Éxodo 13:1-22
13 Upéi Jehová oñeʼẽ jey Moiséspe, ha heʼi chupe:
2 “Eaparta chéve g̃uarã entéro israelita raʼy ypykue. Entéro umi ijypykuéva chembaʼe hína, tahaʼe pende raʼy ypykue ha avei umi animál raʼy ypykue”.+
3 Upémarõ Moisés heʼi umi israelítape: “Penemanduʼákena kóva ko díare, pórke Jehová ipoderóso ha ipyapy mbarete rupi peneguenohẽ Egíptogui.+ Upépe ningo peẽ peiko kuri esklávoramo.+ Upévare peẽ ndapeʼúi vaʼerã mbaʼeve orekóva levadúra.
4 Peẽ ningo pesẽta koestedía, ko mes de Abíbpe.*+
5 Ha Jehová pendegueraháta hína umi cananeo yvýpe, oĩháme umi hitita, amorreo, heveo ha jebuseo.+ Ñandejára opromete vaʼekue pende tuakuéra ypykuépe omeʼẽtaha peẽme upe yvy,+ ha upe yvýpe ningo osyry kamby ha eirete.+ Ha ág̃a peike vove upe yvýpe, peẽ pesegi vaʼerã pemboarete ko fiésta kóva ko méspe, ha pejapo vaʼerã péicha:
6 siete día aja peʼu vaʼerã pan ilevaduraʼỹva,+ ha pe 7 diahápe pejapo vaʼerã peteĩ fiésta peadora hag̃ua Jehovápe.
7 Peʼu vaʼerã pan ilevaduraʼỹva umi 7 día aja,+ ha ndaperekói vaʼerã pende rógape mbaʼeve orekóva levadúra.+ Pende yvy tuichakue ndaipóri vaʼerã mbaʼeveichagua mása ilevadúrava.
8 Ha ág̃a pende raʼy oporandu vove peẽme mbaʼérepa pejapo ko fiésta, peẽ peje vaʼerã chupekuéra: ‘Che ajapo koʼã mbaʼe chemanduʼa hag̃ua umi mbaʼe porã Jehová ojapo vaʼekuére cherehehápe asẽrõ guare Egíptogui’”.+
9 Upéi Moisés osegi heʼi chupekuéra: “Ko arete pejapóva haʼetéta peteĩ márka oĩva pende póre ha pende syváre,+ ha penemomanduʼáta Jehová ipoderóso rupi peneguenohẽ hague Egíptogui. Péicha peẽ ikatúta peñeʼẽ ótrope Jehová léire.
10 Ha pekumpli vaʼerã ko léi káda áño ha itiempoitépe.+
11 Jehová pendegueraha vove umi cananeo yvýpe, pe yvy opromete vaʼekuépe peẽme ha pende tuakuéra ypykuépe omeʼẽtaha peẽme,+
12 peẽ pemeʼẽ vaʼerã Jehovápe umi pende raʼy ypykue ha avei umi pene rymba raʼy ypykue. Entéro umi ijypykuéva Jehová mbaʼe hína.+
13 Pe vúrro raʼy ypykuére pemeʼẽ vaʼerã peteĩ ovecha, pórke ndapepagáirõ hese, peinupã vaʼerã inúkape ha pejuka pe vúrro raʼy. Ha enterovete pende raʼy ypykuére pepaga vaʼerã avei.+
14 Ha ág̃a pende raʼy oporandu vove peẽme: ‘¿Mbaʼére pejapo koʼã mbaʼe?’, peje vaʼerã chupekuéra: ‘Jehová ipoderóso rupi oreguenohẽ vaʼekue Egíptogui. Upépe ningo ore roiko vaʼekue esklávoramo.+
15 Ha faraón oñembopyʼahatãrõ guare ha ndopoiséi orehegui,+ Jehová ojuka umi egipcio raʼy ypykue ha avei umi animál raʼy ypykue.+ Upévare entéro animál raʼy ypykue asakrifikáta Jehovápe, ha apagáta enterove che raʼy ypykuére’.
16 Upe pejapóva haʼetéta peteĩ márka oĩva pende póre ha pende syváre,+ ha penemomanduʼáta Jehová ipoderóso rupi peneguenohẽ hague Egíptogui”.
17 Faraón opoírõ guare umi israelítagui, Ñandejára nomondói vaʼekue chupekuéra umi filisteo territóriorupi, hiʼag̃uivéramo jepe upérupi. Pórke Haʼe heʼi: “Haʼekuéra ohóramo upérupi, oñorairõ vaʼerã umi filistéondi. Ha upéva omongyhyjéne chupekuéra ha ojevyse jeýta Egíptope”.
18 Upévare Ñandejára ogueraha chupekuéra pe desiértorupi, pe Mar Rojo gotyo.+ Umi israelita ningo osẽ vaʼekue Egíptogui peteĩ ehérsitoicha, grúpo por grúpo.
19 Upérõ Moisés ogueraha vaʼekue avei José kanguekue, pórke José ojerure vaʼekue Israel raʼykuérape ohura hag̃ua chupe: “Ñandejára katuete penepytyvõta pesẽ hag̃ua koʼágui, ha peneguenohẽ vove, pegueraha vaʼerã che kanguekue”.+
20 Upéi umi israelita osẽ Sucótgui ha oho opyta peteĩ lugár héravape Ezam, oĩva pe desiérto ypýpe.
21 Ha Jehová oho vaʼekue umi israelita renonderã ogia hag̃ua chupekuéra,+ upearã oipuru de diakue peteĩ arai* ha pyharekue katu peteĩ tatarendy* ohesape hag̃ua chupekuéra. Upévare haʼekuéra ikatu vaʼekue oviaha de diakue ha pyharekue avei.+
22 Pe arai siémpre oĩ vaʼekue de diakue umi israelita renonderã ha pe tatarendy katu siémpre oĩ pyharekue henonderãkuéra.+
