OÚRAMO ne rendápe peteĩ tapicha ijyvatetereíva, ha iñakã ohupytýva nde róga técho, mbaʼépa repensáne? Haʼeha peteĩ higánte! Oĩvaʼekue peteĩ tiémpo añetehápe oikohague hénte upeichagua ko Yvy ape ári. La Biblia ohechauka ituvakuéra haʼehague ánhel yvagapegua. Péro mbaʼéicha piko ikatu oiko upéva?

Nemanduʼáne, Satanás pe ánhel aña omoñepyrũhague heta provléma. Ñandejára anhelkuérape jepe oñehaʼã omoñaña. Ohasávo tiémpo, oĩ ánhel oñepyrũva iñeʼẽrendu Satanáspe. Oheja hikuái pe tembiapo Ñandejára omeʼẽvaʼekue chupekuéra yvágape. Ou hikuái ko Yvy ape ári ha oñembohete kuimbaʼéicha. Reikuaápa nde mbaʼérepa?

La Biblia heʼi ohechahague umi kuñataĩ iporãva ko Yvy ape ári ha oikosehague hendivekuéra. Upévare oguejy hikuái ha omenda hesekuéra. La Biblia heʼi upéva ivai hague, pórke Ñandejára ojapo umi ánhelpe oiko hag̃ua yvágape.

Umi ánhel oguerekórõ guare mitã hembirekokuéra ndive, koʼã mitã idiferénte. Iñepyrũrã ikatu ndojehechakuaái hesekuéra idiferenteha. Péro okakuaa ha okakuaave hikuái, ha imbareteve ohóvo káda día, oiko peve chuguikuéra higánte.

Koʼã higánte iñaña. Tuichaiterei ha imbaretégui ojapo heta mbaʼe vai umi hentekuérare. Oñehaʼã hikuái enterovépe omoñaña haʼekuéra iñañaháicha.

Enoc omanomavaʼekue, péro koʼág̃a oĩ ko Yvy ape ári peteĩ kuimbaʼe ivuénova. Ko kuimbaʼe héra Noé. Haʼe siémpre ojapo umi mbaʼe Ñandejára heʼíva.

Peteĩ día Ñandejára heʼi Noépe og̃uahẽmaha pe tiémpo ohundi hag̃ua umi iñañávape. Péro Ñandejára osalváta Noé ha ifamíliape ha heta animalkuérape. Jahechami mbaʼéichapa ojapo upéva.