HERÓDOTO, nia wanee wayuu nümaiwajachi ekirajaakai sünain sukuwaʼipa wayuu sümaiwajatü. Müshi nia nachiki na egipcio eejanakana nükalioʼu: «Süchikijee tü ekawaa eejatkat natuma na egipciokana, eeshi wanee wayuu eeʼiyatakai shiyaakua wayuu ouktüsü suluʼu wanee kojon, aainjuushi tia ayaakuaakat süka taapüla. Müshi chia wayuukai sünain niiʼiyatüin tia ayaakuaakat namüin na jutkatüshiikana waneʼewai nakua: ‹Piirakaa sümüin, meerü pukuwaʼipa mayaa; anakajaʼa mata püsaale otta pimiʼijaale neʼe›».

Nnojoishii nayain neʼe müin anüiki na egipciokana. Maaʼulu yaa wainma na wayuu makana anüiki: «Anashii wemiʼijaale neʼe». Mepire tü ouktaakat, anasüjaʼa mata waainjüle tü waainjeekalü amüin. Nnojotsü kasainjatüin woonooin amaa. Müshi Pablo süchiki nakuwaʼipa na wayuu manoujüinkana sünain süsoʼiraain saaʼin wayuu: «Matüjüinreje osoʼirawaa saaʼin wayuu süchikijee ouktaa. [...] ‹Anashii wemiʼijaale neʼe›» (1 Corinto 15:32).

Nnojotsü alatüin suluʼupünaa naaʼin Pablo müinnamaʼaleʼeinya na ouktüshiikana. Shia nütüjaaka aaʼu kateerüin noʼu nachikuaʼa otta müinnamaʼaleʼeya nnojoliin ouktüin naya. Nunouja anainrü tia sükajee shiimain nüsoʼiraain aaʼin Jesucristo. Sutuma nüsoʼiraain aaʼin Jesuu, * ichesü maʼin nanoula na anoujüshii eejanakana nükalioʼu Jesuu.

¿Jamüsü wanainpünaaka süsoʼiraain naaʼin Jesuu? ¿Jamüsü watüjaaka saaʼu sünain shiimain süsoʼiraain naaʼin? Wekirajaa sünain tü nümakat Pablo namüin na anoujüshii chajanakana Corinto.

Eeshii na anoujüshii chakana Corinto manoujüinka sünain nüsoʼiraain aaʼin wanee wayuu otta eeshii na oʼtchejaakana sümaa tia. Nüshajapa Pablo tü pütchi nümakat namüin, nüküjüin jamüin shiimainka süsoʼiraain naaʼin Kürisüto. Pansaasü tü nümakat namüin: «Matüjüinreje osoʼirawaa saaʼin  wayuu, nnojoishije osoʼiraain aaʼin Cristo. Je müleka nnojoruleje nusoʼiraain aaʼin Cristo, nnojotsüjaʼa kasain saapüinjatüin jümüin tü nüchiki waküjakat jümüin. Akaajaa neʼe sukuaippa tü jünoulakalüya. [...] Alawaaje neʼe tü waküjakat jümüin nüchiki chi Maleiwakai. [...] Nnojotsüjaʼa kasain saapüin jümüin tü jünoulakat, je nnojotsüjaʼa alaʼajaanüin jaainjala juulia, otta na juwalayuu anoujakana nünain Cristo eekai ouktüin, amülouishiijaʼa naya» (1 Corinto 15:13-18).

Pansaasü maʼin tü nümakat Pablo: nnojoliirejeʼe nasoʼiraainjanain aaʼin na wayuukana, nnojoishijaʼa mata asoʼiraain aaʼin Kürisüto. Nnojoirejeʼe nüsoʼiraain aaʼin Kürisüto, alawaajaʼa mata tü pütchi waküjakat. Süka nüsoʼiraain aaʼin Jesuu, sünainpünaasü maʼin tü wekirajakalü anain wayuu. Nnojotsü wattaluʼuin suulia tü shikirajakalü anain tü Wiwüliakat süchiki nünülia Maleiwa, tü Nuluwataayakat, süchiki nuʼtteʼereenain waya otta süchiki niain sülaülain kasaka süpüshuaʼa. Nnojoirejeʼe nüsoʼiraain aaʼin Jesuu, alawaajaʼa mata tü pütchi nüküjakat Pablo namaa na nümaajanakana.

Nnojoirejeʼe nüsoʼiraain aaʼin Jesuu amülajaʼa mata wanoujüin süka nnojoluin kasain anain apüla shia. Nnojoirejeʼe nüsoʼiraain aaʼin Jesuu, alaajaʼa mata Pablo otta na waneeinnua anoujüshiikana. Naashin nayakana asoʼiraasü naaʼin Jesuu nutuma Jeʼwaa. Müsü tü Wiwüliakat nüchiki Kürisüto: «Ouktüshi nia saaʼu waainjala», nnojoirejeʼe nüsoʼiraain aaʼin alawaajaʼa mata tia süka iseerüin nüchiki nuʼtteʼerüin waya (1 Corinto 15:3). Amülajaʼa mata noʼutünüin aaʼin waneeinnua anoujüshii sümaa naʼatapüin nasoʼireʼennüin aaʼin.

«Nnojoruleje shiimüin sünain süsoʼiraainjatüin waaʼin süchikijee ouktaa, nnojolujaʼa mata kasain anain apüla wanoujain nünain Cristo», müshi Pablo (1 Corinto 15:19). Niʼrüin nümüliala Pablo namaa waneeinnua anoujüshii; ajachijünüshi nia. ¡Malaakatche maʼin tü naainjakat Pablo nnojoirejeʼe nüsoʼiraainjachin aaʼin!

Nnojotsü alawaain nümüin Pablo tü asoʼirawaakalü aaʼin. Nütüjaa aaʼu sünain nüsoʼiraain aaʼin Jesuu otta nüküjüin namüin na chakana Corinto jaraliin eʼrüin nia: «Ouktüshi nia saaʼu waainjala. Ojoitünüshi nia sütüma wayuu, je süchikijee soʼu apünüin kaʼi, süsoʼiraakalaka naaʼin nütüma chi Maleiwakai. Shia tü ashajünakat paala nüchiki Cristo suluʼu tü karaloukta nüchikimaajatkat Maleiwa. Je süchikijee nüsoʼiraain aaʼin, niiʼiyataakalaka nümüin Pedro, ooʼulaka mapa, namüin na waneeirua Aluwataaushikana. Shiasa süchikijee tia, niiʼiyataakalaka namüin maa aka 500 wawalayuu wanaa sümaa jutkatüin naya. Anaayülia wainma noʼutku katüin oʼu maaʼulu yaa, otta eeshii eekai ouktüinain. Je süchikijee tia, niiʼiyataakalaka nümüin Santiago ooʼulaka mapa namüin na Aluwataaushikana napüshuaʼaya. Je mapa kakalia nachikijee nayakana, eeʼiyataashi Cristo tamüʼinya» (1 Corinto 15:3-8).

Naashin Pablo, ouktüshi Kürisüto saaʼu waainjala, ojoitünüshi nia otta süsoʼiraakalaka naaʼin nutuma chi Maleiwakai. ¿Jamüsü nütüjaaka saaʼu tia? Wainma na wayuu eʼrakana Jesuu süchikijee süsoʼiraain naaʼin. Eeʼiyataashi nia sümüin wayuu maʼaka naaʼin Pablo, na aluwataaushiikana otta namüin maʼaka 500 wawalayuu. Eeshii na nnojoliikana anoujüin maʼin sünain nüsoʼiraain aaʼin Jesuu (Lucas 24:1-11). Eejanaʼaya nükalioʼu Pablo noʼutku na wayuu eʼrakana Jesuu süchikijee nüsoʼiraain aaʼin (1 Corinto 15:6). Mayaapejeʼe eein süpüla saʼalaajünüin waneesia jee piamasü wayuu, nnojotsü süpüla saʼalaajünüin maʼaka 500 wayuu.

Müshi Pablo piantua suluʼu tü ashajuushikat süka griego: «Suluʼu tü karaloukta nüchikimaajatkat Maleiwa». Shia nüküjeeka achiki shikeraajüin nünain Jesuu tü nümakat paala Maleiwa suluʼu tü Ashajuushikat süka Hebreo sünain niain Jesuu chi Mesías antajachikai.

Mayaapejeʼe süküjüin tü Ashajuushikat süsoʼiraain naaʼin Jesuu otta shiʼrüin nia wainma wayuu, eeshii na nnojoliikana anoujüin sünain tia otta eeyüliʼiya maaʼulu na manoujüinkana. Naashin waneeinnua wayuu, naʼluwajüin na nikirajüinkana chi müliashiikai süpüla naküjüin nüsoʼiraain aaʼin. Isasü nachiki na nikirajüinkana Jesuu  naainjüin tia süka nayain aaʼinmajüin tü woowirakat na surulaat romanokana. Eeshii waneeinnua wayuu aküjakana noʼupeʼein neʼe na nikirajüinkana Jesuu tü neʼrakat. Alawaa neʼe tia süka wainmain na wayuu eʼrakana Jesuu otta kojuyatua niiʼiyalaain namüin. Soto waaʼin niiʼiyalaain Jesuu chayaa Galilea namüin na nikirajüinkana sümaa nüsijaain jime otta nikirüin naya. Nnojotsü süpüla saainjünüin tia nuʼupeʼere shia wanee wayuu (Juan 21:9-14). Noʼupeʼere neʼe tü neʼrakat na nikirajüinkana Jesuu, nnojoishijeʼe müin nia namüin: «Keʼirukushi taya. Keimseshi taya. Jipetta taya jütüjaaiwa taaʼu sünain shiimüin sünain tayain» (Lucas 24:36-39).

Naashin waneeinnua wayuu, alawaa neʼe tü naküjakat na nikirajüinkana Jesuu süchiki nüsoʼiraain aaʼin Kürisüto. Nnojotsü kasain saamüin tia namüin. Meeʼerapalashii naya, müliashii atumawaa jee oʼutüna aaʼinchii sutuma naküjüin nüsoʼiraain aaʼin Jesuu. Nayaleewanachejeʼe oukteeka maʼin aküjakuʼu maka alawaa. Aküjüshii pütchi na nikirajüinkana Jesuu chayaa Jerusalén noʼupala na laülaayuu judíokana; maʼatshii jameekai naaʼin neeʼiree na nikirajüinkana Jesuu.

Jaʼitainna müliain maʼin na nikirajüinkana Jesuu ayatshiʼiya meimmoluin naya sünain aküjaa pütchi süka natüjaain saaʼu sünain nasoʼiraajeenain aaʼin. Shia naashajaaka maʼin achiki tü asoʼirawaakalü aaʼin. Nnojoishii oʼutüneein aaʼin saalii naküjüin pütchi nüchiki wanee wayuu ouktüshi, oʼutünee aaʼinchii süka naküjüin pütchi nüchiki wanee wayuu asoʼiraakai aaʼin. Shiiʼiyatüin tia niain chi Kürisüto Nüchonkai Maleiwa, wanee wayuu katoʼuchi, pülashi otta oʼunirakai nakuwaʼipa. Süka nüsoʼiraain aaʼin Jesuu, asoʼiraajeerü naaʼin na nikirajüinkana. Nnojoirejeʼe nüsoʼiraain aaʼin Kürisüto nnojotsüjeʼe eein tü anoujaakat; nnojoishijeʼe waapüin achiki nia.

¿Jamüsü wakuwaʼipa sutuma nüsoʼiraain aaʼin Kürisüto?