Jeremías 41:1-18
41 Pe séptimo méspe, Ismael,+ haʼéva Netanías raʼy ha Elisamá niéto, haʼéva umi rréi familiare* ha pe kuimbaʼe iñimportantevéva pe palásiope, ou 10 kuimbaʼéndi Mizpápe Guedalías rendápe,+ haʼéva Ahicam raʼy. Ha okaru aja hikuái oñondive Mizpápe,
2 Ismael, haʼéva Netanías raʼy, ha umi 10 kuimbaʼe ou vaʼekue hendive, opuʼã ha ojuka espádape Guedalíaspe, haʼéva Ahicam raʼy ha Safán niéto. Péicha haʼe ojuka pe kuimbaʼe rréi de Babilonia omoĩ vaʼekuépe oñenkarga hag̃ua pe país rehe.
3 Ismael ojuka avei kompletoite umi judío oĩ vaʼekuépe Guedalías ndive Mizpápe, ha avei umi soldádo caldeo oĩvape upépe.
4 Al ótro día ojejuka rire Guedalíaspe, avave oikuaa mboyve,
5 ou 80 kuimbaʼe Siquem,+ Siló+ ha Samáriagui.+ Haʼekuéra oipeʼa ivárva, omondoropa ijao, oñekytĩmba+ ha ogueru ipópe ofrénda de semílla ha olívano+ ogueraha hag̃ua Jehová rógape.
6 Upémarõ Ismael haʼéva Netanías raʼy osẽ ohug̃uaitĩ chupekuéra, ha hasẽ ohóvo hendapekuéra. Otopárõ guare hesekuéra heʼi: “Pejúna Guedalías Ahicam raʼy rendápe”.
7 Péro oikévo pe siudápe, Ismael haʼéva Netanías raʼy ha umi kuimbaʼe oĩva hendive ojuka chupekuéra ha opoipa peteĩ alhívepe.*
8 Péro ijapyteguikuéra oĩ kuri 10 kuimbaʼe heʼíva Ismaélpe: “Anína orejuka, pórke ore ningo roguereko hiʼupy roñongatu vaʼekue ore kokuépe, roguereko trígo, seváda, aséite ha eirete”. Upévare ndojukái chupekuéra ojukárõ guare umi ótro iñermanokuérape.
9 Ha Ismael haʼéva Netanías raʼy omombopaite peteĩ alhíve guasúpe umi kuimbaʼe ojuka vaʼekue reʼongue. Upe alhíve ojapoka vaʼekue rréi Asá, oñorairõha tiémpope rréi Baasá de Israel ndive.+ Upéva upe alhíve la omyenyhẽ vaʼekue Ismael umi kuimbaʼe reʼonguégui.
10 Ismael ogueraha prisionéroramo kompletoite umi hénte opyta vaʼekue Mizpápe,+ ha ogueraha avei pe rréi rajykuéra ha kompletoite umi hénte ojeheja vaʼekue Mizpápe. Nebuzaradán, umi guardiakuéra kapitán oheja vaʼekue koʼã héntepe Guedalías,+ haʼéva Ahicam raʼy, kárgope. Ismael ogueraha chupekuéra prisionéroramo ha oho okrusa hag̃uáicha umi ammonita oĩha gotyo.+
11 Johanán,+ haʼéva Caréah raʼy, ha kompletoite umi kuimbaʼe omoakãva pe ehérsito oĩva hendive, ohendúrõ guare entéro mbaʼe vai ojapo vaʼekue Ismael, Netanías raʼy,
12 ogueraha entéro umi kuimbaʼépe ha oho oñorairõ hag̃ua Ismael kóntrape, haʼéva Netanías raʼy. Ha oho otopa hese pe y guasu* ypýpe oĩva Gabaónpe.
13 Kompletoite umi hénte Ismael ogueraha vaʼekue prisionéroramo ovyʼaiterei ohechávo Johanánpe, haʼéva Caréah raʼy, ha umi kuimbaʼe omoakãvape pe ehérsito oĩva hendive.
14 Upémarõ kompletoite umi hénte Ismael ogueraha vaʼekue prisionéroramo Mizpágui,+ ojere ha oupaite Johanán ndive, haʼéva Caréah raʼy.
15 Péro Ismael, haʼéva Netanías raʼy, ha 8 kuimbaʼe omoirũva chupe okañy Johanángui ha oho umi ammonita rendápe.
16 Johanán haʼéva Caréah raʼy ha enterove umi kuimbaʼe omoakãva pe ehérsito oĩva hendive, ojagarra ha ogueraha umi hénte ojeheja vaʼekue Mizpápe, umívape haʼekuéra osalva Ismaélgui, haʼéva Netanías raʼy. Koʼã héntepe Ismael ogueraha vaʼekue ojuka rire Guedalíaspe,+ haʼéva Ahicam raʼy. Johanán ogueru jey Gabaóngui umi kuimbaʼépe, umi soldádo, umi kuña, umi mitã ha umi ofisiál palasiopeguápe.
17 Upémarõ osẽ oho hikuái ha opyta Belén+ ypýpe, oke hag̃ua peteĩ lugár opytahápe umi oviaháva, haʼévape Kimham mbaʼe. Haʼekuéra ningo okontinuase kuri iviáhe oho hag̃ua Egíptope+
18 okyhyjégui umi caldéogui. Haʼekuéra opyta kuri okyhyje chuguikuéra Ismael, haʼéva Netanías raʼy, ojuka rupi Guedalíaspe, haʼéva Ahicam raʼy, chupe ningo omoĩ vaʼekue pe rréi de Babilonia oñenkarga hag̃ua pe país rehe.+
Nóta
^ Térã: “pe rréino desendiénte”.
^ Upéva hína yvykua oñembyatyhápe y.
^ Ikatu avei: “piléta guasu”.
