Éxodo 4:1-31
4 Moisés katu heʼi jey: “Péro ñamoĩ chupe ndachegueroviaiha hikuái ha nohenduseiha la haʼéva chupekuéra,+ pórke haʼekuéra heʼíne chéve ág̃a: ‘Jehová ndojechaukái ndéve’”.
2 Upémarõ Jehová heʼi chupe: “¿Mbaʼe reguereko nde pópe?”. Moisés heʼi: “Peteĩ vastón”.
3 Ñandejára heʼi chupe: “Eity yvýpe”. Upémarõ haʼe oity yvýpe ivastón ha oiko chugui peteĩ mbói,+ ha Moisés oñemondýi ha opo chugui.
4 Ha Jehová heʼi chupe: “Ejagarra huguáigui”. Upémarõ Moisés ojagarra pe mbói, ha oñakaramávo hese oiko jey chugui peteĩ vastón.
5 Ñandejára heʼi chupe: “Ko milágro rupive haʼekuéra ogueroviáta Ñandejára Jehová ojechauka+ hague ndéve, haʼe hína pende tuakuéra ypykue Jára, Abrahán, Isaac ha Jacob+ Jára”.
6 Jehová heʼi avei chupe: “Emoingemi nde po nde ao kuápe”. Upémarõ Moisés omoinge ipo ijao kuápe, ha oguenohẽvo ohecha pe ipo henyhẽteha lépragui ha morotĩmba eládaicha.+
7 Upéi Ñandejára heʼi chupe: “Emoinge jey nde po nde ao kuápe”. Ha Moisés omoinge jey ipo ijao kuápe, ha oguenohẽvo upégui, okuera jeýma la ipo.
8 Ñandejára heʼi chupe: “Nandegueroviaséiramo térã nopenáiramo nderehe hikuái ág̃a rejapo vove pe primer milágro, upéicharõ ogueroviátama hikuái rejapo vove ko ótro milágro.+
9 Péro rejapo rire koʼã mokõi milágro ha lomímonte nandegueroviái ha nanerenduséi hikuái, upéicharõ reguenohẽ vaʼerã y pe Rrío Nílogui ha upéi eñohẽ yvýpe. Ha reñohẽ vove yvýpe pe y, oikóta chugui tuguy”.+
10 Upéi Moisés heʼi Jehovápe: “Chediskulpamína Jehová, péro che ningo ndahaʼéi la añeʼẽkuaaitereíva, ni ymave ni nde reñeʼẽ rire chendive. Chéko areko provléma añeʼẽ hag̃ua ha ndaikatúi añeʼẽ syryry”.+
11 Jehová heʼi chupe: “¿Ha máva piko ojapo yvypórape ijururã, ha máva piko omoñeʼẽngu chupekuéra? Térã, ¿máva piko heʼi peteĩ persóna nohendumoʼãiha? ¿Máva piko ojapo chupekuéra hesarã ikatu hag̃uáicha ohecha porã? ¿Máva piko heʼi peteĩ persóna opytataha isiégo? ¿Ndahaʼéipa che, Jehová, upe ikatúva ojapo koʼã mbaʼe?
12 Tereho katu, che aiméta nendive ha roipytyvõta reñeʼẽ hag̃ua ha romboʼéta mbaʼe mbaʼépa ere vaʼerã”.+
13 Péro Moisés heʼi chupe: “Chediskulpamína Jehová, emondóna ótrope, nde remondosévape”.
14 Upépe Jehová ipochyeterei Moisés rehe ha heʼi: “Toho upéicharõ nendive ne ermáno Aarón,+ pe levita. Che aikuaa haʼe ivaleha oñeʼẽ hag̃ua. Haʼe oime ou hína tapére nerug̃uaitĩ hag̃ua, ha ovyʼaitereíta nderecha vove.+
15 Upévare, pejotopa vove eñeʼẽ vaʼerã hendive ha emombeʼu chupe umi mbaʼe haʼe vaʼekue ndéve.+ Ha che aiméta penendive ha poipytyvõta peñeʼẽ hag̃ua+ ha pomboʼéta mbaʼe mbaʼépa pejapo vaʼerã.
16 Haʼe oñeʼẽta ág̃a nde rérape, ha oñeʼẽta voi nde vése pe puévlondi, ha nde eréta chupe mbaʼépa heʼi Ñandejára.+
17 Ha regueraha vaʼerã ko vastón rejapo hag̃ua umi milágro”.+
18 Upéi Moisés oho isuégro Jetró+ rendápe ha heʼi chupe: “Ahase ningo umi che ermanokuéra hebreo rendápe Egíptope, ahecha hag̃ua mbaʼéichapa oiko hikuái”. Jetró heʼi chupe: “Tereho katu, ha tosẽ porãmba ndéve”.
19 Upéi Moisés oĩ aja gueteri Madiánpe Jehová oñeʼẽ jey chupe ha heʼi: “Tereho jey katu Egíptope, pórke omanombáma umi ndejukase vaʼekue”.+
20 Upémarõ Moisés ohupi vúrro ári hembireko ha ifamiliakuérape ha osẽ oho Egíptope. Moisés ogueraha avei pe vastón Ñandejára heʼi vaʼekue chupe oraha hag̃ua.
21 Upéi Jehová heʼi Moiséspe: “Ág̃a reime vove Egíptope, tereho faraón rendápe ha ejapo umi milágro. Che ameʼẽma kuri ndéve podér rejapo hag̃ua umíva.+ Péro che ahejáta haʼe oñembopyʼahatã+ ha ndopoisemoʼãi pe puévlogui.+
22 Upévare ere vaʼerã faraónpe: ‘Péicha heʼi Jehová: “Israel ningo che raʼy, haʼe hína che raʼy ypykue.+
23 Che haʼe ndéve: emondo che raʼýpe cheadora* hag̃ua. Péro neremondóiramo, ajukáta nde raʼýpe, pe nde raʼy ypykuépe”’”.+
24 Upéi tapére opyta hikuái peteĩ lugárpe oke hag̃ua. Ha upépe Jehová*+ ojotopa hendive ha ojukase chupe.*+
25 Upémarõ Ziporá+ ojagarra peteĩ kyse* ha osirkunsida* imembýpe. Upéi omombo ipýre* imemby órgano sexuál pireʼi oikytĩ vaʼekue, ha heʼi chupe: “Ko tuguy rupive nde hína peteĩ nóvio chéve g̃uarã”.
26 Upémarõ Ñandejára ndojapói hese mbaʼeve. Ziporá ningo osirkunsida rupi imembýpe heʼi vaʼekue: “Ko tuguy rupive nde hína peteĩ nóvio chéve g̃uarã”.
27 Upémarõ Jehová heʼi Aarónpe: “Tereho pe desiértope rejotopa hag̃ua ne ermáno Moisés ndive”.+ Upévare haʼe oho ha ojotopa iñermánondi Ñandejára tee montáñape,+ ha ohug̃uaitĩvo oañuã ha ohetũ chupe.
28 Ha Moisés omombeʼu Aarónpe opa mbaʼe Jehová heʼi vaʼekue,+ avei omombeʼu chupe entéro umi milágro Ñandejára ojapoka vaʼekue chupe.+
29 Upe rire Moisés ha Aarón ombyaty ha oñeʼẽ entéro umi kuimbaʼe omoakãvandi* umi israelítape.+
30 Ha Aarón omombeʼu chupekuéra opa mbaʼe Jehová heʼi vaʼekue Moiséspe. Upéi Moisés ojapo umi milágro+ umi israelita renondépe,
31 ha haʼekuéra oguerovia chupe.+ Umi hénte oñesũ ha oñakãity ohendúrõ guare Jehová imanduʼaha Israel rehe+ ha ohechaha mbaʼeichaitépa ohasa asy hikuái.+
Nóta
^ Hebréope: “cheservi”.
^ Oĩ manuskríto yma guare heʼíva: “Jehová ánhel”.
^ Amalisia koʼápe oñeñeʼẽ hína Moisés raʼýre.
^ Hebréope: “kyse ojejapóva itágui”.
^ Amalisia omombo pe ánhel pýre.
^ Hebréope: “ansianokuéra”.
