Números 31:1-54
31 Upéi Jehová heʼi Moiséspe:
2 “Eñevenga+ umi madianítare umi mbaʼe ojapo vaʼekuére umi israelita kóntrape.+ Ha upe rire remanóta ha reñeñotỹta umi nde tuakuéra ypykuéicha”.*+
3 Upémarõ Moisés oñeʼẽ umi israelítape, ha heʼi: “Peprepara umi kuimbaʼe oĩva pende apytépe oho hag̃ua oñorairõ Madián kóntrape. Péicha Jehová oñevengáta umi madianítare.
4 Pemondo vaʼerã pe ehérsitope 1.000 kuimbaʼe káda trívu de Israélgui”.
5 Upémarõ oñemondo umi miles oĩvagui Israélpe,+ 1.000 kuimbaʼe káda trívugui, péicha ojeprepara 12.000 kuimbaʼe oho hag̃ua gerrahápe.
6 Ha Moisés omondo 1.000 kuimbaʼe káda trívugui pe ehérsitope, ha oho avei Finehás.+ Haʼe hína pe saserdóte Eleazar raʼy ha oñenkarga umi tembiporu sagrádovare ha umi trompéta+ de gérra rehe.
7 Ha Jehová heʼi haguéicha Moiséspe, haʼekuéra oho oñorairõ umi madianítandi ha ojukapaite umi kuimbaʼépe.
8 Ha ojuka avei hikuái umi rréi de Madiánpe, umíva hína Eví, Réquem, Zur, Hur ha Reba. Koʼãva hína umi 5 rréi de Madián. Ojuka avei hikuái Balaámpe,+ haʼe hína Beor raʼy.
9 Péro umi israelita ojagarra ha ogueraha umi kuña ha umi mitãnguéra madianítape. Oguerahapaite avei chuguikuéra umi hymbakuéra ha opa mbaʼerepy orekóva.
10 Ha ohapy umi isiudakuéra oikoha hikuái ha umi kampaménto kompletoite.
11 Haʼekuéra ogueraha entéro mbaʼe oipeʼa ha osakea vaʼekue chuguikuéra, ogueraha hikuái umi hénte ha avei hymbakuéra.
12 Upéi haʼekuéra ogueraha umi prisionéro, umi mbaʼe osakea ha oipeʼa vaʼekue Moiséspe, Eleazar pe saserdótepe ha enterove umi israelítape. Upérõ umi israelita kampaménto oĩ vaʼekue pe desiérto de Moábpe,+ Jordán ypýpe, Jericó rovái.
13 Upémarõ Moisés, Eleazar pe saserdóte ha entéro kuimbaʼe omoakãva umi israelítape osẽ pe kampaméntogui, ha oho ohug̃uaitĩ chupekuéra.
14 Péro Moisés ipochyeterei umi kuimbaʼe omoakãvandi pe ehérsito, umíva hína umi héfe de 1.000 soldádo ha umi héfe de 100 soldádo. Upérõ haʼekuéra og̃uahẽ oúvo gerrahágui.
15 Moisés heʼi chupekuéra: “¿Mbaʼére piko ndapejukapái umi kuñanguérape?
16 Koʼãva hína umi omboliga vaʼekue umi israelítape+ oñemomombyry hag̃ua Jehovágui ha oadora hag̃ua pe dios fálso oĩva Peórpe.+ Balaam voi heʼi vaʼekue chupekuéra ojapo hag̃ua upéicha. Upévare ojekastiga vaʼekue Jehová puévlope.+
17 Ha koʼág̃a pejukapaite vaʼerã umi mitãʼi oĩva guive umi mitãnguéra apytépe, ha pejuka vaʼerã avei umi kuña orekóma vaʼekuépe rrelasión sexuál kuimbaʼéndi.
18 Péro ani pejuka umi mitãkuña ndorekóiva gueteri rrelasión sexuál kuimbaʼéndi.+
19 Upéi pehaʼarõ vaʼerã 7 día peike hag̃ua pe kampaméntope. Avei peñemopotĩ+ vaʼerã pe tercer díape ha pe séptimo díape, ojapo vaʼerã avei upéicha umi oporojuka vaʼekue, umi opoko vaʼekue peteĩ teʼonguére+ ha umi hénte pegueru vaʼekue.
20 Ha pemopotĩ vaʼerã pekádogui umi pende ao, oimeraẽ mbaʼe de kuéro, opa mbaʼe ojejapo vaʼekue kavara pirekuégui ha yvyrágui”.
21 Upéi Eleazar pe saserdóte heʼi umi kuimbaʼe oho vaʼekuépe gerrahápe: “Kóva hína pe léi Jehová omeʼẽ vaʼekue Moiséspe:
22 ‘Pe óro, pláta, kóvre, iérro, estáño, plómo
23 ha opa mbaʼe ikatúva oñemopotĩ tatápe, pembohasa vaʼerã tatárupi ha ipotĩtama. Upéi umíva pemopotĩ vaʼerã avei ýpe.*+ Péro entéro mbaʼe ndaikatúiva pemopotĩ tatápe, pemopotĩ vaʼerã ýpe.
24 Avei pejohéi vaʼerã pende ao pe séptimo díape ha penepotĩtama, ha upéi ikatútama peike pe kampaméntope’”.+
25 Upéi Jehová heʼi Moiséspe:
26 “Ejapo peteĩ lísta umi mbaʼe ojegueru vaʼekuégui, ekonta mboy hénte ha animálpa ojegueru. Ko lísta rejapo vaʼerã pe saserdóte Eleazar ndive ha umi omoakãvandi ituakuéra ypykue familiarépe.
27 Edividi umi mbaʼe ojegueru vaʼekue ha peteĩ párte emeʼẽ umi oho vaʼekuépe gerrahápe ha pe ótra párte emeʼẽ umi israelita opyta vaʼekuépe.+
28 Ha umi mbaʼe oñemeʼẽ vaʼekuégui umi soldádo oho vaʼekuépe gerrahápe, de káda 500 emeʼẽ Jehovápe peteĩ,* tahaʼe persóna, vaka, vúrro térã ovecha.
29 Ha ejagarra pe párte otoka vaʼekuégui chupekuéra ha emeʼẽ Eleazar pe saserdótepe kontrivusiónramo Jehovápe g̃uarã.+
30 Ha pe ótra párte oñemeʼẽ vaʼekuégui umi israelítape, emeʼẽ umi levítape+ peteĩ de káda 50, tahaʼe persóna, vaka, vúrro, ovecha térã oimehaichagua animál. Umi levita oñenkarga hína umi mbaʼe ojejapóvare Jehová tavernákulope”.+
31 Upémarõ Moisés ha Eleazar pe saserdóte ojapo Jehová heʼi hagueichaite Moiséspe.
32 Umi mbaʼe ojegueru vaʼekue gerrahágui ha omohemby vaʼekue hikuái, en totál ohupyty 675.000 ovecha,
33 72.000 vaka,
34 ha 61.000 vúrro.
35 Umi mitãkuña ndorekóiva gueteri rrelasión sexuál kuimbaʼéndi+ en totál ohupyty 32.000.
36 Pe párte otokáva umi oho vaʼekuépe gerrahápe, ohupyty en totál 337.500 ovecha,
37 ha umívagui oñemeʼẽ Jehovápe en totál 675 ovecha.
38 Umi vaka en totál ohupyty 36.000, ha umívagui oñemeʼẽ Jehovápe 72 vaka.
39 Ha umi vúrro en totál ohupyty 30.500, ha umívagui oñemeʼẽ Jehovápe 61 vúrro.
40 Umi persóna* katu ohupyty en totál 16.000, ha umívagui oñemeʼẽ Jehovápe 32 persóna.*
41 Upéi Moisés omeʼẽ Eleazar pe saserdótepe koʼã kontrivusión Jehovápe g̃uarã,+ haʼe ojapo Jehová heʼi hagueichaite chupe.
42 Ha pe ótra párte oñemeʼẽ vaʼekue umi israelítape, upéva hína pe Moisés ombojaʼo vaʼekue chupekuéra umi kuimbaʼe oho vaʼekuégui gerrahápe,
43 ohupyty en totál 337.500 ovecha,
44 36.000 vaka,
45 30.500 vúrro,
46 ha 16.000 persóna.*
47 Upéi Moisés ojagarra pe párte otokávagui umi israelítape, ha de káda 50 omeʼẽ peteĩ umi levítape,+ tahaʼe persóna térã animál. Umi levita oñenkarga hína umi mbaʼe ojejapóvare Jehová tavernákulope.+ Péicha Moisés ojapo Jehová heʼi hagueichaite chupe.
48 Upéi oñemboja Moisés rendápe umi kuimbaʼe omoakãva pe ehérsito,+ umi héfe de 1.000 soldádo ha umi héfe de 100 soldádo,
49 ha heʼi hikuái Moiséspe: “Ore ningo rokontapáma umi kuimbaʼe oĩva ore poguýpe ha oho vaʼekue gerrahápe, ha ndofaltái ni peteĩ.+
50 Upévare epermitína oréve, káda uno toromeʼẽ Jehovápe ofréndaramo umi mbaʼe rojuhu vaʼekue, umi kósa de óro, tovilléra, vrasaléte, umi kuãirũ ojepurúva ojesella hag̃ua, umi namichãi ha opaichagua joya, ikatu hag̃uáicha oñeperdona oréve* ore pekádo Jehová renondépe”.
51 Ha Moisés ha Eleazar pe saserdóte ojagarra chuguikuéra umi óro ha opaichagua joya.
52 Pe óro omeʼẽ vaʼekue umi héfe de 1.000 soldádope ha umi héfe de 100 soldádope, pe kontrivusión omeʼẽ vaʼekue Jehovápe g̃uarã ohupyty en totál 191 kílo.*
53 Káda uno umi kuimbaʼe oho vaʼekue gerrahápe ogueraha kuri imbaʼerã peteĩ párte umi mbaʼe ojegueru vaʼekuégui.
54 Moisés ha Eleazar pe saserdóte ojagarra pe óro umi héfe de 1.000 soldádogui ha umi héfe de 100 soldádogui, ha omoinge hikuái pe óro pe tavernákulope* Jehová renondépe ikatu hag̃uáicha haʼe imanduʼa umi israelítare.
Nóta
^ Hebréope: “remoirũta umi ne hentekuérape”. Péicha ojeʼe umi poesíape pe ñemanóre.
^ Ko y omopotĩ umi hénte ha umi kósa opyta hag̃uáicha ipotĩ Ñandejára renondépe.
^ Térã: “álma”.
^ Térã: “álma”.
^ Térã: “álma”.
^ Térã: “álma”.
^ Térã: “ore álmape”.
