Jeremías 7:1-34
7 Jehová oñeʼẽ Jeremíaspe ha heʼi chupe:
2 “Tereho eñemboʼy Jehová róga rokẽme ha ere chupekuéra koʼã mbaʼe: ‘Pehendu Jehová ñeʼẽ entéro peẽ Judagua, peikéva hína koʼã okẽrupi peñesũ hag̃ua Jehová renondépe.
3 Israel Jára Jehová, umi ehérsito yvagapegua ruvicha heʼi péicha: “Pekambia peiko lája ha umi mbaʼe pejapóva, ha che ahejáta peẽme pesegi peiko ko lugárpe.+
4 Ani pejerovia umi japu ojeʼévare ha peje: ‘¡Kóva hína* Jehová témplo, kóva hína Jehová témplo, kóva hína Jehová témplo!’.+
5 Pórke añetehápe pekambiáramo peiko lája ha umi mbaʼe pejapóva, peñehaʼãramo pejapo hustísia iprovléma jave peteĩ kuimbaʼe hapichándi,+
6 ha napembohasaʼasýiramo umi extranhéro oikóvape pende apytépe, umi ityreʼỹvape, ha umi viúdape,+ ha ndapejukáiramo peteĩ persóna inoséntepe,* ha ndapehóiramo umi ótro dios rapykuéri pejeperhudika hag̃ua,+
7 upéicharõ che apermitíta peẽme pesegi peiko ko lugárpe, ko yvy ameʼẽ vaʼekuépe pende tuakuéra ypykuépe, ha peikóta pype pára siémpre”’”.*
8 “Péro peẽ pejerovia hína umi japu ojeʼévare...+ upéva ndaideprovechomoʼãi peẽme.
9 ¿Peimoʼã piko ikatuha pemonda,+ pejuka, pemoakãratĩ, pendejapu pehurávo,+ pejapo sakrifísio* Baálpe,+ ha pesegi umi dios peẽ ndapeikuaáivape?
10 ¿Peimoʼã piko upéi ikatuha peju peñemboʼy che renondépe ko óga ojepurúvape oñemombaʼeguasu hag̃ua che réra, ha peje: ‘Jajesalváta’, pejapóramo jepe entéro koʼã mbaʼe oporombojeguarúva?
11 ¿Peẽme g̃uarã piko upéicharõ ko óga ojepurúvagui oñemombaʼeguasu hag̃ua che réra oiko vaʼerã peteĩ mondaha raity?+ Che ahechapaite hína la pejapóva”, heʼi Jehová.
12 “‘Tapeho koʼág̃a che santuáriope oĩva Silópe,+ upe lugár che aiporavo vaʼekue iñepyrũme oñemombaʼeguasu hag̃ua che réra,+ ha pehecha mbaʼépa la ajapo vaʼekue che puévlo Israel rehe hembiapo vai haguére.+
13 Péro peẽ pesegi pejapo entéro koʼã mbaʼe’, heʼi Jehová, ‘ha añeʼẽ jey jeýramo jepe peẽme,* peẽ napehendúi.+ Che asegi pohenói, péro peẽ napepenái cherehe.+
14 Péicha ajapóta pe ógare oñemombaʼeguasuhápe che réra,+ upe peẽ pejeroviaitévare,+ ko lugár ameʼẽ vaʼekuére peẽme ha pende tuakuéra ypykuépe, ajapo haguéicha Silóre.+
15 Pomosẽta che renonderãgui, amosẽ haguéicha che renonderãgui enterovete pene ermanokuérape, kompletoite umi Efraín familiarépe’.+
16 Nde katu, animoʼãkena reñemboʼe ko puévlo rehehápe. Animoʼãke rejerure asy ni reñemboʼe ha nerasẽ rejerurévo hesehapekuéra,+ pórke norohendumoʼãi.+
17 ¿Nderehechái piko la ojapóva oikóvo hikuái Judá siudakuérape ha Jerusalén kallekuérape?
18 Umi taʼyrakuéra ombyaty oikóvo jepeʼa, umi tuakuéra ojatapy hína, ha umi tembirekokuéra katu oprepara hína pe mása ojapo hag̃ua tórta de sakrifísio pe ‘Rréina Yvagapeguápe’,*+ ha oñohẽ hikuái ofrénda líkida umi ótro dióspe g̃uarã chembopochy hag̃ua.+
19 Jehová heʼi: ‘Péro, ¿chéve piko hína la pecheperhudika?* ¿Ndahaʼéi piko peẽ la pejeperhudikáva hína peñemotĩ hag̃ua?’.+
20 Upéicha rupi, péicha heʼi Ñandejára Jehová ogovernáva opa mbaʼe: ‘Amboúta che pochykue ko lugárpe,+ umi kuimbaʼe ha umi animál ári, umi mbaʼe oprodusíva ko yvy ha umi yvyramáta ñumegua ári, che pochykue hendýta tatáicha ha ndoguemoʼãi’.+
21 Israel Jára Jehová, umi ehérsito yvagapegua ruvicha heʼi péicha: ‘Pejapove katu ofrénda ojehapypaitéva umi ótro sakrifísiondi, ha peẽ voi peʼu umíva.+
22 Pórke aguenohẽrõ guare pende tuakuéra ypykuépe Egíptogui, che ndaʼéi ni namandái kuri chupekuéra ojapo hag̃ua ofrénda ojehapypaitéva ha sakrifísio.+
23 Péro amanda kuri chupekuéra ko mbaʼe: “Pejapo haʼéva peẽme ha che haʼéta pende Dios, ha peẽ haʼéta che puévlo.+ Peẽ peiko vaʼerã pe tape che amandávare peẽme ikatu hag̃uáicha oho porã peẽme”’.+
24 Péro haʼekuéra nopenái cherehe ni nacherendúi,+ upéva rangue ojapo haʼekuéra ojaposévante,* oñembokaprichóso ha ojapo ikorasõ aña heʼíva,+ ha oho hikuái tapykue gotyo oho rangue tenonde gotyo,
25 ha péicha oiko pende tuakuéra ypykue osẽha día guive Egíptogui koʼág̃a peve.+ Upémarõ che asegi amondo peẽme che siervokuéra umi proféta, ha amondo chupekuéra káda día, heta vése.*+
26 Péro ko puévlo nacherenduséi, ha ndojapysakái cherehe.+ Upéva rangue oñembokaprichóso ha hembiapo vaive umi ituakuéra ypykuégui.
27 Nde eréta chupekuéra entéro koʼã mbaʼe,+ péro nanerendumoʼãi, rehenóita chupekuéra, péro nopenamoʼãi nderehe.
28 Ha eréta chupekuéra: ‘Kóva hína pe nasión naiñeʼẽrendúi vaʼekue Ijára Jehovápe, ha ndohejái haʼe okorrehi chupekuéra. Ndaipóri avave iñeʼẽrendúva, ha ni noñeʼẽi voi hikuái upe témare’.*+
29 Eikytĩ ne akãrangue puku* ha emombo, ha epurahéi peteĩ músika jaheʼo umi sérro perõ ári, pórke Jehová orrechasáma ha oheja reíta ko henerasión ombopochy vaʼekuépe chupe.
30 Jehová heʼi: ‘Pórke pe puévlo de Judá ojapo ivaíva che renondépe. Haʼekuéra omoĩ umi idiós puerkésa pe óga oñemombaʼeguasuhápe che réra ha péicha omongyʼa hikuái.+
31 Haʼekuéra omopuʼã umi lugár yvate oĩva Tófetpe,* oĩva Hinón Raʼy Ñúme*+ ohapy hag̃ua upépe itaʼýra ha itajyrakuérape sakrifísioramo,*+ upéva che namandái vaʼekue chupekuéra ha núnka ndarekói vaʼekue che pyʼapýpe upéva’.*+
32 Jehová heʼi: ‘Upévare og̃uahẽta hína umi día ndojeʼemoʼãveimaha pe lugár rehe Tófet ni Hinón Raʼy Ñu,* síno Ñu Ojeporojukaha. Tófetpe oñotỹta hikuái umi omano vaʼekue, ndaiporivéi peve lugár oñeñotỹ hag̃ua chupekuéra.+
33 Ha heʼonguekuéra opytáta umi guyra ha umi animál salváhe ko yvy arigua rembiʼurã, ha avave nomongyhyjemoʼãi chupekuéra.+
34 Che aipeʼáta Judá siudakuéragui ha Jerusalén kallekuéragui umi osapukáiva vyʼágui, ha umi ovyʼaitereíva, ha noñehendumoʼãvéima pe nóvio ha pe nóvia ñeʼẽ,+ pórke pe país oñehundietéta’”.+
Nóta
^ Hebréope: “Koʼãva hína”. Koʼápe oñeñeʼẽ umi konstruksión kompletoite oĩvare pe témplo oĩháme.
^ Hebréope: “napeñohẽiramo peteĩ persóna inosénte ruguy”.
^ Térã: “etérno ymaite guive ha pára siémpre”.
^ Térã: “sakrifísio oñemotimbóva”.
^ Hebréope: “voi apuʼã ha añeʼẽramo jepe peẽme”.
^ Peteĩ título orekóva peteĩ diosa oadoráva umi israelita oñemoĩva Ñandejárare. Ojeʼe ko diosa ikatuha oipytyvõ umi kuñáme hyeguasu hag̃ua.
^ Térã: “chembopochy, chemorrenega”.
^ Térã: “osegi ikonsehokuérante”.
^ Hebréope: “voi apuʼã ha amondo chupekuéra”.
^ Hebréope: “oipeʼaite hikuái ijurúgui”.
^ Térã: “noñekytĩriva, emeʼẽ vaʼekue”.
^ Peteĩ lugár oĩva okápe Jerusaléngui, ha upépe umi israelita opuʼãva Ñandejárare osakrifika umi mitãme.
^ Ehecha “Gehena” Diksionáriope.
^ Hebréope: “ombohasa hag̃ua upépe itaʼýra ha itajyrakuérape tatárupi”.
^ Térã: “núnka ndoikéi vaʼekue chéve che akãme”.
^ Ehecha “Gehena” Diksionáriope.
