omondo peteĩ ofisiál del ehérsito rrománo, orekóva ipoguýpe 100 soldádo.

Ko ofisiál oreko peteĩ hembiguái ohayhuetereíva, péro koʼág̃a hasyete ha omanombotaitéma. Pe ofisiál ningo ndahaʼéi hudío, upéicharõ jepe ojerureka ajúda Jesúspe. Umi hudío heʼi Jesúspe oipytyvõmi hag̃ua pe tembiguáipe, pórke “hasyete, ndaikatúi oguata” ha osufrieterei hína (Mateo 8:6). Haʼekuéra oñeʼẽ porãiterei pe ofisiál rehe, ha heʼi: “Pe ofisiál ningo omerese reipytyvõ chupe, haʼe ohayhu ñane retã ha ojapouka voi oréve pe sinagóga” (Lucas 7:4, 5).

Upepete Jesús osẽ oho hendivekuéra. Péro og̃uahẽmbotávo hikuái, pe ofisiál omondo iñamigokuérape heʼi hag̃ua chupe: “Aníntena reju Karai, che ningo namereséi reg̃uahẽ che rógape. Upévare voi nañanimái kuri aha ne rendápe” (Lucas 7:6, 7). ¡Ajépa iñumildete ko kuimbaʼe! Hiʼarive haʼe oreko autorida ha omanda guasu. Umi rrománo otrata vaieterei jepi ijesklavokuérape, péro ko kuimbaʼe ndahaʼeiete upéicha (Mateo 8:9).

Pe ofisiál oikuaa umi hudío ndojeheʼaiha umi ndahaʼéivare hudío (Hechos 10:28). Oime vaʼerã upévare ojerure iñamigokuérape heʼi hag̃ua Jesúspe: “Erénte okuera hag̃ua che rembiguái, ha haʼe okuerátama” (Lucas 7:7).

Jesús oñesorprende ohendúvo upéva, ha osẽ heʼi: “Ni Israélpe ndatopáiva gueteri peichaite peve ojeroviáva” (Lucas 7:9). Pe ofisiál amigokuéra og̃uahẽvo pe ógape, ohecha hikuái pe kuimbaʼe hasyete vaʼekue okueramaha.

Ojapopa rire pe milágro, Jesús oaprovecha pe okasión ha heʼi Ñandejára ovendesitaha avei umi ndahaʼéivape hudío ha orekóva fe. Haʼe heʼi: “Oúta heta hénte kuarahyresẽ ha kuarahyreikéguio, oguapy hag̃ua mesápe Abrahán, Isaac, ha Jacob ndive pe Rréino yvagapeguápe”. Péro, ¿mbaʼépa oikóta umi hudío naiñeʼẽrendúivagui? Jesús heʼi: “Oñemosẽta ha opytáta pytũmbýpe. Upépe haʼekuéra hasẽ soro ha ipyahẽta ñembyasýgui” (Mateo 8:11, 12).

Umi hudíope raẽ oñemeʼẽ oportunida oĩ hag̃ua Ñandejára Rréinope, péro orrechasáramo upe invitasión, Ñandejára omboykéta avei chupekuéra. Haʼe orresivíta umi ndahaʼéivape hudío, jaʼe porãsérõ g̃uarã “oguapy hag̃ua mesápe”, térã “pe Rréino yvagapeguápe”.