EMAÑAMI mbaʼéichapa koʼã hénte opuka ko kariaʼýre. Reikuaa piko mávapa ko kariaʼy? Héra Jeremías, peteĩ Ñandejára proféta iñimportantetereíva.

Pe rréi Josías oñepyrũ riremi ohundi hetãgui umi taʼangakuéra, Jehová heʼi Jeremíaspe oiko hag̃ua chugui Iproféta. Péro, Jeremías oimoʼã imitãitereiha oiko hag̃ua chugui proféta. Upévare Jehová heʼi oipytyvõtaha chupe.

Jeremías heʼi umi isrraelítape anive hag̃ua ojapo mbaʼe vai. ‘Umi diós oadoráva umi hénte ótro tetãmegua ndahaʼéi añetegua’, heʼi Jeremías. Péro heta isrraelíta oadoraseve umi taʼangápe, oadorarangue Ñandejára añetegua Jehovápe. Heʼívo Jeremías Ñandejára okastigataha chupekuéra hembiapo vaikuére, pe puévlo opuka hese.

Ohasa heta áño. Josías omano, ha tres mése haguépe itaʼýra Joaquímgui oiko rréi. Jeremías heʼi jey jey pe puévlope: ‘Jerusalén oñehundíta ndapehejáiramo pene rembiapo vai’. Umi saserdotekuéra ojagarra Jeremíaspe ha osapukái: ‘Nde remanovaʼerã erehaguére koʼã mbaʼe’. Upe rire heʼi avei Israel prinsipekuérape ‘Jeremías ojejukavaʼerã, oñeʼẽ vai haguére ñande siudáre’.

Mbaʼépa ojapóta Jeremías? Haʼe ndokyhyjéi! Heʼi enterovépe: ‘Jehová chembou haʼe hag̃ua peẽme koʼã mbaʼe. Ndapehejáiramo pene rembiapo vai, Jehová ohundíta Jerusalén. Péro peikuaa porãke ko mbaʼe: Pechejukáramo, pejukáta peteĩ kuimbaʼe ndojapoivaʼekue mbaʼeve ivaívape’.

Umi prínsipe oheja Jeremías oikove, péro umi isrraelíta ndohejái hembiapo vai. Upe rire ou Nabucodonosor, Babiloniaygua rréi, ha oñorairõ Jerusalén kóntrape. Ipahápe, Nabucodonosor ojapo umi isrraelítagui hembiguái. Miles ojegueraha Babilóniape. Epensamína mbaʼépa oikóne ndehegui rejegueraháramo nde rógagui peteĩ tetã reikuaaʼỹvape!