Apünüinrü shikii jaʼralimüin suuyase Dalia. Ayuuitüjülia shia joʼuuiwaʼaya, makutulaainreesia sutuma wanee ayuulii apoplejía münüsü jee shukuleraasü sünüiki. Tü ayaawatakat saaʼu sünüiki Dalia shia tü shiikat ooʼulaka müshiʼiya na wayuu kasayuukana sünain. Galina sünülia tü shiikat Dalia. Aaʼinmajünüsü shia sutuma. Talatüsü saaʼin Dalia mayaainjeʼe wattain saalii tü kasa mojusü alatakat sümüin. ¿Kasa akaaliinjaka shia süpüla müin sukuwaʼipa?

Anuu sünüiki Galina: «Soʼu 1999, awaraijaasü waaʼu wanee tawalairü, Apolonija sünülia. Aküjüt shia pütchi nüchiki Jeʼwaa. Atüjüsü maʼin shia ekirajaa sünain tü Wiwüliakat. Ekirajaasü Dalia sünain tü Wiwüliakat süka süküjüin Apolonija süpüshuaʼa tü süsakitkalü anain shia. Shikirajaʼawaipa Dalia, aikkalaapuʼusü taya süpüla taküjüinjatüin tü sünüikikat sümüin Apolonija. Shiasaʼa sünainjee tia, ekirajaasü taya sünain tü Wiwüliakat».

Kooʼomüin kooʼomüin müsü sütüjüin Dalia sünain tü Wiwüliakat, eepejeʼe wanee kasa shapaaka atuma saaʼin. «Iseerü tachiki taküjüin pütchi süka ayuulin taya», müsü Dalia sümüin Apolonija (Mat. 28:19, 20). Sümaka Apolonija sümüin: «Nnojo mojuin paaʼin, nükaaliinjeerü pia Jeʼwaa». Ayatüsiaʼaya kaaliin shia nüpüla Jeʼwaa.

¿Kasaka akaaliinjain Dalia süpüla süküjüin pütchi? Aluwataʼawaisü shia karaloukta sümüin wayuu. Süshajirüin wanee wawalayuu suluʼu karaloukta tü sünüikinjatkat namüin na wayuu süküjeekana amüin pütchi nüchiki Maleiwa. Jee müsia aluwataʼawaisü shia mensaaje suluʼupünaa süserulaatse süpüla süküjüin pütchiya. Nnojorüle jaʼin maʼin chi Kaʼikai, nnojorüle juyapoʼuin, namaasü shia sünain aküjaa pütchi chaa parqueruʼu jee shiale kaayeruʼu.

Woutiisasü Dalia sümaa tü shiikat nowienpüroʼu  2004. Soʼu kashika settienpüroʼu 2008, nakaaliinjain na wawalayuukana sünain aküjaa pütchi namüin na polacokana chaʼayaa neʼe suluʼu noumain. Anuu sünüiki Dalia: «Eesü sülatüle kojuya kashi sünain nnojoluin taküjüin pütchi, mojuwaisü taaʼin sutuma tia. Achuntüsü taya kaaliinwaa nümüin Jeʼwaa suʼunnaa tia. Anta müshiijaʼa tawalayuu amaaka taya sünain aküjaa pütchi. Mayaapejeʼe ayuulin taya, talatüsü taaʼin süka taashajaain sümaa wayuu nüchiki Jeʼwaa».