Números 30:1-16
30 Ha Moisés oñeʼẽ umi kuimbaʼe omoakãvape+ Israel trivukuéra, ha heʼi: “Jehová heʼi ojejapo vaʼerãha ko mbaʼe:
2 peteĩ kuimbaʼe katuete okumpli vaʼerã iñeʼẽ+ ojapóramo peteĩ promésa+ Jehovápe, térã ohuráramo+ ndojapomoʼãiha peteĩ mbaʼe. Ojapopaite vaʼerã umi mbaʼe heʼi vaʼekue ojapotaha.+
3 Peteĩ kuñataĩ ojapóramo peteĩ promésa Jehovápe, térã ohuráramo ndojapomoʼãiha peteĩ mbaʼe oiko aja gueteri itúa rógape,
4 ha itúa ohendúramo upe promésa ojapo vaʼekue, térã oñekomprometeha Ñandejárape ndojapomoʼãiha peteĩ mbaʼe, ha ndeʼíri chupe mbaʼeve, upéicharõ pe kuñataĩ okumpli vaʼerã umi mbaʼe opromete vaʼekue. Entéro mbaʼe opromete vaʼekue ndojapomoʼãiha, haʼe okumpli vaʼerã katuete.
5 Péro pe túa ohendúvo itajýra ojapoha peteĩ promésa térã oñekomprometéramo Ñandejárape ndojapomoʼãiha peteĩ mbaʼe, ha oproivi chugui, upéicharõ natekotevẽmoʼãi okumpli umi mbaʼe oñekompromete vaʼekue. Péicha oikóramo Jehová operdonáta chupe, pórke itúa oproivi chugui.+
6 Péro ko kuñataĩ omendáramo okumpli aja gueteri ipromésa, térã pe oñekompromete vaʼekue opensa porãʼỹre,
7 ha pe iména ndeʼíriramo chupe mbaʼeve oikuaaha díape, upéicharõ katuete okumpli vaʼerã umi mbaʼe opromete vaʼekue, térã umi mbaʼe oñekompromete vaʼekue ndojapomoʼãiha.
8 Péro pe iména oproivíramo chugui pe oikuaaha díape, upéicharõ haʼe natekotevẽmoʼãi okumpli ipromésa, térã pe opensa porãʼỹre oñekompromete vaʼekue ojapotaha.+ Péicha oikóramo Jehová operdonáta chupe.
9 Péro peteĩ viúda térã peteĩ kuña ojedivorsia vaʼekue ojapóramo peteĩ promésa, katuete okumpli vaʼerã entéro mbaʼe opromete vaʼekue.
10 Péro peteĩ kuñakarai oiko aja gueteri iménandi hógape, ojapóramo peteĩ promésa térã oñekomprometéramo ndojapomoʼãiha peteĩ mbaʼe,
11 ha iména ohendúramo upe promésa ojapo vaʼekue, térã oñekomprometeha Ñandejárape ndojapomoʼãiha peteĩ mbaʼe, ha ndeʼíriramo chupe mbaʼeve, upéicharõ pe kuñakarai okumpli vaʼerã.
12 Péro pe ména ohenduha díape hembireko ojapoha peteĩ promésa térã oñekomprometeha ndojapomoʼãiha peteĩ mbaʼe, ha oproivi chugui, upéicharõ natekotevẽmoʼãi okumpli umi mbaʼe oñekompromete vaʼekue.+ Péicha oikóramo Jehová operdonáta chupe, pórke iména oproivi chugui.
13 Pe ména odesidi vaʼerã hembireko okumplítapa térãpa nokumplimoʼãi ipromésa, térã upe mbaʼe ohura ha oñekompromete vaʼekue ndojapomoʼãiha.
14 Péro ohasáramo unos kuánto día ha iména ndeʼíri chupe mbaʼeve, upéicharõ haʼe odesidi hembireko ikatuha okumpli umi promésa ojapo vaʼekue, térã umi mbaʼe oñekompromete vaʼekue ndojapomoʼãiha. Haʼe opermiti hína chupe okumpli umíva, pórke ndeʼíri kuri mbaʼeve upe ohenduha díape hembirekópe ojapórõ umi promésa.
15 Péro pe ména ohendu rire ohasáramo unos kuánto día, ha upe rire ae haʼe oproivi chugui okumpli ipromésa, upéicharõ hese opẽta pe hembireko nokumplíri vaʼekue”.+
16 Koʼãva hína umi léi Jehová omeʼẽ vaʼekue Moiséspe, ha heʼíva mbaʼépa ojejapo vaʼerã peteĩ tembireko térã tajýra ojapóramo peteĩ promésa. Koʼã mbaʼe ojapo vaʼerã peteĩ ména ha hembireko, térã peteĩ túa ha itajýra kuñataĩ oikóva hógape.
