Suulia ayuulin pia
Nnojotsü nüshajalain wanee tottoot tü Wiwüliakat, anapejeʼe maʼin waaʼinrüle tü sümakat süpüla waaʼinmajiraain suulia ayuulii. Wekirajaa sünain waneirua wetsiikulo.
AAʼINMAJIRAAINJANA WAYA
TÜ SÜMAKAT TÜ WIWÜLIAKAT: «Wane wayuu, nnojotsü kanain naaʼin niʼiruku, shia eeka naaʼinmajüin shia» (Éfeso 5:29, 30).
TÜ SÜNAINPÜNAAKAT. Sütütüleʼerüin waaʼin tü wetsiikulokot süpüla waaʼinmajiraainjanain suulia ayuulii. Naashin na ekirajaakana süchiirua tia, ayuuishi wanee wayuu nnojoire naaʼinmajiraain. Nnojoleena ayuuleʼein waya müleka waaʼinmajiraale.
TÜ PAAʼINRAJATKAT
-
Ana piküin. Jülüja paaʼin anale piküin jee asüinjachi pia wüin.
-
Paainja ejercicio. Eesü süpüla naaʼinrüin tia wanee wayuu jaʼitashi jintülin jee miyoʼuin nia. Aawalaajeechi wanee wayuu suulia tü ayuulii nünainkat naainjale ejercicio, jaʼitairü mepin tia jee kapüleein nümüin waneirua kasa. Eeshi süpüla nükaalinjain pia sünain aainjaa ejercicio wanee püpüshi jee niale wanee tottoot, piapejeʼe acheküinjachin tia.
-
Atunküinjachi pia. Matüjainre atunkaa wanee wayuu, kaʼlecheechi sünainjee tia. Eeshii na matunküinkana süpüleerua naaʼinrüin waneirua kasa. Akaajasaʼa na atunkakana, anashii naya.
PUUʼULAA SUULIA TÜ AYUUIJEECHIKALÜ ATUMA PIA
TÜ SÜMAKAT TÜ WIWÜLIAKAT: «Tawalayuwaa, süka pansaain nünüiki chi Maleiwakai wamüin, anakaja wooʼulaale suulia tü yarüttakat atüma waaʼin, tü mojukat atüma wakuaippa» (2 Corinto 7:1).
TÜ SÜNAINPÜNAAKAT. Nnojoleechi ayuuleʼein pia paaʼinmajiraale suulia tü kasa yarüttakalü atuma piʼiruku maʼaka saaʼin yüi. Ayuuisü maʼin wayuu sutuma tia jee kaluʼusü outaa shiayaa.
TÜ PAAʼINRAJATKAT. Piʼitaa tü kaʼi puuʼulaainjachikalü oʼu suulia akamüjaa. Pejeetta tia kaʼikat suluʼu wanee calendario jee püküja shia nümüin wanee wayuu akaalinjeechikai pia. Süpülapünaa tü kaʼi piʼitaakat, pojoto süpüshuaʼa tü kasa pükamüjeekalü atuma, maʼaka saaʼin sikariia, cenicero jee tü shipejaayakat sikariia. Nnojo puʼunuin eere eein wayuu akamüjannuu.
SOOʼOMÜIN TÜ SÜMAKAT TÜ WIWÜLIAKAT
Keeʼireere paaʼin wanee Wiwülia, puchunta shia nümüin wanee aküjai pütchi nüchiki Jeʼwaa kepiakai peje pünain.
PIYAAWATA TÜ PAAʼINRAKAT
«Pukumajüinjachipa pipia, piʼitaainjatü wanee süsepüchon sotpünaa tü süraloʼukat. Jaʼitaichikalaka nujutuuin wanee wayuu saaʼujee, nnojoleechi piain kasirüin» (DEUTERONOMIO 22:8).
PÜCHECHERA PAAʼIN SUULIA JASHIEE
«Chi nnojoikai kashapajaaralin kekiishi nia, akaajasaʼa chi kashapajaaraikai shia naaʼinraka tü nümalainkat» (PROVERBIOS 14:29).
PIYAAWATA PIKÜIN
«Nnojo namaain pia [...] na koʼutunakana» (PROVERBIOS 23:20).
Eesüjaʼa kamalainjeerüle pümüin aashajeʼeraa tüü
¡EEJA WAAʼIN!
Wopu talataka atuma waaʼin: Nnojolin ayuulin waya otta resiliencia
¿Jama ayuuire maʼin waya? ¿Nnojoleenache waya talatüin aaʼin?
