Éxodo 32:1-35
32 Umi hénte katu ohechakuaávo Moisés hiʼaretereimaha pe montáñape ha ndoguejyvéi,+ oho Aarón rendápe. Ha oñepyrũ ojerepa hese hikuái ha heʼi chupe: “Ejapo ñandéve peteĩ dios ñandegia hag̃ua,+ pórke ndajaikuaái mbaʼépa oiméne oiko raʼe Moisésgui, upe kuimbaʼe ñaneguenohẽ vaʼekue Egíptogui”.
2 Upémarõ Aarón heʼi chupekuéra: “Pegueru chéve umi namichãi de óro+ orekóva pene rembireko, pende raʼy ha pende rajykuéra”.
3 Upévo enterove umi hénte oipeʼa umi namichãi de óro orekóva ha ogueraha hikuái Aarónpe.
4 Upémarõ Aarón ojagarra umi namichãi de óro, omboyku ha omoldea peteĩ erramiéntape ha ojapo chugui peteĩ vaka raʼy raʼanga.+ Upéi umi hénte oñepyrũ heʼi: “Israel, kóva hína Ñandejára neguenohẽ vaʼekue Egíptogui”.+
5 Aarón ohechávo koʼã mbaʼe, omopuʼã peteĩ altár pe vaka raʼy raʼanga renondépe ha heʼi umi héntepe: “¡Koʼẽrõ jajapóta peteĩ fiésta Jehovápe g̃uarã!”.
6 Upémarõ, al ótro día pyharevete haʼekuéra opuʼã ha ojapo ofrénda de paz ha oofrese avei ofrénda ojehapýva. Upe rire umi hénte oguapy okaru joa, ha okarupa rire opuʼã ojediverti.+
7 Upéi Jehová heʼi Moiséspe: “Pyaʼéke eguejy, pórke umi ne retãygua reguenohẽ vaʼekue Egíptogui ojapo peteĩ mbaʼe ivaietereíva.+
8 Pyaʼeterei oheja hikuái umi mbaʼe haʼe vaʼekue chupekuéra okumpli hag̃ua.+ Haʼekuéra ojapo peteĩ vaka raʼy raʼanga, oñesũ henondépe ha ojapo chupe sakrifísio, ha heʼi: ‘Israel, kóva hína Ñandejára neguenohẽ vaʼekue Egíptogui’”.
9 Jehová osegi oñeʼẽ Moiséspe ha heʼi chupe: “Ahechakuaa ko puévlo irrevélde ha ikaprichosoha.+
10 Chemorrenegaiterei hikuái, upévare koʼág̃a eheja chéve tahundipaite chupekuéra ha hendaguépe tajapo ndehegui peteĩ nasión tuicháva”.+
11 Upémarõ Moisés ojerure asy* Jehovápe+ ha heʼi chupe: “¿Mbaʼére piko Jehová ndepochyete hesekuéra ha rehundipase voi ko puévlo? Ndete ningo rehechauka vaʼekue ndepoderóso ha ndepyapy mbareteha reguenohẽrõ guare chupekuéra Egíptogui.+
12 Maʼerãiko rehejáta umi egipcio heʼi: ‘Haʼéngo iñintensión vai kuri oguenohẽrõ guare chupekuéra koʼágui. Haʼe orahasénte kuri chupekuéra umi montáña ypýpe ojukapa hag̃ua chupekuéra’.+ Anína ndepochy hendivekuéra ha ani rehundi nde puévlope eréma haguéicha rejapotaha.
13 Nemanduʼamíntena Abrahán, Isaac ha Israel rehe, nde ningo nde rérare rehura vaʼekue chupekuéra: ‘Ambohetaitereíta ne familiare, hetaháicha avei umi estrélla yvagapegua.+ Ameʼẽmbaitéta koʼã yvy aapartáma vaʼekue ne familiarépe g̃uarã, ha opytáta voi chupekuéra g̃uarã pára siémpre’”.+
14 Upémarõ Jehová okambia* upe heʼi vaʼekue ojapotaha ha nohundíri ipuévlope.+
15 Upéi Moisés oguejy pe montáñagui ha ogueru ipópe+ umi mokõi ita ipéva orekóva umi mandamiénto.*+ Ha umi ita ipévare ojeskrivi kuri mokõive ládore.
16 Ñandejára ojapo umi ita ipéva ha haʼete voi oskrivi umívare.+
17 Upéi Josué ohendu mbaʼéichapa umi hénte ijayvu ha osapukái joa pe kampaméntope, ha heʼi Moiséspe: “Amalisia umi hénte oñorairõ hína, upévare osapukaipa hikuái”.
18 Péro Moisés heʼi chupe:
“Ndahaʼeiete katu la opurahéiva hína hikuái ogana haguére peteĩ gérra,térã ojaheʼóva operde haguére gerrahápe.
Ótra kósa hína la opurahéiva hikuái”.
19 Ha Moisés og̃uahẽ mbotávo pe kampaméntope, ohecha pe vaka raʼy raʼanga+ ha ohecha avei chupekuéra ojeroky joa hína. Upépe Moisés ipochyeterei ha pe montáña ypýpe ojapete yvýre umi ita ipéva ha ijakuʼipaite.+
20 Upéi ojagarra pe vaka raʼy raʼanga ojapo vaʼekue hikuái, ohapy ha omonguʼipaite.+ Upéi pe ikuʼikue omoĩ ýpe ha hoʼuka umi israelítape.+
21 Ha Moisés heʼi Aarónpe: “¿Mbaʼe mbaʼéiko heʼi ndéve koʼã hénte ajeve rejapoka chupekuéra ko mbaʼe vaiete?”.
22 Aarón heʼi chupe: “Anína chamígo ndepochy chendive. Ndéko reikuaa porã ko puévlo ivaívante voi ojaposeha.+
23 Upéi haʼekuéra ou heʼi chéve: ‘Ejapo ñandéve peteĩ dios ñandegia hag̃ua, pórke ndajaikuaái mbaʼépa oiméne oiko raʼe Moisésgui, upe kuimbaʼe ñaneguenohẽ vaʼekue Egíptogui’.+
24 Upémarõ che haʼe chupekuéra: ‘Umi orekóva guive óro togueru chéve koʼápe’. Upéi che apoi tatápe ha osẽ chugui ko vaka raʼy raʼanga”.
25 Moisés ohechakuaa mbaʼeichaitépa umi hénte itarovapa Aarón oheja haguére chupekuéra oiko iñakãre, ha upéicha rupi oñemotĩ hikuái iñenemigokuéra renondépe.
26 Upémarõ Moisés oho oñemoĩ umi israelitakuéra kampaménto entrádape ha heʼi: “¡Ohayhúva guive Jehovápe, toñemoĩ che ykére!”.+ Ha enterovete umi levita oho oñemoĩ ijykére.
27 Ha Moisés heʼi chupekuéra: “Péicha heʼi Jehová, Israel Jára: ‘Pejagarra káda uno pende espáda ha peike pe kampaménto tuichakuére,* peg̃uahẽ káda ógape ha pejuka pene ermánope, pene vesínope ha pene amígope’”.+
28 Umi levita ojapo Moisés heʼi vaʼekue, upévare upe díape ojejuka amo 3.000 kuimbaʼérupi.
29 Upéi Moisés heʼi chupekuéra: “Peñesantifika koestedía peservi hag̃ua Jehovápe, pórke peime pejuka hag̃uáicha pende raʼy ha pene ermánope jepe.+ Upévare haʼe penevendesíta umi mbaʼe pejapo vaʼekuére koestedía”.+
30 Upéi, al ótro día Moisés heʼi umi héntepe: “Peẽ tuichaiterei pefalla Ñandejára renondépe. Koʼág̃a aháta Jehová rendápe ha ajeruréta penderehe, jahecha noperdonáipa peẽme pende pekádo”.+
31 Ha Moisés ojupi pe montáñape ha heʼi Jehovápe: “Tuichaiterei ningo ofalla ko puévlo ojapóvo peteĩ dios de óro oadora hag̃ua.+
32 Upévare Ñandejára, eperdonamína chupekuéra,+ péro ndaikatumoʼãirõ reperdona, evorránte che réra pe nde lívrogui”.+
33 Péro Jehová heʼi Moiséspe: “Umi opeka vaʼekue che kóntrape, umíva réra la avorrátava che lívrogui.
34 Tereho katu ha egueraha ko puévlope haʼe haguépe ndéve. Eñatende porãke, che ánhel ohóta hína ne renonderã,+ ha og̃uahẽ vove pe día, che arrevisáta pe puévlo rembiapokue ha akastigáta chupekuéra ipekádore”.
35 Ha Jehová oñepyrũ okastiga umi héntepe ha oiko hesekuéra heta mbaʼe vai ojapo haguére pe vaka raʼy raʼanga. Upe vaka raʼy raʼanga ningo Aarón ojapo vaʼekue.
