Süpüla piʼraajüinjachin wanee wayuu, pütüjaainjatü aaʼu tü kasa anasü naaʼinrüitpakat. Müsia neʼe sukuwaʼipa süpüla piʼraajüinjachin Maleiwa, pütüjaainjatü aaʼu tü kasa naaʼinrakat püpüleerua. Poneerü maʼin paaʼin pütüjaapa saaʼu kasain naaʼinrüin Maleiwa püpüleerua otta tü naaʼinrüinjatkat mapeena.

Nia kakumajalaka waya Jehová otta watüjaa aaʼu anashaatain maʼin tü nukuwaʼipakat «sükajee tü kasa nükumajakat paala sümaiwa. Nnojotsü wayuu matüjaainkat naaʼu Maleiwa, süka shiʼrüin wayuu süpüshua tü kasa nükumajakat» (Roma 1:20). «Nia Kakumajalaka tü mmakat süka tü nüpülainkat. Nia keʼitaalaka tü mmakat sümaa anain maʼin sukumajia nutuma süka kekiin nia. Nia chi Kakumajalakai tü kasakalüirua chaa iipünaa süka nütüjain maʼin» (Jeremías 10:12). Sünainjee anain maʼin tü kasa nukumajakat Jehová wayaawata aaʼu alin maʼin waya nüpüla.

Talatüsü waaʼin süka nukumajüin waya Maleiwa sünain müin wakuwaʼipa maʼaka naaʼin (Génesis 1:27). Nnojotpejeʼe ayatashaatain watuma süpüshuaʼa tü nukuwaʼipakat. Nukumajüin waya süpüla wayaawatüin saaʼu tü jülüjakat naaʼin otta tü nuluwataakalü anain. Watüjaale saaʼu tia, talateerü waaʼin jee watüjaajeerü aaʼu tü wakuwaʼipainjatkat maaʼulu otta watta kaʼi. Jee aleeweena maʼin waya nümaa Maleiwa.

Nukumajüin Maleiwa tü Mmakat süka alin waya nüpüla. Anuu nünüiki Pablo: «Nnojoittaapajaʼa nia ooʼulaain suulia eeʼiyataa sünain jaralin nia sükajee tü kasa anasü naaʼinrakat waneepia. Niaʼa aʼititka tü juyakat jaaʼu, otta nia aapaka tü aʼttieekat jümüin juyapü. Je niaʼaya aapaka jümüin tü jikakat waneepia süpüla emirainjanain jia otta talatüinjatüin jaaʼin» (Aluwataaushikana 14:17). Nukumajaiwaʼaya Maleiwa tü Mmakat, naapüin tü choʼujaakat wamüin otta tü talatajatkalü atuma waaʼin. Tia, süpüshi neʼe tü kasa naapeetkat wamüin mapeena.

Nukumajüin Jehová tü Mmakat süpüla kepiainjatüin wayuu waneepia suluʼu. Anuu tü sümakat tü Wiwüliakat: «Naapüin Jehová namüin na wayuukana tü mmakat» süka «nnojoluin nukumajaʼalüin neʼe shia, nukumajüin shia süpüla kepiainjatüin wayuu suluʼu» (Salmo 115:16; Isaías 45:18). ¿Jaralii na kepiainjanakana suluʼu tü Mmakat? ¿Kepieenache naya waneepia suluʼu? Saashin tü Wiwüliakat, «nayeena kepiaka suluʼu tü mmakat süpüla kaʼika süpüshuaʼa na lotokana akuwaʼipa» (Salmo 37:29).

 Nukumajüin Jehová Adán sümaa Eva süpüla kepiainjanain naya waneepia suluʼu tü Mmakat. Niʼitaain naya suluʼu wanee apain süpüla «naaʼinmajüinjatüin tü pünajütkat» (Génesis 2:8, 15). Anuu nünüiki namüin: «Anakaja kachonniire jia, jouluiwa na juuʼuliwoʼukana sainküin mmakat süpüshua süpüla laulaainjanain jia saaʼu» (Génesis 1:28). Kepiainjanayaa naya waneepia suluʼu tü Mmakat, akanasaʼa nnojoliin noonooin sümaa nünüiki Jehová, outakalaka naya. Nnojotpejeʼe aʼwanajaain tü kasa anasü keeʼireetüjütkalia naaʼin Maleiwa wapüleerua. Paashajeʼera joo süchiki wane kasa naapaka Maleiwa sümüin wayuu.

Naapüin wamüin Maleiwa tü Wiwüliakat süpüla weʼraajüinjachin nia (Proverbios 2:1-5). Nnojotpejeʼe süküjain tü Wiwüliakat süpüshuaʼaleʼeya tü kasa watüjaweekalü aaʼu nüchiki Maleiwa, nnojotsü eeirüin wanee karaloʼuta ashajünaka aluʼu tia (Eclesiastés 3:11). Weʼraajapejeʼe Maleiwa sutuma tü sümakat tü Wiwüliakat. Watüjaa aaʼu jamüin maʼin nukuwaʼipa sünainjee tü kasa naaʼinrakat süpüleerua wayuu otta jaraliin na talatakana amaa nia (Salmo 15:1-5). Watüjaa aaʼu jaralüin tü iküleesia anakat nümüin, jamüin nünüiki süchiki tü kasa anakat jee tü mojukat otta tü nümakat süchiki kamaʼanaa wainma korolo. Jee müsia, weʼraajüin nukuwaʼipa Jehová sünainjee tü naaʼinrakat Jesukürisüto otta tü naashajaakalü achiki (Juan 14:9).

Naapüin Jehová wamüin tü Wiwüliakat süpüla talatüinjatüin waaʼin otta süpüla watüjaainjatüin saaʼu tü wakuwaʼipainjatkat. Nüküjain wamüin sükajee tü Wiwüliakat tü waaʼinrajatkat süpüla talatüin waaʼin sümaa wapüshi, süpüla anainjatüin waaʼin otta nnojoluinjatüin shapaain waaʼin sutuma wanee kasa. Aküjüneerü suluʼu karaloʼutakat tüü, tü sümakat tü Wiwüliakat süchiki tü kasa sütüjaweekalü aaʼu wayuu. Aashajaasü shia süchiki jamüin müliaka maʼin wayuu, jameerüin wakuwaʼipa watta kaʼi otta kasain naaʼinrüin Maleiwa süpüla nikeraajüin tü keeʼireekat naaʼin wapüleerua.

Wainma kasa wayaawataka anainjee anain maʼin tü sümakat tü Wiwüliakat otta nüshajiralain shia Maleiwa. Mayaapejeʼe nashajalain shia 40 wayuu soʼunnaa 1.600 juya, pansaasü maʼin tü sümakat süka nüshajiralain shia Maleiwa (2 Timoteo 3:16). Naata maʼin shia suulia waneirua karaloʼuta sümaiwajatü süka matüjain aʼwanajawaa tü pütchi suluʼukat. Watüjaa aaʼu tia sutuma tü aküjünakat sünain tü rooyo süchikimaajatkat tü Wiwüliakat. Mayaapejeʼe shiyoutunuin achiki süshajünüin suluʼu naata anüikii, ayatsia eein tü Wiwüliakat sümaʼana wayuu jee saashajeʼerüin shia. Tü Wiwüliakat shia tü karaloʼuta oikünakat maʼin sainküin mmakat otta wainma anüikii süshajünaka aluʼu. Süka eein wamaʼana tü Wiwüliakat maaʼulu, watüjaa aaʼu eejeerüin shia wamaʼana waneepia (Isaías 40:8).

Wanee kasa naaʼinraka Jehová shia nüpansaajüin nünüiki süpüla shikeraajüin tü nümakat. Eesü wanee kasa anasü maʼin naapaka wamüin. Aküjünüsü paala sünain pütchikat tüü keeʼireetüjülüin naaʼin Maleiwa kepiainjatüin waneepia wayuu suluʼu tü Mmakat. Shiasaʼa sutuma nnojoluin noonooin Adán sümaa nünüiki Jehová, kaainjalashi jee outaka nia, akaʼaya na nüchonniikana, müinjatia nakuwaʼipa. «Kaainjalashi Adán nuulia Maleiwa sükajee niyouktajaain sümaa nünüiki nümüin. Ouktakalaka nia saaliijee. Je sükajee kaainjalain Adán, oʼttüsü wayuu ütamüinreʼeya sünain kaainjalaa. Ouktakalaka naya saaliijee» (Roma 5:12). ¿Nnojoleetche nikeraajüin Maleiwa tü nümakat sünainjee kaainjalain Adán? ¿Kaseetche naaʼinraka süpüla nikeraajüin nünüiki?

Pansaasü tü naaʼinrakat Jehová sümaa tü nukuwaʼipakat. Lotusü sukuwaʼipa tü naaʼinrakat nümüin Adán sümaa Eva soʼu süsalain naya naainjala nutuma. Nukumajamaatüin sukuwaʼipa süpüla anainjatüin wayuu mapeena, naaʼinrüin tia süka alin wayuu nüpüla. Kekiishi maʼin Jehová, müsüjeseʼe nüchajaamaatüin sukuwaʼipa süpüla nunoutuin tü alatakat (Génesis 3:15). Nuluwataain chi Nüchonkai süpüla taashinjanain waya suulia kaainjalaa jee suulia outaa. ¿Kasa naaʼinraka süpüla taashinjanain waya?

Süpüla nunoutuin Jehová sukuwaʼipa tü naainjalakat Adán, nuluwataain Jesuu yaa Mmapaʼamüin  süpüla nikirajüinjanain na wayuukana sünain tü naaʼinrajatkat süpüla katüin noʼu. Otta müshia Jesuu naapajiraainjatü nikii süpüla taashinjatüin wayuu suulia saainjala a (Mateo 20:28; Juan 14:6). Taashishii waya nutuma Jesuu süka lotuin nukuwaʼipa maʼaka lotopuʼuin nukuwaʼipa Adán süpülapünaa kaainjalain nia. Naata maʼin nukuwaʼipa Jesuu nuulia Adán sükajee noonooin waneepia nümüin Jehová, naaʼinrüin tia outaleepa nia. Outushi Jesuu sümaa nnojoluin kaainjalain nia, müshijeseʼe nüsoʼireʼennüin aaʼin nutuma Jehová otta aleʼejüshi nia nüchikuaʼa iipünaamüin. Naapüin Jesuu kataa oʼuu namüin na wayuu oonookana waneepia nümaa Jehová. Nnojotpejeʼe naaʼinrüin tia Adán. «Saaʼujee moonooin Adán sümaa nünüiki Maleiwa, oʼttüsü wayuu ütamüinreʼeya sünain kaainjalaa. Otta müsia jooluʼu, saaʼujee noonooin Jesucristo sümaa nünüiki Maleiwa, eeitpa süpüla anajiraain wayuu maleekalia» (Roma 5:19). Nikeraajeerü Maleiwa tü nümakat süchiki kepiainjatüin wayuu waneepia suluʼu tü Mmakat, nuuntuin tia sükajee naapajiraain nikii Jesuu.

Sutuma nunoutuin Maleiwa sukuwaʼipa tü naaʼinrakat Adán, weʼraajüin maʼin nia. Nnojotsü eein wanee kasa ataʼülaka nukuwaʼipa Maleiwa suulia nikeraajüin tü nümakat; ayateeria nikeraajüin shia (Isaías 55:11). Aishaatashii waya nüpüla. «¿Jamüsü watüjaakaʼa saaʼu alin waya nüpüla Maleiwa? Shia süka nuluwataain chi waneeshikai Nüchon yaa mmoluʼumüin süpüla [katüinjatüin woʼu, TNM]. ¿Washatüin tü aijirawaakat saaʼujee alin maʼi chi Maleiwakai wapüla? Nnojo. Washatüin saaʼujee alin maʼi neʼe waya nüpüla chi Maleiwakai. Nuluwataainjese chi Nüchonkai süpüla ouktüinjachin saaʼu waainjala süpüla nülaʼajaainjatüin woulia» (1 Juan 4:9, 10).

Anashiisü nümüin Maleiwa outajachin chi Nüchonkai saaʼu saainjala wayuu. Müsüjeseʼe watüjaain saaʼu «naapeerüin wamüin süpüshua tü kasa anasükat» nüküjaka achiki wamüin (Roma 8:32). ¿Eesüche waneirua kasa naaʼinreetka wapüleerua? Paashajeʼera tü wane pütchikat.