UMI idióma ojehaihaguépe la Biblia, ojeporu setenta henda rupi pe evréo ñeʼẽ scheʼóhl ha griégo háiʼdes. Koʼãva ojeporu oñeñeʼẽ jave pe ñemanóre. Oĩ Biblia guaraníme otradusíva koʼã ñeʼẽ “omanovaʼekue oĩha”, “añaretã” térã “omanovaʼekue renda”. Péro heta idiómape ndaikatúi oñembohasa porã koʼã evréo ha griégo ñeʼẽ heʼiséva. Upévare, pe Traducción del Nuevo Mundo oiporu umi ñeʼẽ “Seol” ha “Hades”. Mbaʼépa heʼise koʼã mbaʼe? Jahechami mbaʼéichapa ojeporu la Bíbliape heta hendápe.

Eclesiastés 9:​10-pe heʼi: ‘ndaipóri Seólpe, pe rehohápe, tembiapo térã ojejaposéva térã konosimiénto térã arandu’. Upéicharõ, haʼépa Seol káda sepultúra oñeñotỹhápe peteĩ omanovaʼekue? Ndahaʼéi. La Biblia oñeʼẽvo peteĩ sepultúragui, ndoiporúi pe ñeʼẽ scheʼóhl térã háiʼdes (Génesis 23:​7-9; Mateo 28:1). Avei, la Biblia ndoiporúi “Seol” oñeʼẽ hag̃ua umi panteóngui oñemoĩhápe heta omanovaʼekue ha oguerekoháicha heta família, térã peteĩ yvykua guasúgui oñeñotỹhápe oñondivepa heta omanovaʼekue (Génesis 49:30, 31).

Upéicharõ, mbaʼépa heʼise la Bíbliape “Seol” ha “Hades”? Heʼise peteĩ mbaʼe tuichavéva pe yvykua guasúgui. Pór ehémplo, Isaías 5:​14-pe heʼi Seol haʼeha peteĩ lugár ipyrusúva ‘tuicha ojurupeʼáva, ikatuʼỹha peve’. Upéicha jaʼekuaa pe Seol omokõmahague hetaiterei omanovaʼekuépe, ha omokõsevénte oikóvo (Proverbios 30:​15, 16). Ndahaʼéi umi sementério jaikuaávaicha, umíva henyhẽkuaa, péro ‘pe Seol nahyg̃uatãi’ (Proverbios 27:20). Añetehápe, pe Seol térã Hades nahenyhẽi arakaʼeve ha ndaijapýrai. Upéicharõ, pe Seol térã Hades ndahaʼéi peteĩ lugár oĩva peteĩ hendápe térã ikatúva jahecha. Haʼe uvei peteĩ mbaʼe orrepresentáva umi omanovaʼekue oĩha, opytuʼuhápe enterove nunga omanovaʼekue.

Jaikuaávo la Biblia omboʼéva pe ñemoingove jeýgui ñantende porãve mbaʼépa heʼise pe Seol térã Hades. Ñandejára Ñeʼẽ oiporu Seol ha Hades oñeʼẽvo umi omanovaʼekue  oñemoingove jeýtavagui a (Job 14:13; Hechos 2:31; Revelación 20:13). Ohechauka avei pe Seol térã Hádespe oĩha umi oservivaʼekue Jehovápe, ha heta ndojapoivaʼekue upéva (Génesis 37:35; Salmo 55:15). Upévare, la Biblia omboʼe oĩtaha “ñemoingove jey hekojoja ha hekojaʼỹvagui” (Hechos 24:15).