Peteĩ tiémpore, Jesús opyta pe rrío Jordán ypýrupi, pe sóna héravare Perea (Juan 10:40). Koʼág̃a oho Jerusalénpe, opytáva sur gotyo.

Jesús ndoviahái haʼeño. Omoirũ chupe idisipulokuéra ha avei “hetaiterei hénte”, ijapytepekuéra umi impuésto kovraha ha pekadorkuéra (Lucas 14:25; 15:1). Umi fariséo ha umi mboʼehára leipegua otakýva Jesúsre, oĩ avei upépe. Haʼekuéra ohendu kuri umi ehémplo oñeʼẽva pe ovecha okañy vaʼekuére, pe taʼýra ofallávare ha pe karai iplátava ha Lázarore. Péro koʼág̃a tekotevẽ ojepyʼamongeta hikuái isituasionkuérare (Lucas 15:2; 16:14).

Koʼág̃a Jesús oñemongeta idisipulokuérandi, ha oiméne opensa gueteri umi mbaʼe heʼívare umi oñemoĩva hese. Haʼe omomanduʼa jey idisipulokuérape umi mbaʼe omboʼéma vaʼekue oĩrõ guare Galiléape.

Por ehémplo, Jesús heʼi: “Oĩtamante voi umi mbaʼe oporomoñepysangáva. ¡Péro tuicha hoʼa vaíta upe ojapóvape upéicha! [...] Peñatendékena pendejehe. Ha ne ermáno opekáramo, emongavaju chupe. Ha oñarrepentíramo eperdona chupe. Ofalláramo jepe nendive siete vése un díape, ha ou siete vése heʼi ndéve: ‘Añarrepenti’, reperdona vaʼerã chupe” (Lucas 17:1-4). Pedro ohendúvo upéva, oiméne imanduʼa raʼe oporandu hague Jesúspe tekotevẽpa oporoperdona siete vése (Mateo 18:21).

¿Ikatúnepa umi disípulo okumpli umi mbaʼe Jesús heʼíva? Haʼekuéra ojerure Jesúspe: “Orepytyvõna rojeroviave hag̃ua”. Ha haʼe oasegura chupekuéra: “Pende jerovia tuicháramo peteĩ mostása raʼỹicha, pejéta ko móra mátape: ‘¡Ejehapoʼo ha tereho eñeñotỹ pe márpe!’, ha ojapóta” (Lucas 17:5, 6). Jahechaháicha, michĩmínte jepe jajeroviáramo, tuichaiterei mbaʼéma ikatu jajapo.

Upéi Jesús omboʼe idisipulokuérape mbaʼérepa iñimportánte ñaneumílde, ha heʼi: “¿Mávapa pende apytépe oguerekóva peteĩ tembiguái oaráva hína térã oñangarekóva ijovechakuérare, heʼítava chupe ou rire ñúgui: ‘Ejúntema eguapy mesápe’? Nahániri, ¿ajépa?, heʼíta guei chupe: ‘Ejapo chéve che senag̃ua, emoĩ ne delantál ha eñatende cherehe asenamba peve. Upe rire ág̃a nde resenáta’. Haʼe ndoagradesemoʼãi hembiguáipe ojapo haguére hembiapo, ¿ajépa? Peẽ avei upéicha, ág̃a pejapopa vove umi tembiapo oñemeʼẽ vaʼekue peẽme, peje vaʼerã: ‘Ore ningo tembiguái ndorovaléiva mbaʼeverã. Pe rojapo vaʼekue rojapónte vaʼerã voi kuri’” (Lucas 17:7-10).

Enterove persóna oservíva Ñandejárape ontende vaʼerã iñimportantetereiha ñamotenonde Ñandejára rembipota. Avei káda uno ñanemanduʼa vaʼerã tuichaitereiha pe priviléhio jarekóva ikatu haguére ñambaʼapo chupe g̃uarã.

Amalisia Jesús omombeʼu riremi ko ehémplo, og̃uahẽ hendápe peteĩ mensahéro. Omondo chupe María ha Marta, Lázaro ermanakuéra. Haʼekuéra oiko Judeápe, pe puévlo héravape Betania. Pe mensahéro heʼi Jesúspe: “Karai, hasy ningo ne amígo rehayhuetéva” (Juan 11:1-3).

Jesús oikuaámarõ jepe iñamígo hasyeteha, haʼe opyta trankílo porãnte, ha heʼi: “Ko mbaʼasy ndahaʼéi haʼe omano hag̃ua, síno oñembotuicha hag̃ua Ñandejárape, ha péicha Ñandejára Raʼy ikatúta oñembotuicha avei”. Ha opytave upe lugárpe dos día. Upéi osẽ heʼi idisipulokuérape: “Jaha jey Judéape”. Haʼekuéra katu heʼi chupe: “Mboʼehára, ramoite ningo umi hudío ndejapise itápe ndejuka hag̃ua, ¿ha piko reho jeýta upépe?” (Juan 11:4, 7, 8).

Jesús heʼi: “Peteĩ día ningo oreko doce óra hesakãha, ¿ajépa? Oĩramo oikóva arakuépe, noñepysangái  mbaʼevére ohechágui pe mbaʼerendy ohesapéva ko múndo. Péro oĩramo oikóva pyharekue, oñepysanga oimeraẽ mbaʼére oĩgui pytũmbýpe” (Juan 11:9, 10). Oiméne Jesús heʼise raʼe neʼĩraha opa pe tiémpo Ñandejára omeʼẽ vaʼekue chupe opredika hag̃ua, ha haʼe oaprovechapaite vaʼerã upe tiémpo hembýva chupe ko yvy ape ári.

Jesús heʼi avei: “Ñane amígo Lázaro oke hína, péro che aháta amombáy chupe”. Umi disípulo oimoʼã Lázaro opytuʼuha ha ojerrekuperatamaha, ha heʼi hikuái: “Ore Ruvicha, oimérõ oke hína okueráta”. Péro Jesús heʼi porãntema chupekuéra: “Lázaro omanóma [...]. Jahána hendápe” (Juan 11:11-15).

Umi disípulo oikuaa ikatuha ojejuka Jesúspe Judéape, péro haʼekuéra ndohejaséi chupe, upévare Tomás heʼi iñirũnguérape: “Jaha katu hendive, tañamano jepe raʼe” (Juan 11:16).