Ezequiel 17:1-24
17 Jehová oñeʼẽ jey chéve ha heʼi:
2 “Yvypóra raʼy, emombeʼu peteĩ adivinánsa ojoguáva peteĩ ehémplope oñeʼẽva Israel rogayguáre.+
3 Ere vaʼerã: ‘Péicha heʼi Ñandejára Jehová ogovernáva opa mbaʼe: “Pe ágila tuichaitéva,+ ipepo tuichaicháva, hague puku pukúva ha ipara porãva, ou pe Líbanope+ ha oipeʼa pe sédro rakã púnta.+
4 Oipeʼa pe hakã ijyvatevéva ha ogueraha umi komersiánte territóriope* ha oñotỹ umi komersiánte siudápe.+
5 Upéi ojagarra peteĩ semílla pe yvýgui+ ha oñotỹ peteĩ yvy porãme. Oñotỹ pe semílla oñeñotỹháicha peteĩ sáuse, peteĩ ysyry tuicháva ykére.
6 Upéi pe semílla heñói ha oiko chugui peteĩ parrál máta ikarapéva,+ umi hogue okakuaa yvy gotyo ha umi hapo okakuaa iguy gotyo. Péicha oiko chugui peteĩ parrál máta ha heta hoky pyahu ha umi hakã iñasãi opárupi.+
7 Ha ou avei upépe ótro ágila tuicháva,+ ipepo tuichaicháva, ha hague puku pukúva.+ Upémarõ ko parrál máta pyaʼe omondo umi hapo pe ágila oĩha gotyo, oka gotyo mombyry pe hardíngui, pe lugár oñeñotỹ haguégui chupe, ha omondo umi hakã pe ágila gotyo orrega hag̃ua chupe.+
8 Chupe oñeñotỹma kuri peteĩ yvy porãme, peteĩ ysyry tuicháva ykére ikatu hag̃uáicha hakã heta, hiʼa heta ha oiko chugui peteĩ parrál máta tuichaitereíva”’.+
9 Ere: ‘Péicha heʼi Ñandejára Jehová ogovernáva opa mbaʼe: “¿Osẽ porãta piko? ¿Ndaiporimoʼãi ngaʼu piko ohapoʼóva chupe+ ha ohundíva umi hiʼa ha ombopirupáva umi hokykue?+ Ko parrál máta ipirupaitéta ha noñekotevẽmoʼãi peteĩ ijyva mbaretéva ni heta hénte ojehapoʼo hag̃ua.
10 ¿Osẽ porãta piko pe parrál máta ojeguerováramo jepe? ¿Ndaipirupamoʼãi piko oipeju vove chupe yvytu ésteguio? Ipirupaitéta pe hardín oñeñotỹ haguépe”’”.
11 Ha Jehová oñeʼẽ jey chéve ha heʼi:
12 “Eremína umi hénte opuʼãvape cherehe: ‘¿Ndapepillái piko mbaʼépa heʼise koʼã mbaʼe?’. Ha ere: ‘¡Pemaʼẽmína! Pe rréi de Babilonia ou Jerusalénpe ha ojagarra pe rréi* ha umi iprinsipekuérape ha ogueraha chupekuéra hendive Babilóniape.+
13 Ojagarra avei peteĩva pe rréi familiare+ ha ojapo hendive peteĩ kompromíso, ha ojapoka chupe peteĩ huraménto.+ Upémarõ ogueraha umi kuimbaʼe iñimportántevape oĩva upe paíspe.+
14 Péicha oñehundietéta kuri pe goviérno ponove opuʼã jey, ha pe puévlo de Israel okumplíramo añoite pe kompromíso osegíta oĩ pe goviérno.+
15 Péro ipahápe pe rréi de Judá opuʼã pe rréi de Babilóniare+ omondóvo imensaherokuéra Egíptope ogueru hag̃ua kavaju+ ha peteĩ ehérsito tuicháva.+ ¿Osẽ porãne piko? ¿Ojesalváta piko pe kastígogui pe ojapóva hína koʼã mbaʼe? ¿Ikatu piko haʼe opyta kastigoʼỹre nokumplíriramo jepe pe kompromíso?’.+
16 ‘Péicha heʼi Ñandejára Jehová ogovernáva opa mbaʼe: “Che rekovére ahura peẽme haʼe omanotaha Babilóniape, pe lugár oikohápe pe rréi* omoĩ vaʼekue chupe rréiramo.* Haʼe odespresia kuri upe rréi huraménto ha nokumplíri pe ikompromíso.+
17 Ha pe ehérsito tuicháva ha faraón soldadokuéra hetaitéva noipytyvõmoʼãi chupekuéra oiko vove pe gérra,+ ág̃a umi soldádo babilonio omopuʼã vove peteĩ rrámpa pe siuda jerére, ha omongora vove pe siuda ohundi hag̃ua heta héntepe.*
18 Haʼe odespresia peteĩ huraménto ha nokumplíri peteĩ kompromíso. Ha oñekomprometéramo* jepe, haʼe ojapopaite koʼã mbaʼe ha ndojesalvamoʼãi”’.
19 ‘Upévare péicha heʼi Ñandejára Jehová ogovernáva opa mbaʼe: “Che rekovére ahura peẽme akastigataha chupe odespresia haguére che huraménto+ ha nokumplíri haguére che kompromíso.
20 Apoíta hiʼári che rred, ha haʼe hoʼáta pype.+ Agueraháta chupe Babilóniape ha ahusgáta chupe upépe chetraisiona haguére.+
21 Enterove umi isoldadokuéra okañýva ojejukapáta espádape, ha umi hembýva katu isarambíta opa gotyo ládo.*+ Upéi peẽ peikuaáta chete voi, Jehová, añeʼẽ hague”’.+
22 ‘Péicha heʼi Ñandejára Jehová ogovernáva opa mbaʼe: “Aipeʼáta pe hakã ijyvatevéva pe sédro ruʼãgui+ ha añotỹta, umi hakã ijyvatevévagui aipeʼáta peteĩ hakã pyahu,+ ha chete voi añotỹta peteĩ montáña ijyvatetereívape.+
23 Israel montáña ijyvatevéva ári añotỹta, ha umi hakã okakuaáta ha hiʼáta, ha oikóta chugui peteĩ sédro tuicha ha iporãitereíva. Ha opaichagua guyra ojaitypóta upépe ha oikóta isómbra guýpe.
24 Ha kompletoite umi yvyramáta oĩva umi ñúre oikuaáta che Jehová, aity hague pe yvyramáta ijyvatetéva ha ambotuicha hague pe yvyramáta ikarapévape,+ avei ambopiru hague pe yvyramáta hogue vérde asývape ha ambopoty hague pe yvyramáta ipirúvape.+ Chete Jehová haʼéma ha ajapóma upéva”’”.
Nóta
^ Hebréope: “Canaán territóriope”.
^ Péva hína pe rréi de Judá.
^ Péva hína Nabucodonosor.
^ Péva hína Sedequías.
^ Térã: “heta álmape”.
^ Hebréope: “oipopyhýramo”.
^ Térã: “yvytu oipejuha gotyo”.
