Unos kuánto astrólogo og̃uahẽ oúvo ésteguio Jerusalénpe. Haʼekuéra ningo omaña umi estréllare ha heʼi ikatuha oikuaa pe futúro (Isaías 47:13). Koʼã kuimbaʼe oĩrõ guare ivállepe, ohecha peteĩ “estrélla” ha osegi heta kilómetrore, péro pe estrélla ndogiái chupekuéra Belénpe, síno Jerusalénpe.

Og̃uahẽvo umi astrólogo, oporandu: “¿Moõiko oime pe hudiokuéra rréi onase vaʼekue? Rohecha ningo ijestrélla kuarahyresẽ gotyo ha upévare roju romombaʼe hag̃ua chupe” (Mateo 2:1, 2).

Pe rréi Jerusalengua hérava Herodes, ipochyeterei ohendúvo umi mbaʼe. Upémarõ ohenoika umi saserdóte prinsipálpe ha umi ótro líder rrelihióso hudíope, ha oporandu chupekuéra moõpa onase vaʼerã pe Cristo. Haʼekuéra imanduʼa Ñandejára Ñeʼẽ heʼi hague onasetaha ‘Belénpe’ (Mateo 2:5; Miqueas 5:2). Ohendúvo upéva, Herodes ohenoika kirirĩhaitépe umi astrólogope ha heʼi chupekuéra: “Tapeho peheka porã pe mitãʼi, ha ág̃a petopa vove, peju pemombeʼu chéve aha hag̃ua avei amombaʼe chupe” (Mateo 2:8). Péro Herodes añetehápe oikuaasénte moõpa oĩ pe mitã ojuka hag̃ua chupe.

Umi astrólogo osẽ rire oho, oiko peteĩ mbaʼe oñeimoʼãʼỹva. Pe “estrélla” ohecha vaʼekue hikuái éste gotyo, koʼág̃a oho henonderãkuéra. Añetehápe upéva ndahaʼéi peteĩ estrélla normál, síno oñemoĩ voi ogia hag̃ua umi astrólogope. Péro peichaháguinte pe estrélla opyta peteĩ óga ári. Upe ógape oiko José, María ha Jesús, tuichaʼivémava ohóvo koʼág̃a.

Umi astrólogo oikévo pe ógape, otopa Maríape imemby Jesús ndive. Haʼekuéra oñepyrũ omombaʼe pe mitãme ha omeʼẽ chupe heta rregálo: óro, insiénso ha mírra. Upe rire, ohótavo hikuái Herodes rendápe omombeʼu hag̃ua chupe moõitépa oĩ pe mitã, Ñandejára oavisa chupekuéra iképe ani hag̃ua ojapo upéva. Upémarõ haʼekuéra oho jeýnte hetãme, péro ótro tapérupi.

¿Mávapa nde ere omoĩne hague pe “estrélla”? Oiméne nemanduʼa ko estrélla ñepyrũrã ndogiái hague umi astrólogope Belén gotyo Jesús oĩháme, síno ogueraha raẽ chupekuéra Jerusalénpe, Herodes rendápe. Ha jaikuaaháicha, haʼe ojukase kuri Jesúspe. Péro Ñandejára ndoavisáirire umi astrólogope, Herodes ojukáta kuri Jesúspe. Añetehápe ningo Satanás la oipotáva ojejuka Jesúspe, ha upearã ojevale pe estréllare.