NDÉPA reikuaa mávapa ko kuña ha koʼã mokõi kuimbaʼe? Ko kuña héra María Magdalena, haʼéva Jesús amíga. Ha umi kuimbaʼe ijao morotĩva katu mokõi ánhel. María omañahína pe túmba ryepýpe, oñemoĩhaguépe Jesús retekue. Péro hetekue ndaiporivéima koʼág̃a! Máva piko ogueraháraʼe? Jahechamína.

Jesús omano rire, umi saserdóte heʼi Pilátope: ‘Oikovépe gueteri Jesús heʼivaʼekue oñemoingove jeytaha chupe tres día haguépe. Upévare, emondomi oñangarekovaʼerã pe túmbare. Upéicharõ idisipulokuéra ndaikatumoʼãi omonda hetekue ha upéi heʼi oñemoingove jey hague chupe!’. Pilato heʼi umi saserdótepe omondo hag̃ua soldadokuéra pe túmba oĩhápe.

Péro voi porã pe tercer día Jesús omanohaguépe, ombou sapyʼa Jehová peteĩ ánhel. Haʼe ombojere ha oipeʼa pe ita ombotýva pe túmba. Umi soldádo okyhyjetereígui ndaikatúi ni omýi. Upéi, omañávo hikuái pe túmba ryepýpe, Jesús retekue ndaiporivéima! Oĩ soldadokuéra ohóva pe siudápe omombeʼu umi saserdótepe. Ndépa reikuaa mbaʼépa ojapo umi saserdóte aña? Opaga hikuái umi soldádope ijapu hag̃ua. ‘Peje idisipulokuéra oguerahahague peẽ peke aja’, heʼi chupekuéra umi saserdóte.

Upe aja, Jesús amigakuéra oho ohecha pe túmba, ha otopáma hikuái inandi! Upépe osẽ sapyʼa chupekuéra mokõi ánhel ijao mimbipáva. ‘Mbaʼére piko pehekapeína Jesúspe koʼápe?’, oporandu hikuái. ‘Haʼe oñemoingove jeýma. Tapeho pyaʼe pemombeʼu idisipulokuérape.’ Pyaʼetereíko oho hikuái! Péro pe tapére, peteĩ kuimbaʼe ojoko chupekuéra. Ndépa reikuaa mávapa? Jesús osẽ chupekuéra! ‘Tapeho pemombeʼu che disipulokuérape’, heʼi Jesús.

Omombeʼúvo umi kuña idisipulokuérape Jesús oikoveha ha ohechahague chupe, umi disípulo ndogueroviapái. Pedro ha Juan odispara oho pe túmbape ohecha hag̃ua, péro pe túmba inandíma! Ohóvo hikuái upégui, María Magdalena itapykue. Upémaramo haʼe omaña pe túmba ryepýpe ha ohecha umi mokõi ánhel.

Ndépa reikuaa mbaʼépa oiko Jesús retekuégui? Ñandejára omokañy. Ñandejára nomoingovejeýi Jesúspe pe hete oguerekovaʼekue reheve. Omeʼẽ chupe hete pyahurã, haʼéva espirituál, umi ánhel oguerekoháicha. Péro Jesús ohechauka hag̃ua idisipulokuérape oikoveha, oñembohete ojehecha hag̃uáicha chupe.