1, 2. Püneeküinjatpa tü kasa anakat saaʼin pümüin, ¿jamüsü shiainjatka paapaain amaa tü nümakat Maleiwa, chi Kakumainkai pia? (Piirakaa sümüin tü ayaakuaakat).

JIMAʼAIRE pia jee majayürüle pia, eesüjaʼa süküjünüirüle pümüin süchiki tü paaʼinrüinjatkat mapeena. Eesüjaʼa naküjairüle pümüin na eʼiküliikana suluʼu koleejia otta waneinnua wayuu pikirajaainjachin sünain wanee kasa süpüla pükanajüin wainma nneerü. Naatapejeʼe sukuwaʼipa tü nümakat Jeʼwaa pümüin. Nücheküin pütüjainjachin karaloʼuta süpüla puusütüin wanee aʼyatawaa pipijaainjatka anainjee kettaapa putuma pukoleejiase (Col. 3:23). Nüküjain pümüin Jeʼwaa tü paaʼinrüinjatkat püneeküinjatpa tü kasa anakat saaʼin pümüin. Jalouijeerü pümüin tia maaʼulu süpülapünaa sajaʼttüin kasa süpüshuaʼa (Mat. 24:14).

² Soteesü paaʼin najaʼttirüinjatüin Maleiwa tü kasa mojusükat otta sülüʼülüin maʼin sükalia (Is. 46:10; Mat. 24:3, 36). Niʼraajüinya Jeʼwaa wakuwaʼipa. Nütüjaa aaʼu tü kasa talatakalü  atuma waaʼin jee tü nnojotkalü talatüin atuma waaʼin. Mayaainjeʼe eein pütchi eekai müin anakai saaʼin wamüin, nnojotsü anain shia süka nnojoluin suluʼujeejatüin shia tü Wiwüliakat (Prov. 19:21).

3, 4. ¿Kasa alataka nümüin Adán, Eva otta na nachonniikana sünainjee noonooin sümaa pütchi nnojotka anain?

³ Sümaiwa paala, nüküjain Satanaa wanee pütchi nnojotka anain. Nüküjain sümüin Eva otta nümüin Adán naneeküinjatüin süka naaʼin namüiwaʼa tü naaʼinrajatkat süpüla talatüin maʼin naaʼin (Gén. 3:1-6). Shiapejeʼe jülüjain naaʼin Satanaa nukuwaʼipa neʼe nümüiwaʼa. Shia keeʼireeka neʼe naaʼin noonooinjachin Adán, Eva otta na nachonniikana sümaa nünüiki jee naʼwaajüinjachin nia nuulialeʼeya Jeʼwaa. Nnojotpejeʼe kasain naapüin Satanaa namüin. Akaisaʼa Jeʼwaa wainma tü kasa naapakat namüin. Naapüin namüin anaa akuwaʼipaa sünain kaʼwayuusee, naapüin namüin wanee mma anasü eejanale kepiain naya jee anashii naya nutuma süpüla katüin noʼu waneepia.

⁴ Adán sümaa Eva, nayoutajaa amaat nünüiki Maleiwa, eʼrüshii wayumüin nümüin. Mojusü maʼin nakuwaʼipa sünainjee tia. Laülaashii jee outushii naya maʼaka outuin wanee süsii maata eekai süshataanüin. Sükajee kaainjalain naya, laülaashii jee outushii na nachonniikana (Roma 5:12). Mayaainjeʼe natüjaain aaʼu tia na wayuukana, ayatüshii nnojoliin oonooin sümaa nünüiki Maleiwa. Naaʼinrüin tü kasa mojusü naaʼinreekalü amüin (Éf. 2:1-3). Müsüjeseʼe nnojoluin anain wanee pütchi eekai nnojoluin nümaʼanajeejatüin Jeʼwaa (Prov. 21:30).

5. (1) ¿Kasa nütüjaatüjütka aaʼu Jeʼwaa? (2) ¿Jamüsü watüjaaka saaʼu shiimain tia nümakat?

⁵ Nütüjaatüjülia aaʼu Jeʼwaa eein wayuu eʼraajeekana nia otta aʼyataweekana nümüin, naʼaka naya wayuukana eeshii jimaʼalii otta majayünnüü (Sal. 103:17, 18; 110:3). ¡Aishaatashii maʼin naya nüpüla! ¿Eeshiche pia naʼaka naya jimaʼaliikana? Eere pia naʼaka, wainma tü kasa naapakat Jeʼwaa pümüin otta tü talatakalü atuma paaʼin (paashajeʼera Salmo 103:5; Prov. 10:22). Wekirajaajeerü anain pienchisü kasa naapaka Jeʼwaa pümüin: tü katchinkalü atuma punoula, na wayuu anakana süpüla paʼaleewain, tü piʼyataweekalü anain otta taashin pukuwaʼipa.

6. (1) ¿Jamüsü choʼujaaka katchinjatüin punoula? (2) ¿Kasa naapaka Jeʼwaa pümüin süpüla katchinjatüin punoula?

⁶ Naata wakuwaʼipa suulia sukuwaʼipa mürüt, weʼrüin choʼujaain wamüin chi Maleiwakai süka niain Kakumalain waya otta nia neʼe aapaka wamüin tü kasa weʼraajüinjachikalü anainjee nia (Mat. 4:4). Choʼujaasü katchinjatüin punoula süpüla piyaawatüin saaʼu wanee kasa, kekiin maʼin pia otta süpüla talatüin maʼin paaʼin. Anuu nünüiki Jesuu: «Anataʼaleeshiijaʼa maʼi jia eʼrakana sünain cheʼojaain chi Maleiwakai jümüin» (Mat. 5:3). Naapüin pümüin Jeʼwaa tü katchinkalü atuma punoula. Naaʼinrüin tia sükajee tü Wiwüliakat otta sükajee süpüshuaʼa tü kasa naapakat pümüin «chi achepchiee oonookai otta kekiikai maʼin» (Mat. 24:45, TNM). Akatchinraasü punoula sutuma tia karaloʼutakalüirua otta aleewashi pia nümaa Jeʼwaa. Wainma tü kasa naapakat  Jeʼwaa pümüin süpüla sükatchinraain punoula (Is. 65:13, 14).

7. ¿Kasa piyaawateetka aaʼu sutuma tü naapakat pümüin Jeʼwaa?

⁷ Kekiijeechi maʼin pia sutuma tü naapakat Jeʼwaa pümüin, piyaawateerü aaʼu tü kasa anasükat jee tü kasa mojusükat otta saaʼinmajeerü pukuwaʼipa suulia wainma kasa mojusü (paashajeʼera Proverbios 2:10-14). Piyaawateerü aaʼu waneirua alawaa aküjünaka maʼaka saaʼin tü münakat süchiki nnojolin eein chi Maleiwakai, choʼujaain wainmainjatüin nneerü pümaʼana otta wainmainjatüin korolo pümaʼana süpüla talatüinjatüin paaʼin. Jee sükaaliijeechi pia süpüla püchecherüin paaʼin suulia paaʼinrüin tü kasa mojusü suchuntaakat paaʼin jee süpüla nnojoluin kiʼrain pia sünain wanee kasa amojujeʼereetka pukuwaʼipa. Püchajaa maʼin sukuwaʼipa süpüla kekiin maʼin pia maʼaka naaʼin Maleiwa otta süpüla piyaawatüin saaʼu tü kasa anasükat jee tü kasa mojusükat. Müle shia putuma, piyaawateerü aaʼu alin maʼin pia nüpüla Jeʼwaa otta aneein pukuwaʼipa niʼrüin (Sal. 34:8; Is. 48:17, 18).

8. (1) ¿Jamüshi pürütkaainjachika maaʼulu nünainmüin Maleiwa? (2) ¿Kaseerü paaʼinraka mapeena jaʼitairü kasain alatüin pümüin?

⁸ Alüʼütsü süpüla sajaʼttüin tü kasa nuluwataakalü aaʼu Satanaa, sülatapa tia, naaʼinmajeerü Jeʼwaa tü nupueulosekat. Jaʼitakajaʼa tü weküinjatkat naapeerü shia wamüin (Hab. 3:2, 12-19). Makalaka pürütkaainjachin maaʼulu nünainmüin chi Püshikai Maleiwa otta piʼitaainjatüin maʼin paaʼin nünain (2 Ped. 2:9). Jaʼitairü kasain alatüin pümüin mapeena, piʼitaajeerü maʼin paaʼin nünain Jeʼwaa maʼaka naaʼin David soʼu nümüin: «Jülüjashi taaʼin Jeʼwaa waneepia. Yaashi nia yaa tekialuʼujee, nnojoleechi taya jamajüin atumawaa» (Sal. 16:8).

9. (1) ¿Kasa naaʼinraka Jeʼwaa saashin Juan 6:44? (2) ¿Jamüsü naataka sukuwaʼipa wantiraale nümaa wanee manoujainsai otta nümaa wanee Aküjai pütchi?

⁹ Wanaa sümaa püntiraain nümaa wanee wayuu eekai manoujain, ¿piʼraajüinche maʼin nia? Nnojo. Eesüjaʼa shiale neʼe  pütüjaain saaʼu kasaichin nünülia otta jamüin niyolojo. Aluʼusaʼa püntiraale nümaa wanee Aküjai pütchi, pütüjaa aaʼu alin Jeʼwaa nüpüla, niʼrüin Jeʼwaa kasa anasü suluʼu naaʼin otta neenaküin nia suluʼumüin tü nupueulosekat (paashajeʼera Juan 6:44). Akaʼaya naatale nuumain, nukuwaʼipa jee niʼiruku, piʼraajüin nukuwaʼipa otta niʼraajüin pukuwaʼipa.

10, 11. (1) ¿Kasa wanaawaka atuma nakuwaʼipa na Aküjaliikana pütchi? (2) ¿Jamüsü anaka watüjaale saaʼu tia nüchiki wanee wayuu?

¹⁰ Jee müsia, pütüjaamaata aaʼu wanaawain tü anüikii jaashajaakat, «tü anüikii wulesükat» sümaka tü Wiwüliakat (Sof. 3:9). Pütüjaa aaʼu wanaawain tü junoujakalü anain, tü wuleetkalü atuma jukuwaʼipa noʼuluʼu Maleiwa, tü kasa jaʼatapajakat otta waneirua kasa. Shia watüjaainjatka aaʼu tia nüchiki wanee wayuu, süka jamüin, weʼitaajeerüin waaʼin nünain jee aleeweenain waya nümaa waneepia.

¹¹ «Naya neʼe na aküjaliikana pütchi nüchiki Jeʼwaa na anakana süpüla taʼaleewain, mayaainjeʼe sainküin naya tü mmakat jee nnojoliin teʼraajüin naya, nayaʼaya neʼe taʼaleewainka», müle pünüiki nnojotsü alawaain tia, shiimainya tü pümakat. ¿Eesüche süpüla müin nünüiki wanee wayuu eekai manoujain?

12. ¿Kasa piʼyataweeka anain nümüin Maleiwa?

¹² (Paashajeʼera Eclesiastés 11:9–12:1). Eeshijaʼa piʼyataale süchiirua paashajeʼerawalin tü Wiwüliakat soʼukaiwai jee piyaʼlerawalin pajapü sünain tü outkajawaakat otta pujuʼitawalin sünain aküjaa pütchi. ¿Jamüsü paaʼin piʼrapa tü kasa anasü eekat sünainjee otta nepelisitaajapa pia na waneinnua? Talatüsü maʼin paaʼin, ¿aashimüin? Talatüsü paaʼin süka shiain paaʼinrüin tü nüchekakat Maleiwa maʼaka naaʼinrüin shia Jesuu (Sal. 40:8; Prov. 27:11).

13. ¿Jamüsü paaʼinmaainjatka tü piʼyataainjatkalü anain nümüin Maleiwa?

¹³ Paaʼinmaale tü piʼyataainjatkalü anain nümüin Maleiwa, talateerü maʼin paaʼin otta piyaawateerü aaʼu tü nukumajakalü apüla pia. Anuu nünüiki Pablo: «Anakaja jüchecherüle jaaʼin sünain anoujaa, süpüla jiʼyataainjanain nümüin chi Senyotkai waneepia süka süpüshua jaaʼin. Soto jaaʼin sünain nnojoleerüin sümalajaain tü anasükat jaaʼinrakat nümüin» (1 Cor. 15:58). Na wayuu aʼyataakana maʼin shiiʼiree nakanajüin wainma nneerü otta neʼraajüneein sutuma wayuu, nnojotsü talatüin maʼin naaʼin (Luc. 9:25). Alatüsü tia nümüin Salomón, maʼaka wekirajaweenain jooluʼu (Roma 15:4).

14. ¿Kasa pütüjaka sünainjee tü naaʼinrakat Salomón?

¹⁴ Mayaainjeʼe washirüin maʼin Salomón otta nuluwataain saaʼu mma, naaʼinrüin tü kasa suchuntaakat maʼin saaʼin wayuu. Nütüjawee aaʼu müleka talateerüle naaʼin sutuma (Ecl. 2:1-10). Nukumajirüin wainma piichi, nüpünajirüin wunuʼulia süpüla wüittuulin jee anainjatüin maʼin süsii otta nukumajirüin waneirua kasa anaka saaʼin nümüin. ¿Talatüsüche maʼin naaʼin sutuma tia? Süchikijee nüsakireʼerüin naaʼin sünain süpüshuaʼa tü kasa naaʼinrakat, nüküjain amülain neʼe nukumajüin tia kasakalüirua otta nnojoluin kasain anain apüla shia (Ecl. 2:11). ¿Aashin nnojoleerüin püshatüin tü naaʼinrakat Salomón?

15. (1) ¿Jamüshi kanoulainjachika maʼin pia? (2) ¿Kasa piyaaweetka aaʼu sükajee tü sümakat Salmo 32:8?

¹⁵ Eeshii wayuu eekai nayaawatüin saaʼu mojuin wanee kasa sülataleepa namüin.  Nnojotsü nücheküin Jeʼwaa müinjatüin pukuwaʼipa. Tü nüchekakat püpüleerua shia kacheʼeinjachin pia nümüin jee poonooinjachin sümaa nünüiki. Süpüla paaʼinrüin tia, acheküshi kanoulainjachi pia, nnojoleerü amülain neʼe tü kasa paaʼinrakat süpüleerua kanoulain pia. Nnojoleerü motuin naaʼin Jeʼwaa tü kasa anasü paaʼinrakat, tü piiʼiyatakalü akajee alin nia püpüla (Heb. 6:10). Püchajaa maʼin sukuwaʼipa süpüla pukooʼomüinrüin punoula. Müle shia putuma, piyaawateerü aaʼu nücheküin Jeʼwaa püpüleerua aneein pukuwaʼipa nutuma sükajee tü nümakat pümüin (paashajeʼera Salmo 32:8).

16. (1) ¿Jamüsü kojutuinjatka wamüin taashin wakuwaʼipa? (2) ¿Jamüsü anainjatka tü kasa waneekakat?

¹⁶ Anuu nünüiki Pablo: «Taashisü sukuwaʼipa wayuu eere chi naaʼinkai Jeʼwaa» (2 Cor. 3:17, TNM). Kojutusü nümüin Jeʼwaa taashin nukuwaʼipa wane wayuu süpüla nüneeküin tü naaʼinrajatkat, müinjanaʼaya waya, kojutuinjatü wamüin taashin wakuwaʼipa. Waneeküinjatü tü kasa anasükat süpüla anainjatüin wakuwaʼipa. Eeshijaʼa piʼraajüle jimaʼalii jee majayünnüü eekai nanajüin shiyaakua wayuu maichesat jee amaʼüjiraasü sukuwaʼipa, eekai naʼluwajiraain nakuwaʼipa, eekai nashaitüin wanee kasa seewaaka anainjee wayuu, eekai nakaijain mariwaana jee eekai nepeʼrüliin. Eesü talatüle naaʼin motsomüin sutuma tia. Eʼrapajaʼa naya kasa mojusü sünainjee naaʼinrüin tia. Kiʼrashii naya sünain, ayuuishii naya jee eeshii outule naya sutuma (Gal. 6:7, 8, TNM). Saaʼin namüin, eesü süpüla naaʼinrüin tü naaʼinreekalü amüin, emeejiraapejeʼe neʼe naya (Tito 3:3).

17, 18. (1) ¿Jamüsü aneetka wakuwaʼipa woonoole sümaa nünüiki Jeʼwaa? (2) ¿Jamüsü nnojotka wanaawain tü apülajünakat nuulia Adán otta Eva sümaa tü apülajünakat maaʼulu suulia wayuu?

¹⁷ Aneerü wakuwaʼipa woonoole sümaa nünüiki Jeʼwaa. Nnojoleena waya ayuulin otta taasheerü wakuwaʼipa süpüla waaʼinrüin tü kasa anasükat (Sal. 19:7-11). Anale putuma süneekia tü kasa paaʼinrajatkat, nuuʼulaajeechi pia Jeʼwaa otta na wayuu kachoinkana pia süpüla paaʼinrüin waneirua kasa. Shia nüchekaka Maleiwa wapüleerua taashireeinjatüin wakuwaʼipa maʼaka «taashin nakuwaʼipa na nüchonniikana Maleiwa» (Roma 8:21, TNM).

¹⁸ Majatü nukuwaʼipa Adán sümaa Eva sümaiwa paala. ¿Wainmache tü apülajünakat nuulia Adán sümaa Eva? Waneesia neʼe: nnojoluinjatü neküin süchon wanee wunuʼu (Gén. 2:9, 17). ¿Mojusüche tü naaʼinrakat Maleiwa? Nnojotsü mojuin, süka jamüin, nnojoluin wanaawain tü kasa apülajünakat nuulia Adán otta Eva sümaa tü apülajünakat maaʼulu suulia wayuu. Waneesia neʼe tü kasa nüpülajakat Maleiwa nuulia Adán sümaa Eva. Akaajasaʼa maaʼulu, wainma tü kasa apülajünakat suulia wayuu natuma na sülaülashiikana mma.

19. ¿Kasa nikirajaka anain waya Jeʼwaa nümaa Jesuu süpüla anainjatüin wakuwaʼipa?

¹⁹ Anasü maʼin sukuwaʼipa wekirajia  nutuma Jeʼwaa. Nnojotsü wainmain maʼin tü kasa nüpülajakat woulia, nikirajüin waya süka anaka akuwaʼipa süpüla alinjachin wapüla nia otta na waneinnua. Shia nüchekaka waaʼinrüin tü nümakat wamüin otta wayoutuin tü kasa mojusükat (Roma 12:9). Anasü maʼin nikirajia Jesuu soʼu nikirajüin wayuu saaʼu wanee namüna, nüchiaain waya suulia tü kasa eekat süpüla kaainjalain atuma waya (Mat. 5:27, 28). Nuluwataapeena Jesuu suluʼu Nuluwataaya Maleiwa jee suluʼupa waya tü mma jeketkat, ayateena nikirajüin waya süpüla wayoutuin tü kasa mojusükat maʼaka niyoutuin shia (Heb. 1:9). Otta nükaalinjeena waya süpüla anainjanain waya jee anainjatüin tü wekiiruʼujatkat. Nnojoleerü suchuntaain paaʼin wanee kasa eekai mojuin otta nnojoleechi eʼrüin pia müliaa süka loteerüin pukuwaʼipa. Taasheerü maʼin pukuwaʼipa maʼaka nüküjain shia Jeʼwaa.

20. (1) ¿Jamüsü nüküjaka wamüin Jeʼwaa tü waaʼinrüinjatkat? (2) ¿Kasa paaʼinrüinjatka süpüla puʼunuin süchiirua nukuwaʼipa Maleiwa?

²⁰ Nnojoleerü taashireein wakuwaʼipa suluʼu tü mma jeketkat, süka jamüin, waaʼinreerüin tü nümakat Jeʼwaa süka alin nia wapüla otta alin wapüla na wayuukana. Tü nuchuntakat wamüin Jeʼwaa shia woʼunuinjanain süchiirua nukuwaʼipa. Mayaapejeʼe niain neʼe nümüiwaʼa chi aneekakai tü anakat süpüla aaʼinnaa, nüküjain wamüin tü waaʼinrüinjatkat süka alin waya nüpüla (1 Juan 4:7, 8). Taasheerü neʼe wakuwaʼipa müleka woʼunüle süchiirua nukuwaʼipa Maleiwa.

21. (1) ¿Jamüsü nünüiki David nümüin Jeʼwaa? (2) ¿Kasa wekirajaajeetka anain sünain tü wane ekirajaayakat?

²¹ ¿Kojutusüche pümüin süpüshuaʼa tü kasa naapakat Jeʼwaa pümüin? Sünain ekirajaayakat tüü, wekirajaa anainrü tü kasa katchinkalü atuma punoula, na wayuu anakana süpüla paʼaleewain, tü piʼyataweekalü anain otta taashin pukuwaʼipa nutuma Maleiwa (Sal. 103:5). Eesüjaʼa talatüle maʼin paaʼin maʼaka naaʼin David soʼu nümüin suluʼu Salmo 16:11: «Piiʼiyateerü tamüin tü wopu katüinjatkalü atuma toʼu. Talatüsü paaʼin nümaa wanee wayuu eekai yalain pümülatuʼu. Talatüsü paaʼin waneepia nümaa wanee wayuu eekai yalain pikialuʼujee». Sünain tü wanee ekirajaayakat, wekirajaajeerü anain waneirua pütchi suluʼujee Salmo 16. Süküjeerü pümüin tü paaʼinrüinjatkat süpüla talatüin maʼin paaʼin.