EMAÑAMI mbaʼépa oikohína koʼápe! Péva haʼe Moisés, ohupivahína már Rojo ári pe yvyra oguerekóva. Umi oĩ porãva hendive katu isrraelitakuéra. Péro Faraón ha ijehérsito ojahogahína. Jahechami mbaʼéichapa oikorakaʼe upéva.

Jahechahaguéicha, ou rire pe décima plága, Faraón heʼi umi isrraelítape osẽ hag̃ua Egíptogui. Osẽ 600.000 kuimbaʼe isrraelíta rupi, ha avei heta kuña ha mitã. Heta hénte ojeroviavaʼekue Jehováre osẽ avei umi isrraelíta ndive. Enterove ogueraha umi ovecha, kavara ha mymbakuéra oguerekóva osẽrõ guare Egíptogui.

Osẽ mboyve, umi isrraelíta ojerure umi ehípsiope ao ha heta mbaʼe ojejapovaʼekue óro ha plátagui. Umi ehipsiokuéra opyta okyhyjeterei ou rire chupekuéra pe última plága. Upévare omeʼẽ umi isrraelítape opa mbaʼe ojeruréva hikuái.

Upe rire, umi isrraelíta og̃uahẽ pe már Rójope. Upépe opyta opytuʼu hikuái. Upe aja, Faraón ha umi oĩva hendive oñepyrũ ombyasy ohejahaguére oho umi isrraelítape. ‘Jaheja oho ñande esklavokuéra!’, heʼi hikuái.

Ha upéicha Faraón okambia jey pe heʼivaʼekue. Upe riremínte oprepara ikárro de gérra ha ijehérsito. Upémaramo oñepyrũ oho hikuái umi isrraelíta rapykuéri 600 kárro espesiál reheve, ha ogueraha avei umi kárro oĩva guive Egíptope.

Umi isrraelíta ohechávo ou Faraón ha ijehérsito, tuichaiterei oñemondýi. Ndaipóri okañy hag̃ua chuguikuéra. Peteĩ henda gotyo oguereko hikuái pe már Rojo, ha ótro henda gotyo umi ehípsio oúva. Péro Jehová omoĩ peteĩ arai ipuévlo ha umi ehípsio paʼũme. Upévare umi ehípsio ndaikatúi ohecha umi isrraelítape oataka hag̃ua chupekuéra.

Jehová koʼág̃a heʼi Moiséspe ohupi hag̃ua pe yvyra oguerekóva ipópe már Rojo ári. Ojapóvo upéva Moisés, Jehová ombou kuarahyresẽguio peteĩ yvytu atã. Pe már oñembojaʼo, ha pe y ojejoko mokõive hendápe.

Upe rire, umi isrraelíta ohasa yvy isékovare pe már mbyte rupi. Oñekotevẽ heta óra ohasapa hag̃ua umi hénte, millones hymbakuéra reheve. Hasy peve umi ehípsio ohecha jey umi isrraelítape, ha ojepoi hikuái pe márpe hapykuerikuéra.

Ojapóvo upéva, Ñandejára oheja ojeipa ikarrokuéra rruéda. Umi ehipsiokuéra oñemondýi tuichaiterei ha oñepyrũ osapukái: ‘Jehová oñorairõ umi isrraelíta rehehápe ñane kóntrape. Jaháke koʼágui!’. Péro ndaikatuvéima.

Upe jave, Jehová heʼi Moiséspe ohupi hag̃ua már Rojo ári pe yvyra oguerekóva, rehechahaguéicha pe taʼangápe. Upéva ojapóvo pe y ojejokóva ojevy hendaguépe ha ojahoʼipa umi ehípsiope ha ikarrokuérape. Pe ehérsito oikepaitevaʼekue umi isrraelíta rapykuéri pe márpe. Ha ni peteĩ ehípsio ndojesalvái!

Mbaʼeichaitépa ovyʼa Ñandejára puévlo ojesalvahaguére! Umi kuimbaʼekuéra opurahéi oagradese hag̃ua Jehovápe, ha heʼi hikuái: ‘Jehová ohupyty tuichaitereíva viktória. Ha pe márpe oity umi kavaju ha hiʼariguápe’. Míriam, Moisés ermána, oguenohẽ ipanderéta ha enterove umi kuña ojapo avei upéicha. Ha ojeroky hikuái vyʼápe opurahéivo avei: ‘Jehová ohupyty tuichaitereíva viktória. Ha pe márpe oity umi kavaju ha hiʼariguápe’.