Números 19:1-22
-
Pe vakílla pytã ha pe y oporomopotĩva (1-22).
19 Jehová oñeʼẽ jey Moisés ha Aarónpe, ha heʼi:
2 “Che, Jehová, ameʼẽ peẽme ko léi: ‘Ere umi israelítape togueru ndéve peteĩ vakílla pytã, isánova ha ndoguerekóiva ni peteĩ defékto,+ ha ndojejokuáiva gueteri júgore.
3 Peẽ pemeʼẽ vaʼerã Eleazar pe saserdótepe oguenohẽ hag̃ua pe kampaméntogui, ha pe vakílla ojejuka vaʼerã henondépe.
4 Upéi Eleazar ojagarra vaʼerã michĩmi pe vakílla ruguykue ha omoheʼõ pype ikuã. Ha upe tuguýpe ohypýi vaʼerã pe yvy 7 vése pe tavernákulo* entráda oĩha gotyo.+
5 Upéi pe vakílla ojehapýta henondépe. Ojehapýta pe vakílla pirekue, hoʼokue, huguykue ha hekakakue.+
6 Ha pe saserdóte ojagarra vaʼerã sédro rakã, ñana máso* ha ílo pytã asýva, ha opoi pe tatápe pe vakílla okái jave.
7 Upéi pe saserdóte ojohéi vaʼerã ijao ha ojahu, ha upe rire ae ikatúta oike jey pe kampaméntope, péro opytáta ikyʼa kuarahy oike peve.
8 Pe ohapy vaʼekue pe vakílla, ojohéi vaʼerã avei ijao ha ojahu, ha opytáta ikyʼa kuarahy oike peve.
9 Peteĩ kuimbaʼe ipotĩva ombyatýta pe vakílla+ ojehapy vaʼekue tanimbukue ha ogueraháta omoĩ peteĩ lugár ipotĩvape mombyry pe kampaméntogui. Ha upe tanimbu oñeñongatu vaʼerã ojeprepara hag̃ua pe y oipurútava umi israelita omopotĩ hag̃ua umi mbaʼe ikyʼáva.+ Péva peteĩ ofrénda ojepaga hag̃ua umi pekádore.
10 Pe kuimbaʼe ombyaty vaʼekue pe vakílla tanimbukue ojohéi vaʼerã avei ijao ha ojahu, ha opytáta ikyʼa kuarahy oike peve.
Kóva haʼéta peteĩ léi siémpre okumpli vaʼerã umi israelita ha umi extranhéro oikóva pende apytépe:+
11 oimeraẽ opokóva peteĩ omano vaʼekuére opytáta ikyʼa 7 día.+
12 Pe tercer díape haʼe oñemopotĩ vaʼerã pe y ojepurúvape oñemopotĩ hag̃ua umi ikyʼávape, ha pe séptimo díape opytátama ipotĩ. Péro noñemopotĩriramo pe tercer díape, haʼe naipotĩmoʼãi gueteri pe séptimo díape.
13 Oĩramo opokóva peteĩ omano vaʼekuére ha noñemopotĩri chupe, haʼe omongyʼáma Jehová tavernákulo.+ Upéicharõ upe persónape ojejuka vaʼerã,+ pórke ndojehypýiri kuri chupe pe y ojepurúvape oñemopotĩ hag̃ua umi ikyʼávape,+ ha upévare haʼe osegi gueteri ikyʼa.
14 Kóva ko léi oñekumpli vaʼerã peteĩ kuimbaʼe omanóramo peteĩ ógape:* enterove oikéva upe ógape ha enterove oĩmava voi upe ógape, opytáta ikyʼa 7 día.
15 Entéro mbaʼyru ndojetapaporãi vaʼekue,* opytáta ikyʼa.+
16 Oimeraẽ oĩva ñúre ha opokóva peteĩ ojejuka vaʼekuére espádape, térã peteĩ teʼonguére, ỹrõ peteĩ omano vaʼekue kanguekuére térã peteĩ sepultúrare, upéicharõ opytáta ikyʼa 7 día.+
17 Ha oñemopotĩ hag̃ua upe persónape, ojejagarra vaʼerã michĩmi pe vakílla tanimbukue ojepurúva ojepaga hag̃ua umi pekádore ha ojehapy vaʼekue. Upe tanimbu oñemoĩ vaʼerã peteĩ mbaʼyrúpe ha oñeñohẽ hiʼári y ipotĩva.
18 Upéi peteĩ kuimbaʼe ipotĩva+ ojagarráta peteĩ ñana máso ha omoingéta pe ýpe ha ohypýita pe óga, umi mbaʼyru ha umi hénte oĩ vaʼekuépe upépe. Avei ohypýita umi opoko vaʼekuépe peteĩ omano vaʼekue kanguekuére, térã opoko vaʼekue peteĩ ojejuka vaʼekuére, peteĩ teʼonguére térã peteĩ sepultúrare.
19 Pe kuimbaʼe ipotĩva ohypýita pe persóna ikyʼávape pe tercer díape, ha avei pe séptimo díape. Péicha haʼe omopotĩta chupe ipekádogui pe séptimo díape.+ Upéi haʼe ojohéi vaʼerã ijao ha ojahu, ha ipotĩ jeýta kuarahy oike rire.
20 Péro pe persóna oñemongyʼa vaʼekue noñemopotĩriramo, upéicharõ ojejuka vaʼerã chupe,+ pórke omongyʼáma Jehová tavernákulo. Chupe ndojehypýiri kuri pe y ojepurúvape oñemopotĩ hag̃ua umi ikyʼávape, upévare haʼe ikyʼa.
21 Kóva hína peteĩ léi siémpre pekumpli vaʼerã: pe ohypýiva hapichápe pe y ojepurúvape oñemopotĩ hag̃ua umi ikyʼávape,+ ojohéi vaʼerã ijao, ha upe opoko vaʼekue upe ýre opytáta ikyʼa kuarahy oike peve.
22 Oimeraẽ mbaʼe opokóvare pe persóna ikyʼáva, opytátama avei ikyʼa. Ha oĩramo ótro opokóva koʼã mbaʼére, opytáta avei ikyʼa kuarahy oike peve’”.+
