LA Bíbliape oñembojoja pe kongregasión ñande retére. Káda párte oĩva ñande retépe iñimportanteterei, “ha káda párte ojapo peteĩ mbaʼe idiferénteva”. Upéicha avei oñemeʼẽ jave ñandéve peteĩ asignasión ñañehaʼã vaʼerã ñakumpli porã. Tahaʼe haʼéva upe párte otokáva ñandéve, japrepara porã vaʼerã ha ani ñapensa peteĩ téma iñimportanteveha ótrogui (Rom. 12:4-8). Pe tembiguái jeroviaha omeʼẽ ñandéve “hiʼoraitépe” opa mbaʼe ñaikotevẽva ñamombarete hag̃ua ñande jerovia (Mat. 24:45). Jaiporúramo pe informasión oñasignáva ñandéve ha jasegíramo umi instruksión, jahechauka hína ñamombaʼeha pe prográma omoĩva pe tembiguái jeroviaha, ha péicha ñaipytyvõ ojejapo hag̃ua hekópe porã opa mbaʼe kongregasiónpe.

Mbaʼe informasiónpa reiporu vaʼerã. Otokáramo ndéve rejapo peteĩ párte ko eskuélape ha oñemeʼẽ ndéve mbaʼe témarepa reñeʼẽta, remyesakã vaʼerã upévante ha ani reñeʼẽ ótra kósare. Katuete oñemeʼẽta voi ndéve mbaʼe informasiónpa reiporu vaʼerã, péro noñemoĩriramo ndéve ikatu reheka umi informasión oho porãva ne témare. Iñimportánte opa mbaʼe eréva omyesakã porã pe téma reñeʼẽha. Redesidíta jave mbaʼe informasiónpa reiporúta rereko vaʼerã avei enkuénta umi nerendútavape.

Ehesaʼỹijo porã umi informasión ha téxto retopa vaʼekue, ha epensa mbaʼéichapa remyesakãta ideprovécho hag̃uáicha umi nerendúvape. Reiporavo vaʼerã mokõi térã mbohapy púnto prinsipál ha avei umi versíkulo relee ha remyesakãtava nde diskúrsope.

¿Mboy informasiónpa reiporu vaʼerã? Ani reñeʼẽse hetaiterei mbaʼére, pórke amo ipahápe rekonfundipa jeýta umi nerendúvape. Upéva rangue reiporu vaʼerã umi ikatútava remyesakã porã nde diskúrso aja. Emboyke umi informasión ndohóiva ne témare, ha eiporu umi orresaltáva umi púnto prinsipál ha ideprovéchotava umi nerendúvape. Ko leksiónpe ojehechauka jaiporu vaʼerãha umi informasión oñemeʼẽva  ñandéve, péro upéva ndeʼiséi jaiporupaite vaʼerãha kompletoite umi informasión jatopa vaʼekue.

Ani rejapónte peteĩ rresúmen pe informasióngui, reiporavo vaʼerã umi púnto remyesakãséva ha reñeʼẽ umívare. Upearã ikatu reiporu peteĩ ehémplo térã remombeʼu mbaʼéichapa ikatu jasegi upe konsého. Reiporútaramo ótra informasión, umíva omyesakãve vaʼerã umi idéa prinsipál, péro ani rekambia pe oñemeʼẽmava ndéve.

Otokáramo ndéve rejapo diskúrso pe Aty Ñanemboʼéva Japredika Hag̃uáme, reiporu vaʼerã pe informasión oñemeʼẽmava voi ndéve ha ani reiporu ótro ndegustávante. Rejapótaramo diskúrso púvliko oñemeʼẽta avei ndéve peteĩ voského reiporu hag̃ua, ha jepe ikatu remoinge peteĩ informasión reheka vaʼekue, reiporu vaʼerã umi púnto prinsipál ha umi téxto oĩmava voi nde voskéhope. Rejepokuaáramo reiporu umi informasión oñemeʼẽva ndéve ha neremoingéi ótra kósa, upéva nepytyvõta ndekatupyryve hag̃ua rejapóvo diskúrso ha ndepreparáta rerresivi hag̃ua hetave priviléhio.

Resegíramo koʼã suherénsia jahecháva ko leksiónpe ndekatupyryvéta avei rejapo porã hag̃ua estúdio vívliko, ¿mbaʼérepa? Pórke ikatúta reñekonsentra pe informasión oĩvare pe puvlikasiónpe ha ndereikomoʼãi rerresalta hetaiterei mbaʼe ndohóiva pe témare, añetehápe umíva ikatu okonfundipa rei ne estudiántepe. Péro repilláramo pe idéa prinsipál oĩva ko leksiónpe rehechakuaáta ndaivairiha remyesakãmie umi mbaʼe ne estudiánte tekotevẽva oikuaa.