Apocalipsis 7:1-17
7 Upe rire ahecha 4 ánhel oñemboʼýva umi 4 eskínape oĩva ko yvy ári. Haʼekuéra ojoko hatã hína umi yvytu oúva umi 4 ládo ko yvýgui. Péicha ojapo ani hag̃ua oipeju umi yvytu pe yvy ári, ni pe mar ári, ni umi yvyramáta ári.
2 Ha ahecha ótro ánhel ojupíva ésteguio,* haʼe oreko Ñandejára oikovéva séllo* ha osapukái umi 4 ánhelpe. Koʼãvape oñemeʼẽ autorida ombyai hag̃ua pe yvy ha pe mar.
3 Ha heʼi: “Ani pembyai pe yvy, pe mar ni umi yvyramáta, rosellapa peve+ isyváre+ Ñandejára esklavokuérape”.
4 Upéi ahendu mboýpa umi ojesella vaʼekue: 144.000+ ojeselláva entéro trívu Israelguágui:+
5 Judá trívugui ojesella 12.000,
Rubén trívugui 12.000,
Gad trívugui 12.000,
6 Aser trívugui 12.000,
Neftalí trívugui 12.000,
Manasés+ trívugui 12.000,
7 Simeón trívugui 12.000,
Leví trívugui 12.000,
Isacar trívugui 12.000,
8 Zabulón trívugui 12.000,
José trívugui 12.000,
Benjamín trívugui ojesella 12.000.
9 Upe rire ahecha hetaiterei hénte, peteĩ aty guasu avave ndaikatúiva okonta, oúva entéro tetã, trívu ha puévlogui, ha oñeʼẽva diferénte idióma.+ Haʼekuéra oñemboʼy pe tróno ha pe Ovecha Raʼy renondépe, omonde ao puku morotĩ asýva+ ha oreko palméra rakã ipopekuéra.+
10 Haʼekuéra osegi osapukái ha heʼi: “Pe salvasión ou Ñandejáragui, pe oguapýva pe trónope,+ ha pe Ovecha Raʼýgui”.+
11 Entéro umi ánhel oñemboʼy pe tróno jerére, umi ansiáno+ ha umi keruvín* jerére. Haʼekuéra oñesũ pe tróno renondépe ha oadora Ñandejárape.
12 Haʼekuéra heʼi: “¡Amén!* Ñandejárape toñemombaʼeguasu, toñembotuicha ha tojerrespeta. Toñemeʼẽ chupe arandu, agradesimiénto, podér ha fuérsa opa ára g̃uarã.+ Amén”.
13 Upéi umi ansiáno apytégui peteĩva heʼi chéve: “¿Máva piko koʼã omondéva ao puku morotĩ asýva,+ ha moõgui piko ou hikuái?”.
14 Upémarõ, upepete haʼe chupe: “Che ruvicha, nde ningo la reikuaáva”. Ha haʼe heʼi chéve: “Koʼãva hína umi osẽva pe jehasa asy guasúgui,+ haʼekuéra ojohéi ijao pe Ovecha Raʼy ruguýpe+ ha ijaokuéra opyta morotĩ asy.
15 Upévare oĩ hikuái Ñandejára tróno renondépe, ha oservi chupe ára ha pyhare itémplope. Ha Ñandejára, pe oguapýva pe trónope,+ oñangarekóta hesekuéra.*+
16 Haʼekuéra ndoikomoʼãvéima iñembyahýi ni ijuhéi, ni ndohapymoʼãvéima chupekuéra kuarahy ni arahaku.+
17 Pórke pe Ovecha Raʼy+ oĩva pe tróno mbytépe oñangarekóta hesekuéra ojapoháicha peteĩ pastór,+ ha ogueraháta chupekuéra oĩháme yvu orekóva y oporomoingovéva.+ Ha Ñandejára omokãmbaitéta hesaykuéra”.+
Nóta
^ Griégope: “kuarahyresẽguio”.
^ Peteĩ séllo haʼe peteĩ pegaménto joguaha ojepuru vaʼekue oñemboty hag̃ua umi kuatia.
^ Térã: “¡Taupéicha!”.
^ Griégope: “oipysóta hiʼarikuéra hóga kárpa”.
