Jesús ningo haʼe vaʼekue peteĩ kuimbaʼe perfékto, upéicha rupi ndojepyʼapyrasái ni ndojedesesperái oimeraẽ ótro yvypóraicha. Péro ohechauka oñeinteresaha umi héntere. Haʼe oñemoĩ ilugarpekuéra ha oĩ dispuésto ojapóvo hesehapekuéra hetave mbaʼe upe tekotevẽvagui. Jesús oiporiahuverekoiterei vaʼekue umi héntepe, upévare oipytyvõ opa ikatúvape. Ehecha kapítulo 32, 37, 57 ha 99.

Tahaʼe imitãva ha ijedáva, ohechakuaa ikatuha oñemboja Jesús rendápe, pórke haʼe noñembotuichái ni ndoikói oñembotavy umi héntegui. Haʼekuéra oñeñandu porã Jesúsndi, ohechágui haʼe oñeinteresaha káda persónare. Ehecha kapítulo 25, 27 ha 95.

Jesús pyʼỹinte oñemboʼe ipyʼaite guive Itúvape, tahaʼe haʼeñohápe, térã oĩ jave umi oadorávandi avei Jehovápe. Haʼe oñemboʼe heta vése, ha ndahaʼéi okaru hag̃uánte. Ojapo avei orasión oagradese hag̃ua Itúvape, omombaʼeguasu hag̃ua chupe, ha odesidíta jave umi mbaʼe iñimportánteva. Ehecha kapítulo 24, 34, 91, 122 ha 123.

Jesús ningo ikatu kuri omboyke tiémpo ijupe g̃uarã, térã opytuʼumi hag̃ua. Péro, omeʼẽ rangue gústo ijupe, haʼe omotenonde umi héntepe. Haʼe núnka nopensái ijehénte. Péicha avei omoĩ ñandéve peteĩ ehémplo iporãitereíva jasegi hag̃ua. Ehecha kapítulo 19, 41 ha 52.

Jesús ndahaʼéi omboʼénteva iporãha ñaporoperdona. Haʼe voi omoĩ upe ehémplo operdonávo idisipulokuérape ha avei heta persónape. Ehecha kapítulo 26, 40, 64, 85 ha 131.

Ojeprofetisáma vaʼekue la majoría umi hudío orrechasataha pe Mesíaspe ha iñenemigokuéra ojukataha chupe. Upéicharõ, Jesús ikatúnte kuri noñehaʼãguasúi umi hénte rehehápe oikuaávo mbaʼépa ohaʼarõ chupe. Péro, upéva rangue, haʼe kyreʼỹme oipytyvõ umi héntepe oñemoag̃ui hag̃ua Jehováre. Péicha omoĩ ehémplo entéro idisípulo ohasávape situasión ijetuʼúva, tahaʼe oĩgui oñembohorýva térã oñemoĩva hesekuéra. Ehecha kapítulo 16, 72 ha 103.

Jesús mombyryeterei ohasa entéro yvypórape, por ehémplo iñarandukuépe ha umi mbaʼe oikuaávape. Haʼe iperfékto rupi, ivaleterei ha ndorekói mbaʼeveichagua defékto físiko. Upéicharõ jepe, iñumílde ha oservi ótrope. Ehecha kapítulo 10, 62, 66, 94 ha 116.

Jesús siémpre ohechauka ipasiensiaha ijapostolkuérandi ha avei umi ótra persónandi. Haʼekuéra heta vése ndaikatúi osegi iñehémplo, térã ndojapói haʼe heʼíva chupekuéra. Upéicha jave, Jesús orrepeti jeýnte chupekuéra umi konsého ikatu hag̃uáicha oñemoag̃ui hikuái Ñandejárare. Ehecha kapítulo 74, 98, 118 ha 135.