JAPREDIKA jave ñande ndajaipotái pe mensáhe opyta umi hénte akãmente, síno jaipota og̃uahẽ ikorasõme. Upearã tekotevẽ jahechauka ñañeinteresaha sinséramente umi ñanerendúvare. Jahechami mbaʼéichapa ikatu jajapo upéva.

Ereko enkuénta umi hénte opensáva. Apóstol Pablo oreko vaʼekue enkuénta umi hénte opensáva ha oikotevẽva. Haʼe heʼi: “Aimérõ guare umi hudíondi aiko hudíoicha, aipytyvõ hag̃ua umi hudíope. Aimérõ guare umi oĩva Léi poguýpe apytépe, akumpli pe Léi, jepe che naiméi Léi poguýpe; ajapo péicha aipytyvõ hag̃ua umi oĩvape Léi poguýpe. Aimérõ guare umi orekoʼỹva Léi apytépe, aiko ndarekoiramoguáicha Léi, jepe che asegi Ñandejára Léi ha aime Cristo Léi poguýpe; ajapo péicha aipytyvõ hag̃ua umi orekoʼỹvape Léi. Aimérõ guare umi ikangýva ndive, aiko ikangývaramo, aipytyvõ hag̃ua umi ikangývape. Ajapo opa mbaʼe aipytyvõ hag̃ua opaichagua tapichápe, ha añehaʼãmbaite asalva mbovymi jepe ijapyteguikuéra. Péro ajapo opa mbaʼe umi marandu porã rehehápe, ikatu hag̃uáicha apredika che rapichakuérape” (1 Cor. 9:20-23). ¿Mbaʼéichapa ikatu jasegi iñehémplo?

Predikasiónpe reñemongeta mboyve pe ogajárandi, ikatu repensa sapyʼaite mbaʼépa ointeresáta chupe ha mbaʼe situasiónpa ohasáne hína. Upearã ikatu remaña pe ógare térã ijerére ha eñeporandu: “¿Ojekuaápa orekoha hikuái peteĩ rrelihión? ¿Mbaʼépepa ombaʼapo? ¿Ikatúpa akambiaʼimi che presentasión ointeresave hag̃ua chupe?”.

Reg̃uahẽ porãve hag̃ua umi hénte korasõme, repensa raẽ vaʼerã mbaʼépa ikatu ere iñinteresanteve hag̃ua ne presentasión. Por ehémplo nde territóriope oĩramo extranhéro, ¿rekalkulámapa mbaʼéichapa ikatu repredika porãve chupekuéra? Ñandejára “oipota opaichagua tapicha ojesalva ha oikuaa porã pe añetegua”. Upévare siémpre ñañehaʼã vaʼerã ñamog̃uahẽ pe marandu porã ohenduse hag̃uáicha umi hénte (1 Tim. 2:4).

Ehendu porã chupekuéra. Jehová iñarandu ha oikuaáramo jepe opaite mbaʼe, ohendu umi ótro opensáva. Por ehémplo, proféta Micaya  ohecha peteĩ visiónpe umi ánhel oñembyatyha Jehová renondépe, ha Haʼe oporandu chupekuéra mbaʼéichapa ikatúta oñesolusiona peteĩ provléma. Upéi Jehová opermiti ojejapo peteĩ ánhel heʼi haguéicha (1 Rey. 22:19-22). Avei Jehová ohendu porã vaʼekue Abrahánpe omombeʼúrõ guare mbaʼéichapa oñeñandu oñehundíta haguére Sodoma (Gén. 18:23-33). ¿Mbaʼéichapa ikatu resegi Jehová ehémplo predikasiónpe?

Ikatu rejapo peteĩ porandu pe ogajárape ha emeʼẽ chupe tiémpo okontesta hag̃ua. Upéi ejapysaka porã hese, péicha ohechakuaáta añetehápe reñeinteresaha la heʼívare. Ereko enkuénta pe omombeʼu vaʼekue, ha ehecha opyta porãtapa reporanduve chupe ótra kósa. Eñehaʼã eikuaave pe ogajárape, péro eñatende ani rejapógui hetaiterei pregúnta odeskonfiáma nderehe. Opyta porãma guive eguerohory la ikomentário. Ha heʼíramo jepe álgo nandegustapáiva, anínte ere chupe oĩ vaiha upe heʼíva (Col. 4:6).

Reñatende vaʼerã ani hag̃ua rehasa la rrája, iporãramo jepe ñañeinteresa umi ñanerendúvare, ndovaléi jaiko ñañentremete ótro ojapóvare (1 Ped. 4:15). Avei peteĩ ermáno oñeʼẽta jave peteĩ kuñándi, térã peteĩ ermána peteĩ kuimbaʼéndi, oñatende vaʼerã ani imbaʼeporãségui pe persóna oñepyrũ omalpensa. Iñimportánte ñañatende porã koʼã mbaʼére, pórke káda tetãme oĩ diferénte kostúmbre ha káda persóna opensa diferénte avei (Luc. 6:31).

¿Mbaʼépa nepytyvõta rehendu porãve hag̃ua umi ogajárape? Resẽ mboyve repredika, repreparáma vaʼerã ne presentasión. Péicha rerekótama ne akãme umi idéa remombeʼuséva ha ikatúta rejapysaka pe ogajárare, reñekevrantaʼỹre la erétavare. Ha pe ogajára oñeñandu porãvéta ha ikatu omombeʼuseve ndéve la opensáva.

Avei rejapysakávo nde rapicháre oñeʼẽ jave rehechauka hína remombaʼeha chupe (Rom. 12:10). Péicha ojekuaa remombaʼeha upe opensa ha oñandúva, ha ikatu upéva omomýi chupe ohendu hag̃ua pe mensáhe. Ndareíri la Biblia heʼi ‘tekotevẽha opavave ipyaʼe ohendukuaa hag̃ua ha imbegue oñeʼẽ hag̃ua’ (Sant. 1:19).

Eipytyvõ chupekuéra oñakãrapuʼã hag̃ua. Reñeinteresáramo umi héntere resegíta repensa umi nerendu porã vaʼekuére ha upéva nemomýita reho jey hag̃ua revisita chupekuéra. Péicha ikatúta remog̃uahẽ káda únope upe kavalete oikotevẽva oñemoag̃uive hag̃ua Jehováre. Reho mboyve rejapo nde rrevisíta, repensa vaʼerã mbaʼe provlémapa  ombohovái hína pe ogajára. Eheka peteĩ informasión oipytyvõtava chupe upearã. Emyesakã nde rrevisítape mbaʼéichapa upe informasión ideprovéchota chupe ha mbaʼéichapa osẽ porãta osegíramo umi konsého (Is. 48:17).

Haʼe omombeʼúramo ndéve peteĩ provléma térã peteĩ situasión ijetuʼúva ohasáva hína, ikatu reaprovecha remombeʼu hag̃ua chupe umi notísia porã oĩva la Bíbliape. Péicha rehaʼangáta Jesúspe, haʼe ningo siémpre okonsola ha oiporiahuvereko vaʼekue umi héntepe (Mar. 6:31-34). Ani rejapura remeʼẽntema hag̃ua peteĩ konsého, pórke pe ogajára ikatu opensa nereñeinteresaiha hese. La Biblia heʼi ñañehaʼã vaʼerãha ñantende ñande rapicha ohasáva ha jajoayhu oñoermánoicha (1 Ped. 3:8). Reheka vaʼerã informasión oñeʼẽva upe provlémare, ha ere pe persónape reipytyvõseha chupe ombohovái hag̃ua upe situasión. Rehechaukáta avei reñeinteresaha hese ndereikóivo remombeʼu ótrope pe heʼi vaʼekue ndéve. Péro rehechakuaáramo tekotevẽha katuete reñeʼẽ ótrondi koʼã mbaʼére, ikatu rejapo (Prov. 25:9).

Koʼýte reñeinteresa vaʼerã ne estudiántere. Upévare iporãta reñemboʼéramo Jehovápe ikatu hag̃uáicha rehechakuaa mbaʼéichapa reipytyvõ porãvéta káda únope. Epensamína: “¿Mbaʼe kámbiopa ojapo vaʼerã oñakãrapuʼã hag̃ua?”. Mborayhúpe rehechauka vaʼerã chupe mbaʼérepa iporã osegi umi konsého oĩva la Bíbliape ha umi omeʼẽva “tembiguái jeroviaha” umi puvlikasión rupive (Mat. 24:45). Péro sapyʼánte tekotevẽta rejapo hendive algúna kósa ikatu hag̃uáicha rehechauka chupe mbaʼéichapa osegi vaʼerã umi konsého oĩva la Bíbliape (Juan 13:1-15).

Iñimportánte rehechakuaa moõ pevépa otoka ndéve reipytyvõ ne estudiántepe. Tekotevẽ nepasiénsia ha rehechakuaa káda persóna idiferenteha isituasión ha umi mbaʼe ohasa vaʼekue. Upévare oĩta umi pyaʼeterei oprogresáva ha umi hasypeve okambiáva (Filip. 4:5). Ani reovliga chupekuéra okambia hag̃ua, upéva rangue reheja vaʼerã Ñandejára Ñeʼẽ ha ijespíritu omomýi ne estudiántepe oservi hag̃ua Jehovápe. Haʼe oipota jaservi chupe ñande pyʼaite guive ha ñande jadesidi rupi, ndahaʼéi oĩgui ñandeovligáva (Sal. 110:3). Aníke reiko reñentremete umi mbaʼe káda uno odesidi vaʼerãre, ha ojeruréramo jepe ndéve ne opinión, ani redesidi hese (Gál. 6:5).

Nembaʼerechakuaáke. Jesús oipytyvõ vaʼekue umi héntepe omombarete hag̃ua ijerovia, péro heta vése omeʼẽ avei chupekuéra umi mbaʼe oikotevẽva (Mat. 15:32). Ñanemboriahúramo jepe, ñande avei ikatu jajapo heta mbaʼe ñaipytyvõ hag̃ua ñande rapichápe.

 Ñañeinteresáramo ñande rapicháre ñanembaʼerechakuaáta hendivekuéra. Por ehémplo predikasiónpe, ¿mbaʼépa rejapóta rehechakuaáramo pe ogajára upe javete ndaikatumoʼãiha oñatende nderehe? Erekuaa chupe rejutaha tardeve. Péro reñeʼẽramo peteĩ persónandi ha tiémpo vai térã peime kuarahýpe, ¿mbaʼépa rejapokuaa? Ikatu reheka peteĩ lugár peñemoʼã hag̃ua, térã ere chupe reju jeytaha ótro día. Oiméramo reikuaa hasykatuha ne vesíno térã peteĩ nerendu porã vaʼekue, ikatu revisita chupe, emondo chupe peteĩ kárta térã mensáhe. Repensáramo iporãtaha, ikatu regueraha chupe oimeraẽ sonserami térã reipytyvõ algúna kósa oikotevẽvape.

Oñakãrapuʼãvévo ohóvo, ne estudiánte ikatu oñeñandu haʼeño pórke ndojeheʼavéi iñamigokuéra mundopeguáre. ¿Mbaʼépa ikatu rejapo? Reñehaʼã vaʼerã rejeheʼave hese, ikatu repyta reñemongeta hendive pende estúdio rire térã eho evisita chupe ótro día. Emokyreʼỹ chupe oheka hag̃ua iñamigorã kongregasiónpe (Prov. 13:20). Eipytyvõ ne estudiántepe oho hag̃ua rreunionhápe ha eguapy hendive. Orekóramo mitã michĩva ikatu reipytyvõ chupe oñatende hag̃ua hese, péicha pe persóna ndoikomoʼãi ojedistrae pe rreunión aja.

Eñeinteresa nde rapicháre nde pyʼaite guive. Pe interés jarekóva ñande rapicháre nañaaprendéi peteĩ lívrogui, upéva osẽ vaʼerã ñane korasõgui. ¿Mbaʼéichapa ikatu rehechauka reñeinteresaha nde rapicháre sinséramente? Upéva ikatu ojekuaa ne ñeʼẽre, térã mbaʼéichapa rejapysaka hese oñeʼẽ jave ha retratávo chupe mborayhúpe. Avei nde rováre ha nde héstore jepe ikatu ojekuaa reñeinteresaha nde rapicháre.

¿Mbaʼérepa iñimportantete reñeinteresa nde pyʼaite guive nde rapicháre? Pórke péicha resegi Jehová ehémplo, haʼe ñanderayhu ha ñandeporiahuvereko. Avei reipytyvõta umi nerendúvape oñemoag̃ui hag̃ua Jehováre ha remog̃uahẽ porãta pe mensáhe. Upévare repredika jave resegi vaʼerã ko konsého omeʼẽva la Biblia: “Aníkena pejapo peẽmente ou porãva, síno pejepyʼapy vaʼerã avei pende rapicháre” (Filip. 2:4).