¿Kojutusüche wamüin wapüshi?
¿JAMÜSÜ ANAKAʼA KOJUTULE WAMÜIN WAPÜSHI?
Aneerü naaʼin jee jimateerü naaʼin wanee wayuu kojutujiraale nia sümaa nuʼwayuuse jee namaa nüchonnii.
-
Aijiraajeena maʼin na kaʼwayuuseshiikana kojutujiraale naya, sutuma tia naaʼinrawaleerü kasa anasü napüleerua waneʼewai nakua. Süküjain tia tü karaloʼutakat Siete reglas de oro para vivir en pareja (süshaala Sonia Tapia Sánchez).
-
Naashin na wayuu ekirajaakana süchiirua sukuwaʼipa wayuu, nnojoleerü jülüjain naaʼin na tepichikana maalin naya apülaa nekirajünüle süpüla kojutuin namüin na waneinnua. Anajiraajeena naya namaa na kachooinkana naya otta eeshiijaʼa nnojoleenale ayuulin naya nekiiruʼu.
TÜ ANAKAT SÜPÜLA PAAʼINRÜIN
Paashajaa sümaa püpüshi süchiki tü jaaʼinrajatkat. Anasü jülüjale paaʼin palajana müleka nayaawatüle saaʼu na püpüshikana tü naaʼinrakat wanee wayuu süpüla kojutuin namüin na waneinnua. Jüshaja waneʼewai jukua tü jaaʼinrajatkat, tü nnojoluinjatkat jaaʼinrüin otta jaashajaajiraa süchiki tü jaaʼinrajatkat süpüla kojutujiraain jia.
Ana pukuwaʼipa noʼupala. Anasü püsakireʼerüle paaʼin sünain tüü: «¿Mojuwaisüche tanüiki namüin mojuwaire wanee kasa natuma? ¿Temeeʼerainpalasüche tü namakat? ¿Macheʼeyaashiche taya naashajaapa? ¿Asounnajaashiche taya naashajaapa?». Jülüjeesü paaʼin piainjachin kojutuin amüin naya palajana.
Puuʼulaka paaʼinrüin tüü: Jülüja paaʼin kojutuin pümüin puʼwayuuse otta püchonnii süka shiain tü paaʼinrajatkat, nnojotsü shiain saaʼujee tü kasa naaʼinrakat.
Kojutujiraa jia mayaainjeʼe nnojoluin wanaawain jaaʼin sünain wanee kasa. «Alesaʼaya pia», «Müsia neʼe pia waneepia», nnojotsü anain müle pünüiki. Aisü sümüin püpüshi müle pünüiki. Eeshiijaʼa mojujiraajeenale jia sünainjee wanee pütchi neʼe.
WAAʼINRAKA WAYAKANA AKÜJALIIKANA PÜTCHI NÜCHIKI JEHOVÁ
Ekirajawaishii waya süchiki tü saaʼinrajatkat wayuu süpüla kojutujiraain shia sümaa süpüshi. Washajüin süchiki tia suluʼu karaloʼuta, poyeeto, internet otta video. Eesü süpüla saashajeʼerüin wayuu maʼleekalia jee nnojoishii waya achekajüin saaʼu.
NAMÜINJATÜ NA KAʼWAYUUSESHIIKANA: Pünaʼla suluʼu jw.org eere sümüin «Na kaʼwayuuseshiikana sümaa nachonnii». Pünteerü anain pütchi jalouijeetka pümüin süpüla...
-
... anain pukuwaʼipa sümaa puʼwayuuse.
-
... paaʼinwajiraain pia sümaa puʼwayuuse.
-
... alin püpüla wayuu.
(Pünaʼla suluʼu jw.org eere sümüin Shikirajaka anain tü Bibliakat > Na kaʼwayuuseshiikana sümaa nachonnii > Na kaʼwayuuseshiikana).
NAMÜINJATÜ NA KACHONSHIIKANA: Pünaʼla suluʼu jw.org eere sümüin «Wekirajaa wachonnii». Eesü pütchi jalouijeetkat namüin süpüla...
-
... nekeraajüin tü aluwataanakalü anain naya.
-
... natüjain achecheraa naaʼin.
-
... nnojoluin yaletüin naaʼin.
(Pünaʼla suluʼu jw.org eere sümüin Shikirajaka anain tü Bibliakat > Na kaʼwayuuseshiikana sümaa nachonnii > Wekiraja wachonnii).
Paashajeʼera tü pütchikat «Los padres preguntan» suluʼuka tü karaloʼutakat Lo que los jóvenes preguntan. Respuestas prácticas (volumen 1). Pünaʼla suluʼu jw.org jee püshaja sünain tü luupachonkat «Los padres preguntan» (alijunaikiruʼusü).
NAMÜINJATÜ NA JIMAʼALIIKANA JEE NA MAJAYÜNNÜÜKANA: Pünaʼla suluʼu jw.org eere sümüin «Jimaʼalii jee majayünnüü». Eesü pütchi jee video jalouijeetka namüin süpüla...
-
... yootiraain naya namaa na kachooinkana naya.
-
... laülaain naya saaʼu nakuwaʼipa.
(Pünaʼla suluʼu jw.org eere sümüin Shikirajaka anain tü Bibliakat > Jimaʼalii jee majayünnüü).
Pünaʼlapa jw.org nnojotsü choʼujaain puwalaajüin nneerü otta püshajirüin pünülia.
