Enterove omendáva katuete voínte iprovlémata. ¿Mbaʼérepa jaʼe upéva? Kuimbaʼe ha kuña ningo idiferénte ojuehegui, káda uno oñehekomboʼe diferénte hogapýpe, ha umi mbaʼe oñandúva ha opensáva idiferentete voi. Sapyʼánte avei ikatu oñepresenta provléma oúva ótro ládogui térã oiko umi mbaʼe oñehaʼarõʼỹva.

Ikatu repensa iporãveha nerepenáinte umi provlémare, péro la Biblia heʼi iporãveha resolusiona umíva (Mateo 5:23, 24). Rejapóramo umi konsého oĩva la Bíbliape, resolusiona porãvéta umi provléma.

MBAʼÉPA HEʼI LA BIBLIA: “Oĩ tiémpo [...] oñeñeʼẽ hag̃ua” (Eclesiastés 3:1, 7). Peñemotiémpo vaʼerã peñeʼẽ hag̃ua pene provlémare. Emombeʼu porã vaʼerã ne rembiayhúpe mbaʼéichapa reñeñandu ha mbaʼépa repensa. Avei siémpre nesinséro vaʼerã (Efesios 4:25). Ha ndepochýramo jepe, rejejokokuaa vaʼerã ani hag̃ua peiko vai. Pejoavýramo jepe, peñehaʼã vaʼerã peñemongeta pyʼaguapýpe porãnte, upéicha ndapeikovaimoʼãi vyroreíre (Proverbios 15:4; 26:20).

Nandegustáiramo jepe umi mbaʼe heʼíva térã odesidíva ne rembiayhu, lomímonte rerrespeta ha retrata porã vaʼerã chupe (Colosenses 4:6). Ha aníkena peneprovléma haguérente napeñeʼẽvéi ojupe, upéva rangue pyaʼe pesolusiona vaʼerã (Efesios 4:26).

EJAPOMÍNA KO MBAʼE:

• Ehecha mbaʼe moméntopepa opyta porãvéta reñemongeta hag̃ua ne rembiayhúndi upe provléma ndepyʼapývare

• Oñeʼẽ jave ne rembiayhu ani reñeʼẽjoko chupe. Ág̃ante otokáta ndéve reñeʼẽ hag̃ua

MBAʼÉPA HEʼI LA BIBLIA: “Pejoayhúkena pende pyʼaite guive oñoermáno teéicha. Peñehaʼã peẽ raẽ pehechauka pemombaʼeha pende rapichápe” (Romanos 12:10). Iñimportanterei ningo ehendukuaa ha eñehaʼã entende ne rembiayhúpe. Péicha “peikóta peteĩ ñeʼẽme” ha pehechaukáta penerekomirĩha (1 Pedro 3:8; Santiago 1:19). Ani rehendu guaʼúnte. Ikatúma guive, reheja vaʼerã upe rejapóva ha eñatende porã upe heʼívare ndéve, térã nerembiapoitereíramo, eporandu chupe ndaikatuichénepa peñeʼẽ upe rire upe témare. Aníkena rehecha ne rembiayhúpe peteĩ ne kontrárioicha síno ne amígoicha, upéicharõmante nandepochymoʼãi hendive vyroreíre (Eclesiastés 7:9).

EJAPOMÍNA KO MBAʼE:

• Ehendu porã ne rembiayhúpe, nandegustáiramo jepe upe heʼíva

• Eñehaʼã entende mbaʼépa heʼise hína. Avei eñatende ihésto ha oñeʼẽ lájare reikuaa hag̃ua mbaʼéichapa oñeñandu

MBAʼÉPA HEʼI LA BIBLIA: Umi ombaʼapo kyreʼỹva ohupytýta heta mbaʼe porã, péro umi okalkulánteva ha ndojapóiva mbaʼeve, imboriahúta (Proverbios 14:23). Ndahaʼéi vaʼerã pejénteva mbaʼéichapa ikatu pesolusiona pene provléma, síno peñehaʼã vaʼerã pejapo peje haguéicha (Proverbios 10:4). Mokõivéva peñehaʼãramo, pevyʼáta ha pehupytýta heta mbaʼe porã (Eclesiastés 4:9).

EJAPOMÍNA KO MBAʼE:

• Epensa mbaʼépa ikatu pejapo káda uno pesolusiona hag̃ua upe provléma perekóva

• Ehecha jepi mbaʼetekópa peho hína hese