Éxodo 6:1-30
6 Upémarõ Jehová heʼi Moiséspe: “Koʼág̃a rehecháta la ajapótava faraón rehe.+ Che podér rupive aovligáta chupe opoi hag̃ua pendehegui, ha ohecha rire che podér, haʼe voi ojeruréta peẽme pesẽ hag̃ua hetãgui”.+
2 Ha Ñandejára heʼi Moiséspe: “Che hína Jehová.
3 Che añeʼẽmi* vaʼekue Abrahán, Isaac ha Jacóbpe. Haʼekuéra oikuaa vaʼekue che haʼeha Ñandejára Todopoderóso,+ péro che ndaikuaaukái vaʼekue chupekuéra mbaʼépa heʼise che réra Jehová.+
4 Ha che añekompromete vaʼekue ameʼẽtaha chupekuéra pe lugár hérava Canaán. Upépe ningo haʼekuéra oiko vaʼekue extranhéroicha.+
5 Che ningo ahendu mbaʼéichapa che puévlo Israel hasẽ ha oñembyasy, pórke umi egipcio oreko chupekuéra esklávoicha, ha upéva chemomanduʼa pe kompromíso ajapo vaʼekuére.+
6 Upévare ere umi israelítape: ‘Che hína Jehová, ha poguenohẽta umi egipcio poguýgui ha ndapeikomoʼãvéima ijesklávoramo.+ Che aipurúta che podér posalva hag̃ua ha tuichaiterei akastigáta umi egípciope.+
7 Ha peẽ haʼéta che puévlo ha che haʼéta pende Jára.+ Peẽ peikuaáta che, Jehová, poguenohẽha umi egipcio poguýgui, ha péicha aipeʼapaitéta umi kárga pohýi haʼekuéra omoĩva pende ári.
8 Avei pogueraháta pe yvy apromete ha ahura vaʼekuépe ameʼẽtaha Abrahán, Isaac ha Jacóbpe. Upe yvy ameʼẽta peẽme ha opytátama penembaʼerã.+ Che hína Jehová’”.+
9 Upéi Moisés oho heʼi koʼã mbaʼe umi israelítape, péro haʼekuéra nohenduséi chupe oñedesanimaiterei rupi, pórke umi egipcio oreko chupekuéra ijesklávoramo ha ohasa asyeterei hikuái.+
10 Upémarõ Jehová heʼi Moiséspe:
11 “Tereho eñeʼẽ faraón ndive, pe rréi de Egipto, ha ere chupe topoi umi israelítagui osẽ hag̃ua ko tetãgui”.
12 Péro Moisés heʼi chupe: “Jehová, umi israelítama voi ningo nacherendúi,+ ha piko mbaʼéicha faraón openáta cherehe, hiʼarive che ndaikatúi voi añeʼẽ porã”.+
13 Ha Jehová heʼi jey Moisés ha Aarónpe mbaʼe mbaʼépa omanda vaʼerã umi israelita ha faraónpe, pe rréi de Egipto, ikatu hag̃uáicha umi israelita osẽ upégui.
14 Koʼãva hína umi omoakãva umi família israelita: Rubén hína Israel raʼy ypykue,+ ha koʼãva hína itaʼyrakuéra omoakãva Rubén trívu: Hanok, Palú, Hezrón ha Carmí.+ Koʼãva hína Rubén familiare.
15 Koʼãva hína Simeón raʼykuéra: Jemuel, Jamín, Ohad, Jakín, Zóhar ha Shaúl. Shaúl sy hína peteĩ cananea.+ Koʼãva hína Simeón familiare.
16 Koʼãva hína Leví+ raʼykuéra: Guersón, Cohat ha Merarí.+ Koʼãvagui ou hína entéro umi levita. Leví oikove vaʼekue 137 áño.
17 Koʼãva hína Guersón raʼykuéra omoakã vaʼekue ifamília: Libní ha Simeí.+
18 Koʼãva hína Cohat raʼykuéra: Amram, Izhar, Hebrón ha Uziel.+ Cohat oikove vaʼekue 133 áño.
19 Koʼãva hína Merarí raʼykuéra: Mahlí ha Musí.
Koʼãva hína umi levitakuéra raʼyre asegún ifamília.+
20 Amram katu omenda peteĩ kuñataĩ héravare Jokébed, haʼe hína itúa ermána.+ Jokébed ningo Aarón ha Moisés sy.+ Amram oikove vaʼekue 137 áño.
21 Koʼãva hína Izhar raʼykuéra: Coré,+ Néfeg ha Zicrí.
22 Koʼãva hína Uziel raʼykuéra: Misael, Elzafán+ ha Sitrí.
23 Upéi Aarón omenda Eliseba rehe, haʼe hína Aminadab rajy ha Nahsón+ ermána. Eliseba membykuéra hína Nadab, Abihú, Eleazar ha Itamar.+
24 Koʼãva hína Coré raʼykuéra: Asir, Elcaná ha Abiasaf.+ Koʼãvagui ou hína umi coreíta.+
25 Aarón raʼy Eleazar+ katu omenda Putiel rajy rehe, upéi ko kuñakarai hyeguasu ha onase Finehás.+
Koʼãva hína umi kuimbaʼe omoakãva ituakuéra ypykue Leví familiarépe, asegún káda ifamília.+
26 Koʼãva hína Moisés ha Aarón hentekuéra, ha koʼã mokõi kuimbaʼépe Jehová heʼi vaʼekue: “Penohẽ umi israelítape Egíptogui grúpo por grúpo, peteĩ ehérsitoicha”.+
27 Moisés ha Aarón hína umi oñeʼẽ vaʼekue pe faraónpe onohẽ hag̃ua umi israelítape Egíptogui.+
28 Jehová oñeʼẽ vaʼekue Moiséspe Egíptope.
29 Upérõ Jehová heʼi chupe: “Che hína Jehová. Tereho ere faraónpe, pe rréi de Egipto, opa mbaʼe haʼéva ndéve”.
30 Upémarõ Moisés heʼi chupe: “Jehová, che ningo ndaikatúi añeʼẽ porã, ¿mbaʼéicha piko faraón openáta cherehe?”.+
Nóta
^ Hebréope: “ajaparesémi”.
