OVIAHA aja Jesús pe tetã rehe, omonguera umi hasývape. Pe notísia koʼã milágrogui ojekuaa opárupi umi puévlo ha siudáre. Upévare, umi hénte ogueraha chupe umi paralítiko, umi ndohecháiva, ikarẽva, ha opaichagua hasýva. Ha Jesús omonguera enterovépe.

Ohasáma tres áño rupi Juan ovautisahague Jesúspe. Ha Jesús heʼi umi apostolkuérape ohopotaitemaha Jerusalénpe, upépe ojejukataha chupe, ha upe rire opuʼã jeytaha umi omanovaʼekue apytégui. Upe aja, haʼe omongueránte oikóvo umi hasývape.

Peteĩ árape Jesús oporomboʼe sábado jave. Sábado haʼe peteĩ ára umi hudiokuéra opytuʼuha. Ko kuña rehecháva ko taʼangápe hasyetevaʼekue. Oikovaʼekue ikarapãhápe 18 áño, ha ikatuʼỹre oñemboʼy porã. Upévare, Jesús opoko hese ha haʼe oñemboʼy porã, ha okueraite!

Kóva ombopochy umi líder rrelihiósope. ‘Ojeguereko seis día oñembaʼapo hag̃ua’, osapukái peteĩ umi hénte atýpe. ‘Umíva haʼe día oñemonguera hag̃ua, ndahaʼéi sábadope!’.

Péro Jesús okontesta: ‘Ajépa peneñañaite! Oimeraẽva pende apytégui ojoráta hymba vúrro ha ogueraháta omboyʼu sábadope. Upévare, noñemongueraivaʼerãpa sábadope ko kuña poriahumíme, 18 áñoma hasýva?’. Ko rrespuésta omeʼẽva Jesús, omotĩ koʼã kuimbaʼe añáme.

Upe rire, Jesús ha ijapostolkuéra ojeʼói Jerusalén gotyo. Hiʼag̃uívo hikuái Jericógui, mokõi siégo ombaʼejeruréva osapukái: ‘Jesús, orepytyvõmína’.

Jesús ohenói umi siégope, ha oporandu: ‘Mbaʼépa peipota ajapo penderehe?’. Haʼekuéra heʼi: ‘Jesús, rohechaséniko’. Jesús opoko hesakuéra rehe, ha sapyʼaitérõ g̃uarã ohecháma hikuái! Ndépa reikuaa mbaʼérepa Jesús ojapo koʼã milágro? Ohayhúgui umi héntepe ha oipotágui ojeguereko fe hese. Kóva ohechauka ñandéve haʼe ogoverna vove ko Yvy ndaiporimoʼãveimaha hasýva.