Jeremías 40:1-16
40 Jehová oñeʼẽ Jeremíaspe, Nebuzaradán+ oheja rire chupe lívre Ramápe.+ Nebuzaradán haʼe hína umi guardiakuéra kapitán. Jeremías oĩ vaʼekue esposádo ojagarrárõ guare chupe Nebuzaradán umi ojegueraha vaʼekue apytégui prisionéroramo Jerusalén ha Judágui. Upérõ ojegueraha vaʼekue chupekuéra prisionéroramo Babilóniape.
2 Upémarõ umi guardiakuéra kapitán ogueraha Jeremíaspe ha heʼi chupe: “Nde Jára Jehová heʼíma vaʼekue oikotaha koʼã mbaʼe vai ko lugár rehe,
3 ha Jehová okumpli heʼi hagueichaite, pórke peẽ pefalla Jehová kóntrape ha napeneñeʼẽrendúi chupe. Upévare oiko penderehe koʼã mbaʼe.+
4 Nde ningo reime esposádo ha koʼág̃a che apoi ndehegui. Ejúna jaha chendive Babilóniape rehoséramo, ha che añangarekóta nderehe. Péro nderehoséiramo chendive Babilóniape, anínte reho. Ko yvy tuichakue oĩ ne disposisiónpe, tereho rehosehápe”.+
5 Jeremías neʼĩra gueteri odesidi ohótapa, ha upépe Nebuzaradán heʼi chupe: “Tereho jey Guedalías+ rendápe, haʼéva hína Ahicam+ raʼy ha Safán+ niéto, chupe ningo pe rréi de Babilonia omoĩ oñenkarga hag̃ua Judá siudakuérare, ha epyta hendive umi hénte apytépe, térã tereho rehosehápe”.
Upémarõ umi guardiakuéra kapitán omeʼẽ chupe michĩmi hiʼupy ha peteĩ rregálo, ha oheja chupe oho.
6 Upévare Jeremías oho Mizpápe+ Guedalías rendápe, haʼe hína Ahicam raʼy, ha opyta Guedalías ndive umi hénte apytépe upe paíspe.
7 Tiémpo rire, umi kuimbaʼe omoakãva pe ehérsito oĩva hína pe territóriope isoldadokuéra reheve, oikuaa pe rréi de Babilonia omoĩ hague oñenkarga hag̃ua pe país rehe Guedalíaspe, haʼéva Ahicam raʼy, ha omoakã hag̃ua umi kuimbaʼe, kuña ha mitãnguérape, umi imboriahuvévape oikóva upe lugárpe ha ndojeguerahái vaʼekuépe prisionéroramo Babilóniape.+
8 Upémarõ Ismael ou Mizpápe Guedalías rendápe,+ Ismael+ haʼe hína Netanías raʼy, avei ou Johanán+ ha Jonatán haʼéva Caréah raʼykuéra, Seraya haʼéva Tanhúmet raʼy, ha pe netofatita Efái raʼykuéra, ha Jezanías+ haʼéva pe maacatita raʼy, ha umi kuimbaʼe oĩva ipoguypekuéra.
9 Ha Guedalías, haʼéva Ahicam raʼy ha Safán niéto, ojapo peteĩ huraménto chupekuéra ha umi kuimbaʼe oĩvape ipoguypekuéra, ha heʼi: “Ani pekyhyje peservi hag̃ua umi caldéope. Peiko katu ko yvýpe ha peservi pe rréi de Babilóniape, ha péicha peiko porãta.+
10 Che katu apytáta Mizpápe porrepresenta* hag̃ua ág̃a ou vove ñane rendápe umi caldeo. Péro peẽ pembyaty vaʼerã víno, frúta veranopegua ha aséite, ha pemoĩ vaʼerã umi mbaʼyrúpe oñeñongatu hag̃ua ha pepyta peiko umi siuda pejagarra vaʼekuépe”.+
11 Ha enterovete umi judío oĩva Moab, Ammón ha Edómpe, ha umi oĩva guive umi ótro paíspe, oikuaa avei pe rréi de Babilonia opermiti hague opyta Judápe umi hembývape, ha omoĩ hague enkargádoramo Guedalíaspe, haʼéva Ahicam raʼy ha Safán niéto.
12 Upémarõ enterove umi judío ou jey entéro umi lugár oñemosarambi haguégui chupekuéra, ha ou Judá territóriope Guedalías rendápe Mizpápe. Ha ombyaty hikuái hetaiterei víno ha frúta veranopegua.
13 Johanán, haʼéva Caréah raʼy, ha enterove umi kuimbaʼe omoakãva pe ehérsito oĩva hína pe territóriope, ou Mizpápe Guedalías rendápe.
14 Haʼekuéra heʼi chupe: “¿Ndereikuaái piko Baalís, umi ammonitakuéra+ rréi, ombou hague Ismaélpe, haʼéva Netanías raʼy, ndejuka hag̃ua?”.*+ Péro Guedalías, haʼéva Ahicam raʼy, ndogueroviái chupekuéra.
15 Upémarõ Johanán, haʼéva Caréah raʼy, heʼi ñemihaitépe Guedalíaspe Mizpápe: “Ahase ningo ajuka Ismaélpe, haʼéva Netanías raʼy, ha avavete ndoikuaamoʼãi upéva. ¿Mbaʼére piko ndejuka vaʼerã,* ha mbaʼére piko isarambipa vaʼerã Judá puévlo ou vaʼekue ne rendápe, ha mbaʼére piko omanomba vaʼerã umi hembýva Judápe?”.
16 Péro Guedalías,+ haʼéva Ahicam raʼy, heʼi Johanánpe, haʼéva Caréah raʼy: “Ani rejapo upéicha, pórke umi mbaʼe eréva Ismael rehe japu hína”.
