Salmos 9:1-20
Pe odirihíva musikokuérape g̃uarã, Mut-Laben* rehe. David purahéi.
א [Álef]
9 Che pyʼaite guive rombotuicháta Jehová.
Amombeʼúta umi mbaʼe porãita nde rejapo vaʼekue.+
2 Ambotuicháta nde réra, vyʼa ha torýpe apurahéita ndéve,nde hína Ñandejára Ndaijojaháiva.+
ב [Behth]
3 Che enemigokuéra odiparaséta okañy hag̃ua,+péro oñepysangáta hikuái ha omanombáta ne renondépe.
4 Pórke nde chedefende ha rejapo chéve hustísia.
Nde reguapy ne trónope rehusga hag̃ua ha katuete rejapo hustísia.+
ג [Guímel]
5 Nde rekondena umi tetãnguérape.+
Nde rehundi vaʼekue umi iñañávape, ha upéi opa ára g̃uarã avave naimanduʼamoʼãvéima hesekuéra.
6 Nde rehundi umi enemígope opa ára g̃uarã,rehundi avei umi siuda ha ni hendague ndopytái.
Haʼekuéra opytáma tesaráipe.+
ה [He]
7 Jehová katu oguapýma itrónope ogoverna hag̃ua opa ára g̃uarã.+
Haʼe oguapy itrónope ohusga porã hag̃ua.+
8 Haʼe ohusga porãta ko yvy kompletoite,+haʼe ohusga vove umi tetãme ndojapomoʼãi inhustísia.+
ו [Waw]
9 Jehová hína peteĩ lugár isegúro porãva* umi oñemaltratávape g̃uarã.+
Ñandejára hína peteĩ lugár isegúro porãva, ikatuhápe jadipara jaike jahasa asy jave.+
10 Ñandejára, umi oikuaáva nde réra ojeroviáta nderehe.+
Jehová, nde núnka nderehejareimoʼãi umi oñemoag̃uívape nderehe.+
ז [Záyin]
11 Ñandejára Jehová oĩ hína Siónpe, pepurahéi pemombaʼeguasu hag̃ua chupe.
Peikuaauka umi héntepe umi mbaʼe haʼe ojapo vaʼekue.+
12 Ñandejára ndahesaraichéne umi persóna inosénte omano vaʼekuégui.+
Haʼe imanduʼáta mbaʼéichapa haʼekuéra ojerure asy chupe sokórro, ha oñevengáta ojejuka haguére chupekuéra.+
ח [Jehth]
13 Jehová, cheporiahuverekomína, emañamína mbaʼeichaitépa asufri umi ndochaʼéiva cherehe káusare.
Nde cheguenohẽ pe ñemano rokẽgui.+
14 Péicha rejapo che aikuaauka hag̃ua Siónpe entéro nembotuicha vaʼerãha umi mbaʼe porãite rejapo vaʼekuére.+
Ha avei avyʼa hag̃ua nde chesalva haguére.+
ט [Tehth]
15 Umi tetã hoʼa pe yvykua haʼekuéra voi ojoʼo vaʼekuépe.
Haʼekuéra jeýnte hoʼa pe ñuhã oprepara vaʼekuépe.+
16 Jehovápe ojekuaa opárupi oporohusga rupi tekojojápe.+
Umi hembiapo vaíva hoʼa umi ñuhãme haʼekueraite voi oprepara vaʼekuépe.+
Higayón.* (Sélah)
י [Yohdh]
17 Umi iñañáva ohóta pe Sepultúrape.*
Upépe ohóta avei enterove tetã hesaráiva Ñandejáragui.
18 Umi imboriahúva katu ndopytamoʼãi tesaráipe opa ára g̃uarã.+
Katuete oñekumplíta umi mbaʼe porã umi ivuénova ohaʼarõva.+
כ [Kaf]
19 Jehová, epuʼãna ha ani eheja umi yvypóra ogana,ehusga umi tetãme.+
20 Jehová, emongyhyjéna chupekuéra.+
Tohechakuaa ndahaʼeiha mbaʼevete asy, yvypóra reinteha hikuái. (Sélah)
