NE ÑEʼẼRE ikatu ojekuaa regueroviápa hína umi mbaʼe eréva. Apóstol Pablo ohechauka vaʼekue upéva opredika jave. Haʼe heʼi: “Umi marandu porã roikuaauka vaʼekue peẽme ndopytái ñeʼẽ reípente, síno [...] pejerovia mbarete hese” (1 Tes. 1:5). Apóstol Pablo oguerovia vaʼekue ipyʼaite guive umi mbaʼe omboʼéva, ha upéva ojekuaa oñeʼẽ ha oiko lájare. Ha ñande jasegi vaʼerã iñehémplo ñaporomboʼe jave.

¿Mbaʼéichapa ikatu rehechauka reimeha segúro pe erévare? Ndeʼiséi reñembovale ni reñemohatãtaha nde repensávape. Heʼise guei reñeʼẽha kyhyjeʼỹme la Bíbliare rejerovia mbarete rupi Ñandejárare (Heb. 11:1).

Mbaʼéicha javépa ojekuaa vaʼerã reimeha segúro pe erévare. Iñimportánte rehechauka regueroviaha umi mbaʼe eréva repredika jave, ¿mbaʼérepa? Pórke umi hénte ndojesarekói ñande ñamboʼévarente, síno oñatende avei mbaʼéichapa ñañeʼẽ. Haʼekuéra pyaʼeterei opilla añetehápepa jaguerovia pe jaʼéva hína. Ojekuaáramo ñanderehe ñaimeha segúro pe jaʼévare, haʼekuéra ohechakuaáta iñimportanteha pe mensáhe jaikuaaukáva.

Avei rejapo jave ne asignasión kongregasiónpe umi ermáno ohechakuaa vaʼerã nde regueroviaha nde pyʼaite guive umi mbaʼe remboʼéva. Por ehémplo apóstol Pedro omombeʼu vaʼekue umi ermánope mbaʼérepa oskrivi ipriméra kárta. Heʼi chupekuéra: “Ikatu hag̃uáicha pomokyreʼỹ ha ahechauka peẽme Ñandejára añetehápe omeʼẽha peẽme mbaʼeporã ijojahaʼỹva. Peñakarama hatãke upévare” (1 Ped. 5:12). Ha apóstol Pablo oskrivírõ guare umi Romaguápe, omokyreʼỹ chupekuéra oguerovia hag̃uáicha upe heʼíva: “Che añetehápe aguerovia ni ñemano, ni jeikove, ni ánhel, ni goviérno, ni umi mbaʼe koʼág̃a oĩva koʼápe, ni umi mbaʼe oútava, ni umi podér, ni umi mbaʼe oĩva yvate ni ipypukuhápe, ni mbaʼeveichagua kreasión, ndaikatumoʼãiha ñandepeʼa Ñandejára mborayhúgui, ojehechaukáva ñande Ruvicha Cristo Jesús rupive” (Rom. 8:38, 39). Ha heʼírõ guare umi ermánope tekotevẽha opredika, oikekuaa chupekuéra, ha iñehémplo rupive ohechauka haʼe voi omombaʼeha upe tembiapo  (Hech. 20:18-21; Rom. 10:9, 13-15). Umi ansiáno avei oporomboʼe jave ohechauka vaʼerã ipyʼaite guive ogueroviaha la omboʼéva, ha upéva ojekuaáta iñeʼẽre ha okumplívo umi mbaʼe heʼíva.

Tuvakuéra avei ostudia jave ifamíliandi térã oñeʼẽ jave hendivekuéra la Bíbliare, ohechauka vaʼerã ni michĩmi ndodudaiha pe heʼívare. Upearã tekotevẽ haʼekuéra raẽve voi ohayhu Ñandejárape ha ohechakuaa iporãveha osegi umi konsého oĩva la Bíbliape. Péicha ndahasymoʼãi chupekuéra oñeʼẽ hag̃ua koʼã mbaʼére, pórke heʼiháicha la Biblia umi mbaʼe oĩva ñane korasõme osẽ hína ñande jurúrupi (Luc. 6:45; Deut. 6:5-7). Péicha ‘ojerovia rupi tovamokõiʼỹre’, ikatúta omoĩ hikuái ehémplo porã ifamíliape (2 Tim. 1:5).

Koʼýte rehechauka vaʼerã reimeha segúro umi mbaʼe regueroviávare oĩ jave ombaʼeporandúva ndéve, térã ndejopy jave hikuái rejapo hag̃ua ivaíva. Por ehémplo, ¿mbaʼépa rejapóta nde profesór, ne kompañéro de traváho térã de eskuéla oporandúramo ndéve mbaʼérepa nderefestehái kumpleáño térã peteĩ fiésta patriótika? Kyhyjeʼỹme remyesakã porãramo mbaʼérepa nderepartisipái umi fiéstape, ikatu pe persóna orrespeta nde regueroviáva. Ha oĩramo nemboligáva remonda hag̃ua, nderekovai hag̃ua, térã retantea hag̃ua peteĩ dróga ¿mbaʼéichapa rembohovái vaʼerã? Reñeʼẽ jave ojekuaa vaʼerã nderehe ndedesididoha ha ni mbaʼevéicharõ nderejapomoʼãiha umi mbaʼe. Potifar rembireko ojopýrõ guare Josépe oñeno hag̃ua hendive, haʼe direktoite heʼi chupe: “¿Mbaʼéicha piko che ajapóta ko mbaʼe ivaietéva, ha apeka péicha Ñandejára renondépe?”. Pe kuña katu osegínte omboapura chupe, upémarõ José osẽ odipara upégui (Gén. 39:9, 12).

Mbaʼéichapa ikatu rehechauka. Reiporavo porãramo umi palávra, umíva ohechaukáta reimeha segúro umi mbaʼe erévare. Jesús oñeʼẽtarõ guare umi mbaʼe iñimportántevare oñepyrũvo heʼi: “Añetehápe haʼe peẽme” (Juan 3:3, 5, 11; 5:19, 24, 25). Pablo avei ohechauka oĩha segúro umi mbaʼe heʼívare, upévare oiporu jepi koʼã palávra: “Che añetehápe aguerovia”, “chéngo ñande Ruvicha Jesús disípulo, ha aikuaa porã”, ha “che ndachejapúi, añeteguánte haʼe” (Rom. 8:38; 14:14; 1 Tim. 2:7). Ohechauka hag̃ua oñekumplitaha katuete umi profesía, ijespíritu rupive Jehová oipytyvõ vaʼekue umi profétape oiporu hag̃ua jepi koʼã palávra: “Katuetei oikóta” (Hab. 2:3). Reñeʼẽta jave koʼã profesíare nde ikatu avei reiporu koʼãichagua palávra rerresalta hag̃ua oñekumplitaha. Rejerovia vaʼerã Jehováre ha ani ndejehénte, péicha  reñeʼẽta rrespetuósamente ha umi palávra reiporúva ohechaukáta rejerovia mbareteha.

Nde vos ha ne tónore ikatu rehechauka reimeha segúro pe erévare. Avei umi hésto ha séña tuicha nepytyvõta. Añetehápe káda uno ñane diferénte, upévare hetápe ifásil ojapo koʼã mbaʼe, péro ótrope katu ijetuʼuve hiʼotĩ térã ivós ikangyve rupi, ¿mbaʼépa ikatu rejapo péicha jave? Nde reguerovia vaʼerã nde pyʼaite guive siertoha pe remboʼéva, ha umi nerendúva oikotevẽha ohendu pe informasión, péicha nekyreʼỹvéta reñeʼẽ jave.

Umi mbaʼe eréva ha rejapóva osẽ vaʼerã nde pyʼaite guive, ani rexahera, pórke umi hénte ohechakuaáramo nanesinseroiha, ndojagarramoʼãi ensério pe eréva. Upévare, reñeʼẽ vaʼerã rejapoháicha jepi voi normálmente, ha ani rekopia ótrope. Ha oimérõ reñeʼẽta hína heta hénte renondépe, tekotevẽ hatãmie reñeʼẽ. Reñehaʼã vaʼerã siémpre nesinséro ha ani rekopia avavépe.

Mbaʼépa rejapo vaʼerã remehora hag̃ua. Iñimportánte rejeprepara porã, péicha ikatúta rehechauka mbaʼépa nde reñandu ha repensa pe informasiónre. Reprepara vove ne asignasión, ani rekopiánte peteĩ puvlikasióngui ha upéi releénte oĩhaichaite upépe. Tekotevẽ ningo rentende porã la ne téma ikatu hag̃uáicha remyesakã ne ñeʼẽtépe. Rehechakuaa vaʼerã mbaʼérepa iñimportánte pe informasión ha mbaʼépepa ideprovéchota umi nerendúvape. Upearã reprepara vove ne téma rekalkula vaʼerã mbaʼe provlémapa ombohovái umi nerendúva ha mbaʼépa oikuaáma voi hikuái pe témagui.

Iñimportánte avei elee ha eñeʼẽ syryry porã, péicha umi nerendúva ohechakuaáta reimeha segúro pe erévare. Upévare ndahaʼéi reprepara porãnte vaʼerã ne asignasión, síno tekotevẽ heta repraktika. Emarka umi párte tekotevẽhápe ere hatãmie ha kyreʼỹme, ha ani remaña ne nótare eréta jave umi párte. Ani nderesarái rejerure hag̃ua Jehovápe tovendesi pe rejapóva hína. Péicha ‘Ñandejára rupive ndepyʼaguasúta reñeʼẽ hag̃ua kyhyjeʼỹme’ ha rehechaukáta nde pyʼaite guive regueroviaha pe mensáhe remombeʼúva ha iñimportanteha upéva (1 Tes. 2:2).