Tü anajaakat shiyaakua wayuu masheʼinsat jee amaʼüjiraasü sukuwaʼipa * sainküinsü tü mmakat. Ojuʼitüsü suluʼu telewisoot, Internet, peliikula, rewiisüta, serulaat, muusika, sünainpünaasü shia süsheʼinpala wayuu maaʼulu otta waneeirua kasa. Eʼitaanüsü maaʼulu wanee programa suluʼu Internet süpüla shiʼrayaa sümüinjatüin wayuu shiyaakua wayuu masheʼinsat jee amaʼüjiraasü sukuwaʼipa. Shia saaʼinraka maʼin wayuu maaʼulu tia. Akooʼomüinraashii maʼin na wayuu anajakana tia suulialeʼeya sümaiwa (paashajeʼera tü pütchikat:  «Aküjünaka süchiki shiyaakua wayuu masheʼinsat»).

Eesü wayuu nnojotka mojuin amüin sünajünüle shiyaakua wayuu masheʼinsat jee amaʼüjiraasü sukuwaʼipa. Müsü sünüiki Gail Dines, wanee wayuu eʼiküt: «Jaʼyasü maʼin eeʼiyatünüin shiyaakua wayuu amaʼüjiraasü sukuwaʼipa. Tü kashüülapuʼukat sümüin wayuu sümaiwa, nnojoluitpa kashüülain maaʼulu».

¿Jamüsü saaʼin pümüin tia? ¿Anasüche süpüla sünajüin wayuu? ¿Mojutaapa maʼaka saaʼin wanee weneena? Müsü nünüiki Jesuu: «Wane wunuʼu eekai shikaajünüin achoin, anasü tü süchonkot, nnojotsü kachoin eekai mekaajuuin. Otta wane wunuʼu eekai mekaajuuin süchon, nnojotsü kachoin eekai shikaajünüin» (Mateo 7:17). ¿Kaseerü alataka nümüin chi anajakai shiyaakua wayuu masheʼinsat jee amaʼüjiraasü sukuwaʼipa? Süpüla watüjaain saaʼu tia, wekirajaa sünain apünüinsü kasa.

NANÜIKI NA ATÜJAKANA: Nashin na tottootkana otta na ekirajaakana sünain nakuwaʼipa na anajakana shiyaakua wayuu masheʼinsat, eeshi süpüla kiʼrain wanee wayuu sünain anajaa shiyaakua wayuu masheʼinsat maʼaka kiʼrain nia sünain tü kokaiina kanüliakat crack.

Müshi Brian, * wanee wayuu kiʼrapuʼukai sünain anajaa suluʼu Internet shiyaakua wayuu masheʼinsat: «Anajüshi maʼin taya waneepia shiyaakua wayuu masheʼinsat. Nnojoishi taaʼinruʼuin taya. Kutkuttüshi taya sümaa alin maʼin tü tekiikat sutuma mojuin taaʼin. Tachajaayainjee sukuwaʼipa süpüla tooʼulaain suulia, akatsaʼa wainmain juya alataka süpüla tooʼulaain shia».

Na wayuu kiʼrakana sünain anajaa shiyaakua wayuu masheʼinsat, nounjulajüin süchiki tü naaʼinrakat. Nnojotsü jaralüin eʼrüin naaʼu tia otta nnojotsü jaralüin ayaawatüin saaʼu nakuwaʼipa. Eeshii eekai nakayalaain noulia na waneeinnua, japülin, shapaain naaʼin, mojuin naaʼin otta jashichin. Eeshiʼiya eeka noʼutiraweein naaʼin. Müshi Sergio, wanee wayuu anajawaikai shiyaakua wayuu masheʼinsat suluʼu nüserulaatse: «Nnojotsü jaralüin taashajaain amaa otta shapaasü taaʼin. Müshi nnojoikai kasain anain apüla taya, mojusü maʼin taaʼin otta nnojotsü tatüjaain aaʼu tü taaʼinrajatkat. Müshi tamüiwaʼakai taaʼin. Mmotshi sümaa japülin maʼin taya, makalaka nnojolin tachuntüin kaaliinwaa».

Jaʼitairü niʼrüttatüle neʼe wanee wayuu shiyaakua wayuu masheʼinsat, eesü süpüla mojuin tü nikiiruʼujatkat sutuma. Müsü sünüiki tü tottootkat Judith Reisman namüin na aʼyataakana suluʼu tü Senado chakat Estados Unidos: «Tü shiyaakuakat wayuu masheʼinsat jee amaʼüjiraasü sukuwaʼipa niʼraka wanee wayuu, ekerotusü nikiiruʼumüin otta yalairümaʼaleʼeya shia. Kapüleejeerü maʼin nümüin motuinjatüin shia naaʼin». Susan, shia wanee wayuu majayüt 19 suuyase, shiʼrüttatüin shiyaakua wayuu masheʼinsat suluʼu Internet, kiʼraleeka shia mapa sünain anajaa, müsü shia: «Nnojotsü motuin taaʼin tia ayaakuaakalüirua. Eesü süntajaale tekiiruʼumüin. Müsü yaleeka ichein shia tekiiruʼu».

¿JAMÜSÜ NUKUWAʼIPA WANEE WAYUU SUTUMA? Na wayuu anajakana shiyaakua wayuu masheʼinsat jee amaʼüjiraasü sukuwaʼipa, müshii süchepchiakai naaʼin tia, süka kiʼrain naya sünain otta sumojujeʼerüin nakuwaʼipa (2 Pedro 2:19).

NANÜIKI NA ATÜJAKANA: «Amojujaasü nukuwaʼipa wanee wayuu sümaa nuʼwayuuse otta nüchonnii nünajüle shiyaakua wayuu masheʼinsat.» (The Porn Trap [Las trampas del porno], de Wendy y Larry Maltz.)

Amojujaasü nukuwaʼipa wanee wayuu sümaa nuʼwayuuse otta nüchonnii nünajüle shiyaakua wayuu masheʼinsat ¿Jamüsü sumojujaaka?

• Süka nnojolin paaʼinwajiraain nia sümaa nuʼwayuuse, mojuin nukuwaʼipa sümaa jee nnojoluin alin shia nüpüla (Proverbios 2:12-17).

• Süka jülüjüin naaʼin nukuwaʼipa neʼe nümüiwaʼa, nnojoishii jamajanain nümüin na waneeinnua otta nnojotsü anain naaʼin sümaa nuʼwayuuse (Éfeso 5:28, 29).

• Süka jülüjüin naaʼin amaʼüjirawaa akuwaʼipa otta keeʼireein naaʼin kasa mojusü (2 Pedro 2:14).

• Süka naainjeein sümaa nuʼwayuuse tü kasa kashüülasü nünajakat (Éfeso 5:3, 4).

•   Süka kawalaʼateein nuʼwayuuse nutuma otta jülüjüin naaʼin wanee wayuu naata suulia tü nuʼwayuusekat (Mateo 5:28).

Saashin tü Wiwüliakat nnojotsü kawalaʼatainjatüin nuʼwayuuse wanee wayuu nutuma (Malaquías 2:16). Kawalaʼatale shia nutuma, amojujaajeerü nakuwaʼipa sünain kasaalüü, akatajiraajeena otta ooʼulaajiraajeena naya. Shiasaʼa yalejee mülieerü saaʼin nachonnii.

Amojujaasü nakuwaʼipa na tepichikana nanajüle shiyaakua wayuu masheʼinsat. Müshi Brian: «Wanaa sümaa polooin touyase, ashaittüshi taya sünain tounjulaayaain, tantaleeka sünain waneeirua rewiisüta shiyaakuamaajatü wayuu masheʼinsat, nükorolo chi tashikai. Tanajawalin shia ojuunaa, nnojotpejeʼe tatüjaain saaʼu jamüin kamalainka tamüin anajaa tia ayaakuaakat. Ayatüshi taya sünain anajaa miyoʼupa taya». Ekirajaana anainrü jamüin nakuwaʼipa na jimaʼaliikana otta na majayünnüükana sutuma nanajüin shiyaakua wayuu masheʼinsat. Sütüjaanaka aaʼu eein süpüla namaʼüjiraain nakuwaʼipa tepichijaiwaʼaya naya, kojuyain naʼwayuuse, mojutüin namüin wanee jierü nainkaapa sümaa otta eeshii süpüla talatawalin naya jee shiale mojuwalin naaʼin.

¿JAMÜSÜ NUKUWAʼIPA WANEE WAYUU SUTUMA? Tü anajaakat shiyaakua wayuu masheʼinsat müsü aka saaʼin wanee weneena ouktasiroʼu. Nnojotsü aijiraain wayuu sutuma, mojusü jee müliasü saaʼin wayuu sutuma (Proverbios 6:27).

TÜ SÜMAKAT TÜ WIWÜLIAKAT: «Je sükajee tia, juuʼulaa jümata suulia süpüshua tü kasa mojusü keejiapüʼükat paala jümüin, tü süchepchiakat atuma jia tü kaainjalaakat, maa aka aʼluwajirawaa akuaippaa sümaa wayuu jierü otta wane jierü nümaa wane toolo, maa aka keeʼireein jaaʼin tü mojusükat, je maa aka kachiiruaa aaʼin washirüü sünain müin aka saaʼin jümaleiwase shia» (Colosas 3:5).

Nülerajüin Jeʼwaa * tü anajaakat shiyaakua wayuu masheʼinsat jee amaʼüjiraasü sukuwaʼipa. Nnojotpejeʼe shiain süka sülanaʼaleein nutuma tü nuchuntakat wamüin. Eeshi süpüla naainjiraain nukuwaʼipa wanee wayuu sümaa nuʼwayuuse süka niʼitaalain naya Maleiwa süpüla müin nakuwaʼipa. Tia süpülajatü anain naaʼin waneʼewai nakua, paaʼinwain jee kachonniin naya (Santiago 1:17).

¿Jamüsü nülerajaka Jeʼwaa tü anajaakat shiyaakua wayuu masheʼinsat jee amaʼüjiraasü sukuwaʼipa? Wekirajaa sünain tia:

• Nütüjaa aaʼu mojuin sukuwaʼipa wayuu sünajüle shiyaakua wayuu masheʼinsat (Éfeso 4:17-19).

• Aishii waya nüpüla otta nnojotsü nücheküin wapüleerua müliainjanain waya (Isaías 48:17, 18).

• Naaʼinmajeein nakuwaʼipa na wayuu kasaatkana jee na nachonniikana (Mateo 19:4-6).

• Nücheküin wapüleerua wuleinjatüin wakuwaʼipa sümaa kojutüin wayuu wamüin (1 Tesalónica 4:3-6).

• Nukumajala Jeʼwaa na wayuukana süpüla kachoinjanain naya otta keeʼireesü naaʼin kojutüinjatüin namüin tia sümaa nnojoliin namaʼüjiraakuʼu namüinjanain (Hebreokana 13:4).

• Nütüjaa aaʼu Jeʼwaa yarüttüin tü shikiiruʼujatkat wayuu sünajüle shiyaakua wayuu masheʼinsat, jülüjüle saaʼin sukuwaʼipa sümüiwaʼa jee süshatüle tü jülüjakat naaʼin Satanaa süchiki tü aainjirawaakat akuwaʼipaa (Génesis 6:1, 2; Judas 6, 7).

¿JAMÜSÜ NUKUWAʼIPA WANEE WAYUU SUTUMA? Amojujaasü nukuwaʼipa wanee wayuu nümaa Maleiwa nünajüle shiyaakua wayuu masheʼinsat (Roma 1:24).

Amülialaapejeʼe naaʼin Jeʼwaa naalii na wayuu ooʼulaweekana suulia anajaa shiyaakua wayuu masheʼinsat. Müsü sünüiki tü Wiwüliakat: «Amüliajüi Jeʼwaa otta anashi maʼin nia, kamaʼashi nia süpüla jashichijawaa. Niʼraajüin maʼin tü wakumajiakat ooʼulaka sotusü naaʼin sümamülain mma waya» (Salmo 103:8, 14). Keeʼireesüle naaʼin Maleiwa narütkaainjanain nünainmüin na wayuu nnojoliikana yaletayaain aaʼin. Süka anamiain maʼin nia, nükaaliinjeena naya soʼu tü kaʼi nachuntakalü oʼu nümüin (Hebreokana 4:16; paashajeʼera tü pütchikat:  «Naaʼinrajatka chi ooʼulaweekai suulia anajaa shiyaakua wayuu masheʼinsat»).

Watta saalii wayuu akaaliinjünaka nutuma Maleiwa. ¿Anasüche nakuwaʼipa? Müsü tü Wiwüliakat nachiki waneeinnua wayuu ooʼulaakana suulia aaʼinraa kasa yarüttüsü: «Alaʼajaanüitpa jaainjala juulia, je akatannüinapa jia suulia nümüin chi Maleiwakai. Je anajiraainapa jia nümaa chi Maleiwakai nütüma chi Naaʼinkai sünainjee tü naaʼinrakat chi Senyotkai Jesucristo» (1 Corinto 6:11). Müsü nanüiki naya wayuukana maʼaka nünüiki chi aluwataaushikai Pablo: «Katchinshi taya süpüla tü kasakat süpüshuaʼa nutuma chi katchinkai atuma taya» (Filipos 4:13, TNM).

Ooʼulaasü Susan suulia anajaa shiyaakua wayuu masheʼinsat otta müsü sünüiki: «Nia neʼe Jeʼwaa eeka süpüla akaaliinjüin wayuu süpüla suuʼulaain suulia anajaa shiyaakua wayuu masheʼinsat. Wachuntüle kaaliinwaa nümüin, wuleerü wakuwaʼipa, anajiraajeena waya nümaa otta nnojoleena niyüülajüin waya».