Kapítulo 21

Oñemohuʼãta katuete Jehová rembipota

1, 2. a) Mbaʼépa Jehová oipota ojapo umi ánhel ha yvyporakuéra? b) Mávapa umi omombaʼeguasuvaʼekue oñondivepa Jehovápe peteĩ famíliaicha?

 OPOROHAYHÚGUI Jehová, Ñandejára añetegua ha peteĩetéva, oipota umi ánhel ha yvyporakuéra omombaʼeguasu chupe oñondivepa ha ohupyty pe liverta ijojahaʼỹva. Umi tapicha omombaʼéva pe hustísia oipotaiterei avei ojejapo upéva.

² Jehová omoñepyrũvaʼekue ipropósito porãite ojapo ypýrõ guare opa mbaʼe oĩva. Ojapo raẽ vaʼekue Itaʼýra Jesúspe, ha omoingove jey rire chupe umi omanovaʼekue apytégui, “taʼýra rupi niko ojehecha [Ñandejára glória] ha haʼe rupi [Ñandejára] ohechauka mbaʼéichapa Haʼe” (Hebreos 1:1-3, JMP). Ñandejaraite voi ojapógui Jesúspe, oñehenói chupe Taʼýra peteĩete. Haʼe rupi ojejapovaʼekue umi anhelkuéra raẽ ha upéi yvyporakuéra (Job 38:7; Lucas 3:38). Haʼekuéra oĩvaʼekue oñondivepa peteĩ família guasúpe. Chupekuéra g̃uarã Jehová haʼevaʼekue Ñandejára, pe Mburuvicha Guasu ha Túva oporohayhúva.

3. a) Mbaʼépa ombohasa ñandéve umi ñande ru ypykue? b) Mbaʼépa omoĩ Jehová imbaʼeporãgui Adán raʼykuérape g̃uarã?

³ Umi ñande ru ypykue ojapórõ guare ivaíva, Ñandejára heʼivaʼekue chupekuéra omanotaha, omosẽ Edéngui  ha ndoipotavéima chupekuéra ifamília apytépe (Génesis 3:22-24; Deuteronomio 32:4, 5). Ha ñande jajúgui chuguikuéra, ñagueronaséma voi pe mbaʼe vai apose. Péro Jehová oikuaavaʼekue Adán ha Eva família apytépe oĩtaha omombaʼéva pe hustísia. Ha imbaʼeporã rupi, omoĩ pe oñekotevẽva ojehupyty “hag̃ua umi [...] Ñandejára raʼykuéra reko sãʼỹ [térã liverta] ojajaipáva” (Romanos 8:20, 21, BNP).

Israel ndahaʼevéima Ñandejára puévlo

4. Mbaʼe ijojahaʼỹvapa omeʼẽvaʼekue Jehová Israélpe?

⁴ Dos mil quinientos áño ojapo rire Adánpe, Jehová omeʼẽvaʼekue peteĩ mbaʼe ijojahaʼỹva yvyporakuérape: oheja chupekuéra oiko iñamígoramo. Oiporavo Israélpe oiko hag̃ua ipuévloramo ha omeʼẽ chupekuéra Iléi (Génesis 12:1, 2). Ojapo rire Israélgui peteĩ tetã, oiporu chupekuéra ojapo hag̃ua hembipota (Deuteronomio 14:1, 2; Isaías 43:1). Péro, oĩgui pekádo ha ñemano poguýpe umi isrraelíta ndohupytýi pe liverta ijojahaʼỹva Adán ha Eva orekovaʼekue.

5. Mbaʼérepa opa pe amista Ñandejára orekovaʼekue umi isrraelíta ndive?

⁵ Upéicharamo jepe, umi isrraelíta oĩ porã vaʼekue Ñandejára renondépe. Upéicha avei, haʼekuéra katuete omombaʼevaʼerã Jehovápe Itúvaramo ha oiko Haʼe oipotaháicha. Jesús heʼivaʼekue tuicha mbaʼeha ojapo hikuái pe oñehaʼarõva chuguikuéra (Mateo 5:43-48). Ñambyasýramo jepe, umi isrraelíta ndojapoivaʼekue upéva. Ha heʼíramo jepe hikuái: “peteĩnte ore Ru, ha upéva [Ñandejára]”, Jesús heʼivaʼekue umi mbaʼe haʼekuéra ojapóvare ndojehechaiha upéva (Juan 8:41, 44, 47). Pe áño 33-pe, Jehová oipeʼa pe  Léi, ha opa pe amista porãite orekovaʼekue Israel ndive. Heʼisépa upéva avave ndaikatuveimaha oiko Ñandejára amígoramo?

Oñembyaty umi “mbaʼe oĩva yvágape”

6. Maʼerãpa oñemoĩvaʼekue pe administración heʼíva Pablo Efesios 1:9, 10-pe?

⁶ Apóstol Pablo heʼivaʼekue ikatuha kuña ha kuimbaʼe oñemoĩ porã Ñandejára ndive. Pór ehémplo, omombeʼu mbaʼépa Jehová ojapovaʼekue oĩ hag̃ua ifamíliape umi ojeroviáva hese, Pablo heʼivaʼekue: “[Ñandejára] oikuaauka ñandéve upe haʼe ojapótava ha avave oikuaaʼỹva. Haʼe imbaʼeporãgui, [...] [omoĩ peteĩ administración] ojapo hag̃ua koʼã mbaʼe Cristo rupi, ha omoĩ ára og̃uahẽ hag̃ua huʼãme upe haʼe oipotáva. Ha pe [Ñandejára] oipotáva niko kóva: Ombyatypase Cristo poguýpe opaite mbaʼe oĩva yvágape ha yvýpe” (Efesios 1:9, 10). Ko administración oĩ Jesucristo pópe. Haʼe rupi, yvyporakuéra ikatu oñemoĩ porã Ñandejára ndive: umíva apytépe mbovymi ohótava yvágape, ha hetaitereive umi oikótava ko Yvy ape ári opa ára g̃uarã.

7. Mávapa umi “mbaʼe oĩva yvágape”?

⁷ Pentecostés áño 33 guive oñepyrũ oñembyaty umi “mbaʼe oĩva yvágape”, térã umi oisãmbyhýtava Jesucristo ndive. Ojeroviágui hikuái Jesús sakrifísiore, Ñandejára heʼi hesekuéra ihustomaha (Romanos 5:1, 2). Upe rire, upe atýpe oikevaʼerã avei umi ndahaʼéiva hudío, ohupyty peve 144.000 (Gálatas 3:26-29; Apocalipsis [Revelación] 14:1). Umíva apytégui mbovymíntema opyta koʼág̃a Yvy ape ári.

Oñembyaty umi mbaʼe oĩva “yvýpe”

8. Mávapa umi mbaʼe oĩva “yvýpe”, ha mbaʼéichapa oĩ hikuái Jehová ndive?

⁸ Ko administración rupive oñembyaty avei umi mbaʼe  oĩva “yvýpe”. Koʼág̃a oĩma millones ohaʼarõva oikove opa ára g̃uarã ko Yvy ape ári. Haʼekuéra ha umi oisãmbyhýtava pe Rréino omombaʼeterei Ñandejára réra ha pe adorasión omeʼẽva chupe (Isaías 2:2, 3; Sofonías 3:9). Ohenói avei Jehovápe ‘ore Ru’, ohechakuaágui hekovekuéra ouha chugui. Ha ojerovia rupi Jesús ruguy oñeñohẽvaʼekuére, oñemoĩ porã hikuái Jehová ndive (Apocalipsis [Revelación] 7:9, 14). Péro, iñimperfékto rupi Ñandejára ndorekói gueteri chupekuéra itaʼýra teéramo.

9. Mbaʼépa oñepromete yvyporakuérape Romanos 8:21-pe?

⁹ Umi ohaʼarõva oiko ko Yvy ape ári oipotáma og̃uahẽ upe ára yvyporakuéra osẽ hag̃ua “tembiguái reko ha ñehundígui” (Romanos 8:21). Upéva oiko ñepyrũta Cristo ha ijehérsito yvagapegua omohuʼã vove Armagedónpe pe jehasa asy guasu. Upépe oñehundipáta Satanás múndo aña, ha upéi ojehupytýta umi mbaʼe porãita oguerútava Jesucristo ogoverna vove mil áño aja (Apocalipsis [Revelación] 19:17-21; 20:6).

10. Mbaʼépa opurahéita umi oservíva Jehovápe omombaʼeguasu hag̃ua chupe?

¹⁰ Añetehápe ovyʼaitereíta umi oservíva Jehovápe ko Yvy ape ári omombaʼeguasu vove chupe umi yvágape oĩva ndive. Umíva vyʼápe opurahéi: “Tuicha ha mbaʼe porãite umi ne rembiapo [...] Ñandejára, opa mbaʼe reisãmbyhýva. Hekopete ha Añeteguápe reguata. Nde opavave tetã ruvicha. Ñandejára. Máva piko nanemombaʼeguasuichéne. Nde añónte nemarangatu, ha opa umi tetãygua oúne nemombaʼeguasu ha oñesũ nerenondépe, ohechámagui koʼág̃a umi nde rejapóva oĩ porãha” (Apocalipsis [Revelación] 15:3, 4, JMP).  Añetehápe, opavave omombaʼeguasúta oñondivepa Jehovápe, Ñandejára añetegua ha peteĩetéva. Ha umi omanovaʼekue jepe oñemoingove jeýta ha ikatúta omombaʼeguasu avei Jehovápe (Hechos 24:15).

Liverta ijojahaʼỹva oĩva tenonderã

11. Mbaʼeichagua livertápa ohupytýta umi osẽva pe jehasa asy guasúgui?

¹¹ Opa rire pe jehasa asy guasu Armagedónpe, ha oñemopotĩ rire ko Yvy mbaʼe vaígui, Satanás el Diablo ndahaʼevéitama “ko múndo ruvicha”. Umi oadoráva Jehovápe noñorairõmoʼãvéitama hendive (2 Corintios 4:4; Apocalipsis [Revelación] 20:1, 2). Pe rrelihión japu ndoikomoʼãvéitama omongyʼa Jehová réra térã omoingo vai oñondive yvyporakuérape. Ñandejára rembiguaikuéra ndohasaʼasymoʼãvéitama umi mburuvichakuéra poguýpe. Tuichaite mbaʼéta pe liverta ohupytýtava hikuái!

12. Mbaʼéichapa yvyporakuérape ojepeʼáta pekádo poguýgui ha opa mbaʼe oguerúvagui?

¹² Jesús hína “Ñandejára ovecha raʼy oipeʼáva yvyporakuéra pekádo”, ha ojapóta upéva isakrifísio rupive (Juan 1:29, BNP). Oĩrõ guare ko Yvy ape ári, operdonávo umi hasývape ipekádo, omonguera avei chupekuéra imbaʼasýgui (Mateo 9:1-7; 15:30, 31). Upéicha avei, Jesucristo, oisãmbyhýtava Ñandejára Rréino yvagapegua, omongueráta umi ohechaʼỹva, iñeʼẽngúva, ohenduʼỹva, umi ikatuʼỹva ojevale ijehe, umi noĩporãiva iñakãme ha oimehaichagua mbaʼasy (Apocalipsis [Revelación] 21:3, 4). Opa yvypóra iñeʼẽrendúva Ñandejárape ojeíta “pe pekádo rehegua léi” poguýgui, ha umi mbaʼe opensáva ha ojapóva iporãta ha ombovyʼáta  Ñandejárape (Romanos 7:21-23, BNP). Opávo pe mil áño, iperféktotama hikuái Ñandejára añetegua joguaháramo (Génesis 1:26).

13. Mbaʼépa ojapóta Jesucristo og̃uahẽvo huʼãme pe Rréino oĩtava mil áño pukukue, ha mbaʼépa ojehupytýta?

¹³ Ohupyty rire yvyporakuéra perfeksión, Jesucristo omeʼẽ jeýta Itúvape pe autorida omeʼẽvaʼekue chupe ojapo hag̃ua upe tembiapo: “Upévo og̃uahẽta pe ára paha, Cristo ohundipahápe opaichagua puʼaka ha mburuvicha, ha ombohasa ñesãmbyhy [Ñandejára], ñande Ru, pópe. Cristo oisãmbyhyvaʼerã opa ijaʼeʼỹva hese oñemoĩmba peve ipyguýpe” (1 Corintios 15:24, 25). Pe Rréino oĩtava mil áño pukukue ojapopaitéta umi mbaʼe oñekotevẽva. Upévare, natekotevẽmoʼãvéima pe goviérno oipytyvõ yvyporakuérape oñemoĩ porã hag̃ua Jehová ndive. Ha opátamagui pekádo ha ñemano, ha yvyporakuéra oĩ porã jeýtamagui Ñandejára ndive, noñekotevẽmoʼãvéima Jesús sakrifísiore. Ñandejára Ñeʼẽ heʼi: “Ha oĩmbámarõ opa mbaʼe Cristo pyguýpe, upépe Cristo voi, pe Taʼýra, oñemoĩta [Ñandejára] poguýpe, pe omoĩmbavaʼekue Cristo poguýpe opa mbaʼe. Upéicharõ, [Ñandejára] haʼepáta opa mbaʼépe” (1 Corintios 15:28).

14. Mbaʼe pruévapa ohasáta umi yvypóra oĩ porã jeýtava Ñandejára ndive, ha mbaʼérepa?

¹⁴ Upe rire umi yvypóra oĩ porã jeýtamava Ñandejára ndive ohechaukavaʼerã oserviseha chupe opa ára g̃uarã. Upéicha, oguereko mboyve chupekuéra itaʼýra teéramo, Jehová oheja jeýta ohasa hikuái peteĩ pruéva. Satanás ha idemoniokuérape oñeguenohẽta pe yvykua  pypukúgui. Umi Jehovápe ohayhu añetéva ndohasamoʼãi mbaʼeve ivaíva ikatuʼỹva Haʼe omyatyrõ. Péro umi ndojepytasóiva Jehová ykére ha naiñeʼẽrendúiva chupe oñehundietéta, ha hendivekuéra Satanás ha umi demónio (Apocalipsis [Revelación] 20:7-10).

15. Mbaʼépa ojapo jeýta oñondive umi ánhel ha yvyporakuéra?

¹⁵ Upérõ, Jehová orekótama itaʼýra teéramo umi oñemoĩvaʼekuépe igoviérno poguýpe pe pruéva aja. Upe guive ohupytýta hikuái pe liverta ijojahaʼỹva Ñandejára raʼýicha, ha oĩtama avei Jehová família guasúpe. Ha umi ánhel ha yvyporakuéra omombaʼeguasu jeýta oñondivepa Ñandejára añetegua ha peteĩetévape. Upéicha oñekumplipaitéta Jehová rembipota. Ndépa reimese avei Ñandejára família guasúpe oĩtava opa ára g̃uarã? Upéicharõ, iporã vaʼerã rejepyʼamongeta heʼívare 1 Juan 2:17 [BNP]: “Ko múndo niko opa vaʼerã, opa koʼã mbaʼe ojehayhúva ipype oĩva reheve, pe ojapóva [...] Ñandejára rembipota katu opytavaʼerã tapia g̃uarã”.

Ñanemanduʼa hag̃ua

• Oñepuʼã mboyve Jehováre Edénpe, mbaʼéichapa oĩvaʼekue hendive opa omombaʼeguasúva chupe?

• Mbaʼépa ojapovaʼerã umi oservíva Ñandejárape?

• Mávapa oikóta Ñandejára raʼy teéramo, ha mbaʼéichapa upéva ohechauka Jehová oipotaha oñemombaʼeguasu chupe oñondivepa?

[Porandu ñahesaʼỹijóva]

 [Nóta oĩva taʼanga ndive páhina 190]

Umi yvypóra iñeʼẽrendúva Ñandejárape oikóta peteĩ paraísope ko Yvy ape ári