Na wayuu aʼyataaliikana nnojoliishii akulajaain aaʼin sünain aʼyatawaa. Kamalainsü maʼin namüin aʼyatawaa süpüla eeinjatüin tü choʼujaakat namüin otta süpüla nakaaliinjain na waneinnua, ayatüshii naya aʼyataain jaʼitairü shiain wanee aʼyatawaa mamalainka sümüin wayuu.

Watta maʼin saalii kasa waaʼinrajatka wayakana wapüshuaʼa. Jee anasü maʼin waʼyataaliire süka mamalain maʼin sümüin wayuu tü aʼyatawaa eekat jawatüin (Eclesiastés 3:13).

«Talatüshi taya taʼyataale maʼin, müsüjeseʼe kamalain tamüin aʼyatawaa. Piʼyataaire maʼin, aneerü maʼin pütchi püchiki» (Reyon).

TÜ SÜMAKAT TÜ WIWÜLIAKAT: «Waʼyataale maʼin süchiirua wanee kasa, eʼreena waya kasa anasü» (Proverbios 14:23, Nueva Versión Internacional).

Anuu tü paaʼinrajatkat süpüla kamalainjatüin pümüin aʼyatawaa.

Ana putuma sukuwaʼipa tü paaʼinrakat. Jülüja maʼin paaʼin tü kasa paaʼinrakat, jaʼitasü shiain tü pükaalinjakalü anain piichipaʼa, tü tareea eʼitaanakat püpüla jee shiale tü piʼyataainkat. Müleka pütüjale süpüleerua aaʼinraa wanee kasa, püchajaa sukuwaʼipa süpüla anaʼleeinjatüin maʼin putuma. Talataleejeerü maʼin paaʼin paaʼinrüle tia.

TÜ SÜMAKAT TÜ WIWÜLIAKAT: «Tütüle wanee wayuu sünain tü niʼyataakalü anain, aʼyataajeechi nia namüin na sülaülakana mma. Nnojoleechi aʼyataain sümüin wayuu eekai eein» (Proverbios 22:29).

Kapüla paaʼin nakuwaʼipa na waneinnua. Paaʼinrüle tü aluwataanakalü anain pia, aneerü nakuwaʼipa na waneinnua sünainjee. Jamüsüjaʼa paaʼinrüle tü aluwataanakalü anain pia piichipaʼa, pükaaliinjeena na püpüshikana sükajee tü paaʼinrakat.

TÜ SÜMAKAT TÜ WIWÜLIAKAT: «Anakuaippaʼireʼeya chi wayuu aapakai nuulia chi aapünakai amüin» (Aluwataaushikana [Hechos] 20:35).

Nnojo shokulain pia sünain aʼyatawaa. Nnojotsü paaʼinrüinjatüin neʼe tü aluwataanakalü anain pia, paaʼinra sooʼomüin. Müle shia putuma, pieechi oʼunirakai pukuwaʼipa nnojoleena nayain na waneinnua. Mayaapejeʼe wainmeerüin maʼin aʼyatawaa püpüleerua, paaʼinreerü tia süka paaʼin pümüiwaʼa, nnojotsü shiain sükajee münajalain pia (Mateo 5:41).

TÜ SÜMAKAT TÜ WIWÜLIAKAT: «Tü kasa paaʼinrakat, nnojo paaʼinrüin shia mojusheeka, paaʼinra shia süka paaʼin pümüiwaʼa» (Filemón 14, TNM).

Piyaawata saaʼu pukuwaʼipa. Mayaapejeʼe piʼyataalin maʼin, nnojoishi pia waneepiainjachin maʼin sünain aʼyatawaa. Piyaawatüinjatü saaʼu choʼujaain piʼyataainjachin sümaa peemeraʼawalin.

TÜ SÜMAKAT TÜ WIWÜLIAKAT: «Shia anaka neemeraale wanee wayuu suulia niʼyataain maʼin, nnojoleerü kasain niʼrüin sünainjee, meechi nuwataakai aaʼin süchiirua joutai» (Eclesiastés 4:6).