Kasa eekai anain suulia kasa eekai mojuin: Jalouisü wamüin tü sümakat tü Bibliakat
Waashajaa süchiki pienchisü kasa nayaawataka akajee wainma wayuu jaloulin namüin tü sümakat tü Bibliakat.
1. Kaʼwayuusee
Naatayaa müsü tü jülüjakat saaʼin wayuu süchiki sukuwaʼipa kaʼwayuusee jee süchiki tü naaʼinrajatkat süpüla talatüinjanain naya.
TÜ SÜMAKAT TÜ BIBLIAKAT: «Jia tooloyuu kaʼwayuuseshiikana, alinjatü jüpüla juʼwayuuse maʼaka alin jia jüpülajiraa. Akaataajaʼa tü wayuu eekai kaʼwayuusein, kojutuinjachi maʼin suʼwayuuse sümüin» (Éfeso 5:33).
JAMALUʼULU TIA: Nia Maleiwa eʼitaaka shikii sukuwaʼipa kaʼwayuusee, müsüjeseʼe nütüjaain saaʼu tü naaʼinrajatkat wanee wayuu sümaa nuʼwayuuse süpüla talatüinjanain naya (Marcos 10:6-9). Talatüshi wanee wayuu sümaa nuʼwayuuse kapülajiraale nakuwaʼipa. Chi wayuu eekai kaʼwayuusein jaʼyeerü naaʼu alin nüpüla nuʼwayuuse saaʼujee tü nukuwaʼipakat sümaa otta tü naaʼinrakat süpüla naaʼinmajüin shia. Tü wayuu eekai kaʼwayuuseein jaʼyeerü saaʼu kojutuin sümüin suʼwayuuse saaʼujee sukuwaʼipa sünüiki otta tü saaʼinrakat nüpüleerua.
JALOUISÜ TÜ SÜMAKAT TÜ BIBLIAKAT: Jülüja waaʼin nukuwaʼipa Quang sümaa Thi, chejeʼewalii Vietnam. Nnojoishi talatayaain nia sümaa Thi eereje nuʼwayuusein shia, eʼrüi wayumüin nia sümüin. Anuu nünüiki Quang: «Nnojotsü kasajatüin tamüin jamüin saaʼin, müliapuʼusü saaʼin tatuma». Suuʼulaweein nia Thi. Müsü shia nüchiki: «Nnojoishi kasajachin tamüin otta mojutusai nia tamüin».
Ekirajaashii naya mapa sünain tü Bibliakat. Anasü nukuwaʼipa Quang sümaa Thi sutuma naaʼinrüin tü sümakat Éfeso 5:33. Anuu nünüiki Quang: «Tü tatüjakat sünainjee tia wetsiikulokot shia kamaneeinjachin taya sümüin taʼwayuuse, alinjatüin shia tapüla, taapüinjatüin tü kasa choʼujaakat sümüin otta kojutuinjatüin tamüin jamüin saaʼin. Sutuma taaʼinrüin tia, aishi taya tachikuaʼa süpüla otta kojutushi taya sümüin». Müsü Thi: «Sutuma taaʼinrüin tü sümakat Éfeso 5:33 kojutushi tamüin taʼwayuuse, saaʼujee tia aisü taya nüpüla, naaʼinmajüin taya jee anasü taaʼin nutuma».
Pütüjeere sooʼomüin süchiki tia, paashajeʼera suluʼu jw.org tü rewiisütakat ¡Eeja Waaʼin! nuumero 2, 2018, tü makalü anülia «12 kasa talateetka atuma paaʼin sümaa püpüshi».
2. Wakuwaʼipa namaa na waneinnua
Eeshii wayuu eekai mojutuin namüin na naatakana akuwaʼipa, neʼiruku, noumain, tü nanoujakalü anain otta sutuma naatain tü jülüjakat naaʼin süchiki aainjirawaa akuwaʼipaa.
TÜ SÜMAKAT TÜ BIBLIAKAT: «Kojuta jümüin wayuu maʼleekalia» (1 Pedro 2:17).
JAMALUʼULU TIA: Nnojotsü shikirajüin anain tü Bibliakat üttüinjatüin waaʼin nanain na jaleetshiikana, na wayuu naatakana eʼiruku otta oumain. Tü shikirajakalü anain tü Bibliakat shia kojutuinjanain wamüin napüshuaʼa na wayuukana jaʼitairü naatain neʼiruku, noumain, washirüle naya jee nnojoliire washirüin naya (Aluwataaushikana [Hechos] 10:34). Jaʼitairü nnojoluin anain wamüin tü nanoujakalü anain jee tü naaʼinrakat ayatüshii kamaneein waya namüin jee kojutuin naya wamüin (Mateo 7:12).
JALOUISÜ TÜ SÜMAKAT TÜ BIBLIAKAT: Jülüja waaʼin nukuwaʼipa Daniel, ekirajünüshi nia sünain nüʼünüüin na wayuu chejeʼewaliikana Asia. Nnojoishii niʼreein amüin naya otta eesü airuʼurule nünüiki namüin suʼupala wayuu. Anuu nünüiki Daniel: «Jülüjapuʼusü taaʼin anain tü taaʼinrakat süka müin takaalinjakai aaʼin na sülaülashiikana mma suulia nantapaain wayuu wattajeʼewalii suluʼumüin tü woumainkat, eetaayaai antüin suluʼu tekii mojuin maʼin tü taaʼinrakat».
Ekirajaashi mapa Daniel sünain tü Bibliakat. Müshi nia: «Tayaawata aaʼu tanouteʼerüinjatüin tü jülüjakat taaʼin nachiki na wayuukana. Tachajaain sukuwaʼipa süpüla kojutuinjatüin tamüin wayuu maʼleekalia jaʼitainna jalejeʼewaliin naya. Taaʼinrüin tia süpüla tashatüin nukuwaʼipa Jehová». Anuu nünüiki Daniel süchiki jamüin naaʼin niʼraajapa wayuu: «Teʼraajapa wanee wayuu nnojotsü jülüjain taaʼin jalejeʼewalin nia, aisü tapüla wayuu maʼleekalia otta eeshii taʼaleewainyuu kepiakana suluʼu wanee mma naatajatü».
Pütüjeere sooʼomüin süchiki tia, paashajeʼera tü rewiisütakat ¡Eeja Waaʼin! nuumero 3, 2020, tü makalü anülia «¿Tiene cura el prejuicio?». Püchajaa suluʼu jw.org (alijunaikiruʼusü).
3. Washirüü
Eeshii wayuu kachiiruaka aaʼin washirüü süka jülüjain naaʼin talateerüin naaʼin sutuma jee aneerüin nakuwaʼipa.
TÜ SÜMAKAT TÜ BIBLIAKAT: «Tü kekiwaakat maʼin süpülajatü anain wanee wayuu maʼaka anain wayuu sutuma tü nneetkat. Shiapejeʼe anain maʼin tü atüjaakat süka katüin woʼu sünainjee» (Eclesiastés 7:12).
JAMALUʼULU TIA: Choʼujaasü wamüin nneerü, nnojotpejeʼe shiain aapüin wamüin talataa aaʼin jee aneerüin atuma wakuwaʼipa mapeena (Proverbios 18:11; 23:4, 5). Tü talateetkalü atuma waaʼin jee tü aneetkalü atuma wakuwaʼipa shia waaʼinrüle tü nümakat Maleiwa wamüin suluʼu tü Bibliakat (1 Timoteo 6:17-19).
JALOUISÜ TÜ SÜMAKAT TÜ BIBLIAKAT: Jülüja waaʼin nukuwaʼipa wanee wayuu Cardo nünülia, chejeʼewai Indonesia. Anuu nünüiki süchiki kachiiruain naaʼin washirüü: «Tü keeʼireekat saaʼin wayuu tamaʼanasü süpüshuaʼa. Oʼunushi taya wattapünaa, tayaʼlajüin tü kasa kojutukat maʼin, wainma teʼejena otta anasü tepia». Amülouipejeʼe nuulia Cardo mapa tü nuwashirüinkat. Müshi nia: «Emeejüna akuwaʼipachi taya. Aʼluwajünüsü toulia süpüshuaʼa tü nneerü tamaʼanajatkat, nnojotsü kasayaain teʼrüin sünainjee kachiiruain taaʼin washirüü, nnojotsü saapüin tamüin talataa aaʼin otta eʼrüshi taya tamüliala sünainjee».
Ekirajaashi mapa Cardo sünain tü Bibliakat jee naaʼinrüin tü sümakat süchiki washirüü, nnojoluitpa naaʼinmaain maʼin washirüü, talatüshi nia sümaa tü kasa eekat nümaʼana. Müshi nia: «Talatüitpa taaʼin maaʼulu süka aleewaichipain taya nümaa Maleiwa, nnojoluitpa shapaakuʼu müin taaʼin waneepia».
Pütüjeere sooʼomüin süchiki tia paashajeʼera suluʼu jw.org tü pütchikat «¿Aneetche pukuwaʼipa sutuma pikirajaain suluʼu eʼikülee miyoʼu jee sutuma tü nneetkat?», ojuʼitaka suluʼu Aapiria Wayuu nuumero 3, 2021.
4. Aainjirawaa akuwaʼipaa
Nnojotsü wanaawain tü jülüjakat saaʼin wayuu süchiki aainjirawaa akuwaʼipaa.
TÜ SÜMAKAT TÜ BIBLIAKAT: «Wuleinjatüin jukuwaʼipa jee nnojoliinjanain jia aʼluwajiraain jukuwaʼipa. Achecherüinjana jia jaaʼin waneʼewai jukua süpüla wuleinjatüin jukuwaʼipa jee anainjatüin shia noʼuluʼu Maleiwa. Nnojo jüshatüin nakuwaʼipapala na wayuu nnojoliikana eʼraajüin Maleiwa, jama shiain suchuntaain maʼin naaʼin kakuwaʼipain naya sümaa wanee jierü jee wanee jierü nümaa wanee toolo otta ayatataasia neʼe keeʼireein naaʼin tia» (1 Tesalónica 4:3-5).
JAMALUʼULU TIA: Ashajünüsü suluʼu tü Bibliakat süchiki tü aʼluwajirawaakalü akuwaʼipaa, shia tü naainjakat wanee wayuu eekai kawalaʼatain atuma nuʼwayuuse otta tü saainjakat wayuu eekai maaʼin, eeshii na aʼluwajiraakana nakuwaʼipa sümaa nnojoluin kasaalüin naya, eeshii na jaleetshiikana jee na aainjiraakana nakuwaʼipa sümaa mürüt (1 Corinto 6:9, 10). Saashin tü Bibliakat kasaalüinjachi palajana wanee wayuu toolo sümaa wanee wayuu jierü süpüla naainjiraain nakuwaʼipa, shia nüchekaka Maleiwa tia (Proverbios 5:18, 19).
JALOUISÜ TÜ SÜMAKAT TÜ BIBLIAKAT: Anuu sünüiki wanee wayuu Kylie sünülia, chejeʼewat Australia: «Jülüjapuʼusü taaʼin aneerüin taaʼin jee talateerüin taaʼin taʼluwajiraale takuwaʼipa, nnojotpejeʼe müin tia, mojusü neʼe taaʼin».
Ekirajaasü mapa Kylie sünain tü Bibliakat otta soonoo amaa tü sümakat tü Bibliakat süchiki tü aainjirawaakalü akuwaʼipaa. Müsü shia: «Ashajünüsü suluʼu tü Bibliakat tü nuluwataakalü anain Maleiwa süpüla anainjatüin wakuwaʼipa otta suulia weʼrüinjanain wamüliala. Talatüsü taaʼin jee kojutusü taya atumawaa maaʼulu süka taaʼinrüin tü nüchekakat Jehová».
Pütüjeere sooʼomüin süchiki tia, paashajeʼera suluʼu jw.org tü pütchikat «¿Kasa naaʼinrajatka wanee wayuu saashin tü Bibliakat kepiajiraale nia sümaa wanee wayuu sümaa nnojoliin kasaalüin naya?».
Chi Kakumalakai waya nükaalinjain waya süpüla wayaawatüin saaʼu kasain anain jee kasain mojuin. Eejeerü kaʼi kapüleejeetka oʼu wamüin waaʼinrüin tia, aneetpejeʼe waaʼin wachajaale sukuwaʼipa süpüla waaʼinrüin shia.
