1, 2. (1) ¿Kasa natüjaweeka aaʼu na judío oʼutitkana naaʼin Jesuu? (2) ¿Jamüsü nünüiki Pedro namüin? (Piirakaa sümüin tü ayaakuaakat.) (3) ¿Kasa yalayalaka atuma naaʼin Pedro sünain aashajawaa namaa na judío oʼutitkana naaʼin Jesuu?

MAʼAKA jeʼra kaʼi süchikijee ouktüin Jesuu, asakiijünüshi Pedro natuma na judío oʼutitkana naaʼin Jesuu, wayuu mojulaasü tiairua. Natüjawee aaʼu jaralüin kapülainkajatka chi wayuu masaʼasai anakai nutuma Pedro. Nümakalaka Pedro sümaa yalayalain naaʼin: «Wayuukai chii, yaakai jiʼrüin jooluʼu sünain anaa, anashi süka nüpülain Jesucristo chi Nazaretjeʼewaikai. Nia keʼinaajalaka waya sünain aaʼinraa kasa makat aka tüü. Jesucristokai chii, niaʼa neʼe chi juʼutitkalinka aaʼin [...], chi anii nüsoʼireʼerüin aaʼin Maleiwakai süchikijee ouktaa» (Aluw. 4:5-10).

² Apünüintua maʼin paala nuunjulajüin Pedro nüchiki Jesuu sutuma tü mmoluukat (Mar. 14:66-72). ¿Kasakaʼa yalayalain atuma naaʼin sünain aashajawaa namaa na judío oʼutitkana naaʼin Jesuu? Shia nutuma chi naaʼinkai Maleiwa jee müsia sutuma nütüjaain aaʼu süsoʼiraain naaʼin Jesuu. ¿Jamüsü nütüjaaka saaʼu Pedro süsoʼiraain naaʼin Jesuu? ¿Jama wayakana? ¿Jamüsü watüjaaka saaʼu süsoʼiraain naaʼin Jesuu?

3, 4. (1) ¿Jaralii na asoʼiraakana aaʼin kakalia süpülapünaa joʼuuin na aluwataaushiikana? (2) ¿Jaralii na asoʼiraakana aaʼin nutuma Jesuu?

³ Natüjaa aaʼu na aluwataaushiikana süsoʼiraain naaʼin waneeinnua wayuu kaka paala. Makalaka nnojoluin eiwaʼalüin naapüin süchiki tia. Natüjaa aaʼu naapüin Jeʼwaa chi naaʼinkai nümüin Elías nümaa Eliseo süpüla nasoʼireʼerüin saaʼin wayuu eekai ouktüin (1 Rey. 17:17-24;  2 Rey. 4:32-37). Jamüshijaʼa chi ouktüshi ojutünakai eejachire niʼitaanüin Eliseo, asoʼiraasü naaʼin sutuma nipettüin neʼe niipüse Eliseo (2 Rey. 13:​20, 21). Maʼaka nanoujüin na aluwataaushiikana sünain shiimain süsoʼiraain naaʼin naya wayuukana, müshiʼiya wayakana maaʼulu yaa, wanouja anainrü shiimain tü sümakat tü Wiwüliakat.

⁴ Ponusü maʼin waaʼin wanaa sümaa waashajeʼerüin nachiki na wayuu nüsoʼireʼetkana aaʼin Jesuu maʼaka ponuin shia naaʼin na wayuukana namaiwa. Jamüsüjaʼa wanee wayuu oukta aʼwayuuset, ponusü maʼin saaʼin wanaa sümaa nüsoʼireʼerüin aaʼin Jesuu chi waneeshikai süchon (Luc. 7:11-15). Eetaasü joo wanee jintut 12 suuyase, asoʼiraasü saaʼin nutuma Jesuu. ¡Talatakajasaʼa maʼin naaʼin na kachonkana tia jintutkat sümaa ponuin maʼin naaʼin tü neʼrakat! (Luc. 8:49-56.) Akaʼaya wanaa sümaa süsoʼiraain naaʼin Lázaro, ¡talatüshii maʼin na wayuu eʼrakana nia wanaa sümaa süsoʼiraain naaʼin! (Juan 11:38-44.)

5. ¿Jamüsü waneejatka sukuwaʼipa süsoʼireʼeria naaʼin Jesuu suulia süsoʼireʼeria naaʼin na wayuu namaiwajanakana?

⁵ Natüja aaʼu na aluwataaushiikana waneejatüin sukuwaʼipa süsoʼireʼeria naaʼin Jesuu suulia süsoʼireʼeria naaʼin na wayuu namaiwajanakana. Süka jamüin, ouktüin nachikuaʼa na wayuu asoʼireʼennakana aaʼin. Akaajasaʼa Jesuu, nnojoishi ouktüin piantua, müichipa nia maʼaka naaʼin wanee aapiee suluʼu meʼrujuichipain nia ( paashajeʼera Aluwataaushikana 13:34). Naashin Pedro, oʼutüna aaʼinchi Jesuu, shiasaʼa mapa, asoʼireʼennüsü naaʼin suluʼu meʼrujuin nia. Otta müshia «oʼunüshi nia chaa iipünaamüin nünainmüin chi Maleiwakai, süpüla eeinjachin nia nikialuʼujee sünain laülaain nia saaʼu kasa süpüshua, sünain jüüjüüin nümüin na aapieekana je na laülaayuushiikana napüshua» (1 Ped. 3:18, TNM; 1 Ped. 3:19-22). Ponoshootosü waaʼin sutuma süsoʼiraain naaʼin waneeinnua wayuu namaiwajannuu, akatsaʼa ponoleein maʼin waaʼin sukuwaʼipa süsoʼireʼeria naaʼin Jesuu.

6. ¿Jamüsü naaʼin na nikirajüinkana Jesuu sutuma süsoʼiraain naaʼin?

⁶ Sutuma süsoʼiraain naaʼin Jesuu yalayalasü naaʼin na nikirajüinkana. Asoʼiraasü naaʼin Jesuu mayaapejeʼe nnojoluin nanoujüin tia na nüʼünüükana. Meʼrujuichipa nia sümaa pülashaatain maʼin otta nnojoishi süpüla jamajüin nia sutuma wayuu. Sutuma süsoʼiraain naaʼin, atüjaana aaʼuchi niain nüchoin Maleiwa. Shiasaʼa sutuma tia, anaitpa naaʼin na nikirajüinkana Jesuu otta talatashaatasü naaʼin. Nnojoliinnapa mmoluin naya. Nnojoirejeʼe nüsoʼiraain aaʼin Jesuu, nnojotsüjeʼe ekeraajüin tü nümakat Maleiwa ooʼulaka nnojotsüjeʼe choʼujaain süküjünüin tü pütchi anasükat.

7. (1) ¿Kasa naainjaka Jesuu maaʼutpünaa? (2) ¿Kasa pütchi wasouktüinjatka eʼipajee?

⁷ Wayakana aʼyataaliikana nümüin Jeʼwaa, watüjaa aaʼu wainmain kasa anasü naainjaka Jesuu süpülapünaa ouktüin nia. Akaisaʼa maaʼulu, katüsü noʼu otta nia shikiishikai tü aküjaakat pütchi sainküin mmaka. Sutuma niain Aluwataain suluʼu Nuluwataaya Maleiwa, najaʼttireerü tü kasa mojusükat soʼu palitchoin kaʼi otta paʼaraiiseerü nutuma tü Mmakat süpüla kepiainjatüin wayuu saaʼu süpüla kaʼika süpüshuaʼa (Luc. 23:​43, TNM). Nnojoirejeʼe nüsoʼiraain aaʼin Jesuu, nnojotsüjee ekeraajüin tia. Makalaka anain jülüjüle waaʼin pütchikat tüüirua: ¿Kasa wanoujaka anainjee süsoʼiraain naaʼin Jesuu? ¿Kasa weʼreetka sünainjee süsoʼiraain naaʼin Jesuu?

8, 9. (1) ¿Jamüsü nachuntaka na sacerdootekana otta na fariseokana nümüin Pilato saaʼinmajünüinjatüin tü woowira eejachire niʼitaanüin Jesuu? (2) ¿Kasa neʼraka na jieyuu oʼunakana eemüin tü woowira eʼitaanakalü aluʼu Jesuu?

⁸ Süchikijee nuʼutünüin aaʼin Jesuu, oʼunüshii na laülaayuushiikana naʼakajee na sacerdoote judíokana ooʼulaka na fariseokana nümaʼanamüin Pilato sünain namüin nümüin: « ‹Laülaashikalee, sotüsü waaʼin tü nümakat paala chira alaakai kataiwaʼaya noʼu sünain maa: ‹Soʼu apünüin kaʼi süchikijee ouktüin taya, osoʼiraajeerü taaʼin›, müshi nia. Anakaja jooluʼu müleka  püjütüle wane surulaalüirua süpüla shiʼrajüinjatüin soʼu tia apünüinkat kaʼi saaʼu tü woowirakat eere niʼitaanüin müliashii. Anakaja paaʼinrüle tia suulia süntajüin tü nikirajüinkalüirua sünain suʼluwajüin müliashii süpüla süküjainjatüin sümüin wayuu sünain süsoʼiraaitpain naaʼin süchikijee ouktaa saajüin. Je tü alawaa süküjainjatkat sümüin wayuu, alanaʼaleejeeria maʼi sünain mojuin suulia tü alawaa nüküjapüʼükat paala Jesús›, namakalaka nümüin Pilato. Nümakalaka Pilato namüin: ‹Teʼitaajeerü jooluʼu wane surulaalüirua süpüla tia. Anakaja jooluʼu müleka jümaale shia süpüla shiʼrajüinjatüin saaʼu tü woowirakat› ». Naainjakalaka tia na sacerdootekana jee na fariseokana (Mat. 27:62-66).

⁹ Eʼitaanüshi Jesuu suluʼu wanee ipa koʼusü otta tü shirousekat shia wanee ipa miyoʼushaata sümaa lakayaain shia. Tü keeʼireekat naaʼin na sacerdootekana jee na fariseokana shia yalainjachin Jesuu waneepia suluʼu tia ipakat. Nnojotpejeʼe shiain keeʼireein naaʼin Jeʼwaa tia. Apünüin kaʼi süchikijee niʼitaanüin Jesuu, oʼunüsü María Magdalena sümaa María tü niikat Santiago eemüin tü woowirakat. Neʼrakalaka jutatüin shia sümaa joyotuin wanee aapiee saaʼu tü shirousekat. Nüküjaka chi aapieekai namüin na jieyuukana nnojoluin Jesuu yala süka süsoʼiraain naaʼin nüchikuaʼa (Mat. 28:1-6). ¡Katüsü noʼu Jesuu nüchikuaʼa!

10. ¿Jamüsü nünüiki Pablo süchiki süsoʼiraain naaʼin Jesuu?

¹⁰ Soʼutpünaa tü pienchi kaʼi alatakat süchikijee tia, atüjaana aaʼu shiimain süsoʼiraain naaʼin Jesuu. Anuu nünüiki Pablo namüin na corintiojeʼewaliikana süchiki tia: «Tü eeʼiyatünakat tamüin, tekirajüin jia sünain. Alanaʼaleesia maʼi shia sümaa anain, je anasü süpüla aapaanüin sütüma wayuu süpüshua. Müsü nüchiki Cristo taküjapüʼükat jümüin: Ouktüshi nia saaʼu waainjala. Ojoitünüshi nia sütüma wayuu, je süchikijee soʼu apünüin kaʼi, süsoʼiraakalaka naaʼin nütüma chi Maleiwakai. Shia tü ashajünakat paala nüchiki Cristo suluʼu tü karaloukta nüchikimaajatkat Maleiwa. Je süchikijee nüsoʼiraain aaʼin, niiʼiyataakalaka nümüin Pedro, ooʼulaka mapa, namüin na waneeirua Aluwataaushikana. Shiasa süchikijee tia, niiʼiyataakalaka namüin maa aka 500 wawalayuu wanaa sümaa jutkatüin naya. Anaayülia wainma noʼutku katüin oʼu maaʼulu yaa, otta eeshii eekai ouktüinain. Je süchikijee tia, niiʼiyataakalaka nümüin Santiago ooʼulaka mapa namüin na Aluwataaushikana napüshuaʼaya. Je mapa kakalia nachikijee nayakana, eeʼiyataashi Cristo tamüʼinya, mayaashije nnojolin nümaajachin taya paala maa aka nakuaippa nayakana» (1 Cor. 15:3-8).

11. ¿Jalasü aküjünüin süchiki süsoʼiraainjatüin naaʼin Jesuu?

¹¹ Ayatüsia alatüin tü ashajünakat paala nüchiki Jesuu «suluʼu tü karaloukta nüchikimaajatkat Maleiwa». Ashajünatüjülia suluʼu tü karaloukta nüchikimaajatkat Maleiwa süsoʼiraainjatüin naaʼin Jesuu. Jamüshijaʼa David, aashajaashi süchiki nüsoʼireʼennüinjachin aaʼin chi waneepiakai nümaa Maleiwa ( paashajeʼera Salmo 16:10). Sünain tü Pentecostés eejatkat soʼu juyaka 33 soʼu wakalia, nüküjüin chi aluwataaushikai Pedro nünainpünaain Jesuu tia pütchikat. Müshi nia: «Aashajaashi [David] süchikü tü niiʼiyatakat Maleiwa nümüin, sünain nüsoʼireʼennajachin aaʼin nütüma Maleiwakai chi Nüneekajalakai süpüla aluwatawaa, chi kanüliakai Cristoin. [...] Müshi nia: ‹Nnojoleechi puuʼulaain nia saʼaka tü ouktüsükalüirua otta nnojoleerü puuʼulaain ittüin tü niʼirukukat› » (Aluw. 2:23-27, 31).

12. ¿Jaralii na eʼrakana Jesuu süchikijee süsoʼiraain naaʼin?

¹² Wainma na eʼrakana Jesuu süchikijee süsoʼiraain naaʼin. Soʼutpünaa pienchi shikii kaʼi süchikijee nüsoʼiraain aaʼin Jesuu, eeʼiyataashi nia namüin na nikirajüinkana chaa eejachire niʼitaanüin paala. Seeta wanee sukuayaa, eeʼiyataashi nia namüin waneeinnua nikirajüin chaa süpünaluʼu Emaús jee suluʼu waneeirua mma (Luc. 24:​13-15). Yootoleeshia Jesuu namaa na niiʼiyataakana amüin. Maʼaka saaʼin nümaa Pedro jee namaa waneeinnua nikirajüin jutkatakana nüpüla.  Soʼu wanee kaʼi, eeʼiyataashi nia namüin watta naaliin nikirajüin, alatüshii suulia 500 nikirajüin. Nnojoishii süpüla «nnojotsü asoʼiraain naaʼin Jesuu» wamüinjanain, süka wainmain na eʼrakana nia sünain süsoʼiraain naaʼin.

13. ¿Kasa naainjaka na nikirajüinkana Jesuu süka natüjaain saaʼu shiimain süsoʼiraain naaʼin Jesuu?

¹³ Naküjüin maʼin na nikirajüinkana Jesuu süsoʼiraain naaʼin Jesuu. Müliashii maʼin atumawaa na nikirajüinkana Jesuu sutuma naküjüin süsoʼiraain naaʼin Jesuu otta eeshii eekai noʼutünüin aaʼin saaʼujee tia. Müleka alawaalejeʼe tia naküjakat, ¿jamakaʼa nüküjaka Pedro namüin na sacerdootekana jee na fariseokana süsoʼiraain naaʼin Jesuu? Nialeewatchejeʼe aapeekai nikii süpüla ouktaa. Nütüjaapejeʼe saaʼu Pedro otta na wanee anoujüshiikana shiimain katüin noʼu Jesuu nüchikuaʼa otta niain shikiishin tü aküjaakat pütchi. Müleka jamüle naya atumawaa, natüjaa aaʼu shiimain süsoʼireʼenneerüin naaʼin mapa maʼaka süsoʼireʼennüin naaʼin Jesuu. Jamüshijaʼa Esteban, nütüjaa aaʼu shiimain süsoʼiraainjatüin naaʼin na ouktüshiikana (Aluw. 7:55-60).

14. ¿Jamüsü pütüjaaka saaʼu shiimain süsoʼiraain naaʼin Jesuu nüchikuaʼa?

¹⁴ Watüjaa aaʼu Nuluwataain Jesuu maaʼulu otta niain Nekiipüʼüin na anoujüshiikana. Sutuma tia, akooʼomüinraashii na anoujüshii shiimainshiikana. Nnojotsüjee müin tia nnojoireje nüsoʼiraain aaʼin Jesuu, ¿aashimüin? Otta müsia nnojotsüjee waapüin nüchiki Jesuu nnojoireje nüsoʼiraain aaʼin. Akatsaʼa watüjaain saaʼu katüin noʼu Jesuu maaʼulu otta nia oʼuniraka sukuwaʼipa aküjaa tü pütchi anasükat sainküin tü Mmakat süpüshuaʼa.

15. ¿Jamüshii yalayalaka waya sünain aküjaa pütchi?

¹⁵ Sutuma watüjaain saaʼu shiimain süsoʼiraain naaʼin Jesuu, yalayalashii waya sünain aküjaa pütchi. Soʼu yaajachin Jesuu yaa mmapaʼa, nachajaain maʼin sukuwaʼipa na nüʼünüükana Maleiwa süpüla nnojoluinjatüin süküjünüin tü pütchi anasükat. Ekirajünüsü alawaa nüchiki Maleiwa, meeʼerapalashii na wawalayuukana, aainjünüsü kasa mojusü namüin, apülajünüsü noulia tü sünainpünaakat naʼyataain nümüin Maleiwa, müliashii naya atumawaa jee eeshii na oʼutünakana aaʼin. Nnojoyütpejeʼe kasain amalajeʼerüin tü aküjaakat pütchi süchiki Nuluwataaya Maleiwa otta müsia ekirajaa wayuu sünain tü Wiwüliakat (Is. 54:17). Nnojoishii waya mmoluin neema na numuusainkana Satanaa. Eeshi Jesuu wamaa maaʼulu yaa (Mat. 28:20). Jaʼitairü nachajaashaatain sukuwaʼipa na nüʼünüükana Maleiwa süpüla nnojoluinjanain waküjüin pütchi, ayateeria neʼe waainjüin tia.

16, 17. (1) ¿Jamüsü sütüjaanaka aaʼu shiimain tü nikirajakalü anain Jesuu? (2) ¿Kasapülajatü tü pülaa naapakat Jeʼwaa nümüin Jesuu saashin Juan 11:25?

¹⁶ Sutuma süsoʼiraain naaʼin Jesuu atüjaana aaʼu shiimain tü nikirajapuʼukalü anain. Naashin Pablo, müleka nnojoire nüsoʼiraain aaʼin Kürisüto nnojotsüjaʼa kasain saapüinjatüin wamüin tü wanoulakat otta amülaʼatsüje neʼe waküjüin pütchi sümüin wayuu. Anuu nünüiki wanee wayuu süpüʼüyakai tü Wiwüliakat: «Müleka alawaaleje neʼe nüsoʼiraain aaʼin Kürisüto, nnojoishiijaʼa mata kasain anain apüla na anoujakana nünain süka nanoujüin sünain wanee kasa nnojotka shiimain». Nnojoire nüsoʼiraain aaʼin Jesuu, nnojotsüjee shiimain tü ashajünakat nüchiki suluʼu tü karalouktakat Mateo, Marcos, Lucas otta Juan. Shiimainpejeʼe süsoʼiraain naaʼin Jesuu. Shiasaʼa sutuma tia, atüjaana aaʼu shiimain tü nikirajapuʼukalü anain otta shiimain tü nümakat süchiki tü alatajatkat mapeena (paashajeʼera 1 Corinto 15:14, 15, 20).

¹⁷ Müshi Jesuu: «Taya chi asoʼireʼerakai saaʼin wayuu. Chi eekai nunoujüin tanain, kateerü noʼu nüchikuaʼa jaʼitashi ouktüin paala nia» (Juan 11:25, TNM). Shiimain shikeraajeerüin tia nümakat Jesuu. Naapüin Jeʼwaa pülaa nümüin Jesuu süpüla nüsoʼireʼerüin naaʼin na anoujüshii chainjanakana iipünaa jee na wattakana naaliin anoujüshii yaainjanakana kepiain yaa Mmapaʼa. Müiria nnojoluin ouktaa, süka jamüin, süsoʼiraaitpain naaʼin Jesuu süchikijee ouktüin paala nia saaʼu waainjala. Sutuma pütüjaaitpain saaʼu tia, ¿aashin achecheraajeerüin paaʼin sünain anoujaa suʼunnaa piʼrüin müliaa?  ¿Jama puʼutüneere aaʼin saaʼujee punoula? ¿Aashin püchechereerüin paaʼin suʼunnaa tia?

18. ¿Kasa watüjaajeetka aaʼu sutuma süsoʼiraain naaʼin Jesuu?

¹⁸ Sutuma süsoʼiraain naaʼin Jesuu, nüküjeerü wamüin pansaale jee nnojorüle pansaain wakuwaʼipa sümaa tü nümakat Jeʼwaa. Anuu tü nümakat Pablo namüin waneeinnua wayuu chejeʼewalii Atenas: «Nüneeküin [Maleiwa] wanee wayuu süpüla niainjachin aküjüin anale jee mojule tü naainjakat wanee wayuu. Lotuinjatü sukuwaʼipa tia nutuma chia wayuukai. Watüjaa aaʼu shiimain tia süka nüsoʼireʼennüin aaʼin nutuma Maleiwa» (Aluw. 17:​31, TNM). Chi nüneekakai Jeʼwaa süpüla aküjaa anale jee mojule tü naainjakat wanee wayuu, nia Jesuu. Loteerü sukuwaʼipa tia nutuma Jesuu jee niiʼiyateerü aipüralin nia ( paashajeʼera Isaías 11:2-4).

19. ¿Kasa waaʼinraka sutuma wanoujüin sünain shiimain süsoʼiraain naaʼin Jesuu?

¹⁹ Sutuma wanoujüin sünain shiimain süsoʼiraain naaʼin Jesuu, waaʼinrüin maʼin tü keeʼireekat naaʼin Maleiwa. Müleka nnojoire naapajiraain nikii Jesuu süpüla ouktaa jee nnojoire nüsoʼiraain aaʼin, nnojoishiije taashin waya suulia kaainjalaa jee ouktaa (Roma 5:12; Roma 6:​23, TNM). Wanaawasüjee neʼe wanüiki namaa na manoujüinsaliikana sünain maa: «Anashii weküle jee anashii wasüle süka ouktajanainya neʼe waya wattaʼa» (1 Cor. 15:​32, TNM). Nnojotpejeʼe shiain jülüjüin waaʼin tia. Shia jülüjaka waaʼin waneepia oonowaa nümaa Jeʼwaa süka watüjaain saaʼu susoʼiraajeerüin saaʼin wayuu.

20. ¿Jamüsü sütüjaanaka aaʼu pülashin Jeʼwaa?

²⁰ Sutuma süsoʼiraain naaʼin Jesuu nutuma Maleiwa, atüjaana aaʼu pülashin Maleiwa otta naapüin kasa anasü namüin na achajaakana nia. (Heb. 11:​6, TNM). ¿Eeirü jülüjüin paaʼin pülashaatain sümaa kekiin maʼin Jeʼwaa süka nüsoʼireʼerüin naaʼin chi Nüchonkai suluʼu meʼrujuin nia? Süka süsoʼiraain naaʼin Jesuu, atüjaana aaʼuchi Maleiwa sünain nikeraajüin süpüshuaʼa tü nümakat. Nüküjatüjülia Jeʼwaa sünain sütüjaaneerüin aaʼu niain neʼe anaka süpüla aluwatawaa saaʼu kasa süpüshuaʼa. Atüjaaneerü aaʼu tia, nutuma «suuʼuliwoʼu tü jietkat». Süpüla shikeraajüin tia, choʼujaasü ouktajachin Jesuu, chi Suuʼuliwoʼukai tü jietkat otta choʼujaasü nüsoʼireʼennüin aaʼin (Gén. 3:15).

21. ¿Jamüsü paʼatapajaka maʼin tü kaʼi süsoʼiraainjatkalü oʼu saaʼin wayuu?

²¹ ¡Waapashaatain tü analuʼutkat nümüin Jeʼwaa saaʼu süsoʼiraainjatüin saaʼin wayuu nutuma! Anuu wanee pütchi aapünaka nümüin chi aluwataaushikai Juan: « ‹Eejeechi jooluʼu chi Maleiwakai sümaa wayuu je kepiainjachi nia namaa. Nüpüshinjana naya. Eeinjachi nia namaa waneepia süka niain Namaleiwasein. Nümülialeena naya. Müiria nnojolüin ouktaa, mojuu aaʼin, aʼyalajaa, je saalii ayuulii, süka sülatüitpain süpüshuaʼale makat aka tia›. Nümakalaka joo chi Maleiwa joyotüshikai saaʼu tü einaseekat: [...] ‹Püshaja pümata tü tanüikikat süpüla kapülainjatüin saaʼin wayuu shia süka shiimüin› ». ¿Jarai aküjaka tia nümüin Juan? ¡Nia Jesuu süchikijee süsoʼiraain naaʼin! (Alat. Map. 1:1; 21:3-5.)