Jesús opyta kuri 40 día pe desiértope, péro oho mboyve Galiléape, oho jey Juan el Bautista rendápe. Juan ohechávo Jesús ouha hína, heʼi umi oĩvape hendive: “¡Pemañami, Ñandejára Ovecharaʼy, oipeʼáva yvyporakuéra pekádo! Haʼe hína pe che haʼe vaʼekue: Che rapykuéri ou peteĩ kuimbaʼe oñemotenondéva cherehe, haʼe ningo oĩma vaʼekue che mboyve” (Juan 1:29, 30). Juan ijedamiéramo jepe Jesúsgui, oikuaa porã Jesús oikóma hague yvágape heta tiémpore ou mboyve ko yvy ape ári.

Péro unas kuánta semána upe mboyve, Jesús oúrõ guare hendápe ojevautisa hag̃ua, Juan noĩri gueteri segúro Jesús haʼeha pe Mesías oñepromete vaʼekue. Péro koʼág̃a haʼe heʼi: “Ni che ndaikuaái kuri chupe, péro aporovautisa hína ýpe, ikatu hag̃uáicha haʼe ojekuaauka umi Israelguápe” (Juan 1:31).

Upéi Juan omombeʼu umi héntepe mbaʼépa oiko ovautisárõ guare Jesúspe. Haʼe heʼi: “Ahecha pe espíritu sánto oguejy yvágagui peteĩ palómaicha, ha opyta hiʼári. Ni che ndaikuaái kuri chupe, péro Upe chembou vaʼekue aporovautisa hag̃ua ýpe heʼi chéve: ‘Rehecha vove pe espíritu sánto oguejy ha opytaha peteĩ kuimbaʼe ári, reikuaáta upéva haʼeha pe oporovautisáva espíritu sántope’. Che ahecha vaʼekue upéva, ha amombeʼu haʼeha Ñandejára Raʼy” (Juan 1:32-34).

Al ótro día, Juan oĩ hína mokõi idisípulondi. Ha ohechávo Jesús ouha heʼi jey: “¡Pemañami, Ñandejára Ovecharaʼy!” (Juan 1:36). Umi mokõi idisípulo ohendúvo upéva oñepyrũ osegi Jesúspe. Peteĩva héra Andrés, ha pe ótro katu Juan, pe oskrivi vaʼekue ko rreláto. Amalisia Juan ha Jesús oñoprímo, pórke Juan sy haʼe hína Salomé, posívlemente haʼéva María ermána. Ha Salomé ména katu Zebedeo.

Jesús ohechakuaa Andrés ha Juan osegiha chupe, upémarõ oporandu chupekuéra: “¿Mbaʼe peipota?”.

Haʼekuéra heʼi: “Rabí (heʼiséva Mboʼehára), ¿moõiko repyta hína?”.

Jesús heʼi: “Pejúna pehecha” (Juan 1:37-39).

Upérõ las cuatro de la tárderupi, ha Andrés ha Juan opyta Jesús ndive kaʼaruete peve. Andrés ovyʼaiterei ha pyaʼe voi oho oheka iñermáno Simónpe, hérava avei Pedro, ha heʼi chupe: “Rotopa pe Mesíaspe” (Juan 1:41). Ha ogueraha chupe Jesús rendápe. Oiméne upe aja Juan oheka avei iñermáno Santiágope ha ogueraha chupe Jesús rendápe. Péro Juan ndoskrivíri upéva irrelátope.

Al ótro día Jesús otopa Felípere. Haʼe ningo Betsaidagua, opytáva mar de Galilea kóstare,  nórte gotyo. Upe siuda haʼe avei Andrés ha Pedro válle. Jesús heʼi Felípepe: “Eju chemoirũ” (Juan 1:43).

Upéi Felipe oheka Natanaélpe, hérava avei Bartolomé, ha heʼi chupe: “Oime rotopa pe kuimbaʼe oñeñeʼẽ hague Moisés Léipe ha Profetakuéra kuatiañeʼẽme, Jesúspe, José raʼy Nazaretgua”. Natanael katu ndogueroviaséi ha heʼi: “¿Nazarétgui piko ikatu osẽ peteĩ mbaʼe iporãva?”.

Péro Felipe heʼi jey chupe: “Eju ehecha”. Jesús ohechávo Natanael ouha hendápe heʼi hese: “Pemañami, peteĩ isrraelíta arakaʼeve noporombotavýiva”.

Natanael katu oporandu chupe: “¿Nde piko mbaʼéicha chekuaa?”.

Jesús ombohovái: “Felipe nerenói mboyve rohecha kuri pe ígo máta guýpe”.

Natanael oñesorprende ha heʼi: “Mboʼehára, nde hína Ñandejára Raʼy, nde hína pe Rréi Israelgua”.

Jesús oporandu chupe: “¿Nde piko reguerovia haʼe haguére ndéve rohecha hague pe ígo máta guýpe? Heta mbaʼe tuichavéva koʼãvagui rehecháta hína”. Upéi Jesús opromete: “Añetehápe haʼe peẽme: Pehecháta pe yvága ojavri ha Ñandejára anhelkuéra ojupi ha oguejyha pe Yvypóra Raʼy rendápe” (Juan 1:45-51).

Upe riremínte Jesús ha idisipulokuéra ojerretira rrío Jordán ypýgui, ha oviaha Galiléare.