1, 2. ¿Mbaʼérepa jaʼekuaa la Biblia haʼeha peteĩ rregálo iporãitereíva omeʼẽva ñandéve Ñandejára?

 ¿MBAʼÉICHAPA reñeñandúne peteĩ ne amígo omeʼẽramo ndéve peteĩ rregálo? Katuete reagradesetereíta chupe opensa haguére nderehe. Revyʼaiterei ha reavrisétama voi rehecha hag̃ua mbaʼépa la nde rregálo.

² La Biblia ningo peteĩ rregálo omeʼẽva ñandéve Ñandejára. Umi mbaʼe heʼíva la Bíbliape ndajatopamoʼãi ótro hendápe. Por ehémplo, upépe omombeʼu ñandéve Ñandejára ojapo hague pe yvága, ko yvy, ha pe kuimbaʼe ha kuña ypykuépe. Omeʼẽ avei ñandéve umi konsého ikatúva ñanepytyvõ ñaneprovléma jave. La Biblia omombeʼu mbaʼéichapa Ñandejára okumplíta hembipota ha ojapóta ko múndogui peteĩ lugár iporãitereíva. ¡Ndaijojahái ningo ko rregálo omeʼẽva ñandéve Ñandejára!

 3. ¿Mbaʼépa rehechakuaáta restudiavévo rehóvo la Biblia?

³ Restudiavévo rehóvo la Biblia, rehechakuaáta Ñandejára oipotaha reiko iñamígoramo. Ha amáske reikuaa chupe, katuete reñemoag̃uivéta hese.

 4. ¿Mbaʼépa nde rehecharamove la Bíbliare?

⁴ La Biblia ningo ojetradusíma mas de 2.800 idiómape ha hetaitereíma oñeimprimi. Enterove lénto la hénte ikatu olee la Biblia iñeʼẽtépe. Káda semána mas de un millón de persóna ojogua peteĩ Biblia imbaʼerã. Añetehápe, ndaipóri ótro lívro ikatúva ñambojoja la Bíbliare.

 5. ¿Mbaʼérepa jaʼekuaa la Biblia haʼeha “Ñandejára Ñeʼẽ”?

⁵ “Entéro mbaʼe oĩva Ñandejára Ñeʼẽme ou Ñandejáragui”  (elee 2 Timoteo 3:16). Péro ikatu oĩ opensáva: “La Biblia ningo oskrivi vaʼekue unos kuánto kuimbaʼe, ¿mbaʼéreiko upéicharõ ojeʼe ouha Ñandejáragui?”. La Biblia ombohovái upéva 2 Pedro 1:21-pe. Upépe heʼi: “Pe espíritu sánto ogia umi kuimbaʼépe omombeʼu hag̃ua umi mbaʼe oúva Ñandejáragui”. Ñantende porãve hag̃ua ikatu ñamoĩ peteĩ ehémplo: Ñamoĩ chupe peteĩ karai ojerureha itajýrape oskrivimi hag̃ua chupe peteĩ kárta oguerahakaséva ótra persónape. Haʼe odikta chupe ha itajýra katu oskrivi. Upéicha avei, Ñandejára la oskrivika vaʼekue la Biblia, ndahaʼéi umi kuimbaʼénte oskrivi vaʼekue ijehegui rei. Ñandejára heʼi chupekuéra mbaʼépa oskrivi vaʼerã. Upévare jaʼekuaa la Biblia haʼeha “Ñandejára ñeʼẽ” (1 Tesalonicenses 2:13, ehecha nóta 2).

6, 7. ¿Mbaʼérepa jaʼekuaa umi mbaʼe heʼíva la Bíbliape noñekontradesiriha?

⁶ La Biblia ningo ojeskrivi vaʼekue mas de 1.600 áño pukukue. Ha umi kuimbaʼe oskrivi vaʼekue la Biblia ndoikói vaʼekue peteĩ tiempopepa. Hiʼarive ijapytepekuéra oĩ vaʼekue ijestudioʼíva ha ijestúdio porãva. Por ehémplo, oĩ vaʼekue ombaʼapóva kokuépe, oñatendéva ovecháre, peskadór, proféta, doktór, hués ha rréi. Idiferénteramo jepe ojuehegui umi kuimbaʼe, oñepyrũ guive opa peve, umi mbaʼe heʼíva la Biblia ndojoavýi ni peteĩ hendápe. Ndaipóri heʼi vaʼerã peteĩ kapítulope heʼiha peteĩ mbaʼe ha upéi ótro hendápe oñekontradesiha upéva. a

⁷ Umi kapítulo oĩva la Biblia oñepyrũvo, omombeʼu mbaʼéichapa oñepyrũ vaʼekue umi provléma oĩva ko múndope, ha umi kapítulo oĩva la Biblia opakuévo katu omombeʼu mbaʼéichapa Ñandejára osolusionáta umíva ha ojapóta ko yvy tuichakuégui peteĩ hardín iporãitereíva. La Biblia omombeʼu avei heta mbaʼe oiko vaʼekue yma, ha umíva ohechauka porãiterei Ñandejára katuete okumpliha umi mbaʼe oprometéva.

 8. Emombeʼu umi ehémplo ohechaukáva la Biblia ndojavyiha ni michĩmi oñeʼẽ jave umi sientífiko omboʼévare.

⁸ La Biblia ningo ndahaʼéi peteĩ lívro de siénsia, upéicharõ jepe, oñeʼẽ jave umi sientífiko omboʼévare, ndojavýi ni michĩmi. Ha upéichamante vaʼerã voi ningo peteĩ lívro oúva Ñandejáragui. Por ehémplo, pe lívro de Levítico omombeʼu Jehová heʼi hague umi israelítape mbaʼépa ojapo vaʼerã ani hag̃ua ova hesekuéra térã ojagarra chupekuéra umi mbaʼasy. Hiʼarive ko lívro ojehaírõ guare,  umi hénte iñaranduvéva jepe ndoikuaái gueteri umi mikróvio ha víru oexistiha ha umíva ombohasyha la héntepe. La Biblia omboʼe avei ko yvy noñemboguapyiha mbaʼeve ári (Job 26:7). Heta tiémpore la hénte opensa vaʼekue ko yvy iplanoha, péro la Biblia ymaite guive heʼíma ko yvy ijapuʼaha (Isaías 40:22).

 9. ¿Mbaʼépa jahechakuaa umi istória omombeʼúvare la Biblia?

⁹ Umi istória oĩva la Bíbliape ndojavýi avei ni michĩmi. Oĩ heta ótro lívro omombeʼúva istória, péro naentéroi omombeʼu opa mbaʼe oiko hagueichaite. Sapyʼánte umi oskrivíva umi lívro oñeʼẽ jave ipaís istóriare, nomombeʼúi operde hague algúna gérra. Péro umi oskrivi vaʼekue la Biblia omombeʼu la kósa oiko hagueichaite. Por ehémplo, umi eskritór israelita omombeʼu hetã Israel operde hague heta gérra. Ha ndahaʼéi upévante, haʼekuéra voi ojavýramo omombeʼu avei. Por ehémplo, pe lívro de Númerospe, Moisés omombeʼu haʼe tuicha ofalla hague ha Ñandejára okorrehi hague chupe upévare (Números 20:2-12). La Biblia omombeʼu umi mbaʼe oiko hagueichaite, upévare ikatu jaguerovia ouha Ñandejáragui.

10. ¿Mbaʼérepa ikatu jaʼe koʼag̃aite peve ideprovechoha ñandéve umi konsého oĩva la Bíbliape?

¹⁰ La Biblia ningo “ou Ñandejáragui, ha ideprovécho ñaporomboʼe hag̃ua, ohechauka hag̃ua ñandéve mbaʼépa oĩ vai, jakorrehi hag̃ua entéro mbaʼe” (2 Timoteo 3:16). La Bíbliape oĩ heta konsého ideprovéchova ñandéve koʼág̃a peve. ¿Mbaʼéicha rupípa upéva? Pórke Jehová oikuaa porãiterei mbaʼéichapa ñandeapo vaʼekue, ha ontende umi mbaʼe ñapensa ha ñañandúva. Ñandehegui jepe haʼe ñandekuaa porãve. Ñandejára ningo oipota javyʼa, ha oikuaa mbaʼépa pe iporãvéva ñandéve g̃uarã ha mbaʼépa ikatu ñandeperhudika.

11, 12. a) ¿Mbaʼe konséhopa jatopa Mateo kapítulo 5 al 7-pe? b) ¿Mbaʼéichapa ñanepytyvõ avei umi ótro konsého oĩva la Bíbliape?

 ¹¹ Mateo kapítulo 5 al 7-pe jatopa heta konsého iporãitereíva Jesús omeʼẽ vaʼekue. Por ehémplo, mbaʼépa jajapo vaʼerã javyʼa hag̃ua, mbaʼéichapa ikatu jajogueraha porã ñande rapichakuérandi, mbaʼéichapa ñañemboʼe vaʼerã ha nañamombaʼetereíri vaʼerãha pe pláta. Ojapómarõ jepe 2.000 áño Jesús omeʼẽ hague koʼã konsého, koʼag̃aite peve ideprovécho ñandéve ha tuicha ñanepytyvõ.

¹² La Bíbliape, Jehová omeʼẽ avei ñandéve heta konsého ikatúva ñanepytyvõ javyʼa hag̃ua ñande rogapýpe, ñanekyreʼỹ hag̃ua ñande travahohápe, ha jajogueraha porã hag̃ua ñande rapichakuérandi. Umi konsého oĩva la Bíbliape ningo siémpre ideprovéchota ñandéve, jaiko jaikohápe ha tahaʼe haʼéva umi provléma jarekóva (elee Isaías 48:17; ehecha nóta 3).

13. ¿Mbaʼépa heʼi vaʼekue proféta Isaías oikotaha pe siuda de Babilóniare?

¹³ Heta profesía oĩva la Bíbliape oñekumplíma. Por ehémplo, proféta Isaías heʼi vaʼekue pe siuda de Babilonia ojedestruitaha (Isaías 13:19). Ha omombeʼu voi mbaʼéichapa oikóta upéva. Babilonia ningo oreko vaʼekue peteĩ okẽ guasu ijyvatetereíva ha ojere voi hese peteĩ rrío, upéicha rupi hasy ojeikénte hag̃ua upépe. Péro Isaías oprofetisa térã heʼíma vaʼekue voi pe rrío isekotaha, pe okẽ opytataha nandi ha umi iñenemigokuéra ni noñorairõmoʼãiha ogana hag̃ua chupekuéra. Ha ndahaʼéi upévante, Isaías oprofetisa vaʼekue avei pe kuimbaʼe ojagarrátava upe siuda herataha Ciro (elee Isaías 44:27–45:2; ehecha nóta 4).

14, 15. ¿Mbaʼéichapa oñekumpli proféta Isaías heʼi vaʼekue Babilóniare?

¹⁴ Doscientos áño Isaías oprofetisa rire umi mbaʼe  oikótava Babilóniare, peteĩ ehérsito oúma preparádo ojagarra hag̃ua upe siuda. ¿Ha mávapa omoakã upe ehérsito? Ciro, pe rréi de Persia. Jahechaháicha, Isaías oprofetisa hagueichaite oiko. Péicha oñekumpli kuri ohóvo entéro mbaʼe heʼi vaʼekue oikotaha Babilonia rehe.

¹⁵ Pe pyhare Ciro ehérsito oatakárõ guare Babilonia, umi hénte upepegua ofarrea joa hína kuri. Haʼekuéra ni  michĩmi ndokyhyjéi, pórke pe siudáre ojere voi peteĩ murálla yvate ha avei pe rrío. Péro ndoikuaaiete hikuái Ciro ha ijehérsito ombodesviamaha hína pe rrío, ha pe y oguejypávo umi soldádo ohasa upérupi. Péro, ¿mbaʼéichapa ohasáta hikuái pe murálla? Proféta Isaías heʼi haguéicha, pe siuda rokẽ opyta nandi ha umi soldádo oike upérupi ha oñorairõʼỹetére ojagarra pe siuda.

16. a) ¿Mbaʼépa heʼive proféta Isaías Babilonia rehe? b) ¿Mbaʼérepa jaʼekuaa oñekumpliha upéva?

¹⁶ Isaías oprofetisa kuri kon el tiémpo ndaiporimoʼãveimaha oikóva Babilóniape. Haʼe heʼi: “Upe lugárpe ndojeikomoʼãvéima arakaʼeve, núnka avave ndoikomoʼãi upépe ni umi henerasión oútava” (Isaías 13:20). ¿Oñekumplípa ko profesía? Si. Pe lugár yma oĩ hague pe siuda de Babilonia, opyta 80 kilómetrorupi Bagdádgui (Irak), péro hendaguéntema oĩ. Koʼág̃a peve ndaipóri ni peteĩ persóna oikóva upépe. Jehová ohundiete upe siuda (Isaías 14:22, 23).

17. ¿Mbaʼérepa ikatu jajerovia Jehová okumplitaha umi mbaʼe oprometéva?

¹⁷ Heta profesía oĩva la Bíbliape ningo oñekumplíma, upévare ikatu jajerovia oñekumplitaha avei umi profesía  oñeʼẽva umi mbaʼe porã ñaneraʼarõvare. Ikatu jajerovia Jehová ojapotaha ko yvy tuichakuégui peteĩ hardín iporãitereíva (elee Números 23:19). Jahupytýta avei pe vída etérna. “Ñandejára ikatuʼỹva ijapu ymaitereíma opromete vaʼekue upéva” (Tito 1:2). b

18. ¿Mbaʼépa heʼi vaʼekue apóstol Pablo Ñandejára Ñeʼẽre?

¹⁸ ¿Mbaʼérepa jaʼekuaa ndaiporiha ótro lívro ikatúva ñambojoja la Bíbliare? Jahecha haguéicha, la Biblia ni peteĩ pártepe ndojoavýi, umi mbaʼe heʼíva pe siénsiare ha umi istória omombeʼúva ndojavýi ni michĩmi. Jahecha avei orekoha heta konsého neporãva ha oĩ avei pype heta profesía oñekumplímava. Péro la Biblia ñanemboʼe hetave mbaʼe. Apóstol Pablo heʼi vaʼekue: “Ñandejára ñeʼẽ oikove ha oreko podér”. ¿Mbaʼépa heʼise upéva? (Elee Hebreos 4:12).

19, 20. a) ¿Mbaʼépepa nepytyvõta avei la Biblia? b) ¿Mbaʼéichapa ikatu rehechauka reagradeseha Ñandejárape la Bíbliare?

¹⁹ Tuichaiterei ningo nepytyvõta la Biblia. Ikatu nepytyvõ nde voi rejekuaa porãve hag̃ua, rentendeve hag̃ua umi mbaʼe reñandu ha repensáva. Por ehémplo, ñande ikatu ñapensa jahayhuha Ñandejárape, péro jahechauka hag̃ua jahayhu añeteha chupe, jajapo vaʼerã la Biblia heʼíva.

²⁰ Añetehápe la Biblia haʼe Ñandejára Ñeʼẽ ha haʼe oipota nde relee, restudia ha remombaʼe Iñeʼẽ. Ehechaukákena eagradeseha Ñandejárape ko rregálore ha esegi estudia la Biblia. Amáske restudia, reikuaavéta umi mbaʼe porã Ñandejára oprometéva ñandéve. Pe kapítulo oúvape oñeñeʼẽta upévare.