Kapítulo 14

Mbaʼéichapa oisãmbyhy Jehová iñorganisasión?

1. Mbaʼépa heʼi la Biblia Jehová organisasión rehe, ha mbaʼérepa iñimportánte ñandéve g̃uarã?

 OGUEREKÓPA Ñandejára peteĩ organisasión? Ñandejára Ñeʼẽ omombeʼu upeichaha ha ohechauka ñandéve michĩmi pe yvágape oĩva (Ezequiel 1:1, 4-14; Daniel 7:9, 10, 13, 14). Ndaikatúiramo jepe jahecha upéva ñande resa teépe, tuichaiterei ñanepytyvõ jaadora hag̃ua Jehovápe (2 Reyes 6:15-17). Jehová oguereko avei peteĩ organisasión ko Yvy ape ári. La Biblia ñanepytyvõ jahecha hag̃ua mbaʼeichaguápa upéva ha mbaʼéichapa Jehová oisãmbyhy.

Jehová organisasión Yvy ape arigua

2. Mbaʼe kongregasión pyahúpa omoĩ Ñandejára?

² Pe tetã Israel haʼevaʼekue Ñandejára kongregasión mil quinientos cuarenta y cinco áño pukukuére (Hechos 7:38). Péro ndojapóigui Ñandejára léi heʼíva ha omboykehaguére Itaʼýrape, Jehová oheja rei pe tetã. Jesús heʼivaʼekue umi hudíope: “Pemaʼẽke, opytáko pende róga taperéicha” (Mateo 23:38, BNP). Upémaramo Jehová omoĩ peteĩ kongregasión pyahu, ha ojapo hendive peteĩ pákto térã kompromíso ipyahúva. Pe kongregasiónpe oĩta 144.000 tapicha Ñandejára oiporavovaʼekue, oĩ hag̃ua Itaʼýra ndive yvágape (Apocalipsis [Revelación] 14:1-4).

3. Mbaʼépa oiko pe áño 33-pe, Pentecostés jave, ohechaukáva Ñandejára oiporutaha peteĩ kongregasión pyahu?

 ³ Umi oike ypy vaʼekue pe kongregasión pyahúpe ojeporavovaʼekue espíritu sánto rupive Pentecostés áño 33-pe. Omombeʼúvo ko mbaʼeguasu oikovaʼekue, la Biblia heʼi: “Og̃uahẽvo Pentecostés, opa ogueroviáva ijaty peteĩ hendápente. Upeichaháguinte peteĩ tyapu mbarete ou yvágagui, yvytu hatã oipejurõguáicha, ha omyenyhẽmba pe óga oĩháme hikuái. Ha ojechauka chupekuéra kũ tata rendýicha oguejýva peteĩteĩ hiʼarikuéra. Ha opavave henyhẽ Espíritu Sántogui” (Hechos 2:1-4). Ñandejára ohechauka upéicha ijespíritu rupive oiporutaha umi tapichakuérape ojapo hag̃ua haʼe oipotáva, ha Jesucristo oisãmbyhytaha chupekuéra yvága guive.

4. Mávapa oĩ Jehová organisasión Yvy ape ariguápe?

⁴ Koʼág̃a mbovymíntema opyta ko Yvy ape ári umi 144.000 apytégui. Péro ojeʼehaguéicha la Bíbliape, koʼág̃a omoirũ chupekuéra ‘peteĩ aty guasu’ ‘ambue ovechakuéra’ rehegua, ohupytýmava millones. Jesús, pe “ovecha rerekua imbaʼeporãva”, omoĩma oñondive koʼã mokõi aty oiko hag̃ua chuguikuéra peteĩnte, ha koʼãva iñeʼẽrendu chupe (Apocalipsis [Revelación] 7:9; Juan 10:11, 16). Koʼã mokõi atýgui oiko peteĩ kongregasión añónte, Jehová organisasión Yvy ape arigua.

Organisasión oisãmbyhýva Ñandejára

5. Mávapa oisãmbyhy Ñandejára organisasión, ha mbaʼéichapa ojapo upéva?

⁵ Pe ñeʼẽ “Ñandejára iglésia [kongregasión, NM]” ojeporúva la Bíbliape, ohechauka porã mávapa oisãmbyhy. Pe organisasión ogoverna Ñandejára. Haʼe omoĩ Jesucrístope Omoakã hag̃ua pe kongregasión, ha  oiporu avei la Biblia ñanemboʼe hag̃ua (1 Timoteo 3:14, 15, BNP; Efesios 1:22, 23; 2 Timoteo 3:16, 17).

6. a) Mbaʼéichapa ojehechavaʼekue pe síglo primérope Jehová ogovernaha pe kongregasión? b) Mbaʼépa ohechauka Jesús omoakãha pe kongregasión koʼág̃a peve?

⁶ Ñandejára ogovernaha pe kongregasión ojehecha porã vaʼekue Pentecostés jave (Hechos 2:14-18, 32, 33). Ojehechavaʼekue avei upéva Jehová ánhel ombohapérõ guare ojepredika hag̃ua Áfricape; Saulo de Tarso ohendúrõ guare Jesús ñeʼẽ ha oiko chugui kristiáno, ha Pedro opredika ypýrõ guare umi ndahaʼéivape hudío (Hechos 8:26, 27; 9:3-7; 10:9-16, 19-22). Mbeguekatúpe noñehenduvéi umi ñeʼẽ oúva yvágagui, ndojehechavéi umi ánhel ha ndaiporivéi umi mbaʼeguasu oñemeʼẽvaʼekue espíritu sánto rupive. Upevére, Jesús heʼivaʼekue: “Peikuaa, che aimeha penendive opa árape ko múndo paha peve” (Mateo 28:20, BNP; 1 Corintios 13:8). Koʼág̃a rupi, opavave testigo de Jehová ohechakuaa Jesús omoakãha chupekuéra. Upeichaʼỹrire, ndaikatuivaʼerãmoʼã opredika hikuái pe notísia porã Rréino rehegua, oĩgui hetaiterei oñemoĩva hesekuéra.

7. a) Mávapa pe ‘tembiguái jeroviaha ha iñarandúva’, ha mbaʼéichapa jaikuaa upéva? b) Mbaʼépa heʼi Jesús pe ‘tembiguáipe’ ojapo hag̃ua?

⁷ Omano mboyvemi, Jesús oñeʼẽvaʼekue hemimboʼekuéra ndive ‘pe tembiguái jeroviaha ha iñarandúvare’ [esclavo fiel y discreto]. Heʼi omeʼẽtaha chupe peteĩ tembiapo iñimportantetereíva. Pe ‘tembiguái’ oĩmavaʼekue Jesús ohórõ guare yvágape, ha ombaʼapo meméta gueteri haʼe ou ojey vove Ñandejára Rréino governánteramo. Peteĩ tapicha añónte ndaikatumoʼãi ojapo upéva, péro umi ojeporavovaʼekue oho hag̃ua yvágape  ikatúta ojapo. Huguy rupive Jesús ojoguavaʼekue koʼã tapichápe, ha upévare heʼi ‘hembiguaiha’. Heʼi chupekuéra ojapo hag̃ua disípulo ha omombarete hag̃ua umívape, “omongaru hag̃ua [espiritualménte] oikotevẽ jave” (Mateo 24:45-47; 28:19; Isaías 43:10; Lucas 12:42; 1 Pedro 4:10).

8. a) Mbaʼépa ojapo koʼág̃a pe tembiguái jeroviaha? b) Mbaʼérepa tekotevẽ ñahendu ha jajapo Ñandejára ñanemboʼeháicha pe tembiguái rupive?

⁸ Ou jeýrõ guare Jesús avave ohechaʼỹre 1914-pe, otopa pe tembiguái ojapoha kyreʼỹme pe tembiapo omeʼẽvaʼekue chupe. Upévare, koʼág̃a jaikuaaháicha, 1919-pe omeʼẽve chupe hembiaporã. Upe guive ojepredika pe Rréino ko Yvy tuichakuére ha oñembyaty peteĩ aty guasu oadoráva Jehovápe. Koʼãva nomanomoʼãi pe jehasa asy guasúpe (Mateo 24.14, 21, 22; Apocalipsis [Revelación] 7:9, 10). Koʼãva avei oikotevẽ pe tembiʼu espirituál, ha pe ‘tembiguái’ omeʼẽ chupekuéra. Upévare, ñaime porã hag̃ua Jehová ndive jajapovaʼerã haʼe ñanemboʼeháicha pe ‘tembiguái’ rupive.

9, 10. a) Mbaʼéichapa oñemyatyrõvaʼekue umi provléma ha oñemotenonde avei predikasión pe síglo primérope? b) Mbaʼéichapa ojejapo koʼág̃a umi tembiapo Jehová organisasiónpe?

⁹ Sapyʼánte ndojekuaái mbaʼépa térã mbaʼéichapa ojejapovaʼerã peteĩ mbaʼe. Mbaʼépa ikatu ojejapo upéicha jave? Hechos kapítulo 15 omombeʼu ñandéve mbaʼéichapa oñemyatyrõvaʼekue peteĩ provléma oĩvaʼekue umi kristiáno ndahaʼéiva hudío ndive. Upe mbaʼe oñeporanduvaʼekue umi apóstol ha ansianokuérape oĩva Jerusalénpe. Haʼekuéra omoakãvaʼekue upérõ umi kongregasión oĩva. Ikatúramo jepe ojavy avei umi kuimbaʼe, Ñandejára oiporu chupekuéra  omyatyrõ hag̃ua ko provléma. Ohecha rire mbaʼépa heʼi la Biblia, ha mbaʼéichapa pe espíritu sánto oipytyvõvaʼekue umi ndahaʼéivape hudío, odesidi hikuái mbaʼépa ojejapovaʼerã. Ñandejára ovendesi ko mbaʼe haʼekuéra ojapovaʼekue (Hechos 15:1-29; 16:4, 5). Koʼã apóstol ha ansianokuéra omondo avei heta kuimbaʼépe omotenonde hag̃ua predikasión Rréino rehegua.

¹⁰ Umi omoakãva koʼág̃a Jehová organisasión ko Yvy ape ári, oñehenóiva Cuerpo Gobernante, ou opa tetãgui ha oiko hikuái testigos de Jehová oficina central oĩhápe. Entéro koʼãva ohovaʼerã yvágape. Jesucristo poguýpe, ombaʼapo hikuái omotenonde hag̃ua pe adorasión añetegua ko Yvy ape ári. Omoakã avei predikasión ojapóva testigos de Jehová hetaiterei kongregasiónpe. Koʼã ermáno omoakãva Jehová organisasión heʼi avei pe apóstol Pablo heʼihaguéicha: “Ndahaʼéi niko roñembojaraséva pe pende jerovia rehe, poipytyvõsénte niko pevyʼave hag̃ua uvei; pe pende jerovia rupi niko peime hatã” (2 Corintios 1:24, BNP).

11. a) Mbaʼéichapa oñenombra umi ansiáno ha siérvo ministeriál? b) Mbaʼérepa ñaipytyvõvaʼerã ãichagua ermánope?

¹¹ Testigos de Jehová oĩva opárupi oheja pe Cuerpo Gobernante omoakãva Jehová organisasión ko Yvy ape ári oiporavo umi ermáno ikatupyrývape. Upéi koʼã ermáno oiporavo jey umi ansiáno ha siérvo ministeriál oñangareko hag̃ua kongregasión rehe. La Biblia heʼi mbaʼépa ojejerure chuguikuéra, péro ojehechakuaa avei umi kuimbaʼe iñimperfektoha, ha ikatuha ojavy. Umi ansiáno opororrekomendáva ha umi ojapóva pe nombramiénto oguereko tuicha rresponsavilida Ñandejára renondépe (1 Timoteo 3:1-10, 12, 13;  Tito 1:5-9). Upévare, haʼekuéra ojerure Ñandejárape oipytyvõ hag̃ua chupekuéra ijespíritu ha la Biblia rupive (Hechos 6:2-4, 6; 14:23). Ñamombaʼevaʼerã ãichagua kuimbaʼépe, ñanepytyvõva ñaime hag̃ua “peteĩcha ñande jeroviápe” (Efesios 4:8, 11-16).

12. Mbaʼéichapa Jehová oiporu umi kuñáme iñorganisasiónpe?

¹² Ñandejára Ñeʼẽ heʼi kuimbaʼe oñangarekovaʼerãha umi kongregasión rehe. Ko mbaʼe ndeʼiséi oñemboykeha umi kuñáme, oĩgui ijapytepekuéra ohótava yvágape, ha haʼekuéra oñondivepa tuicha oipytyvõ  ojepredika hag̃ua (Salmo 68:12 [68:11, NM]). Avei, oñehaʼãmbaitévo oñangareko ifamíliare, umi kuña oipytyvõ oñeñeʼẽ porã hag̃ua kongregasión rehe (Tito 2:3-5). Péro, pe kongregasiónpe omboʼevaʼerã umi kuimbaʼe oñemoĩvaʼekue upearã (1 Timoteo 2:12, 13).

13. a) Mbaʼéichapa ohechavaʼerã ansianokuéra umi rresponsavilida oñemeʼẽva chupekuéra? b) Mbaʼe ijojahaʼỹvapa oñemeʼẽ enterovépe jajapo hag̃ua?

¹³ Ko múndope oñemombaʼe umi irresponsavilida hetávape. Ñandejára organisasiónpe katu ojehecha kóicha: “Pe michĩvéva pende apytépe, upéva hína pe tuichavéva” (Lucas 9:46-48; 22:24-26). La Biblia heʼi umi ansianokuérape ani hag̃ua oñemombaʼeguasu umi Ñandejára mbaʼévare, upéva rangue omeʼẽvaʼerã hikuái ehémplo ovechakuérape (1 Pedro 5:2, 3). Ndahaʼéi mbovymípente, síno enterove testigos de Jehovápe, kuimbaʼe ha kuñáme, oñemeʼẽva ko mbaʼe ijojahaʼỹva: oñeʼẽ Ñandejára rérape, pe Mburuvicha Guasu yvága ha Yvy apohare, ha omoherakuã Irréino opárupi.

14. Eiporu umi téysto Bibliapegua embohovái hag̃ua umi porandu oñemoĩva ko párrafo rire.

¹⁴ Iporã ñañeporandumi: “Ahechakuaápa añetehápe mbaʼéichapa Jehová oisãmbyhy iñorganisasión ko Yvy ape ári? Ojehechápa upéva che ñeʼẽre ha pe ajapóvare?”. Ñanepytyvõta jajepyʼamongetáramo koʼã mbaʼére:

 Cheñeʼẽrendúramo añetehápe Crístope, pe kongregasión Omoakãva, mbaʼépa heʼi koʼã téysto ajapovaʼerãha? (Mateo 24:14; 28:19, 20; Juan 13:34, 35.)

 Amombaʼéramo pe ‘tembiguái jeroviaha’ ha Cuerpo  Gobernante rupive oúva, máva mávapepa amombaʼeʼaína? (Lucas 10:16.)

 Mbaʼéichapa otratavaʼerã iñermanokuérape umi kristiáno, ha koʼýte umi ansiáno? (Romanos 12:10.)

15. a) Mbaʼépa jahechauka ñamombaʼéramo Jehová organisasión? b) Mbaʼéichapa ikatu jahechauka Satanás ijapuha, ha ñambovyʼa avei Jehovápe ?

¹⁵ Jehová oñangareko koʼág̃a isiervokuérare iñorganisasión rupive, ombaʼapóva Cristo poguýpe. Upévare, ñamombaʼéramo pe organisasión jahechaukañaína ñañemoĩha Jehová goviérno ykére (Hebreos 13:17). Satanás heʼi jajepyʼapyha ñandejehénte. Upévare, ñaipytyvõramo umi oikotevẽvape ha ndajaikóiramo ñañemombaʼeguasu, jahechauka Satanás ijapuha. Ha ñambovyʼáta Jehovápe jahayhu ha ñamombaʼéramo umi haʼe oiporúvape oisãmbyhy hag̃ua pe kongregasión. Péro ndajaikomoʼãi ‘ñaporombojuruheʼẽ’ ñañemoĩ porã hag̃ua (Judas 16; Hebreos 13:7). Jajepytasóramo Jehová organisasión ykére jahechauka jaadoraha chupe ha jajapoha upéva peteĩ ñeʼẽme (1 Corintios 15:58).

Ñanemanduʼa hag̃ua

• Mbaʼe organisasiónpa oiporu Jehová koʼág̃a? Mbaʼépa ojapo?

• Mávapa Omoakã pe kongregasión, ha mbaʼépa oiporu ñanesãmbyhy hag̃ua mborayhúpe?

• Mbaʼéichapa iporã jahecha umi ermanokuérape oĩva Jehová organisasiónpe?

[Porandu ñahesaʼỹijóva]

[Nóta oĩva taʼanga ndive páhina 133]

Jehová ñanesãmbyhy iñorganisasión rupive ombaʼapóva Cristo poguýpe