Jeremías 28:1-17
-
Jeremías ombohovái pe proféta japu Hananíaspe (1-17).
28 Upe áñope avei, oñepyrũrõ guare ogoverna rréi Sedequías+ de Judá, pe 4 añohápe, pe quinto méspe, proféta Hananías, haʼéva Azur raʼy Gabaongua,+ heʼi chéve Jehová rógape umi saserdóte ha pe puévlo kompletoite rovake:
2 “Péicha heʼi Israel Jára Jehová, umi ehérsito yvagapegua ruvicha: ‘Che katuete amopẽta rréi de Babilonia júgo.+
3 Ha koʼágui 2 áño haguépe agueru jeýta koʼápe Jehová rogapegua tembiporu kompletoite, pe rréi Nabucodonosor de Babilonia ogueraha vaʼekue ko lugárgui Babilóniape’”.+
4 Jehová heʼi: “‘Agueru jeýta koʼápe Jeconíaspe,+ haʼéva Jehoiaquim+ raʼy pe rréi de Judá, ha enterovete umi Judagua ojegueraha vaʼekue prisionéroramo Babilóniape,+ pórke che amopẽta pe rréi de Babilonia júgo’”.
5 Upémarõ proféta Jeremías oñeʼẽ proféta Hananíaspe umi saserdóte ha pe puévlo kompletoite rovake, upérõ haʼekuéra oñemboʼy hína kuri Jehová rógape.
6 Proféta Jeremías heʼi: “¡Amén!* ¡Tojapo katu upéicha Jehová! ¡Tokumpli katu Jehová umi mbaʼe reprofetisa vaʼekue ha togueru jey Babilóniagui koʼápe umi tembiporukuéra Jehová rogapegua, ha enterovete umi ojegueraha vaʼekuépe prisionéroramo!
7 Péro ehendumína ko haʼétava ndéve ha pe puévlo kompletoitépe.
8 Umi proféta oĩ vaʼekue che mboyve ha nde mboyve, ymaitereíma oprofetisa hague heta país ha goviérno ipoderósova rehe, oikotaha gérra, sarambi guasu ha outaha mbaʼasy.*
9 Ha peteĩ proféta oprofetisáramo oĩtaha pyʼaguapy ha oñekumpli upe proféta heʼi vaʼekue, upéicharõ ojekuaáta añetehápe Jehová omondo hague upe profétape”.
10 Upépe proféta Hananías oipeʼa ha omopẽ pe júgo oĩ vaʼekue Jeremías ajúrare.+
11 Ha Hananías heʼi pe puévlo kompletoite rovake: “Péicha heʼi Jehová: ‘Koʼágui 2 áñope, péicha amopẽta rréi Nabucodonosor de Babilonia júgo, oĩva umi nasionkuéra ajúrare’”.+ Ha Jeremías osẽ oho upégui.
12 Upéi proféta Hananías omopẽ rire pe júgo oĩ vaʼekue proféta Jeremías ajúrare, Jehová heʼi kóicha Jeremíaspe:
13 “Tereho ere Hananíaspe: ‘Péicha heʼi Jehová: “Nde remopẽ pe yvyra oservi vaʼekue júgoramo,+ péro hekovia nde rejapóta vára de iérro oservítava júgoramo”.
14 Pórke péicha heʼi Israel Jára Jehová, umi ehérsito yvagapegua ruvicha: “Amoĩta júgo de iérro kompletoite koʼã nasión ajúrare oservi hag̃ua rréi Nabucodonosor de Babilóniape. Haʼekuéra oservi vaʼerã chupe,+ ha umi animál salváhe oikóva umi ñúre jepe amoĩma ipoguýpe”’”.+
15 Upémarõ proféta Jeremías heʼi proféta Hananíaspe:+ “¡Ehendumína Hananías! Jehová ningo nanemboúi, péro nde regueroviaka japu ko puévlope.+
16 Upévare péicha heʼi Jehová: ‘Che aipeʼáta ndehegui nde rekove, ha ko áñope voi remanóta, pórke nde remboliga umi héntepe opuʼã hag̃ua Jehováre’”.+
17 Ha péicha omano proféta Hananías upe áñope, pe séptimo méspe.
